E Milagernan di Hesus—Kiko Bo Por Siña for di Nan?

KISAS lo bo keda sorprendí pa sa ku e relatonan di Beibel tokante Hesus su bida riba tera nunka ta usa e palabra di e idioma original pa “milager.” E palabra griego (dý·na·mis) ku tin biaha ta ser tradusí komo “milager” ta nifiká literalmente “poder.” (Lukas 8:46) Tambe e por ser tradusí komo “kapasidat” òf “obranan poderoso.” (Mateo 11:20, NW; 25:15) Segun un komentarista bíbliko, e palabra griego aki “ta enfatisá e obra poderoso ku a ser realisá, i spesialmente, e poder ku a usa pa logr’é. E suseso ta ser deskribí pa mustra kiko e poder di Dios por hasi.”

Un otro palabra griego (té·ras) por lo general ta ser tradusí komo ‘maravia.’ (Echonan 2:19) E ekspreshon aki ta resaltá e efekto ku e milagernan tabatin riba opservadónan. Hopi bes, tantu e multitut komo e disipelnan a keda asombrá i babuká  ku Hesus su obranan poderoso.—Marko 2:12; 4:41; 6:51; Lukas 9:43.

Un di tres palabra griego (se·méi·on) ku ta referí n’e milagernan di Hesus ta nifiká un “señal,” esta, un señal di e outoridat ku Dios a dun’é. Segun profèser Robert Deffinbaugh, e palabra señal aki ta “enfoká riba e nifikashon mas profundo di e milager.” El a agregá: “Un señal ta un milager ku ta komuniká un bèrdat tokante nos Señor Hesus.”

Engaño òf Poder di Dios?

Beibel no ta deskribí Hesus su milagernan komo triki òf engaño diseñá pa entretené hende. Nan tabata manifestashon di e “grandesa” òf poder di Dios, manera den e kaso ora Hesus a saka un demoño for di un mucha. (Lukas 9:37-43) Akaso e obranan poderoso ei lo ta imposibel pa Dios Todopoderoso—Esun di ken Beibel ta papia di “e grandesa di su forsa”? (Isaias 40:26) Klaru ku nò!

E relatonan di Evangelio ta referí na rònt di 35 milager di Hesus. Pero e kantidat total di su milagernan ta deskonosí. Por ehèmpel, Mateo 14:14 ta bisa: “El [Hesus] a mira un multitut grandi, i el a sinti kompashon pa nan i a kura nan enfermonan.” Mateo no ta bisa nos kuantu hende malu el a kura n’e okashon ei.

E obranan poderoso ei a duna prueba ku Hesus, manera e mes a bisa, tabata Yu di Dios, e Mesias primintí. E Skritura en bèrdat a konfirmá ku Hesus por a hasi milager pa medio di e poder ku Dios a dun’é. Apòstel Pedro a referí na Hesus komo “un hòmber aprobá pa Dios boso dilanti ku milagernan, maravianan i señalnan ku Dios a hasi pa medio di dje meimei di boso, manera boso mes sa.” (Echonan 2:22) Na un otro okashon, Pedro a mustra ku ‘Dios a ungi Hesus ku spiritu santu i ku poder, i ku el a bai rònt, hasiendo bon i kurando tur ku tabata bou di poder di Diabel; pasobra Dios tabata kuné.’—Echonan 10:37, 38.

 E milagernan di Hesus tabata hopi ligá ku su mensahe. Marko 1:21-27 ta mustra kon e multitut a reakshoná riba Hesus su siñansa i riba un di su milagernan. Marko 1:22 ta bisa ku e multitut “a keda asombrá di su siñansa,” i versíkulo 27 ta bisa ku e hendenan a keda “strañá” ora el a saka un demoño. Tantu Hesus su obranan poderoso komo su mensahe a duna prueba ku e tabata e Mesias primintí.

Hesus no a djis pretendé ku e tabata e Mesias; e poder di Dios manifestá den su milagernan, huntu ku su palabranan i otro akshonnan, a duna prueba ku en bèrdat e tabata e Mesias. Ora hende a kuestioná su papel i outoridat, Hesus a respondé ku kurashi: “E testimonio ku mi tin ta mas grandi ku esun di Juan [Boutista]; pasobra e obranan ku e Tata a duna mi pa kumpli kuné, e mesun obranan ku mi ta hasi, ta duna testimonio di mi ku ta e Tata a manda mi.”—Juan 5:36.

Prueba Ku e Milagernan Tabata Outéntiko

Kiko ta konvensé nos ku Hesus su milagernan tabata real, outéntiko? Laga nos konsiderá algun di e pruebanan.

Ora Hesus a efektuá su obranan poderoso, nunka el a hala atenshon na su mes. Semper el a sòru pa tur e mérito i gloria di kualke milager bai pa Dios. Por ehèmpel, promé ku Hesus a kura un hòmber siegu, el a enfatisá ku e kurashon lo a tuma lugá “pa e obranan di Dios wòrdu manifestá den dje.”—Juan 9:1-3; 11:1-4.

Distinto di goochelaar, mago i sanadó di fe, nunka Hesus a hasi uso di hipnotismo, triki, kosnan espektakular, palabranan mágiko òf ritonan emoshonal. Tampoko el a rekurí na superstishon òf usa ophetonan ku supuestamente ta sagrado. Tuma nota di e forma simpel ku Hesus a kura dos hòmber siegu. E relato ta bisa: “Hesus a tene kompashon ku nan i a mishi ku nan wowonan; i mesora nan a rekobrá nan bista i a siguié.” (Mateo 20:29-34) No tabatin nada di seremonia òf espektákulo. Hesus a hasi su milagernan públikamente, hopi bes den bista di vários testigu. E no a duna un show ku efekto spesial di lus ni nada partikular. En kambio, hopi bes e supuesto milagernan djawe sí no por wòrdu dokumentá.—Marko 5:24-29; Lukas 7:11-15.

Na algun okashon Hesus a rekonosé e fe di e personanan ku a benefisiá di su milagernan. Pero e echo ku un persona no tabatin fe, no a stroba Hesus di hasi un milager. Tempu ku e tabata den Kapernaum na Galilea, e hendenan “a trese serka dje hopi hende ku tabata poseí pa demoño; i ku un palabra el a saka e spiritunan afó i a kura tur ku tabata malu.”—Mateo 8:16.

Hesus a hasi su milagernan pa satisfasé nesesidatnan físiko di e hendenan, i no pa satisfasé e kuriosidat di algun persona. (Marko 10:46-52; Lukas 23:8) I Hesus nunka a hasi milager pa haña un òf otro benefisio personal.—Mateo 4:2-4; 10:8.

E Relatonan di Evangelio Ta Konfiabel?

Nos ta haña e detayenan tokante e milagernan di Hesus den e kuater Evangelionan. E relatonan aki ta konfiabel? Ora nos repasá e milagernan atribuí na Hesus pa wak si nan ta outéntiko, nos ta haña prueba di esei? Sigur ku sí.

Manera nos a menshoná kaba, Hesus a hasi su milagernan públikamente, dilanti di hopi testigu. E promé tres Evangelionan a ser skirbí tempu ku ainda mayoria di e testigunan ei tabata na bida. Relashoná ku e onestidat di eskritornan di Evangelio, e buki The Miracles and the Resurrection (E Milagernan i e Resurekshon) ta bisa: “Lo ta sumamente inhustu pa akusá e eskritornan di evangelio di a skonde intenshonalmente datonan históriko meimei di un avalancha di relato di supuesto milagernan, ku e meta pa promové fe religioso. . . . Nan kier tabata eskritornan onesto.”

Un otro punto ta ku opositornan hudiu di kristianismo nunka a kuestioná e obranan  poderoso menshoná den e Evangelionan. Úniko kos ku nan a kuestioná ta ku poder di ken Hesus a hasi milager. (Marko 3:22-26) Ni e hendenan ku a biba despues i ku tabatin krítika riba Hesus no por a logra desbaratá su milagernan. Al kontrario, durante e promé dos siglonan di nos era, vários hende a referí n’e milagernan ku Hesus a hasi. Sin ningun duda anto nos tin tur motibu pa mira e relatonan di Evangelio tokante su milagernan komo outéntiko.

E Hòmber Ku A Hasi e Milagernan

Nos no por basa nos análisis di si Hesus su milagernan tabata outéntiko solamente riba lógika. Den e deskripshon ku e Evangelionan ta duna di e obranan poderoso di Hesus, nan ta revelá un hòmber ku sintimentu profundo i ku un kompashon nunka bisto. E tabatin un interes sinsero den e bienestar di su próhimo.

Tuma por ehèmpel e kaso di un leproso ku den su desesperashon a aserká Hesus i rog’é: “Si bo kier, bo por hasi mi bira limpi.” “Yen di kompashon,” Hesus a saka su man, i a mishi kuné i a bis’é: “Mi kier, sea limpi.” Mesora e hòmber a kura. (Marko 1:40-42) Asina Hesus a demostrá e kompashon ku a impuls’é pa usa e poder ku Dios a dun’é pa hasi milager.

Kiko a sosodé ora Hesus a topa un korteho fúnebre ta sali for di e stat di Nain? E defuntu tabata e úniko yu hòmber di un biuda. “Yen di kompashon” pa e señora, Hesus a aserk’é i a bis’é: “No yora.” Despues di esei el a lanta su yu for di morto.—Lukas 7:11-15.

Un konsuelo ku nos por saka for di Hesus su milagernan ta ku Hesus tabata “yen di kompashon,” i e kier a yuda hende. Pero e milagernan ei no ta simpel historia. Segun Hebreonan 13:8, “Hesukristu ta meskos ayera i awe i pa semper.” Aktualmente e ta goberná komo Rei selestial, kla i kapas pa usa e poder di hasi milager ku Dios a dun’é na un eskala muchu mas grandi ku tempu e tabata riba tera komo hende. Pronto, Hesus lo usa e poder aki pa kura humanidat obediente. Gustosamente Testigunan di Yehova lo yuda bo siña mas tokante e perspektiva briante aki pa futuro.

[Plachi na página 4, 5]

Hesus su milagernan tabata un manifestashon di e “grandesa” òf poder di Dios

[Plachi na página 7]

Hesus tabata un hòmber ku sintimentu profundo