E Milagernan di Hesus Kico Bo Por Siña for di Nan?

KISAS lo bo keda sorprendi pa sa cu e relatonan di Bijbel tocante Hesus su bida riba tera nunca ta uza e palabra di e idioma original pa “milager.” E palabra Griego (dý·na·mis) cu tin biaha ta ser traduci como “milager” ta nifica literalmente “poder.” (Lucas 8:46) Tambe e por ser traduci como “capasidad” of “obranan poderoso.” (Mateo 11:20, NW; 25:15) Segun un comentarista biblico, e palabra Griego aki “ta enfatisa e obra poderoso cu a ser realisa, y specialmente, e poder cu a uza pa logr’e. E suseso ta ser describi pa mustra kico e poder di Dios por haci.”

Un otro palabra Griego (té·ras) por lo general ta ser traduci como ‘maraviya.’ (Echonan 2:19) E expresion aki ta resalta e efecto cu e milagernan tawatin riba observadonan. Hopi bes, tanto e multitud como e disipelnan a keda asombra y babuca  cu Hesus su obranan poderoso.—Marco 2:12; 4:41; 6:51; Lucas 9:43.

Un di tres palabra Griego (se·méi·on) cu ta referi na e milagernan di Hesus ta nifica un “señal”, esta, un señal di e autoridad cu Dios a dun’e. Segun profesor Robert Deffinbaugh, e palabra señal aki ta “enfoca riba e nificacion mas profundo di e milager.” El a agrega: “Un señal ta un milager cu ta comunica un berdad tocante nos Señor Hesus.”

Engaño of Poder di Dios?

Bijbel no ta describi Hesus su milagernan como triki of engaño diseña pa entretene hende. Nan tawata manifestacion di e “grandesa” of poder di Dios, manera den e caso ora Hesus a saca un demoño for di un mucha. (Lucas 9:37-43) Acaso e obranan poderoso ei lo ta imposibel pa Dios Todopoderoso—Esun di ken Bijbel ta papia di “e grandesa di su forsa”? (Isaias 40:26) Claro cu no!

E relatonan di Evangelio ta referi na rond di 35 milager di Hesus. Pero e cantidad total di su milagernan ta desconoci. Por ehempel, Mateo 14:14 ta bisa: “El [Hesus] a mira un multitud grandi, y el a sinti compasion pa nan y a cura nan enfermonan.” Mateo no ta bisa nos cuanto hende malo el a cura na e ocasion ei.

E obranan poderoso ei a duna prueba cu Hesus, manera e mes a bisa, tawata Yiu di Dios, e Mesias priminti. E Scritura en berdad a confirma cu Hesus por a haci milager pa medio di e poder cu Dios a dun’e. Apostel Pedro a referi na Hesus como “un homber aproba pa Dios boso dilanti cu milagernan, maraviyanan y señalnan cu Dios a haci pa medio di dje meimei di boso, manera boso mes sa.” (Echonan 2:22) Na un otro ocasion, Pedro a mustra cu ‘Dios a ungi Hesus cu spirito santo y cu poder, y cu el a bai rond, haciendo bon y curando tur cu tawata bou di poder di Diabel; pasobra Dios tawata cu ne.’—Echonan 10:37, 38.

 E milagernan di Hesus tawata hopi liga cu su mensahe. Marco 1:21-27 ta mustra con e multitud a reacciona riba Hesus su siñansa y riba un di su milagernan. Marco 1:22 ta bisa cu e multitud “a keda asombra di su siñansa”, y versiculo 27 ta bisa cu e hendenan a keda “straña” ora el a saca un demoño. Tanto Hesus su obranan poderoso como su mensahe a duna prueba cu e tawata e Mesias priminti.

Hesus no a djis pretende cu e tawata e Mesias; e poder di Dios manifesta den su milagernan, hunto cu su palabranan y otro accionnan, a duna prueba cu en berdad e tawata e Mesias. Ora hende a cuestiona su papel y autoridad, Hesus a responde cu curashi: “E testimonio cu mi tin ta mas grandi cu esun di Huan [Bautista]; pasobra e obranan cu e Tata a duna mi pa cumpli cu ne, e mesun obranan cu mi ta haci, ta duna testimonio di mi cu ta e Tata a manda mi.”—Huan 5:36.

Prueba Cu e Milagernan Tawata Autentico

Kico ta combence nos cu Hesus su milagernan tawata real, autentico? Laga nos considera algun di e pruebanan.

Ora Hesus a efectua su obranan poderoso, nunca el a hala atencion na su mes. Semper el a percura pa tur e merito y gloria di cualkier milager bai pa Dios. Por ehempel, prome cu Hesus a cura un homber ciego, el a enfatisa cu e curacion lo a tuma luga “pa e obranan di Dios wordo manifesta den dje.”—Huan 9:1-3; 11:1-4.

Distinto di goochelaar, mago y sanado di fe, nunca Hesus a haci uzo di hipnotismo, triki, cosnan espectacular, palabranan magico of ritonan emocional. Tampoco el a recori na supersticion of uza obhetonan cu supuestamente ta sagrado. Tuma nota di e forma simpel cu Hesus a cura dos homber ciego. E relato ta bisa: “Hesus a tene compasion cu nan y a mishi cu nan wowonan; y mesora nan a recobra nan bista y a siguie.” (Mateo 20:29-34) No tawatin nada di ceremonia of espectaculo. Hesus a haci su milagernan publicamente, hopi bes den bista di varios testigo. E no a duna un show cu efecto special di lus ni nada particular. En cambio, hopi bes e supuesto milagernan djawe si no por wordo documenta.—Marco 5:24-29; Lucas 7:11-15.

Na algun ocasion Hesus a reconoce e fe di e personanan cu a beneficia di su milagernan. Pero e echo cu un persona no tawatin fe, no a stroba Hesus di haci un milager. Tempo cu e tawata den Capernaum na Galilea, e hendenan “a trece serca dje hopi hende cu tawata posei pa demoño; y cu un palabra el a saca e spiritonan afo y a cura tur cu tawata malo.”—Mateo 8:16.

Hesus a haci su milagernan pa satisface necesidadnan fisico di e hendenan, y no pa satisface e curiosidad di algun persona. (Marco 10:46-52; Lucas 23:8) Y Hesus nunca a haci milager pa haya un of otro beneficio personal.—Mateo 4:2-4; 10:8.

E Relatonan di Evangelio Ta Confiabel?

Nos ta haya e detayenan tocante e milagernan di Hesus den e cuater Evangelionan. E relatonan aki ta confiabel? Ora nos repasa e milagernan atribui na Hesus pa wak si nan ta autentico, nos ta haya prueba di esei? Sigur cu si.

Manera nos a menciona caba, Hesus a haci su milagernan publicamente, dilanti di hopi testigo. E prome tres Evangelionan a ser skirbi tempo cu ainda mayoria di e testigonan ei tawata na bida. Relaciona cu e honestidad di escritornan di Evangelio, e buki The Miracles and the Resurrection (E Milagernan y e Resureccion) ta bisa: “Lo ta sumamente inhusto pa acusa e escritornan di evangelio di a sconde intencionalmente datonan historico meimei di un avalancha di relato di supuesto milagernan, cu e meta pa promove fe religioso. . . . Nan kier tawata escritornan honesto.”

Un otro punto ta cu opositornan Hudiu di cristianismo nunca a cuestiona e obranan poderoso menciona den e Evangelionan. Unico  cos cu nan a cuestiona ta cu poder di ken Hesus a haci milager. (Marco 3:22-26) Ni e hendenan cu a biba despues y cu tawatin critica contra Hesus no por a logra desbarata su milagernan. Al contrario, durante e prome dos siglonan di nos era, varios hende a referi na e milagernan cu Hesus a haci. Sin ningun duda anto nos tin tur motibo pa mira e relatonan di Evangelio tocante su milagernan como autentico.

E Homber Cu A Haci e Milagernan

Nos no por basa nos analisis di si Hesus su milagernan tawata autentico solamente riba logica. Den e descripcion cu e Evangelionan ta duna di e obranan poderoso di Hesus, nan ta revela un homber cu sintimento profundo y cu un compasion nunca bisto. E tawatin un interes sinsero den e bienestar di su prohimo.

Tuma por ehempel e caso di un leproso cu den su desesperacion a acerca Hesus y rog’e: “Si bo kier, bo por haci mi bira limpi.” “Yen di compasion”, Hesus a saca su man, y a mishi cu ne y a bis’e: “Mi kier, sea limpi.” Mesora e homber a cura. (Marco 1:40-42) Asina Hesus a demostra e compasion cu a impuls’e pa uza e poder cu Dios a dun’e pa haci milager.

Kico a sosode ora Hesus a topa un corteho funebre ta sali for di e stad di Nain? E defunto tawata e unico yiu homber di un biuda. “Yen di compasion” pa e señora, Hesus a acerc’e y a bis’e: “No yora.” Despues di esei el a lanta su yiu for di morto.—Lucas 7:11-15.

Un consuelo cu nos por saca for di Hesus su milagernan ta cu Hesus tawata “yen di compasion”, y e kier a yuda hende. Pero e milagernan ei no ta simpel historia. Segun Hebreonan 13:8, “Hesucristo ta mescos ayera y awe y pa semper.” Actualmente e ta goberna como Rei celestial, cla y capas pa uza e poder di haci milager cu Dios a dun’e na un escala mucho mas grandi cu tempo e tawata riba tera como hende. Pronto, Hesus lo uza e poder aki pa cura humanidad obediente. Gustosamente Testigonan di Yehova lo yuda bo siña mas tocante e perspectiva briyante aki pa futuro.

[Plachi na pagina 5]

Hesus su milagernan tawata un manifestacion di e “grandesa” of poder di Dios

[Plachi na pagina 7]

Hesus tawata un homber cu sintimento profundo