A Ongasireng Er A Jesus Ngera Sebechem El Suub?

NGLOCHA mo mechas a rengum sel msubii er a Biblia el kirel a omesodel a klengar er a Jesus er a lengar er tia el chutem el kmo ngdimlak a ta el ousbech el ngar er sel kot-el-omelekoi sel tekoi el mo loiuid el kmo “ongasireng.” A tekoi er a Greek el (dyʹna·mis) a lebebil e ngmoiuiid el kmo “ongasireng” a mera el belkul a kmo “klisiich.” (Lukas 8:​46) Ngdirrek el sebechel el mo oiuiid el kmo “duch” ma lechub e ng “mesisiich lureor.”​—⁠Matteus 11:20; 25:​15.

A Biblia a diak losaod er aike el ongasireng el lurruul a Jesus el ua di letekoi er a omerodech ma lechub el tekoi el ousbech el mengelaod er a rechad. Ngii a mle olechotel a “ngarbab el klisichel a Dios,” el uai a blekerdelel ngike el buik el Jesus a uldikii a mengelengalek el reng er ngii. (Lukas9:​37-​43) A choua ika el kmal mesisiich el ureor ngmo diak el sebechel el meruul ngike el kmal Mesisiich el Dios​—⁠el Chimong el Kedidai el losaod er ngii el kmo “a klisichel a imis el betok el klou”? (Isaia 40:26) Ngkmal diak!

 A Evangkelio a melekoi el kirel a bekord el 35 el ongasireng lurruul a Jesus. Engdi a uldekial ngii el rokui el ongasireng lurruul a Jesus a diak el lemocholt. El uai tiang, a Matteus 14:14 a melekoi el kmo: “Ma Jesus ra bocha el kerd ra bos e ngmilsa kloul seked; me ngkmal mlo chubteterir, me ngulemekungil erar smecher el teloi er tir.” Ngdiak louchais er kid el kmo te tela el smecher el chad a lulemekungil er tir er seikid el taem.

A ua ikeikid el mesisiich el lureor a mle olechotel a kmo a Jesus a ngmle Ngelekel a Dios, el ngar er a telbiil el Messias. A Bades a mera el olecholt el kmo a klisichel a Jesus el lebilsang a Demal a uchul me ngmle sebechel el meruul a ongasireng el tekoi. A apostol el Petrus a millekoi el kirel a Jesus el kmo ng “chad . . . lullecholt er ngii er kemiu a Dios el kmo ngulderchii, me ngmerruul a ngarngii a klisichel lurreor, ma chongasireng, ma cholangch el oeak ngii.”​—⁠Rellir Ar Apostel 2:​22.

A ongasireng el lurruul a Jesus a mle kaukbuk ngii ma osisecheklel. A Markus 1:​21-​27 a ouchais er a teletelir tirke el ngar er a seked el kirel a osisecheklel a Jesus ma ta er a ongasireng el lurruul er ngii. A Markus 1:​22 a melekoi el kmo a seked a “kilebetiekl er chosisecheklel,” ma 27 el kekerei el bades a ouchais el kmo a rechad a kmal “kilebetiekl” er a lodikii a mengelengalek el reng. Aike el mesisiich el ureor el lurruul a Jesus ma klumech el lulemerek er ngii a dul lulechotii el kmo ngii a mera el mle ngike el telbiil el Messias.

Ochotel a Kmo Ngmera el Tekoi

Ngerang me ngsebeched el oumerang el kmo a ongasireng el lurruul a Jesus a mera el dilubech? Ka me bo domes a bebil er a tekoi lolecholt el kmo ngmle mera el tekoi.

Sera loruul a mengasireng e mesisiich el ureor, e a Jesus a dimlak a ta el lengai a chetengakl el mo er a di ngii. Ngmle kerekikl ma klebkall ma odanges a mlo er a Dios er a uriul er a ongasireng el ureor el lurruul. El ua itiang, a uchei er a lomekungil er a meiiko el chad, e a Jesus a millekoi el kmo a chad a mo ungil el “kirel me le mocholt a urerel a Dios er ngiil chad.”​—Johanes 9:​1-3; 11:​1-4.

Ngdimlak a ngii di lengerang el ileakl el tekoi ma lechub a olechotel el mlocholt. A Jesus a mirruul a ongasireng el tekoi el dimlak leblart, e ngbai mle chemolt er a delongelir a rechad, el mle betok el taem el lurruul er a mederir a rechad. Ngdimlak a ta el ousbech a tokubets el llomes, ma lechub e ngkedidai el basio el sebechir a rechad el mesang, ma lechub el klalo lolengeseu er ngii. ​—Markus 5:​24-​29; Lukas 7:​11-​15.

A Jesus a lebebil el taem e ngnguluuchais er a klaumerang er tirke el ngilai a klungiolir er a ongasireng el lurruul. Engdi alta rebebil a di mla loumerang engdi tia dimlak lolekebai er a Jesus el meruul a ongasireng el tekoi. Sera lengar er a Capernaum el ngar er a Galilea, “e ar chad a chilteklterir ar betok el blekall rar mekngit el reng el mer ngii; me nguleba chomelekoi loldik rar mekngit el reng, el ulemekungil tirikal rokui el smecher.”​—Matteus 8:​16.

Aike el ongasireng er a Jesus a lurruul el lolengeseu er a rechad el ousbech a ngeso er a bedengir, el dimlak el lemeruul el kirel a rechad el di sorir a tekoi. (Markus 10:46-​52; Lukas 23:8) E dirrek a Jesus a dimlak loruul a ongasireng me bo lsebechel el ngmai a kmung ngerang el di kirel.​—Matteus 4:​2-4; 10:8.

Ngike el Chad el Mirruul a Ongasireng

A omesubel a ongasireng el lurruul a Jesus a mo diak lecherrungel a lsekum e ngdi ultuil er a omesaod er a kmo ngii el tekoi ngmera el dilubech ngdiak. Ma losaod aike el mesisiich el ongasireng el urerel a Jesus, e a Evangelio a ochotii el kmo ngchad el mle chubechubechad e betik a rengul er a rechad, e mle semeriar er a ungil el klungiolir a rechad.

Ka molatk er ngike el chad el mle chebedes el mlei el olengit er a Jesus el kmo: “Chomko ng soam, e ng sebechem el kikidak.” “Kmal mlo chubur,” ma Jesus a riretechii ngika el mle smecher er a chebedes, e kmo: “Ng soak, me bo mklikiid.” Me ngika el chad a kmal di mle mereched el mo klikiid. A Jesus a ulleisech er sel klisiich el lebilsa Dios el meruul ongasireng.

A ongelaod el mla er a suobel el sebechel el mocholt er a ongasireng er a Jesus e le ngii “kmal mlo chubur” me ngmirruul a betok el tekoi el olengeseu er a rechad.” Engdi aike el ongasireng a diak el di el tekoi er a ngar er a mong e lemerekong. “A Jesus a diak lemengodech er chelii, me chelechang, e dirrek el mo cherechar,” el ua lolekoi a Hebru 13:⁠8. Ngii er a chelechang a mengederedel el King el ngar er a eanged, el kltmokl e sebechel el mo ousbech er a klisiich el mla er a Demal el mo meruul a ongasireng el kuk ngar er a bab er aike el lurruul er sera ledirk lengar er tia el chutem el chad. Ngdi kmedung, e a Jesus a mo ousbech el mo omekungil er tirke el bekongesenges el chad. A Resioning er a Jehovah a kmal dmeu a rengrir el ngosukau el mo mesuub a betok el kirel tia kmal ungil el tekoi er a ngar er a medad el taem.