Ko Tinkupfunzirapo Chani Pa Vodabwisa va Yesu?

MUNGADABWE kudziwa kuti nkhani za m’Baibolo za moyo wa Yesu palibe mawu ya chiseweredwe choyambirira yakuti ‘chodabwisa.’ Mawu ya chigiriki (dyʹna·mis) yomwe nthawe zinango ayatsumbudzulira kuti ‘chodabwisa’ makamaka yachatanthauza ‘mphanvu.’ (Luka 8:46) Tingayatsumbudzuliresoti kuti ‘nzeru’ panango ‘basa zamphanvu.’ (Mateyu 11:20; 25:15) Mobverana na vimwevi vomwe katswiri munango adanena, mawu ya chigiriki mwaya ‘yachanena va basa ikulu yomwe yachitika, ndipo achanena makamaka mphanvu yomwe yachitisa basa iyo. Achaonesa kuti basa iyo yachitika mwa mphanvu ya Mulungu.’

Mawu yanango ya chigiriki (teʹras) nthawe zizinji yatsumbudzuliriwa kuti ‘yodabwisa’. (Yohane 4:48; Machitidwe 2:19) Mawu mwaya yachawonesa makamaka vomwe wanthu achachita akaona vimwevo. Kawirikawiri, wanthu azinji wonyang’anira na wopfunzira wa Yesu ambadabwa akaona basa zamphanvu zomwe Yesu ambachita.—Maliko 2:12; 4:41; 6:51; Luka 9:43.

Mawu ya chitatu ya chigiriki (se·meiʹon) Yolewa vodabwisa va Yesu yachatanthauza “chizindikiro” katswiri munango wa mapfunziro Robert Deffinbaugh. Adati mawu mwaya “yachawonesa tanthauzo chaiyo ya chodabwisa.” Adanena soti kuti: “Chizindikiro ndicho chodabwisa chomwe chichathandiza kubvesa chonadi chonena va Ambuya wathu Yesu.”

Ko ambandonamiza wanthu panango wenze na mphamvu zochokera kwa Mulungu?

Baibolo ichanenalini kuti vodabwisa va Yesu venze vondopusisa wanthu panango kuwanamiza na chakulinga chakuti awakondwerese. Vimbawonesa ‘ukulu wa Mulungu,’ ninge mwavidachitikira pa nkhani ya mulumbwana yemwe Yesu adamuchosa chiwanda. (Luka 9:37-43) Ko basa za mphanvu zimwezi zingakhale zosakwanisika kwa Mulungu Wamphanvu zose yemwe achanena kuti ‘anamphanvu zizinji’? (Yesaya 40:26) Neye shuwa!

Malemba ya ntontholo wa bwino yadafotokoza vodabwisa va Yesu vothamangira 35. Koma yafotokozalini vodabwisa vose vomwe iye adachita. Mwakulinganiza, pa Mateyu 14:14 ichalewa kuti: ‘Iye [Yesu] adawona gulu ikulu ya wanthu, ndipo adawabvera ntsisi, adapolesa wanthu wodwala womwe wenze nawo.’ Panthawe mweyi alibe kutomoleratu namba ya wodwala womwe adawapolesa.

Basa zamphanvu zimwezi zenze zodikana maninge pakutsimikizira vomwe Yesu ambalewa kuti ni mwana wa Mulungu yemwe ni Mesiya wopolomisiwa. Malemba yachaoneseratu kuti mphanvu zomwe Mulungu adamupasa ndizo zidamuthandiza Yesu kuchita vodabwisa. Mtumi Petulo adalewa Yesu kuti ni ‘munthu yemwe Mulungu adamuonesera pachena kwa iye. Adachita vimwevi mwa basa yamphanvu komasoti mwa vizindikiro, vomwe Mulungu adachita pakati panu ninge momwe imwepo munkudziwira.’ (Machitidwe 2:22) Pa nthawe inango Petulo adalewa kuti ‘Mulungu adamudzodza [Yesu] na mzimu uchena na mphanvu. Ndiposoti pakuti Mulungu adafambafamba mu dziko, nkumbachita vabwino na kupolesa wose woshupisiwa na Ndyerekezi.’—Machitidwe 10:37, 38.

Vodabwisa va Yesu vimbabverana na ntontholo wake. Pa Maliko 1:21-27 Pachawonesa vomwe wanthu adachita padabva vomwe Yesu adapfunzisa na padawona chodabwisa chake chinango. Pa Maliko 1:22 pachati wanthu ‘adadabwa na vomwe ambapfunzisa,’ ndipo pa vesi 27 pachanena kuti wanthu ‘adadabwa’ Yesu padabulisa chiwanda. Basa za mphanvu za Yesu na ntontholo wake vidapereka umboni wakuti wenze Mesiya wopolomisiwa.

Sikuti Yesu adapereka umboni wakuti wenze Mesiya mwa mawu yokha panango mwa vochita vake vinango, koma iye adachita pomwe vimwevo mwa mphamvu yochitira vodabwisa yomwe Mulungu adamupasa. Padagumanika mibvunzo yonena va basa na udindo wake, Yesu adadawira molimba moyo kuti: ‘Ine ninaumboni woposha wa Yohane [M’batizi]; pakuti basa zomwe Ababa adanipasa kuti nizikwaniririse, basa zomwe ine ninkuchita zikunichitira umboni kuti Ababa adanitumadi.’—Yohane 5:36.

Umboni wakuti venzedi chaivo

Ko tingatsimikize tani kuti vodabwisa va Yesu venze chaivo? Onani vinango vomwe vinkuonesa kuti venzedi chaivo.

Pochita basa zamphanvu, Yesu alibe kufuna kuti wanthu ambamupase ulemu. Ambawonesesa kuti akachita chodabwisa chilichose, ulemu na ulemerero vimbayende kwa Mulungu. Mwakulinganiza, Yesu akanati kupolesa munthu wosaona, adalewa motsindika kuti munthu uyo apolesewe ‘kuti basa za Mulungu zikaonesewe mwa iye.’—Yohane 9:1-3; 11:1-4.

Mosiyana na wanthu wochita vinthu vakundofuna kunamiza wanthu, wa matsenga na wopolesa wanthu mwa kuwapempherera, Yesu ambapusisalini wanthu maganizo, kuwanamiza, kuchita vinthu na chakulinga chodabwisa wanthu, va matsenga, panango kuchita vosokoneza maganizo wanthu. Alibe kutewedzera vikhulupiriro va wanthu. Onani momwe Yesu adawonesera kudzichepesa padapolesa wanthu awiri womwe ambawonalini. Nkhani mweyi ichati: ‘Yesu adabva ntsisi ndipo adaphata maso yawo. Nthawe mweyoletu wosaona wale adayamba kuwona ndipo adamulondola.’ (Mateyu 20:29-34) Pamwapa alibe kuchita mwambo uliwose panango kudziwonesera. Yesu ambachita vodabwisa pachena, ndipo nthawe zizinji ambavichita wanthu azinji ankuona. Ambaphatisalini basa malo yochita kukonzewa mwapadera, panango vipangizo vinango vapadera. Mosiyana na vimwevi, vomwe wanthu ntsiku zino achati ni vodabwisa nthawe zizinji vikhala vilibe umboni wotsimikizirika.—Maliko 5:24-29; Luka 7:11-15.

Nthawe zinango Yesu ambalewa kuti munthu yemwe wapolesewa anachikhulupiriro. Koma Yesu ambakangiralini kupolesa munthu ndawa yakuti munthu uyo alibe chikhulupiriro. Ali kukaperenawo ku Galileya, wanthu adamubweresera wanthu azinji wophatiwa na viwanda, ndipo iye adabulisa mizimu mwayo na mawu yokha. Wose womwe ambabvalini bwino nthupi mwawo adawapolesa.’—Mateyu 8:16.

Yesu ambachita vodabwisa pakufuna kuthandiza wanthu pa vomwe venzedi vodikana pa moyo wawo, osati kundofuna wanthu womwe ambandonyang’anira. (Maliko 10:46-52; Luka 23:8) Ndipo Yesu alibe kuchita vodabwisa kuti agumane maphindu.—Mateyu 4:2-4; 10:8.

Ko nkhani za m’mabukhu yanayi ya Ntontholo wabwino zidachitikadi?

Kudziwa vodabwisa va Yesu kudzera mu mabukhu yanayi ya ntontholo wabwino. Ko panavifukwa vodalila nkhani mwezi pomwe tinkupfunzira peno vodabwisa va Yesu venzedi chaivo? Inde, vifukwa viripo.

Ninge mwataonera vodabwisa va Yesu vimbachitikira pa gulu ya wanthu azinji ankuona. Mabukhu ya ntontholo wabwino yomwe yadanembewa cha kumayambiriro yadanembewa yazinji na wanthu womwe adawona vodabwisa vimwevi ali na moyo. Pa nkhani yakuti wonemba ntontholo wabwino wenze wowona ntima, bukhu yakuti The Miracles and the Resurrection Idati: “Nkuphonya maninge kulewa kuti wonemba ntontholo wa bwino anganembera dala nkhani zizinji za vodabwisa pakufuna kubisa vomwe vidachitikadi na chakulinga cha kufalisa chikhulupiriro chawo. . . . Iwo ambandofuna kunemba chaivo vokhavokha”

Wanthu wa chiyuda wotsutsa va chikhrisitu alibe kukaikirako basa za mphamvu za ntontholo wa bwino. Iwo ambakaikiralini mphanvu yomwe imbachitisa vimwevi. (Maliko 3:22-26) Podiya yemwe adadzakhala wotsutsa adakangira kutsutsa, vodabwisa va Yesu. Koma yakanati kukwana magole 100 ndiposoti patsogolo pa magole 100 Yesu wabwera kale, penze mawumboni ya vodabwisa ya vomwe Yesu adachita. Shuwadi, tinavifukwa vokwana vokhulupirira kuti nkhani za mu ntontholo wabwino zolewa za vodabwisa va Yesu nchaizo.

Khalidwe ya munthu yemwe ambachita vodabwisa mwevi

Kuti tibvese vodabwisa va Yesu tingandoyendalini panpfundo yakuti vodabwisa vake venze chaivo. Pakufotokoza basa zamphanvu zomwe Yesu adachita, Ntontholo wa bwino uchanena va munthu yemwe ambakhudziwa ntima maninge na wa chifundo kuposha wochita chidwi na moyo wa wanthu anzake.

Onani nkhani ya munthu wodwala khate yemwe adafika kwa Yesu na kumugwigwirira mochitisa ntsisi kuti: ‘Peno munkufuna munganichenese.’ Yesu adabva ntsisi; Adapfuthula djanja yake na kumuphata munthu wodwala khate ule, nkulewa kuti: “Ninkufuna; khala wochena.” Munthu muyo adapolesewa nthawe mweyo. (Maliko 1:40-42) Pamwapo, Yesu adawonesa kuti ntsisi ndiyo yomwe idamuchitisa kuphatisira basa mphanvu zomwe Mulungu adamupasa yochitira vodabwisa.

Ko nchani chomwe chidachitika pomwe Yesu adagumana na wanthu alitakule maliro akuchokera m’muyi wa Naini? Mulumbwana yemwe wenze womwalira ule wenze mwana m’bodzi yekha wa nkazi munango wamasiye. Yesu ‘adabva ntsisi’ na mayi mwaule adamufenderera nkunena kuti: ‘Ayi kulira’ patsogolo pake adamumukisira mwana wake.—Luka 7:11-15.

Pfunziro yolimbikisa maninge pa vodabwisa va Yesu ni yakuti ‘wenze wa chifundo ndipo ambachita vinthu kuti athandize wanthu. Koma vodabwisa vimwevi osati ni mbiri chabe. Pa Aheberi 13:8. Pachati: ‘Yesu Khrisitu adzachinjelini mpakana kalekale’. Manjeuno ankutonga ninge Mpfumu kudzulu, ndipo ni wokonzeka komasoti adzaphatisire basa mphanvu zomwe Mulungu adamupasa zochitira vodabwisa mu njira ikulu maninge kuposha momwe ambachitira ali pa dziko yapasi pano. Manjemanjepa, Yesu adzaphatisire basa mphanvu zimwezo pakupolesa wanthu wobvera. Mboni za Yahova zidzakondwe kukuthandizani kupfunzira vizinji polewa va chidikhiro cha kutsogolo chabwino maninge mwechi.

[Mafoto]

 Vodabwisa va Yesu “vichawonesa mphanvu zomwe Mulungu anazo”

 [Mafoto]

Yesu wenze munthu wa ntsisi maninge