¿Imatá yachakunchej Jesús milagrosta ruwasqanmanta?

JESÚS kay jallpʼapi kashaspaqa, ashkha milagrosta ruwarqa. Chay milagrosta ruwasqanta rikuspa discipulosninpis, waj runaspis mayta tʼukorqanku (Marcos 2:12; 4:41; 6:51; Lucas 9:43). ¿Jesús milagrosta ruwasqan cuentollachu? Chayta kay yachaqanapi yachakusun.

¿Jesús Diospa atiyninwanchu milagrosta ruwarqa?

Jesusqa tukuy runas rikunankuta milagrosta ruwarqa. Chay milagrostaqa mana pʼajpakus jinachu ruwarqa runas tʼukuspa qhawanankupaj, nitaj yatiris jinachu pakayllapi ruwarqa. Jesusqa Diospa atiyninwan ashkha milagrosta ruwarqa. Chayrayku uj kuti uj waynuchitumanta uj supayta qharqorqa (Lucas 9:37-43). Tukuy atiyniyoj Diospa “kallpanqa may jinapuni”, chayrayku payqa ima milagrotapis atiyninwan ruwayta atillan (Isaías 40:26).

Jesuspa kausayninmanta parlaj Mateo, Marcos, Lucas, Juan librospeqa, Jesús 35 milagrosta ruwasqanmanta parlan. Jinapis mana sutʼita yachakunchu chaykunallatachus ruwasqanta, chayri astawan ashkha milagrostachus ruwasqanta. Mateo 14:14 versiculopi willawanchej, ‘ashkha runasta rikusqanta, paykunamanta khuyakuspataj onqosqasta sanoyachisqanta’. Jinapis mana ninchu mashkha onqosqa runastachus sanoyachisqanta.

Jesusqa milagrosta ruwaspa rikuchisharqa, Diospa Wawan kasqanta, Mesías kasqanta ima. Bibliapi niwanchej payman Dios atiyta qosqanta milagrosta ruwananpaj. Chaymanta parlaspa apóstol Pedro nerqa: “Yachankichej jina [...] Jesustaqa Dios kachamorqa. Paynejta Diosqa qankuna ukhupi milagrosta, tʼukuna imasta, señalestawan ruwarqa”, nispa (Hechos 2:22). Waj kutipitaj Pedro nillarqataj: “[Jesustaqa] Dios espíritu santowan ajllarqa, atiytataj qorqa. Ajinamanta Jesusqa tukuynejta purerqa allin kajta ruwaspa, sanoyachispataj Diabloj atiyninpi tukuy ñakʼarejkunata, Dios paywan kasqanrayku”, nispa (Hechos 10:37, 38).

Runasqa mayta tʼukorqanku, Jesús milagrosta ruwasqanta rikuspa, yachachisqanta uyarispa ima (Marcos 1:21-27). Chayrayku Marcos 1:22 versiculopi willawanchej, Jesuspa yachachisqanta uyarispa runas mayta tʼukusqankuta. Marcos 1:27 versiculopitaj willawanchej, uj runamanta supayta qharqosqanta rikuspa, runas mayta tʼukullasqankutataj. Jesús tʼukuna imasta ruwasqan, yachachisqanpis, paypuni Mesías kasqanta rikucherqa.

Jesusqa ni jaykʼaj nerqachu: “Noqa Mesías kani”, nispa. Paypuni Mesías kasqanqa rikukorqa, Diospa atiyninwan milagrosta ruwasqanpi. Wakin runas, mana Diospa atiyninwanchu milagrosta ruwasqanta nejtinkupis, payqa mana manchachikuspa nerqa: “Juanpa willasqanmantaqa, noqaypata aswan sumaj willay tiyapuwan. Tatayqa ruwanasta qowarqa juntʼanaypaj, chay ruwanasta ruwasqaytaj sutʼinchan Tatay kachamuwasqanta”, nispa (Juan 5:36).

¿Imaraykutaj mana iskayrayanchejchu Jesús milagrosta ruwasqanmanta?

Jesús ima milagrostachus ruwasqanmanta, ¿pruebas kanchu? Arí. Mayqenkunachus chaykuna kasqanta qhawarina.

Jesusqa milagrosta ruwarqa, Dios jatunchasqa kananpaj, manataj pay jatunchachikunanpajchu. Chayrayku uj kuti, uj cieguituta sanoyachishaspa, kayqa “Diospa ruwasqasninta runas rikunankupaj” nispa nerqa (Juan 9:1-3; 11:1-4).

Kay tiempopi jampirispis, yatirispis runasta jampinankupaj chayri sanoyachinankupaj tukuy imaymanasta ruwanku. Jesustajrí mana paykuna jinachu ruwarqa. Payqa Diospaj atiyninwan runasta sanoyacherqa, jamperqa ima. Iskay cieguitusta sanoyachinanpaj imatachus ruwasqanmanta, Biblia nin: “Jesustaj mayta khuyakuspa ñawisninkuta llankharerqa. Chay ratopachataj watejmanta rikuyta aterqanku, Jesuspa qhepantataj rerqanku”, nispa (Mateo 20:29-34). Jesusqa kay milagrota mana runas tʼukuspa qhawanankupajchu ruwarqa. Kay tiempopi yatirisqa, runasta sanoyachiyta, jampiyta ima atisqankuta ninku. Jinapis chay imasta ruwasqankumantaqa mana pruebas kanchu. Jesustajrí mana paykuna jinachu pakaypi milagrosta ruwarqa, manaqa tukuy runas rikunankuta ruwarqa (Marcos 5:24-29; Lucas 7:11-15).

Jesusqa paypi creejkunata sanoyacherqa, jinallataj mana paypi creejkunatapis. Jesús Capernaum llajtapi kashajtin, “ashkha supayniyoj runasta pusamorqanku, Jesustaj uj simillawan chay supaykunata runasmanta qharqorqa, tukuy onqosqastapis sanoyacherqa” (Mateo 8:16).

Jesusqa milagrosta ruwarqa runasta yanapananpaj, manataj ruwasqanta rikuspa runas tʼukunankupajchu (Marcos 10:46-52; Lucas 23:8). Chantapis Jesusqa mana paypa allinninpajchu milagrosta ruwarqa (Mateo 4:2-4; 10:8).

Jesuspaj kausayninmanta parlaj libros, ¿atienekunapaj jinachu?

Jesús milagrosta ruwasqanmanta willaykunaqa, Mateo, Marcos, Lucas, Juan librospi kashan. Chay librospi Jesuspaj milagrosninmanta parlasqan, ¿atienekunapaj jinachu? Arí.

Jesusqa mana pakaypichu milagrosta ruwarqa, manaqa tukuy runas rikunankuta. Ima milagrostachus ruwasqanta rikoj runasqa, tawantin Evangelios qhelqakushajtin kausakusharqankuraj. Chay tawantin Evangeliosmanta parlaspa, Los milagros y la resurrección nisqa libro nin: “Mateo, Marcos, Lucas, Juan librospi, Jesuspa milagrosninta qhelqajkunamanta, mana nisunmanchu runasta creechinallankupaj llullasta qhelqasqankuta. [...] Paykunaqa maychus kajtapuni qhelqarqanku”, nispa.

Cristianosman churanakoj judiosqa, sutʼita yacharqanku Jesús milagrosta ruwasqantapuni. Jinapis paykunaqa yuyarqanku Satanaspa atiyninwan chay milagrosta ruwasqanta, nitaj Diospa atiyninwanchu (Marcos 3:22-26). Ñaupa tiempomanta cristianosman churanakoj runasqa, Jesús milagrosta ruwasqantaqa mana pakayta aterqankuchu. Jesús wañupusqanmanta 200 watasña pasajtinpis, milagrosta ruwasqanmanta pruebas kashallanpuni. Chayrayku Mateo, Marcos, Lucas, Juan librospi Jesuspa milagrosninmanta qhelqakusqanqa atienekunapaj jinapuni.

¿Imayna runataj Jesús karqa?

Mateo, Marcos, Lucas, Juan librospi Jesuspaj milagrosninmanta qhelqasqata entiendenapajqa, yachananchej tiyan chay milagrosta ruwaj runa imaynachus kasqanta. Tawantin Evangeliosta leespaqa, reparasun Jesusqa may munakuyniyoj, khuyakuyniyoj kasqanta, wajkunamantataj llakikusqanta.

Uj pacha, “uj lepra onqoyniyoj runaqa Jesusman qayllaykuytawan, qonqoriykukuspa mañakorqa: ‘Munankichus chayqa, atinki sanoyachiwayta’, nispa. Jesustaj paymanta khuyakusqanrayku makinwan llankhaykorqa, nerqataj: ‘Arí, munani. Sanoyapuy’, nispa. Chay ratopachataj chay runaqa lepra onqoyninmanta sanoyaporqa” (Marcos 1:40-42). Jesusqa runasta khuyakusqanrayku Diospa atiyninwan sanoyachej.

Uj kuti imatachus Jesús ruwasqanta qhawarina. Payqa Naín llajtaman risharqa. Llajta punkuman qayllaykushajtintaj uj wañusqata orqhomushasqanku. “Jesusqa chay viudata rikuytawan mayta khuyakuspa nerqa: ‘Amaña waqaychu’, nispa”. Chantá uj kʼata qhari wawanta kausaricherqa (Lucas 7:11-15).

Jesusqa kay jallpʼapi kashaspa milagrosta ruwarqa, runasta yanapayta munasqanrayku, chayllatataj pisimantawan ruwanqa. Hebreos 13:8 versiculopi paymanta parlaspa nin: “Jesucristoqa kikillanpuni, qaynapis, kunanpis, wiñaypajpis”, nispa. Jesusqa cielopi Rey jina kamachishanña. Sumaj wakichisqataj kashan tumpamantawan Diospa atiyninwan astawan ashkha milagrosta ruwananpaj. Kay jallpʼata kamachimonqa chaypachaqa, Diosta kasukoj runasta sanoyachenqa. Chaymanta astawan yachakuyta munanki chayqa, Jehovaj testigosnin tukuy sonqo yacharichiykuman.

[Dibujos/fotos]

Jesusqa Diospa atiyninwan milagrosta ruwarqa.

[Dibujo/foto]

Jesusqa may munakuyniyoj, khuyakuyniyojtaj.