¿Imatan yachasunman Jesuspa milagrokuna ruwasqanmanta?

KAY pachapi kashaspa Jesús milagrokunata ruwasqantaqa griego simipiqa manan “milagro” nispachu churarqanku, aswanpas dý·na·mis, nispan churarqanku chayqa “atiy” ninantan nin (Lucas 8:46). Chaymantapas nillankutaqmi “atiywan ruwaykuna” otaq “ruway atiy” nispa (Mateo 11:20, willakuy; 25:15). Juj allin yachaq runan nirqan: “Griego rimaypi dý·na·mis simiqa ima milagrotapas atiywan ruwakusqanmantan rimashan, chay milagroqa Diospa atiynintan rikuchin”, nispa.

Chaymantapas griego simipin churallarqankutaq té·ras, nispa chayqa “admirakunapaq kaqkuna” ninantan nishan (Juan 4:48; Hechos 2:19). Jesuspa ruwasqan milagrokunata rikuq runakunapas dicipulonkunapas anchatan admirakurqanku chaykunata rikuspa (Marcos 2:12; 4:41; 6:51; Lucas 9:43).

Chaymantapas Jesuspa milagrokuna ruwasqanmantaqa griego simipi churallarqankutaq sē·méi·on otaq “señal” nispa. Chaymantan juj teólogo runa nirqan: “Griego simipi sē·méi·on nisqa simiqa astawanmi rikuchiwanchis Jesuspa milagrokuna ruwasqanqa cheqaqpuni kasqanta Jesuspas Diospa wawan kasqanta”, nispa.

¿Runaq ruwasqanchu icha Diospa atiyninchu?

Jesuspa ruwasqan milagrokunaqa manan magiata ruwaq runakunaq ruwasqan jinachu karqan, Bibliapi willasqan jina Jesuspa ruwasqan milagrokunaqa “Diospa jatun atiyninwanmi” karqan. Juj kutinmi Jesusqa supaykunaq ñak’arichisqan waynachata yanaparqan chaypin Jesusqa Diospa atiyninwan millay espiritukunata qarqorqan (Lucas 9:37-43). Diosqa tukuy atiyniyoqmi paypaqqa manan sasachu chhayna milagrokuna ruwayqa. Bibliapin nishan: “Diosqa sinchi atiyniyoqmi sinchi kallpayoqmi”, nispa (Isaías 40:26, Diospa Simin Qelqa). *

Jesusqa yaqachus jina 35 milagrokunata jina ruwanman karqan, manan llapanmantaqa yachakunraqchu. Bibliapin Mateo 14:14 textopi nishan: “Jesustaq […] ancha askha runakunata rikurqan, chaymi paykunata khuyapayarqan onqosqa kaqkunatapas qhaliyachirqan”, nispa. Chaypiqa manan niwanchischu jayk’a onqosqakunatas qhaliyachirqan chaytaqa.

Diospa atiyninwan Jesuspa milagrokuna ruwasqanqa sut’itan rikuchirqan Jesusqa Diospa wawanpuni kasqanta prometesqa Mesías kasqantapas. Bibliapin astawan willawashanchis Jesusqa Diospa atiyninwanpuni milagrokuna ruwasqanmanta. Apóstol Pedron nirqan: “Jesusqa Diospa kachamusqanmi karqan, paytaqa sut’itan Dios reqsichirqan ñaupaykichispi milagrokunata admirakunapaq kaqkunata, señalkunata ima ruwachispa imayna yachasqaykichis jina”, nispa (Hechos 2:22). Juj kutipin apóstol Pedro nillarqantaq: “Paytan Dios ajllarqan santo espirituwan, jinaspa atiyta qorqan. Jinan payqa lliuta purirqan imaymana allinkunata ruwaspa, Saqraq ñak’arichisqan runakunata qhaliyachispa ima. Payqa chaykunata ruwarqan paywan Dios kashasqanraykun”, nispa (Hechos 10:37, 38).

Marcos 1:21-27 textopin willashan imaynatas runakuna qhawarirqanku Jesuspa yachachisqanta milagrokuna ruwasqantapas chaykunamanta. Versículo 22 nishan: “Runakunaqa anchata admirakurqanku imayna yachachisqanmanta”, nispa. 27 versiculopi nisqan jina, “llapa runakunan ancha admirasqa” kasharqanku millay espiritukunata qarqosqanwan. Chhaynaqa chaypi qhawarimusqanchis jina Jesuspa milagrokuna ruwasqankunapas Diosmanta yachachisqanpas sut’itan rikuchirqan paypuni prometesqa Mesías kasqanta.

Jesusqa ruwayninwan, imachus yachachisqanwan, Diospa atiyninwan milagrokunata ruwaspa iman sut’ita rikuchirqan Mesías kasqanta, chaymi chaykunamanta iskayaq runakunamanpas mana manchakuspa nirqan: “Noqaq ruwasqayqa [Bautizaq] Juanpa willasqanmantapas astawanraqmi noqamanta willakun. Noqaqa Yayaypa qomuwasqan ruwaykunatan junt’ashani, chaykunan rikuchin noqaqa Yayaq kachamusqan kasqayta”, nispa (Juan 5:36).

¿Imakunan rikuchirqan Jesuspa milagrokuna ruwasqan cheqaqpuni kasqanta?

¿Imakunan rikuchirqan Jesuspa milagrokuna ruwasqan cheqaqpuni kasqanta? Kaypi qhawarisunchis wakinmanta.

Jesusqa manan payta jatunchanankutachu munarqan milagrokuna ruwasqanmantaqa. Aswanpas sapanka milagrokuna ruwasqanwanmi Diosta jatunchanankuta munarqan. Juj kutinmi Jesusqa juj ñausa runata manaraq jampishaspa discipulonkunata nirqan: “Kayqa kashan Diospa ruwayninkuna paywan rikuchisqa kananpaqmi”, nispa (Juan 9:1-3; 11:1-4).

Magiata ruwaq runakunapas, layqa ruwaq runakunapas imaymanatan jap’inku otaq imaymanata ruwanku pitapas jampiyta munaspa, Jesusqa milagrokunata ruwananpaqqa manan chay runakuna jinaqa imatapas ruwaqchu. Juj kutinmi Jesusqa iskay ñausa runakunata jampirqan, ¿imaynatan chayta ruwarqan? Bibliapin nishan: “Jesusqa anchata khuyapayaspa ñawinkuta llamiykurqan, jinan paykunaqa kaq rato qhawaripurqanku, chaymantataq payta qatikurqanku”, nispa (Mateo 20:29-34). Jesusqa makinwan llamiykuspallan chay runataqa qhaliachirqan manan imatapas layqa runakuna jinaqa ruwarqanchu. Jinaspapas askha runakuna rikushaqtinmi chay milagrokunataqa ruwarqan. Magiata ruwaq otaq layqa ruwaq runakunapas imaymanatan ruwanku pitapas jampiyta munaspa, chaypaqmi imaymanawan k’anchachikunku velakunawan juj cosaskunawan ima. Jinaspapas chay runakunaq milagrokuna ruwasqanku cheqaqchu icha manachus chayta yachanankupaqqa manan ima pruebapas kanchu (Marcos 5:24-29; Lucas 7:11-15).

Wakin runakunaqa Diospi iñisqankuraykun qhaliyachisqa karqanku chaytaqa sut’itan Jesusqa willarqan. Ichaqa manan Diospi iñiqkunallatachu qhaliyachirqan llapa runakunatan yanaparqan. Juj kutinmi Galileapi Jesús kashaqtin “pusamurqanku supaykunaq junt’aykusqan askha runakunata, Jesustaq juj simillawan chay espiritukunata qarqorqan, llapan onqosqakunatapas qhaliyachirqanmi” (Mateo 8:16).

Chaymantapas Jesusqa milagrokunataqa ruwaq runakunata yanapayta munaspan, manan payta jatunchanankuraykuchu (Marcos 10:46-52; Lucas 23:8). Jinaspapas chaykuna ruwasqanmantaqa manan mijunatachu nitaq qolqetachu runakunamantaqa mañakurqan (Mateo 4:2-4; 10:8).

¿Ima nisunmantaq Jesuspa vidanmanta willaq tawa librokunamanta?

Mateo, Marcos, Lucas, Juan librokunapin astawanqa willashan Jesuspa ruwasqan milagrokunamanta. Chay, ¿tawa librokunapi willasqan cheqaqchu? Chayta yachananchispaq kaykunata qhawarisunchis:

Qhawarimusqanchis jina Jesusqa askha runakuna rikushaqtinmi milagrokunataqa ruwarqan, paykunamanta wakinqa kausasharqankuraqmi chay tawa librokuna qelqakamusqan tiempopiqa. Chay librokunata qelqaq runakunamantan juj libro nirqan: “Chay tawa librokunata qelqaq runakunamantaqa yaqapaschá pipas ninman: Paykunaqa llullakuspan milagrokuna kasqanmantaqa qelqamurqanku askha runakuna religionninkupi creenankurayku, nispa. Ichaqa chhayna piensasqankuqa manan allinchu, chay tawa librokunata qelqamuq runakunaqa cheqaqtan imatapas qelqamurqanku”, nispa.

Jesusta cheqnipakuq judío runakunapas rikurqankun Jesuspa milagrokuna ruwasqantaqa, chaymi paykunaqa rimapakurqanku: “Beelzebubpa junt’aykusqanmi kashan”, nispa (Marcos 3:22-26). Jesús contra yanqamanta rimapakuq runakunapas manan negayta atirqankuchu Jesuspa ruwasqan milagrokunamanta. ¿Imaraykun mana negayta atirqankuchu? Askha watakunan Jesuspa milagrokuna ruwasqanmantaqa rimarqanku, chaykunan rikuchirqan cheqaqpuni kasqanta. Chhaynaqa Jesuspa vidanmanta willaq tawa librokunaq nisqanqa cheqaqmi.

¿Imayna sonqoyoqmi karqan milagrokunata ruwaq runa?

Qhawarimusqanchis jina askha pruebakunan rikuchin Jesuspa milagrokuna ruwasqanqa cheqaqpuni kasqanta. Jesuspa vidanmanta willaq tawa librokunaqa manan milagrokuna ruwasqallanmantachu willashan, willashallantaqmi imayna runa kasqanta imayna sonqoyoqsi karqan chaytapas. Jesusqa munakuq, khuyapayakuq runan karqan, payqa pitapas sonqomantan yanapaq.

Juj kutinmi lepra onqoyniyoq runa Jesusman achhuykuspa nirqan: “Munanki chayqa, atinkin qhaliyachiwayta”, nispa. Jesustaq payta anchata khuyapayaspa nirqan: “Arí, munanin, qhali kapuy”, nispa. Jinan chay lepra onqoyniyoq runaqa kaq rato qhaliyapurqan (Marcos 1:40-42). Chhaynaqa chaypi nisqan jina, Jesusqa runakunata khuyapayaspan Diospa atiyninwan paykunata qhaliyachirqan.

Juj kutinpas Jesusqa Naín llaqtaman chayashaspan rikurqan, juj wañupuq waynata p’ampanankupaq askha runakuna apashasqankuta. Chay waynaqa juj viuda warmiq sapallan wawanmi kasqa, jinan Jesusqa chay viudata rikuspa maytapuni khuyapayaykurqan jinaspan nirqan: “Amaña waqaychu”, nispa. Chaymantataq wawanta kausarichirqan (Lucas 7:11-15).

Jesuspa milagrokuna ruwasqanmantaqa imaymanatan yachanchis, Jesusqa ancha khuyapayakuqmi karqan chayraykun llapa runakunatapas yanapaytapuni munarqan. Jesuspa milagrokuna ruwasqanqa manan yanqa yachachikuykunachu nitaq yanqa willakuykunachu. Hebreos 13:8 textopin nishan: “Jesucristoqa kaqllapunin ñaupaqpas, kunanpas, wiñay-wiñaypaqpas”, nispa. Jesustaqa Jehová Diosmi gobiernonpi rey kananpaq churarqan, Jesusqa allin preparasqan kashan Jehová Diospa atiyninwan imaymanata ruwananpaq. Imaynan kay allpapi kashaspa imaymana milagrokunata ruwarqan, chhaynatan jamuq tiempopipas astawanraq Diospa atiyninwan imaymanata ruwanqa. Diosta kasukuq runakunatan imaymana onqoykunamanta qhaliyachipunqa. Sichus astawan yachayta munanki jamuq tiempomanta chayqa, Jehová Diospa testigonkunan chaymanta astawan yachanaykipaq yanapasunkiku.

[Nota]

[4, 5 paginakunamanta fotokuna]

Jesuspa milagrokuna ruwasqanqa “Diospa ancha atiynintan rikuchirqan”

[7 paginamanta foto]

Jesusqa munakuq ancha khuyapayakuq runan karqan