Saida mak ita bele aprende husi Jesus nia milagre?

IHA Jesus nia tempu, Jesus nia dixípulu sira no ema seluk admira ho milagre sira neʼebé Jesus halo. (Marcos 2:​12; 4:​41; 6:​51; Lucas 9:​43) Maibé karik Ita hanoin: ‘Milagre sira-neʼe akontese duni ka lae?’

Finje deʼit ka forsa husi Maromak?

Bíblia nunka dehan katak Jesus nia milagre mak finje deʼit ka lohi ema atu dada sira-nia atensaun. Jesus halo milagre sira ho “Maromak nia kbiit boot”. Porezemplu, Jesus duni sai anju aat husi labarik-mane ida tanba Maromak nia kbiit. (Lucas 9:37-​43) Entaun la susar ba Maromak neʼebé Kbiit Boot Liu Hotu neʼebé iha ‘forsa boot’ atu bele halo buat kmanek hanesan neʼe.​—Isaias 40:26.

Evanjellu sira temi Jesus nia milagre maizumenus 35. Maibé Evanjellu sira la konta milagre hotu neʼebé Jesus halo. Porezemplu, Mateus 14:14 hatete: “Nia [Jesus] haree ema-lubun boot, no nia hanoin tebes sira, no nia kura ema sira neʼebé moras.” Bíblia la konta kona-ba ema moras naʼin-hira mak Jesus kura iha tempu neʼebá.

Milagre sira hanesan neʼe hatudu ho klaru katak Jesus mak Maromak nia Oan-Mane, no Mesias neʼebé fó-hatene nanis ona. Eskritura sira fó sai katak Maromak mak fó kbiit ba Jesus atu halo milagre oioin. Apóstolu Pedro dehan katak Jesus mak “mane neʼebé Maromak haruka mai. Maromak halo milagre, sinál no buat kmanek oioin iha imi-nia leet liuhusi nia, hanesan imi rasik hatene”. (Apóstolu 2:​22) Iha tempu seluk, Pedro dehan katak “Maromak hili ona [Jesus] liuhusi espíritu santu no kbiit, no nia laʼo haleʼu rai neʼe hodi halo diʼak no kura ema hotu neʼebé Diabu haterus, tanba Maromak hamutuk ho nia”.​—Apóstolu 10:37, 38.

Jesus nia milagre sira liga ho mensajen neʼebé nia haklaken. Marcos 1:​21-​27 konta kona-ba ema-lubun nia reasaun bainhira Jesus hanorin no halo milagre. Marcos 1:​22 hatete katak ema-lubun “hakfodak ho ninia dalan atu hanorin”, no versíkulu 27 fó sai katak ema-lubun mós “hakfodak” bainhira nia duni sai anju aat. Jesus nia milagre no ninia mensajen sai nuʼudar prova katak nia mak Mesias neʼebé Bíblia fó-hatene nanis ona.

Jesus la dehan deʼit katak nia mak Mesias. Jesus nia liafuan, hahalok, no mós ninia milagre sira fó evidénsia katak nia mak Mesias. Bainhira ema husu kona-ba ninia podér, nia hatán ho aten-brani: “Haʼu iha sasin neʼebé boot liu fali João [Batista] nian, tanba haʼu-nia Aman fó serbisu ba haʼu atu kumpre, no serbisu neʼebé haʼu halo daudaun mak fó sasin kona-ba haʼu katak Aman haruka haʼu mai.”​—João 5:​36.

Evidénsia katak Jesus nia milagre akontese duni

Tanbasá ita bele fiar katak Jesus nia milagre sira mak akontese duni? Hanoin toʼok evidénsia balu.

Bainhira halo milagre, Jesus nunka dada atensaun ba ninia an rasik. Nia fó glória hotu ba Maromak. Porezemplu, antes Jesus kura mane matan-delek ida, nia fó sai katak mane neʼe sei hetan kura atu nuneʼe “liuhusi [mane neʼe nia] situasaun neʼe mak ema bele haree Maromak nia serbisu”.​—João 9:​1-3; 11:​1-4.

Jesus la hanesan ho ema seluk neʼebé dehan katak sira bele halo milagre. Jesus la uza májiku no nia mós la hanesan ho amlulik sira neʼebé dehan katak sira bele kura ema. Jesus mós nunka lohi ema, ka uza buat neʼebé liga ho anju aat ka sasán lulik atu kura ema. Haree toʼok dalan simples neʼebé Jesus kura mane naʼin-rua neʼebé matan-delek. Istória neʼe dehan: “Tanba hanoin tebes sira, Jesus tau liman ba sira-nia matan, no iha tempu neʼe kedas sira bele haree, no sira laʼo tuir nia.” (Mateus 20:29-​34) Jesus la halo milagre neʼe hodi dada ema seluk nia atensaun. Jesus halo milagre sira iha ema nia oin, no baibain iha ema barak mak sai nuʼudar sasin. Nia la presiza uza palku espesiál ka lampu oioin atu halo milagre. Ida-neʼe la hanesan duni ho ema ohin loron, sira dehan katak sira bele halo milagre maibé la iha evidénsia kona-ba neʼe.​—Marcos 5:​24-​29; Lucas 7:​11-​15.

Dala barak Jesus kura ema neʼebé hatudu fiar ba nia, maibé dala ruma nia mós kura ema neʼebé la hatudu fiar. Bainhira Jesus iha Kafarnaum iha Galileia, ema lori ba nia “ema barak neʼebé anju aat mak domina, no nia duni sai anju aat sira-neʼe ho liafuan ida deʼit, no nia kura sira hotu neʼebé moras”.​—Mateus 8:​16.

Jesus halo milagre atu ajuda ema, laʼós deʼit atu dada ema nia atensaun. (Marcos 10:46-​52; Lucas 23:8) Jesus nunka halo milagre atu hetan osan.—Mateus 4:​2-4; 10:8.

Ita bele tau fiar ba istória iha Evanjellu sira ka lae?

Ita bele aprende kona-ba Jesus nia milagre liuhusi lee Evanjellu haat. Ita bele tau fiar duni ba istória sira-neʼe neʼebé konta kona-ba Jesus nia milagre sira ka lae? Sin, bele duni.

Hanesan fó sai tiha ona, Jesus halo milagre sira iha ema nia oin, no iha ema barak neʼebé sai sasin ba Jesus nia milagre sira. Evanjellu balu hakerek iha tempu neʼebé sasin-naʼin barak sei moris hela. Livru ida (The Miracles and the Resurrection) esplika kona-ba ema neʼebé hakerek Evanjellu sira, hodi dehan: “La justu atu dehan katak ema sira neʼebé hakerek Evanjellu sira konta istória bosok kona-ba milagre sira atu bele habelar sira-nia relijiaun. . . . Tuir loloos, hakerek-naʼin sira-neʼe mak ema neʼebé laran-moos.”

Ema Judeu neʼebé kontra ema Kristaun nunka hatete katak milagre sira neʼebé hakerek iha Evanjellu sira la akontese. Sira hatete deʼit katak Jesus hetan kbiit atu halo milagre sira-neʼe husi anju aat sira. (Marcos 3:22-26) Depois Jesus nia tempu, kontradór sira mós labele nega Jesus nia milagre. Tuir loloos, tinan 200 depois Jesus mate, iha hakerek-naʼin barak neʼebé hakerek kona-ba milagre oioin neʼebé Jesus halo. Klaru katak, ita bele tau fiar duni ba istória iha Evanjellu sira kona-ba Jesus nia milagre sira.

Jesus mak ema hanesan saida?

La toʼo atu aprende deʼit kona-ba buat oioin neʼebé hatudu katak Jesus nia milagre sira akontese duni. Ita mós presiza aprende kona-ba mane neʼebé halo milagre sira-neʼe atu bele komprende didiʼak ninia milagre sira. Evanjellu sira hanorin ita katak Jesus hatudu domin, laran-sadiʼa no nia hanoin ema seluk.

Hanoin toʼok ezemplu kona-ba mane ida neʼebé moras-lepra no hakbesik ba Jesus hodi husu ho laran: “Haʼu hatene katak se Ita-Boot hakarak, Ita bele halo haʼu sai moos.” Jesus “hanoin tebes mane neʼe”, no nia lolo liman hodi kaer mane moras-lepra neʼe, no dehan: “Haʼu hakarak! Sai moos bá.” Mane neʼe sai diʼak kedas. (Marcos 1:40-​42) Ida-neʼe hatudu katak Jesus halo milagre tanba nia hadomi no hanoin ema.

Saida mak Jesus halo bainhira hasoru ema-lubun neʼebé lori hela mate-isin sai husi sidade Naim? Ema neʼebé mate mak feto-faluk ida nia oan-mane mesak. Jesus “hanoin tebes feto neʼe”, no nia hakbesik ba feto neʼe hodi dehan: “Keta tanis.” Tuirmai nia fó moris-hiʼas ba feto neʼe nia oan-mane.—Lucas 7:​11-​15.

Bainhira ita lee kona-ba Jesus nia milagre sira, neʼe bele fó kmaan ba ita tanba ita aprende katak Jesus hakarak tebes ajuda ema no nia “hanoin tebes” ema. Milagre sira-neʼe laʼós istória deʼit. Ebreu 13:8 hatete: “Jesus Kristu hanesan deʼit horiseik, ohin, no ba nafatin.” Agora nia ukun nuʼudar Liurai iha lalehan, no nia prontu ona atu halo milagre barak liu fali tempu neʼebé nia iha rai. Lakleur tan, Jesus sei uza Maromak nia forsa atu kura ema neʼebé laran-metin. Testemuña ba Jeová sei kontente atu ajuda ita aprende liután kona-ba futuru kapás neʼe.

[Dezeñu iha pájina 4, 5]

Jesus nia milagre sira hatudu sai “Maromak nia kbiit boot”

[Dezeñu iha pájina 7]

Jesus hanoin tebes ema