I Fahagagagne Natao i Jesosy Rey​—Ino Ty Ianara’o boake Amy Rey?

VA’E ho gaga rehe naho irehafagne fa tsy trea amy ty tantaram-piaigna i Jesosy amy Baiboly ao, ty rehake grike irehafagne tihoe “fahagagagne.” Ty rehake grike (dy’na·mis) adika tihoe “fahagagagne” kindraike, le midika ara-bakiteny tihoe “hery.” (Lioka 8:46) Azo adika ka io tie “fahaiagne.” (Matio 11:20; 25:15) Misy manam-pahaiagne mirehake fa o rehake grike iohoe le “magnasongadigne i asa lahibey nataoy, lohotsie fa ty hery nagnatanterahagne aze. Mampibaribary ty fiasa ty herin’Andrianagnahare o rehake iohoe.”

Misy rehake grike hafa (te’ras) mateteke adika tihoe “fambara” ndra raha mahaveregne. (Jaona 4:48; Asan’ny Apostoly 2:19) Ty voka’e amo o mpagnenteo ka ty asongadigne amy io. Mateteke niveren-draha o ndatio naho i mpianatsey, naho fa nahatrea ty asa lahibey natao i Jesosy.​—Marka 2:12; 4:41; 6:51; Lioka 9:43.

“Famantaragne” ty heve i rehake grike fahateloy (se·mei’on). Irehafagne ty fahagagagne natao i Jesosy io. “Mifantoke amy ty hevetse laleke amy i fahagagagney” io, tasa i manam-pahaiagne atao tihoey Robert Deffinbaug. Hoe ka reke: “Tihoe famantaragne le fahagagagne mirehake ty maregne miomba i Jesosy Tompo.”

Fitake vao sa Hery Nimean’Andrianagnahare?

Tsy rehafe ty Baiboly tie fitake ndra hafetsefetseagne natao mba hampifalefaleagne o ndatio avao i fahagagagne natao i Jesosỳ. Nampiseho ty “hery lahibein’Andrianagnahare” rey, ohatse naho fa namoake demonia tamy ty ajaja lahilahy raike ty Jesosy. (Lioka 9:37-43) Tsy hahavita asa lahibey hoe izay vao ty Andrianagnahare, ie amy zao reke managne hery fara tampo’e sady ‘tena matanjake’? (Isaia 40:26) Mazava hoaze fa tena ho vita’e zay!

Mitantara fahagagagne 35 teo ho eo natao i Jesosy i Filazantsaray. Faie tsy voarehake ao tie fire maregne ty fitambara ty fahagagagne natao’e. Rehafe ty Matio 14:14 ohatse fa “nahatrea vahoake maro ty [Jesosy]. Nitretré iareo reke, le nisitragne’e ze narare.” Faie tsy nirehafegne ty isa ty marare nisitragne’e tamo o fotoagne io.

Tena nila nanao i asa lahibey rey ty Jesosy, mba hagnaporofoagne ty reha’e tie Anak’Andrianagnahare naho i Mesia nampitamaegney reke. Hamaregne ty Soratse Masigne ka fa ty hery nimean’Andrianagnahare aze ro nahavita’e i fahagagagne rey. Nirehafe i apostoly Petera fa i Jesosy, le “lahilahy nabaribarin’Andrianagnahare tama’areo eo tamy ty fahagagagne naho fambara vaho famantaragne. Tamy ty alala’e ro nanoan’Andrianagnahare izay tama’areo eo, sady fanta’areo soa zay.” (Asan’ny Apostoly 2:22) Nisy fotoagne ka reke nirehake fa “nihosoran’Andrianagnahare tamy ty fagnahy masigne naho ty hery reke [Jesosy]. Sady nahatsitsike tane maro naho nanao soa reke, le nagnasitragne ze ndaty nampijalé i Devoly, satria nagnampe aze ty Andrianagnahare.”​—Asan’ny Apostoly 10:37, 38.

Mateteke ka ty Jesosy ro nanao fahagagagne naho fa nampianatse. Rehafegne amy Marka 1:21-27 ao ty fihetse o ndatio, naho fa naharey ty fampianara i Jesosy sady nahatrea ty fahagagagne natao’e. Rehafe ty Marka 1:22 fa “niveren-draha noho ty fomba fampianara’e” o ndatio, sady “gaga” naho fa namoake demonia reke, arake ty andine’e faha-27. Niporofoe ty asa lahibey natao i Jesosy naho ty fampianara’e fa ireke i Mesia nampitamaegney.

Tsy nirehake avao ty Jesosy tie ireke o Mesiao. Ankoatse ty raha nirehafe’e naho ty raha natao’e, le nagnaporofo ty naha Mesia aze ka ty hery nimean’Andrianagnahare aze mba hanoa’e fahagagagne. Naho fa nisy nisalasala ty amy i fahefa’ey, le sahy reke ty namale tihoe: ‘Faie managne porofo lahibey noho ty porofo nimea i Jaona raho, satria i asa nanendrea i Babako ahỳ ro ataoko hinane zao. Sady ze asa ataoko zay ro magnaporofo fa nirahe i Baba raho.”​—Jaona 5:36.

Porofo fa Tena Nisy i Fahagagagney

Nagnino tikagne ro mahazo antoke fa tena nanao fahagagagne ty Jesosy? Dineho ty porofo retoagne.

Tsy nisarike ty say o ndatio ho amy ty tegna’e ty Jesosy, naho fa nanao asa lahibey. Natao’e avao ty hagnomeagne voninahitse naho dera an’Andrianagnahare. Taloha ty nampagnentea i Jesosy ty maso ty goa raike ohatse, le nihamafese’e fa “mba hampisehoagne ty asan’Andrianagnahare ama’e ty anto izay.”​—Jaona 9:1-3; 11:1-4.

Tsy manahake o mpanao mazỳ io ndra ty mpagnasitragne fitrea amy izao ty Jesosy. Tsy nampiasa hipnotisma ndra fitake reke, ndra nanao fihetseketsehagne bey, ndra nampiasa rehake majika, ndra fombafomba manaitse. Sady tsy mba ninonino fahatane reke ro tsy nampiasa raha niheveregne fa masigne. Mareho ohatse fa raha tsotra avao ty natao’e, naho fa nampagnente ty maso i goa roe lahy rey reke. Hoe tasa i fitantaragney: “Nitretré aze ty Jesosy le nikasike ty maso’e. Le avy le nahatrea iareo le nagnorike aze.” (Matio 20:29-34) Tsy nisy fombafomba ndra fihetseketsefagne bey tamy izay. Nanao fahagagagne tagnatreha o ndaty eo ka reke, sady tsy nisy tafiagne ndra jiro manokagne nampiasaegne. Misy mirehake fa nao mahavita fahagagagne ka tie amy izao, ie amy izao tsy misy porofo magnamaregne izay.​—Marka 5:24-29; Lioka 7:11-15.

Kindraike ty Jesosy le nagneke fa nanam-pinoagne i ndaty nandrambe soa boake amy i fahagagagne natao’e rey. Faie nahavita nanao fahagagagne avao reke, ndra tie tsy nanam-pinoagne aza i ndatỳ. Tamy ireke ta Kapernaomy tagney ohatse, le ‘nientegne tama’e teo i ndaty maro nisy demoniay. Nirehake avao reke, le niakatse i fagnahy raty rey. Nisitragne’e iaby ze narare.’​—Matio 8:16.

Nagnomey fahafaham-po ze raha tena nilae o ndatio i fahagagagne natao i Jesosỳ, fa tsy natao hampifalefaleagne ze te hahafanta-draha avao. (Marka 10:46-52; Lioka 23:8) Tsy nipay ty ho tombotsoa ty tegna’e manokagne reke, naho fa nanao fahagagagne.​—Matio 4:2-4; 10:8.

Azo Atokisagne vao o Filazantsarao?

I Filazantsara efatse rey ty nampahafantatse antikagne i fahagagagne natao i Jesosỳ. Toko’e hatoky ze voarehake ao vao tikagne? Eka.

Arake ty nirehafegne teo, le tagnatreha o ndaty teo ty nanoa i Jesosy fahagagagne. Mbe velogne ty ankamaroa i ndaty nahatrea maso ze raha rezay, naho fa nanomboke nisorategne i Filazantsaray. Rehafe i boke I Fahagagagne Naho i Famelomagne ty Mate Rey (angilé), fa nirehake ty maregne i mpanoratse Filazantsara rey. Izao ty rehafegne ao: “Tena tsy rare’e ty irehafagne fa namorogne tantara maro miomba ty fahagagagne iareo, sady nampiharo izay tamy ty tantara tena nisy, satria te hampiparitake ty finoa’e. ... Tena nirehake ty maregne iareo.”

Tsy niliere i Jiosy nanohetse o Kristianismao fa tena niseho i asa lahibey rehafegne amy i Filazantsara aoy. I hery nahafahagne nanao izaỳ avao ty nampisalasala iareo. (Marka 3:22-26) Naho fa tafara tatoy, le tsy afake nagnaporofo ka o mpagninje o Kristianaò, fa tsy nanao fahagagagne ty Jesosy. Mifanohetse amy izay aza fa nisy boke tamy ty taonjato voaloha’e naho faharoe A.K. nirehake miomba i fahagagagne rey. Tena azontikagne itokisagne areke ty raha rehafe o Filazantsarao miomba i fahagagagne natao i Jesosỳ.

Ty Toetse i Ndaty Nanao Fahagagagney

Tsy ampe ty mandineke i fahagagagne natao i Jesosy rey, naho mionogne amy ty porofo magnamaregne izay avao tikagne. Naho fa mirehake ty asa lahibey natao i Jesosy o Filazantsarao, le mirehake fa ndaty nanagne fihetseham-po laleke reke. Trea ao ka fa tsy nisy ndaty nahay nitretré naho tena nikarakara ze hahasoa ty hafa manahake i Jesosy.

Dineho ohatse ty raha niseho naho fa nisy boka nagnarine i Jesosy, sady nihalale ama’e hoe izao: “Naho mba tea’o ty hagnasitragne ahy, le ho vita’o zay.” “Nitretré aze” ty Jesosy, le naampa’e i tagna’ey sady nikasike aze, le nirehake tihoe: “Teako zay. Maliova rehe.” Le avy le nisitragne i lahilahỳ. (Marka 1:40-42) Trea boake amy izay fa nahay niarake ore tamo o ndatio ty Jesosy. Izay ty nandrisike aze hampiasa i hery nimean’Andrianagnahare azey mba hanoagne fahagagagne.

Ino ty natao i Jesosy naho fa nifankatrea tamy i mpandevegne boake tamy ty tanà i Nainay reke? Ty ana-dahy i vantotsey ro nimate tamy izay. “Nitretré” i ampelay ty Jesosy, le niharine aze, sady nirehake tihoe: “Ko tomagny sasa.” Naho fa niavy eo, le nivelome’e tamy ty mate i ana-dahi’ey.​—Lioka 7:11-15.

Ino ty ianarantikagne boake amo o fahagagagne natao i Jesosy rehoe? “Nitretré” reke, sady nagnampe o ndatio. Mampahery vata’e zay! Faie tsy tihoe tantara avao i fahagagagne rey. Rehafe ty Hebreo 13:8 fa “tsy miova ty Jesosy Kristy tie omale naho androany vaho nainai’e.” Fa mpanjaka an-dagnitse agne reke tie amy izao. Sady vognogne reke ro afake mampiasa i hery nimean’Andrianagnahare azey, mba hanoagne raha maro mandikoatse ty fa natao’e tan-tane etoy. Tsy ho ela reke, le hagnasitragne ze ndaty mpankatò. Ho fale o Vavolombelo i Jehovah-o hampianatse azo miomba ze fanantenagne tena fanjaka zay.

[Sare]

Nampiseho ty “hery lahibein’Andrianagnahare” i fahagagagne natao i Jesosy rey

[Sare]

Nanagne fihetseham-po laleke ty Jesosy