Jesúsiri milagruecha: ¿Ambeksïni jorhendasïni?

AMBERIJTSÏ chá no mítepka eska enga Biblia uandajka Jesúsiri irekueri ambe jiáni enga echerirhu jámani japka, no nani úrasïndi uandakua enga griegu jimbo úrakuarhijka para “milagru”. Uandakua griegu jimbo enga ísï tradusirikuarhijka komu “milagru”, jindeesti dý na·mis” enga arhikuekajka “uinhapikua” (Lukasʌ 8:46) ka enga ístu úpiringa tradusirikuarhini komu ‘kʼérati úkuecha’ (Mateo 11:20, TNM nota). Jorhenati ma uandaspti eska i uandakua, “xarhatasïnga ima kʼéri ambe enga úkuarhika, peru eska sánderu xarhatasïnga imani uinhapikua enga jingoni úkuarhika. Ima kʼéri ambe enga úkuarhika, xarhatasïndi Tata Diosïri uinhapikua enga méntku úni jarhajka ambe ma”.

Máteru uandakua griegu jimbo enga sáno májkuenika, jindeesti té ras, enga tradusirikuarhijka komu: kʼéri ambe o ambe ma enga ísku pakataajka kʼuiripuechani. I uandakua, sánderu ambe arhikuekasïndi na engaksï pakarajka imeecha engaksï exejka ambe enga úkuarhika. Sáno méntkisï, kʼuiripuecha ka ístu Jesúsiri chúxapatichaksï ísku pakarasïrendi engaksï exenga milagruechani enga ima uáuenga (Markusʌ 2:12; 4:41; 6:51; Lukasʌ 9:43).

Máteru uandakua griegu jimbo para Jesúsiri milagruechani arhikuekani, jindeesti sē·méi·on o “minda”. Teologo Robert Deffinbaugh, uandasïndi: “Inde uandakua sánderu ambe arhikuekasïnga ambe engamindu arhikuekajka milagru ma. Míndechaksï jindeesti milagruecha engaksï jorhentpijka jurhimbikua ambe juchaari Tata Jesukristueri ambe”.

¿Tata Diosïri uinhapikua jimboksï úkuarhispi o máteru ambe jimbo?

Biblia no uandasïndi eska ima milagruecha enga Jesúsi uaapka, majia ambeespka nomasi para kʼuiripuecha exeni jarhani. Sánderu sési, ima milagruechaksï enga Jesúsi uaapka, xarhataspti “na enga xáni kʼéri ambeeka [Tata] Diosï”, komu jiáni enga demoniuni ma petarhitantapka tumbini ma (Lukasʌ 9:37-43). Para Tata Diosï no sáni úkua jukasti indeni ambe úni jimboka ima iámindu ambe úsïnga úni ka ‘kʼéri ka ambakiti uinhapikua jatsisti’ (Isaías 40:26).

Nájkiruka Ebanjeliuecharhu jukari 30 Jesúsiri milagruechani uandaajka, peruchi míteska eska ima uánikua máteru milagruechani uaaspka. Por ejemplu, Mateu 14:14 uandasïndi eska Jesúsi exeaspka “uánikua kʼuiripuechani ka pʼamojkuaspti, ka ambakeraantaspti imeechani engaksï pʼamenchani japka”, peru no uandasïndi namunispiksï pʼamenchaticha enga ambakeraantapka.

Jesúsiri milagruechaksï xarhataspti eska Tata Diosïri Uájpeespka, ima Mesíasi enga jupiringa. Biblia uandasïndi eska ima milagruecha enga Jesúsi uaapka, Tata Diosïri uinhapikua jimboespti. Apostoli Pedru uandaspti eska Jesúsi jindeeska ima “acheeti enga [Tata] Diosï xarhatapka chánksïni japarini eska imanisï íntskupka juramukua, jimboka imani jimbo chánksïni japarini kʼérati ambe uaaska, ka ístu milagruechani ka míndechani eska chájtu na mítetini jakaia” (Ukuecha [Hechos] 2:22). Tátsekua, ménderu Pedru uandaspti eska jiáni enga Tata Diosï na míndapkia Jesúsini “espiritu santu jimbo ka imeeri uinhapikuani jimbo”, eska ima jámasïreenga “ambakiti ambe úni, ka ambakeraantani iámindu pʼamenchatichani enga Noambakiti mínguarhiatini jatsiapka, jimboka [Tata] Diosï imani jingonispka” (Ukuecha [Hechos] 10:37, 38).

Jesúsiri milagruecha, terukuntasïreendi imani ambe jingoni enga ima aianhpienga. Markusʌ 1:21-27 uandasïndi ambe engaksï úpka kʼuiripuecha engaksï kurhaapka Jesúsiri aianhperakuani ka ístu engaksï exepka ma imeeri milagruni. Bersikulu 22 uandasïndi: “Kʼuiripuecha ískuksï pakarasïrendi eratsentani imeeri jorhentpikuani jimbo”, ka ménderu bersikulu 27 uandasïndi eskaksï ‘iámindu kʼuiripuecha ísku pakaraspka eratsentani’ engaksï exepka eska Jesúsi petarhitantaspka demoniuni ma. Jesúsiri milagruecha ka ambe enga aianhpienga, sési xarhatasïreendi eska ima jindeespka Mesíasi enga aiatspinhapka.

Jesúsi no solu uandaspti eska Mesíasispka, sino xarhataspti eska ísïispka imani ambe jimbo enga úpka ka uandani, komu ima milagruecha enga Tata Diosïri uinhapikua jimbo uaapka. Engaksï máru kurhamarhipka andisï ueeni imani ambe, ima no sáni chéparini mókukuaspti: “Ji jatsiska máteru ambe enga sánderu xarhatajka juchiiti ambe ka eska enga Juanu uandantaka, jimboka ima úkuecha engareni Taati enkargariaka parani uaani, ima mismu xarhatasïnga eskarini Taatisï axaka” (Juanu 5:​36).

¿Meru ísï úkuarhispi?

¿Nénachi uaa seguru jarhani eskaksï Jesúsiri milagruecha meru ísï úkuarhispka? Ju je exeni nénachi uaa seguru jarhani.

Enga Jesúsi milagruechani uaapka, no méni uandaspti eska imeeri uinhapikua jimboespka. Méni enga ueenga ambe ma, úsïreendi eska Tata  Diosï k’éri ambe arhinhapiringa. Pori ejemplu, ante de tsinani acheetini ma enga sieguepka, uandaspti eska úxapka indeni ambe para eska indeni jimbo xarharapiringa Tata Diosïri úkuecha (Juanu 9:1-3; 11:1-4).

Jarhasptiksï máru engaksï uandeenga eskaksï uásïrenga milagruechani, peru Jesúsi méntku ménderuenisti eska imeecha. Jesúsi no úrasïreendi majia, ni sïkuamikua ambe, ni úreeni máteru jásï ambe para kʼuiripuechani tsinani. Exe je ambe enga úpka para tsimani sieguechani tsinani: “Jesúsi pʼamojkuaspti, ka pʼánharhikuaspti éskuecharhu, ka sóntkuksï éskantaspti, ka seguirisptiksï chúxapani imani” (Mateu 20:29-34). Enga ini milagruechani uaapka, no ma ambe úraspti nijtu máteru jásï ambe úni. Ístu, no úspti i ambe paraksï máteruecha kʼéri ambe exeni. Uánikua kʼuiripuechaksï exespti enga Jesúsi milagruechani uaapka. Peru ima méntku ménderuenispti imani kʼuiripuecha jingoni engaksï iásï uandajka eskaksï uásïnga milagruechani ka astaksï esenariu ambe peerani lusicha jingoni ka mámaru ambe jingoni, joperuksï no úsïndi xarhatani eska milagruecha engaksï uaajka, sési jimboeska (Markusʌ 5:24-29; Lukasʌ 7:11-15).

Jesúsi úsïreendi tsinaani imani kʼuiripuechani engaksï mintsikeenga imani, joperu nájkiruka nema no mintsikapiringa, inde ambe no ójkutasïreendi Jesúsini para úni tsinaani. Enga Jesúsi Capernaum japka jini Galilea, kʼuiripuechaksï juákuaspti “uánikua engaksï noambakitiri espirituechani jukaratiani japka. Ka ima petarhitaantaspti noambakitiri espirituechani uandakua jimbojku, ka ambakerantaaspti iámindu pʼamenchatichani” (Mateu 8:16).

Jesúsi uaaspti milagruechani jimboka meru uékasïreenga kʼuiripuechani jarhuataani ka no para ima kʼéri ambe exenhani (Markusʌ 10:46-52; Lukasʌ 23:8). Ístu, ima milagruechani enga ima uaapka, no jindeespti para andani ambe ma (Mateu 4:2-4; 10:8).

¿Uaachi mintsikani ambe engaksï Ebanjeliuecha uandajka?

Engachi arhiantajka tʼámu Ebanjeliuechani, niárasïngachi míteni imani milagruechani enga Jesúsi uaapka. Peru, ¿uaachi mintsikani ambe engaksï uandajka Jesúsiri milagruecheri ambe? Jo, uaakachi.

Eskachi na uandakia, uánikua kʼuiripuechaksï exeaspti Jesúsiri milagruechani ka sáno iámindu, útasïksï irekaxapti jiánisï engaksï máru Ebanjeliuecha karanhapka. Para xarhatani eskaksï jurhimbikua ambe karaspka imeecha engaksï Ebanjeliuechani karaapka, libru Los milagros y la resurrección (The Miracles and the Resurrection) uandasïndi: “No sési japirindi uandani eskaksï imeecha engaksï Ebanjeliuechani karaapka, chkuanderakua ambeksï uandaspka milagruecheri ambe nomasi para xarhatani eska sési jarhaspka ambe engaksï imeecha jakajkuenga. Ima kararicha, jurhimbikua ambeksï karaspti”.

Ima judiuecha engaksï no jiókuarhienga Kristueri ambe, nóksï méni uandaspti eskaksï milagruecha engaksï Ebanjeliuecharhu jaka, nóksï ísï úkuarhispka. Ambe engaksï imeecha uandeenga, jindeespti eskaksï demoniuechaksïsï jarhuateenga Jesúsini para milagruechani uaani (Markusʌ 3:22-26). Ísï tátsekua, nájkirukaksï japka máteruecha engaksï no jiókuarhienga Kristueri ambe, nóksï úspti xarhatani eska chkuanderakua ambeespka Jesúsiri milagruecha. Sánderu sési, jarhastiksï karakatecha engaksï karanhapka dosientu uéxurhinisï tátsekua enga Jesúsi ixú echerirhu jámani japka ka engaksï xarhatajka eskaksï ísï úkuarhiska Jesúsiri milagruecha.

¿Na jásï kʼuiripuespi Jesúsi?

Parachi úni sési kurhanguni ima milagruechani engachi Ebanjeliuecharhu arhiantajka, jatsiskachi para sési míteni imani kʼuiripuni enga uaaka ima milagruechani. Ebanjeliuechajtsïni jorhendasïndi eska Jesúsi kánikua xénchpetispka ka pʼamojpitini, ka eska meru uandanhiasïreenga máteruechani jimbo.

Pori ejemplu, acheeti ma enga lepra pʼamenchani japka niraspti andarhierani Jesúsini paraka jarhuatapiringa ka arhispti Jesúsini: “Engari tʼu uékajka, uaakareni ambakerantani. Ka Jesúsi kánikua pʼamojkuspti imani acheetini ka pʼárhispti ka arhini: ‘Jo uékasïngani, ambakintia’”. Ka ima acheeti jirejiresï ambakentaspti (Markusʌ 1:40-42). I ambe xarhataspti eska Jesúsi uásïrenga milagruechani jimboka xénchasïreenga ka uandanhiani kʼuiripuecha jimbo.

¿Ka ambe úspi Jesúsi jini ireta Naíni jiáni enga exepka eskaksï páxapka jatsintani nemani? Tsïndi ma, uarhiranchaspti ima uájpantku enga kánguarhienga. Enga Jesúsi “exepka imani uarhiitini, lástima úspti”, niraspti andarhierani ka arhispti: “Asï jáma uerani”. Ka tátsekua tsítantaspti tumbini (Lukasʌ 7:11-15).

Kánikuajtsïni sési p’ikuastantasïndi i Jesúsiri milagruecha jimbokajtsïni jorhendasïnga eska ima pʼamojpisïreenga ka jánguarhintasïreenga jarhuataani máteruechani. Ka i milagruechajtsïni íntskusïndi ambakiti erokuarhikua ma para sánderu orhepani. Ebreu 13:8 uandasïndi: “Jesukristu májku jásï jindeesti uitsindekua ka iásï ka méntkisï”. Iásï, ima Reistia auandarhu ka listu jarhastia para sánderu uánikua milagruechani uaani ka eska jiáni enga Echerirhu jámani japka. No ióni jimbo uaati eska ima kʼuiripuecha engaksï Tata Diosïni kurhajchajka, nóteru pʼamenchaakia. Jeobaeri testiguechaksïni tsípikua jingoni jarhuataati jorhenguarhini i xáni ambakiti ambeeri enga no ióni jimbo úkuarhiaka.

[Imajeni]

Jesúsiri milagruechaksï xarhataspti “na enga xáni kʼéri ambeeka [Tata] Diosï”

[Imajeni]

Jesúsi kánikua xénchpetispti ka pʼamojpitini