¿Bintik ya yakʼbat anop te milagroetik la spas te Jesuse?

CHAMNAXNIWAN ya awaʼiy-a te kʼalal ya akʼopon te evangelioetik ta swenta te skuxlejal te Jesús, ma xyalbey skʼoplal ta griego kʼop te kʼopil «milagro». Sbabial, te kʼopil griego dý·na·mis, te ay baeltik ya yichʼ kʼasesel ta «milagro» te ya skʼan ya yal uʼelal (Lucas 8:46) jaʼnix jich ay ya yichʼ alel te ay bin ya snaʼ spasel o ya spas bayal ta chajp aʼteliletik (Mateo 11:20; 25:15). Jtul pʼijil winik, ya yalbey skʼoplal «te machʼa ta yuʼel ya xjuʼ ya yichʼ spasel bayal ta chajp aʼteliletik. Te kʼalal jich ya yichʼ pasele, jaʼ jich ya xchiknaj-a te yuʼel te Diose».

Schebal, te kʼopil es té·ras, te ay ta griego kʼop ya yichʼ kʼasesel jich bitʼil «señahiletic soc jchahp aʼteliletic» (Juan 4:48; Hechos 2:19). Te kʼopil ini jaʼ ya yalbey skʼoplal te bin yaʼiyel ya yaʼiy sbaik te machʼatik ya yilik. Te kʼalal la spas milagroetik te Jesús, te ants winiketik sok te jnopojeletik chamnax yoʼtanik yuʼun (Marcos 2:12; 4:41; 6:51; Lucas 9:43).

Yoxebal, te kʼopil sē·méi·on, o «señal» te ay ta kʼopil griego, jaʼ ya yalbey skʼoplal te milagroetik la spas te Jesús. Te teólogo Robert Deffinbaugh ya yal te «bin swentail te milagro sok jich la yakʼ ta naʼel te bin smelelil la stojol te Jesús».

¿Jaʼbal ta swenta yuʼel Dios?

Te milagroetik la spas te Jesús ma yuʼunuk la smonbey yoʼtan te ants winiketik, jaʼ la yakʼ ta ilel te «smucʼul yuʼel te Diose», jich bitʼil la spas ta stojol te kerem te la slokʼesbey pukuj ta yoʼtan (Lucas 9:37-43). Te milagroetik la yichʼ spasel, ¿wokolbal la yaʼiy spasel te Dios te jaʼ te machʼa «cʼax bayel yip»? ¡Maʼuk! (Isaías 40:26).

Manchukme ta Evangelioetik ya yalbey skʼoplal 35 milagroetik te la spas te Jesús, pero manix naʼbiluk ta lek-a te jayeb la spase. Ta Mateo 14:14 jich ya yal ta swenta te Jesús: «La yil bayel ants-winiquetic, stsʼujet ta yoʼtan la yaʼiy, hich la slecubteslan te jayeb jchameletic tey ayic a», pero ma xyal te jayeb ta jtul chameletik la slekubteslan.

Te milagroetik la spas te Jesús jich la yakʼ ta ilel te yuʼun-nix jaʼ-a te sNichʼan te Dios, te Mesías te albil skʼoplale. Ta Biblia jamal ya yal te jaʼ ta swenta yuʼel Dios te la spas milagroetik. Te jpuk-kʼop Pedro jich la yal ta stojol, «ha te winic te Dios la yacʼ ta ilel ta atojolic te lec scʼoblal; hich la yacʼ ta ilel ta scuenta jchahp aʼteliletic soc señahiletic te Dios la spas ta atojolic ta scuenta, hich te bin utʼil anaʼojique» (Hechos 2:22). Te Pedro jich la yalxan, Dios «la smal ta Chʼul Espíritu soc yuʼel te Jesús [...] soc te bin utʼil behen ta spasel lequil aʼteliletic soc ta scoltayel spisil machʼatic ay swocolic yuʼun te pucuj, como joquimbil yuʼun Dios» (Hechos 10:37, 38).

Te milagroetik la spas te Jesús snitojbey sba skʼoplal sok te bin la yal. Te kʼalal nojpteswan sok te la spas milagroetik, ta Marcos 1:21-27 ya yakʼ ta ilel te bin yaʼiyel la yaʼiy sbaik te ants winiketik. Ta versículo 22, chamnax yoʼtanik te ants winiketik te bitʼil nojpteswan sok ta versículo 27 ya yal te chamnax yoʼtanik te kʼalal la yilik te la slokʼes pukuj ta yoʼtan te winik. Te milagroetik la spas te Jesús sok te bin la yale, la yakʼ ta ilel jaʼ te Mesías te albil skʼoplale.

Te Jesús ma la smuk ta yoʼtan te jaʼ te Mesías, chiknaj ta ilel ta swenta te bin la spas sok te bin la yal, jaʼnix jich te kʼalal la spas te milagroetik ta swenta te yuʼel te Dios. Kʼalal ma la schʼuunik te jaʼ akʼbil yaʼtel yuʼun te sTat, jich la yal: «Pero ay bin ya yalbon jcʼoblal te cʼax hich ay scʼoblal a te bin la yal te Juan: ha te aʼteliletic aʼbibilon yuʼun te Tatil yuʼun ya huʼtes, ha nix te aʼteliletic te yacon ta spasel, ha ya yalbonic jcʼoblal te sticonejon tal te Tatile» (Juan 5:36).

¿Melelbal te jich la spas?

¿Bin yuʼun ya jchʼuuntik te yuʼun-nix la spas milagroetik-a te Jesuse? Kiltik cheʼoxebuk te yuʼun-nix jich kʼot ta pasel-ae.

Kʼalal la spas milagroetik te Jesús, maʼyuk bin-ora la yakʼ sba ta ichʼel ta mukʼ, jaʼ la yakʼ ta ichʼel ta mukʼ te Jehová sok la yalbey yutsil skʼoplal. Te kʼalal mato slekubtes-a te winik te ma xyil kʼinal, la yal te jaʼnax ya xlekub «yuʼun ya xchicnaj yaʼtel Dios ta stojol» (Juan 9:1-3; 11:1-4).

Te Jesús ma jichuk la spas jich bitʼil te magoetik, te j-akʼchameletik sok te espiritistaetik, ma chajpuknax te bin la yakʼtiklan ta ilel sok ma la schʼaytesbey yoʼtan te ants winiketik. Jaʼnix jich ma la stuuntes biluketik yuʼun ya spas milagroetik. Ta sjun Mateo ya yakʼ ta ilel te spekʼelil yoʼtan te kʼalal la slekubtes chaʼtul winiketik te ma xyilik kʼinal, jich ya yal: «Te Jesús la snaʼbe yoʼbolil sbahic, la spicbe te sitic, hich la yilic qʼuinal ta ora soc la stʼunic bahel» (Mateo 20:29-34). Kʼalal la spas te milagroetik, maʼyuk bin chajpnax la spas, maba la yichʼ chʼalel, maba ta muken sok la spas ta komon sitil. Yan stukel te milagroetik ya yichʼ spasel ta kʼajkʼal ini, ma xnaʼbaj bin-utʼil ya spasik (Marcos 5:24-29; Lucas 7:11-15).

Te Jesús la yal te jaʼ lekub te ants winiketik ta swenta te schʼuunel yoʼtanik. Pero teme ay machʼa maʼyuk schʼuunel yoʼtan, ma jaʼuk makot te Jesús ta spasel te milagro. Kʼalal ayin ta Capernaum, «la yiqʼuic tal bayel machʼatic ay pucuj ta yoʼtanic; ta scʼop nax la sloqʼueslan te pucujetic soc la slecubteslan spisil te jchameletique» (Mateo 8:16).

Te bin swentail la spas te milagroetik, ma jaʼuk te ya x-ilot yuʼun te ants winiketik, jaʼ te ya skʼan skoltaylan (Marcos 10:46-52; Lucas 23:8). Te Jesús maʼyuk bin-ora la spas milagroetik yuʼun jaʼnax ya sta yutsil slekil (Mateo 4:2-4; 10:8).

¿Bin ya jnoptik ta swenta te Evangelioetik?

Te milagroetik la spas te Jesús ya jtatik ta chaneb Evangelioetik te la yichʼ tsʼibayel. Jich yuʼun ¿yabal schʼuun koʼtantik te bin ya yal te relatoetik ini? Yak.

Jich bitʼil la jnoptikix, te Jesús la spas ta komon sitil te milagroetik, jaʼnix jich la yichʼ tsʼibayel te evangelioetik te kʼalal kuxulikto-a te machʼatik la yilik. Te libro, The Miracles and the Resurrection (Los milagros y la resurrección) jich ya yal ta stojol te machʼatik la stsʼibayik te Evangelioetik: «Teme ya kaltik te maba jamal la yalik te machʼatik la stsʼibayik te Evangelioetik ta swenta te milagroetik la spas te Jesús, ma stojiluk te bin ya yichʼ alel ta stojolik. [...] Melel te bin la stsʼibayik, jaʼ smelelil».

Te judioetik te la skontrainik te Jesús ma la yalik te ma smeleliluk te bin la yichʼ tsʼibayel ta Evangelioetik. Te bin yuʼun la skontrainik, jaʼ te machʼa ta swenta la spas te milagroetik (Marcos 3:22-26). Jaʼnix jich te jlabanwanejetik ma la yalik te ma smeleliluk te milagroetik la spas te Jesús. Ta sbabial sok ta schebal siglo bayal bin la yichʼ alel ta swenta te milagroetik. Chikan ta ilel te spisil te bin la yichʼ tsʼibayel ta Evangelioetik, yuʼun-nix smelelil-a.

Te Jesús la spas milagroetik

Teme jaʼnax ya yichʼ ilbeyel skʼoplal te pruebaetik ta swenta te milagroetik la spas te Jesús, maba tsʼakal ya xkʼot spisil-abi. Ta Evangelioetik ya yal te milagroetik la spas, te ay skʼuxul yoʼtan, te ya snaʼbey yoʼbolil sba te ants winiketik sok te ya slebey yutsil slekil.

Kiltik te bin la spas te Jesús ta stojol jtul winik te yichʼoj kʼaʼel chamel te jich la yal: «Teme yac acʼane, ya xhuʼ awuʼun te yac alecubteson». «Te Jesús la snaʼbe yoʼbolil sba, la shach scʼab, la spic soc hich la yalbe: Ya jcʼan, acʼa lecubucat. Ora nax chʼay te scʼaʼelchamel» (Marcos 1:40-42). La yakʼ ta ilel te jich ya yaʼiy sba te bitʼil ya yaʼiy sba te yantik, jaʼ-abi jaʼ tijbot yoʼtan ta stuuntesel te yuʼel te talem ta stojol Dios yuʼun ya spas te milagroetik.

¿Bin kʼot ta pasel ta lum Nain te kʼalal ay machʼa bajt smukik? Jaʼ yal te meʼba ants te kerem laje. Te Jesús «tsʼujet ta yoʼtan la yaʼiy» sok jich la yalbey te antse: «Ma xʼocʼat», jich te Jesús la schaʼkuxajtesbey te yale (Lucas 7:11-15).

Te bin ya yakʼ jnoptik ta swenta te milagroetik la spas te Jesús, jaʼ te la snaʼbey yoʼbolil sba sok la skoltay te ants winiketike. Pero te milagroetik la spas, ma jaʼuknax aʼiyejetik. Jich bitʼil ya yal Hebreos 13:8: «Te Jesucristo stalel ay wojey, yoʼtic soc sbahtel qʼuinal». Ta kʼajkʼal ini jaʼ Ajwalil ta chʼulchan sok chapal yuʼun ya spas milagroetik ta swenta te yuʼel te talem ta stojol Dios sok jaʼ bayalxan bin ya spas ta pajel chaʼbej te bitʼil kʼax ta Balumilal. Nopol ya stuuntes te yuʼel yuʼun ya slekubtes te machʼatik ya schʼuunbeyik smantal te Dios. Te testigoetik yuʼun Jehová sok sbujtsʼ yoʼtan ya skoltayat yuʼun ya anaʼbeyxan skʼoplal te bin tʼujbil ya yichʼ pasel ta pajel chaʼbej.

[Fotoetik]

Te milagroetik la spas te Jesús jich la yakʼ ta ilel te «smucʼul yuʼel te Diose»

[Foto]

Te Jesús kʼux ta yoʼtan te ants winiketik