¿Kʼusi chakʼ ta ilel li skʼelobiltak juʼelal la spas Jesuse?

LI TA skʼakʼalil Jesuse, li yajtsʼaklomtak xchiʼuk li yan krixchanoetike labal tajek laj yilik li skʼelobiltak juʼelal o milagroetik la spase (Markos 2:12; 4:41; 6:51; Lukas 9:43). Pe xuʼ van chajakʼbe aba mi melel kʼotanuk ta pasel taje.

¿Mi ta sjuʼel Dios la spas o mi makob satil noʼox?

Li skʼelobiltak juʼel la spas Jesus chal ta Vivliae, maʼuk noʼox makob satil sventa chchʼaybe-o yoʼonton li krixchanoetike, jaʼ skʼelobil li sjuʼel Diose. Jun skʼelobile jaʼo kʼalal li Jesus la slokʼesbe pukuj ta yoʼonton li jun kereme (Lukas 9:37-43). ¿Mi mu spas yuʼun xanaʼ li Dios ti skotol xuʼ yuʼun xchiʼuk ti toj labal sba li sjuʼele? (Isaias 40:26). Ta melel xuʼ yuʼun.

Li ta Evanjelioetike te van 35 skʼelobil juʼelal la spas li Jesuse, pe maʼuk noʼox taje, yuʼun oy to yan skʼelobil juʼelal la spas. Xi chal Mateo 14:14: «Laj yil li epal krixchanoetike xchiʼuk kʼuxubaj ta yoʼonton, vaʼun la xpoxta li buchʼutik ip yuʼunike». Pe muʼyuk chal ti jayvoʼ la xpoxtaane.

Li ta skʼelobil juʼelal la spas Jesuse jamal vinaj ti jaʼ xnichʼon Diose, li Mesias ti albil onoʼox skʼoplale. Li Vivliae jamal chakʼ ta ilel ti te likem tal ta stojolal Dios li skʼelobil juʼelal la spas Jesuse. Xi laj yal li Pedroe: «Viniketik ta Israel, chikintaik li jkʼope: li Diose laj yakʼ lek avilik ti jaʼ la stak tal li Jnasaretal Jesuse, la spas skʼelobiltak juʼelal xchiʼuk kʼusitik labalik sba ta aventaik ta stojolal li Jesuse, jech kʼuchaʼal anaʼojike» (Echos 2:22). Jun veltae, xi laj yal Pedro ta stojolal li Jesuse: «Ti tʼujat yuʼun Dios ta chʼul espiritu xchiʼuk ta juʼelale, [jaʼ sventa] spas batel kʼusi lek ta balumil xchiʼuk ti la xpoxta batel skotol li buchʼutik ilbajinbilik yuʼun li Diabloe; yuʼun te chiʼinbil yuʼun li Diose» (Echos 10:37, 38).

Li skʼelobil juʼelal la spas Jesuse koʼol sbalil xchiʼuk li cholmantal la spase. Li ta Markos 1:21 kʼalal ta 27 chakʼ ta ilel kʼu yelan laj yaʼi sba li krixchanoetik ta skoj ti kʼu yelan chanubtasvan xchiʼuk li skʼelobiltak juʼelal la spase. Ta versikulo 22 chal ti krixchanoetike chʼayal to kʼot yoʼontonik ta skoj ti kʼu yelan chchanubtasvane. Ta versikulo 27 chal ti toj labal sba laj yilik kʼalal la slokʼesbe pukuj ta yoʼonton li jun krixchanoe. Li skʼelobiltak juʼelal la spas Jesus xchiʼuk li cholmantal la spase, jamal chakʼ ta ilel ti jaʼ li Mesias ti albil skʼoplale.

Li Jesuse maʼuk no’ox laj yal ti jaʼ li Mesias ti albil skʼoplale, yuʼun jamal vinaj li ta skʼelobiltak juʼelal la spase. Kʼalal chibal kʼoptaat yuʼun li krixchanoetike, xi la stakʼ li Jesuse: «Oy kʼusi mas tsotsik skʼoplal chkal ti jaʼ mu sta li Juan [j-akʼ-ichʼvoʼe], yuʼun li abtelaletik laj yakʼbun jpas Jtot xchiʼuk li abtelaletik ta jpas jtuke jaʼ chakʼ ta ilel ti jaʼ la stakun tal li Totile» (Juan 5:36).

Sprevailtak ti melelik li skʼelobiltak juʼelal la spas Jesuse

¿Kʼusitik sprevail oy ti melelik li skʼelobil juʼelal la spas Jesuse? Jkʼeltik jun chibuk.

Kʼalal la spas kʼelobil juʼelal li Jesuse, maʼuk sventa labaluk sba x-ile li stuke, laj yal ti jaʼ sventa xichʼ ichʼel ta mukʼ li Diose xchiʼuk ti xichʼ kʼupil kʼoptael ta skoj li jujun skʼelobil juʼelal la spase. Jun skʼelobile jaʼ liʼe, kʼalal mu toʼox xpoxta li jun maʼsat vinike, xi jamal laj yalbe skʼoplale: «Jaʼ sventa xil krixchanoetik li kʼusitik spas yuʼun li Diose» (Juan 9:1-3; 11:1-4).

Li Jesuse jelel xchiʼuk li krixchanoetik ti tspasik skʼelobil juʼelal ta alele, yuʼun muʼyuk la smak satil jech kʼu chaʼal li magoetik xchiʼuk li j-iloletike, muʼyuk la spas li kʼusi xchʼunoj krixchanoetike mi jaʼuk la stunes smetsʼultak sventa xpoxtavan. Akʼbil venta ti muʼyuk kʼusi mas la stunes kʼalal la xpoxta chaʼvoʼ maʼsatetike. Xi chal li Vivliae: «Kʼuxubaj tajek ta yoʼonton li Jesuse, jaʼ yuʼun la spikbe li satike xchiʼuk ta ora noʼox jam, vaʼun la stsʼakliik batel» (Mateo 20:29-34). Li skʼelobil juʼelal la spas Jesuse maʼuk sventa labaluk xa sba skʼoplal x-ile yuʼun li yantike. Jech xtok, te skʼeloj epal krixchanoetik kʼalal la spas li skʼelobil juʼele. Jelel xchiʼuk li krixchanoetik ti chalik ti tspasik skʼelobil juʼel avie, pe ti mu jnaʼtik mi batsʼi melele (Markos 5:24-29; Lukas 7:11-15).

Li Jesuse poxtaj yuʼun li buchʼutik yakʼoj xchʼunel yoʼontonik ta stojolale, jech xtok poxtaj yuʼun li buchʼutik chʼabal xchʼunel yoʼontonike. Jun velta kʼalal te oy ta jteklum Galilea ta Kapernaum li Jesuse, «li krixchanoetike laj yikʼbeik tal li buchʼutik uʼuninbilik yuʼun pukujetike, vaʼun ta jpʼel noʼox kʼop la slokʼes li pukujetike xchiʼuk la xpoxta skotol li buchʼutik chil svokolike» (Mateo 8:16).

Li Jesuse la spas skʼelobiltak juʼelal sventa skolta li krixchanoetike, maʼuk sventa lek xa skʼoplal xkom stuk (Markos 10:46-52; Lukas 23:8). Jech xtok, maʼuk la spas skʼelobiltak juʼelal sventa stabe sbalil stuk (Mateo 4:2-4;10:8).

¿Mi xuʼ jpat-o koʼontontik li kʼusi chal ta Evanjelioetike?

Kʼalal ta jchantik li Evanjelioetike, ep kʼusi chakʼ jchantik ta sventa li skʼelobil juʼelal la spas li Jesuse. ¿Mi xuʼ jpat koʼontontik li ta Evanjelioetik taje? Tana, xuʼ jpat koʼontontik.

Jech kʼuchaʼal laj xa kaltike, li skʼelobiltak juʼelal la spas Jesuse, laj yil epal krixchanoetik. Jech xtok, kʼalal laj yichʼ tsʼibael li baʼyel Evanjeliotike, jutuk mu skotolikuk kuxajtik toʼox li buchʼutik laj yilike. Ta sventa mi melel snaʼ xkʼopojik li jtsʼibajom yuʼun li Evanjeliotike, li livro The Miracles and the Resurrection (Los milagros y la resurrección) xi chale: «Mu xkʼot-o ti jnoptik ti jaʼ jutkʼopetik li jtsʼibajom yuʼun Evanjelioetike, ti jecheʼ la snopik ti la pas skʼelobiltak juʼelal li Jesuse xchiʼuk ti jaʼ noʼox tskʼan chakʼik ta ojtikinel li kʼusitik xchʼunojike, moʼoj, yuʼun melel snaʼ xkʼopojik».

Li judaetik ti tskontrainik li yajtsʼaklomtak Kristoe, muʼyuk bu laj yalik ti muʼyuk bu kʼot ta pasel li skʼelobiltak juʼelal chal ta Evanjeliotike. Li kʼusi laj yalike jaʼ la ti koltaat yuʼun pukujetik sventa xuʼ spas li skʼelobiltak juʼelal li Jesuse (Markos 3:22-26). Ta tsʼakal une, oy xa ox yan krixchanoetik ti lik skontrainik li yajtsʼaklomtak Kristo xtoke, pe muʼyuk bu x-akʼ yuʼunik ta ilel ti mu jechuk ta melel li skʼelobiltak juʼelal la spase. Kʼalal echʼ xa ox chib sien jabil slajel li Jesuse, oy xa ox tsʼibetik ti chalbeik skʼoplal li skʼelobiltak juʼelal la spas Jesus kʼalal liʼ toʼox oy ta balumile. Xuʼ jpat koʼontontik li ta Evanjelioetik ta sventa li skʼelobil juʼelal la spase.

¿Kʼu yelan stalelal echʼ Jesus li ta balumile?

Ti mi jaʼ noʼox la jkʼeltik mi jech o mu jechuk kʼot ta pasel li skʼelobiltak juʼelal la spas Jesuse, xuʼ van oy kʼusitik mu xkaʼibetik smelolal. Sventa xkaʼibetik smelolal li skʼelobiltak juʼelal chalbutik ta Evanjelioetike, skʼan jnabetik skʼoplal kʼu yelan stalelal echʼ li buchʼu la spas li skʼelobiltak juʼele. Li ta Evanjelioetike chalbutik ti Jesuse laj yakʼ ta ilel kʼanelal. Kʼuxubaj ta yoʼonton li krixchanoetike xchiʼuk oy ta yoʼonton tskʼan tskoltaan.

Jun skʼelobile jaʼ kʼalal oy toʼox jun vinik ti tsakbil ta lepra chamele, nopaj batel ta stojolal li Jesuse xchiʼuk xi laj yalbee: «Ti xakʼanuke, xuʼ xapoxtaun». Li Jesuse «kʼuxubaj ta yoʼonton, la syeʼ batel skʼob, la spik xchiʼuk xi laj yalbee: ‹¡Ta jkʼan!; kolan›». Ta ora noʼox kol li vinike (Markos 1:40-42). Taje chakʼ ta ilel ti Jesuse la spas skʼelobiltak juʼelal ta skoj ti skʼanojan li krixchanoetike xchiʼuk ti tskʼan tskoltaane.

Jun velta li Jesuse te la snup ta be epal krixchanoetik ta jteklum Nain. Spoyojik batel jun anima, jaʼ jun noʼox skerem jun ants ti chamem smalale. Li Jesuse «kʼuxubaj ta yoʼonton» li antse, nopaj batel ta stojolal, xi laj yalbee: «Mu xa xa-okʼ». Ta jlikele, la xchaʼkuxesbe li skereme (Lukas 7:11-15).

Tspat tajek koʼontontik kʼalal ta jkʼeltik ta Vivlia ti la spas skʼelobiltak juʼelal Jesus ta skoj ti tskʼan tskolta li krixchanoetike. Li skʼelobiltak juʼelal taje tspat tajek koʼontontik ta sventa li kʼusitik tspas ta jelavele. Xi chal Ebreos 13:8: «Mu snaʼ xjel-o li Jesukristoe, jaʼ jech-o li voljee, li avie xchiʼuk sbatel osil». Li avie, jaʼ xa Ajvalil ta vinajel xchiʼuk chapal xa sventa tspas yan skʼelobiltak juʼelal ti jaʼ xkom to li kʼusitik la spas kʼalal ay liʼ ta balumile. Li Jesuse tstunes sjuʼel sventa skolta li krixchanoetik ti chchʼunik mantale. Li stestigotak Jeovae ta sjunul yoʼonton tskʼan chakʼik avojtikin li kʼusitik lek chkʼot ta pasel ta jelavele.

[Lokʼol]

Li skʼelobiltak juʼelal la spas Jesuse jaʼ chakʼ ta ilel li sjuʼel Diose

[Lokʼol]

Li Jesuse laj yakʼ ta ilel kʼanelal