Cossa che imparemo dei miràcoli che Gesù el ga fato?

FURSI l’è fadiga par ti creder che la Bìblia nela léngua greca ndove se parla dela vita de Gesù nela Tera no la dopera mai la parola “miràcolo”.

La parola greca (dyʹna·mis) che dele volte i la traduse come “miràcolo” la ghe vol dir “poder”. (Luca 8:​46) Anca la pol dir “capacità” o “òpere poderose”. (Mateo 11:20; 25:15) Un studioso el dise che la parola greca “la mostra la òpera poderosa che la ze stata fata e, ancora de pi, el poder doperà par far questa òpera. Quel che sucede l’è spiegà come el poder de Dio in assion.”

Nantra parola greca (teʹras) quasi sempre la ze tradusia come “portento” o “prodìgio.” (Gioani 4:​48; Ati 2:​19) Queste parole le ghe vol dir el efeto che questo el causa par quei che i vede. Tante volte, la moltitùdine e i dissìpoli i restea spaventadi e maraveiadi quando i vedea le òpere poderose de Gesù. — Marco 2:​12; 4:​41; 6:​51; Luca 9:​43.

Quando se parla dei miràcoli de Gesù, la parola greca (se·meiʹon) la vol dir “segnal”. El studioso Robert Deffinbaugh el dise che “questa parola la mostra quel che pròpio el miràcolo el vol dir”. Lu el dise anca: “Un segnal l’è un miràcolo che el mostra una verità sora el nostro Signor, Gesù.”

El poder che Dio el ga dato o magia?

La Bìblia no la parla dei miràcoli de Gesù come se i fusse una màgica par far divertir le persone. Ma i era par mostrar el “grando poder de Dio”, come quel che ga sucedesto con un tosatel che Gesù el ga spulsà un demònio. (Luca 9:​37-​43) Sarà che queste òpere poderose le saria impossìbile par un Dio Tuto Poderoso che l’è mensionà come un Dio che el ga “granda forsa”? (Isaia 40:26) Sicuro che nò!

I Vangeli i parla de intorno de 35 miràcoli che Gesù el ga fato. Ma no se mensiona tuti i miràcoli che lu el ga fato. Par esémpio, Mateo 14:14 el dise: “[Gesù] el ga visto una granda moltitùdine. Lori i ghe fea pecà e el ga guario tuti i maladi.” No savemo dir quante persone che lu el ga curà in quela ocasion.

Queste òpere poderose le mostrea che Gesù l’era pròpio el Fiol de Dio, el Messia che el gavaria de vegner. La Bìblia la mostra che Gesù el ga fato i miràcoli par causa del poder che el ga ricevesto de Dio. El apòstolo Piero el ga ciamà Gesù de ‘un omo che Dio el ga aprovà davanti de valtri con òpere poderose, miràcoli e segnai che Dio el ga fato par meso de lu in meso de valtri, come valtri savé.’ (Ati 2:​22) Nte nantra ocasion, Piero el ga dito che “Dio lo ga scoliesto par esser el Cristo con spìrito santo e poder. Dio l’era con lu. Par quela, lu l’è ndato par tuta la region fando el ben e curando tuti quei che i era soto el poder del Diaol.” — Ati 10:37, 38.

I miràcoli de Gesù i era de acordo col so messàgio. Marco 1:​21-​27 el mostra come la moltitùdine la ga reagio al insegnamento de Gesù e a un dei so miràcoli. Marco 1:​22 el dise che le persone ‘le ze restade tanto maraveiade cola so maniera de insegnar’, e el versìcolo 27 el dise che le persone le ze restade ‘maraveiade’ quando lu el ga spulsà un demònio. Alora, le òpere poderose de Gesù e el so messàgio le ne dà prove de che lu l’era el Messia che el gavaria de vegner.

El pròpio Gesù el ghe parlea ale persone che lu l’era el Messia. Ma cossa che provea che lu l’era pròpio el Messia? El poder che Dio el ghe gavea dato che se podea vederlo nei miràcoli, quel che el disea e quel che el fea l’era una prova che lu l’era el Messia. Quando i ghe ga domandà a Gesù qual che l’era el so ogetivo e de chi che lu el gavea ricevesto la autorità, lu el ga rispondesto: “El testimònio che mi dao l’è pi importante de quel de Gioani, parché i laori che el me Pare el me ga dato par far, i laori che son drio far, i dà testimònio che el Pare el me ga mandà.” — Gioani 5:​36.

Prove che i miràcoli de Gesù i ga pròpio sucedesto

Parché che podemo esser sicuri che i miràcoli de Gesù i ga pròpio sucedesto? Vedemo arquante prove.

Quando Gesù el fea òpere poderose, Gesù no’l ga mai ciamà atension a lu stesso. Par tuti i miràcoli che lu el fea el ghe dea el mèrito e la glòria a Dio. Par esémpio, vanti de curar un orbo, Gesù el ga parlà che la cura la saria fata ‘par mostrar le òpere de Dio’. — Gioani 9:​1-3; 11:​1-4.

Gesù l’è difarente dei màgichi e de quei che i dise che i cura par meso dela fede. Lu no’l ipnotisea mai le persone, no’l doperea mai màgiche e no’l fea mia spetàcoli o riti par farse veder. Lu no’l doperea la superstission gnanca el doperea robe che le persone le considerea sacre. Vedemo la maniera sémplisse che Gesù el ga curà due orbi. ‘I ghe ga fato pecà’, la Bìblia la dise, ‘Gesù el ga tocà i oci de lori e presto i ga scominsià a véderghe, e lori i lo ga seghio’. (Mateo 20:29-​34) No l’è stà un rito, una serimònia e gnanca un spetàcolo. Gesù el fea i miràcoli davanti dele persone e dele volte davanti de tante persone. Lu no’l doperea luce spessial, gnanca un posto de spetàcolo o decorassion. I miràcoli che i dise che i fà ancoi i ze ben difarenti de quei che Gesù el fea, e no i ga come provarli. — Marco 5:​24-​29; Luca 7:​11-​15.

Tante volte Gesù el parlea dela fede dele persone che le era state curade. Ma se ghe manchesse fede a qualchedun, lu el fea el miràcolo stesso. Intanto che l’era in Cafarnaun nela Galilea, “i ghe ga menà tante persone indemoniade. E lu el ga parà via i spìriti con una parola, e el ga curà tuti quei che i era maladi.” — Mateo 8:​16.

Gesù el ga fato i so miràcoli par giutar le persone e nò sol par contentar le persone che li vedea. (Marco 10:46-​52; Luca 23:8) Gesù no’l ga mai fato un miràcolo col ogetivo de benefissiarse lu stesso. — Mateo 4:​2-4; 10:8.

Cossa che i dise i Vangeli?

Savemo dei miràcoli de Gesù par meso dele pàgine dei Vangeli. Quando che esaminemo i miràcoli de Gesù, sarà che ghemo motivi par fidarse? Si.

Come ghemo parlà vanti, i miràcoli de Gesù i ze stati fati davanti de tante persone. I primi Vangeli i ze stati scriti nte una època che tante persone che le ga visto i miràcoli de Gesù le era ancora vive. Parlando dela onestità dei scritori dei Vangeli, el libro The Miracles and the Resurrection (I Miràcoli e la Ressuression) el dise: “Saria una falsa acusassion dir che i scritori dei Vangeli i gàpia sconto aposta quel che ga pròpio sucedesto par parlar de una mùcia de miràcoli, col ogetivo de far propaganda dela fede religiosa.  . . El so ogetivo l’era registrar quel che gavea pròpio sucedesto.”

I giudei che i era contra i cristiani no i ga mai bio dubi dei miràcoli mensionadi nei Vangeli. Lori sol i gavea dubi del poder che l’era doperà par far i miràcoli. (Marco 3:​22-​26) Gnanca quei che i ze vegnesti dopo e che i era contra no i ga podesto dir che no i gavea sucedesto i miràcoli de Gesù. Ma invesse, nel primo e secondo sècolo, ghen’era prove che i miràcoli de Gesù i gavea pròpio sucedesto. Alora, ghemo tuti i motivi par creder che i miràcoli de Gesù i ze veri.

El omo che el ga fato i miràcoli

Se noantri se fermessino a veder sol le prove che le ne mostra se i miràcoli i ga pròpio sucedesto o nò, el stùdio dei so miràcoli no’l saria completo. Scrivendo dele òpere poderose de Gesù, i Vangeli i mostra un omo de sentimenti e de compassion come nissun altro, che el gavea tanto interesse in farghe el ben ai altri.

Vedemo el caso de un leproso desesperà che l’è ndato fin Gesù. Lu el ga suplicà: “Se ti te vol, te pol farme deventar puro”. Gesù el gavea pecà de lu, alora “el ga stirà la man, el ga tocà quel omo e el ghe ga dito: ‘Mi vui! Sìpia purificà’.” El omo l’è restà curà in quel momento. (Marco 1:​40-​42) Gesù el ga mostrà che meterse nel posto dei altri lo ga giutà a doperar el poder che Dio el ghe ga dato par far miràcoli.

Cossa che ga sucedesto quando Gesù el se ga catà cole persone che le ndea interar un morto nela cità de Nain? El gióveno morto l’era el ùnico fiol de una védova. Gesù el ga sentio pecà de questa dona, l’è rivà darente de ela e el ga dito: “Basta de piander”. Dopo, el ga ressussità el so fiol. — Luca 7:​11-​15.

Una roba che imparemo e che ne consola l’è che Gesù ‘el sentia pecà’ dele persone e el fea de tuto par giutarle. Ma questi miràcoli no i ze sol una stòria. Ebrei 13:8 el dise: “Gesù Cristo l’è el medèsimo de gieri, de ancoi e par sempre.” Lu adesso el governa come Rè nel cielo, e l’è pronto e l’è bon de doperar i poderi de far miràcoli che Dio el ghe ga dato de una maniera pi granda de quando l’era qua nela tera come omo. Presto, lu el ndarà doperar i so poderi par curar le persone obediente. Le Testimònie de Geovà le ga caro de giutarte par saver de pi sora questa speransa maraveiosa par el futuro.

[Stampa nela pàgina]

I miràcoli de Gesù i mostra el “grando poder de Dio”

[Stampa nela pàgina]

Gesù l’era un omo de sentimenti profondi