An mga Milagro ni Jesus—Ano an Imo Mahibabaroan?

BANGIN mahipausa ka ha paghibaro nga an mga asoy han Biblia mahitungod han kinabuhi ni Jesus ha tuna waray gud gumamit han orihinal nga pulong para ha “milagro.” An Griego nga pulong (dyʹna·mis) nga usahay iginhuhubad nga “milagro,” nangangahulogan ha literal hin “gahum.” (Lukas 8:46) Mahimo liwat ito ihubad nga “sadang” mabuhat han usa o “mga katingalahan.” (Mateo 11:20; 25:15) Sumala ha usa nga eskolar, ini nga Griego nga termino “nagpapabug-at han gamhanan nga buhat nga nahimo na, ngan, labi na an gahum nga gin-gamit ha paghimo hito. An hitabo iginhuhulagway sugad nga kapahayagan han gahum han Dios nga nagios.”

An usa pa nga Griego nga termino (teʹras) kasagaran nga iginhuhubad nga “urusahon” o “katingalahan.” (Juan 4:48; Buhat 2:19) Ini nga pulong nagpapatin-aw han epekto han milagro ha mga paraobserba. Agsob gud nga nahipapausa an mga tawo ngan an mga disipulo  ha gamhanan nga mga buhat ni Jesus.—Markos 2:12; 4:41; 6:51; Lukas 9:43.

An ikatulo nga Griego nga pulong (se·meiʹon) nga nagtutudlok ha mga milagro ni Jesus nangangahulogan hin “tigaman.” Ito “nakasentro ha mas hilarom nga kahulogan han milagro,” siring han eskolar nga hi Robert Deffinbaugh. Hiya nagdugang: “An tigaman usa nga milagro nga nagsusumat hin usa nga kamatuoran mahitungod han aton Ginoo nga hi Jesus.”

Ilusyon o Hatag han Dios nga Gahum?

Waray ihulagway han Biblia an mga milagro ni Jesus sugad nga mga taktika o mga ilusyon nga gindisenyo basi mapalipay an mga tawo. Mga kapahayagan ito han “daku nga gahum han Dios,” sugad ha kahimtang han usa nga bata nga lalaki, nga tikang ha iya ginpagawas ni Jesus an usa nga demonyo. (Lukas 9:37-43) Ito ba nga gamhanan nga mga buhat magigin imposible para ha Makagarahum-ha-ngatanan nga Dios—an Usa nga iginhulagway sugad nga hura ha ‘daku nga gahum’? (Isaias 40:26) Diri gud!

An mga asoy han Ebanghelyo naghihisgot hin mga 35 nga milagro ni Jesus. Kondi waray isumat an kabug-osan nga kadamu han iya mga milagro. Pananglitan, an Mateo 14:14 nasiring: “Pakakita [ni Jesus] han kadam-an, hiya nahikalooy ha ira, ngan iya pinanambal an ira mga magsakit.” Waray kita sumati kon pira kadamu nga mga magsakit an iya gintambal hito nga okasyon.

Ito nga gamhanan nga mga buhat importante ha pag-angkon ni Jesus nga hiya an Anak han Dios, an iginsaad nga Mesias. Ginpamatud-an gud han Kasuratan nga tungod han hatag-han-Dios nga gahum, hi Jesus nakabuhat hin mga milagro. Gintawag ni apostol Pedro hi Jesus sugad nga “tawo nga pinili han Dios nga iginpakilala ha iyo tungod han mga katingalahan ngan mga urusahon ngan mga tigaman, nga ginbuhat han Dios tungod ha iya ha butnga niyo, sugad han hinbaroan na niyo.” (Buhat 2:22) Ha usa pa nga okasyon, iginpatin-aw ni Pedro nga ‘gindihogan han Dios hiya [Jesus] han espiritu santo ngan gahum; nga hiya naglibot pagbuhat han maopay, ngan panambal han ngatanan nga ginsasakit han yawa; kay an Dios upod ha iya.’—Buhat 10:37, 38.

 An mga milagro ni Jesus importante gud nga bahin han iya pagtutdo. Iginsusumat han Markos 1:21-27 an reaksyon han damu nga mga tawo ha pagtutdo ni Jesus ngan ha usa han iya mga milagro. An Markos 1:22 nasiring nga an damu nga mga tawo “nanhipausa . . . han iya pagtutdo,” ngan an Mar 1 bersikulo 27 nagpapatin-aw nga an mga tawo “nanhipausa” han ginpagawas niya an usa nga demonyo. An gamhanan nga mga buhat ni Jesus ngan an iya mensahe nagpamatuod nga hiya an iginsaad nga Mesias.

Diri la kay siniring hi Jesus nga hiya an Mesias; an hatag han Dios nga gahum nga nakita ha iya mga milagro nagpamatuod han iya pagin Mesias, upod na an iya mga pulong ngan an iya iba pa nga mga buhat. Han binangon an mga pakiana mahitungod han iya katungdanan ngan awtoridad, hi Jesus maisugon nga binaton: “Ako may-ada pagpamatuod nga darodaku han kan Juan [nga Parabaptis]; kay an mga buhat nga ihinatag han akon Amay ha paghuman, ini gud nga mga buhat, nga akon ginhihimo, nagpapamatuod ha nahitutungod ha akon, nga an Amay nagpakanhi ha akon.”—Juan 5:36.

Mga Ebidensya han Pagkatotoo

Kay ano nga makakasiguro kita nga an mga milagro ni Jesus tinuod nga nahitabo, totoo? Tagda an pipira han mga ebidensya han pagkatotoo.

Ha pagbuhat han iya gamhanan nga mga buhat, waray gud ni Jesus daniha an atensyon han mga tawo ngada ha iya. Iya ginsiguro nga kakarawaton han Dios an dungog ngan kadayawan tungod han bisan ano nga milagro. Pananglitan, antes tambalon an usa nga buta nga lalaki, iginpatin-aw ni Jesus nga bubuhaton an pagtambal “basi an buhat han Dios igpahayag pinaagi ha iya.”—Juan 9:1-3; 11:1-4.

Diri pariho han mga ilusyonista, mga mahiko, ngan mga faith healer, waray gud gumamit hi Jesus hin hipnotismo, mga taktika, urusahon hinduro nga mga pagpakita, mga orasyon, o mga rituwal nga nakakabantad ha emosyon. Waray hiya gumamit hin patootoo o hin mga butang nga ginhuhunahuna nga baraan. Tigamni an simple nga paagi han pagtambal ni Jesus ha duha nga buta nga kalalakin-an. “Hi Jesus nalooy,” siring han asoy, iya “kinamkam an ira mga mata; ngan ha kadagmitan hira nakakarawat han ira pagkita, ngan nanunod ha iya.” (Mateo 20:29-34) Waray nahidabi nga rituwal, seremonya, o parayawnon nga pagpakita. Ginbuhat ni Jesus an iya milagroso nga mga buhat ha kadaygan, agsob nga ha atubangan han damu nga magkirita. Waray hiya gumamit hin espesyal nga mga sugâ, entablado, o espesyal nga mga garamiton. Ha kabaliktaran, an tinatawag nga mga milagro yana agsob nga diri mahihimoan hin dokumentasyon.—Markos 5:24-29; Lukas 7:11-15.

Usahay kinilala ni Jesus an pagtoo hadton nagpahimulos ha iya mga milagro. Kondi an kawaray pagtoo han usa ka tawo waray makapugong kan Jesus ha pagbuhat hin milagro. Samtang nakadto hiya ha Kapernaum ha Galilea, “gindara [han mga tawo] ha iya an damu nga mga yawan-on, ngan iya pinapanggowa an mga espiritu ha usa ka pulong, ngan nagkaopay an ngatanan nga mga magsakit.”—Mateo 8:16.

An mga milagro ni Jesus ginbuhat basi matagbaw an aktuwal nga pisikal nga mga panginahanglan han mga tawo, diri basi matagbaw an interes han usa. (Markos 10:46-52; Lukas 23:8) Ngan waray gud maghimo hin mga milagro hi Jesus basi makaganansya ha anoman nga paagi.—Mateo 4:2-4; 10:8.

Masasarigan ba an mga Asoy han mga Ebanghelyo?

Hinbaroan naton an mga kamatuoran mahitungod han mga milagro ni Jesus pinaagi han upat nga Ebanghelyo. May-ada ba mga hinungdan ha pagsarig hini nga mga asoy samtang aton inuusisa an pagkatotoo han mga milagro ni Jesus? Oo, may-ada.

Sugad han ginsiring na, an mga milagro ni Jesus ginbuhat ha kadaygan, ha atubangan han damu nga mga magkirita. An pinakasiyahan nga mga Ebanghelyo iginsurat ha panahon nga buhi pa an kadam-an han mga magkirita hito. May kalabotan ha pagkatangkod han mga parasurat han Ebanghelyo, an libro nga Miracles and the Resurrection nasiring: “An pag-akusar ha mga parasurat han ebanghelyo hin tinuyo nga pagtago han makasaysayan nga kamatuoran ha butnga han damu nga mga istorya mahitungod han ginhuhunahuna nga mga milagro basi maipasamwak an relihiyoso nga pagtoo diri gud makatadunganon. . . . Karuyag nira magin tangkod nga mga parasurat.”

An mga Judio nga nakontra ha Kristianidad waray gud magruhaduha ha gamhanan nga mga buhat nga iginhulagway ha mga Ebanghelyo. Ira la  ginkwestyon an gahum nga ginamit ha pagbuhat hini. (Markos 3:22-26) Bisan an mga kritiko ha urhi nga mga panahon waray makalampos ha pagnigar han mga milagro ni Jesus. Ha kabaliktaran, durante han siyahan ngan ikaduha nga siglo K.P., may-ada mga pag-unabi ha milagroso nga mga ginbuhat ni Jesus. Matin-aw, may-ada kita masasarigan nga hinungdan nga tagdon nga totoo an mga asoy han Ebanghelyo mahitungod han iya mga milagro.

An Tawo nga Nagbuhat han mga Milagro

An pag-usisa ha mga milagro ni Jesus diri magigin kompleto kon ito nga pag-usisa lohikal la nga mga argumento mahitungod han pagkatotoo hito. Ha paghulagway han gamhanan nga mga buhat ni Jesus, iginpapakita han mga Ebanghelyo an usa nga lalaki nga may hilarom nga mga pagbati ngan diri matupngan nga pagpaid, ngan may sinsero nga interes ha kaopayan han mga igkasi-tawo.

Tagda an kahimtang han usa nga sanlahon nga dinaop kan Jesus nga duro nga nanginginyupo: “Kon imo karuyag, makakalinis ka ha akon.” “Tungod han pagkalooy,” gin-unat ni Jesus an iya kamot ngan ginkamkam an sanlahon, nasiring: “Karuyag ko, malinisan ka.” Natambal dayon an lalaki. (Markos 1:40-42) Hini nga paagi iginpakita ni Jesus an empatiya nga nagpagios ha iya nga gamiton an iya hatag han Dios nga gahum ha pagbuhat hin mga milagro.

Ano an nahitabo han iginkatapo hi Jesus hin usa nga prosesyon han lubong nga tigawas ha siyudad han Nain? An patay nga batan-on nga lalaki an amo la nga anak han usa nga balo. Tungod kay “nalooy” hiya ha babaye, dinaop hi Jesus ha iya ngan nagsiring: “Ayaw pagtuok.” Katapos iya ginbanhaw an anak han balo.—Lukas 7:11-15.

An makukuha nga leksyon tikang ha mga milagro ni Jesus nga makakaliaw ha aton amo nga “nalooy” hiya ngan nagbuhat basi buligan an mga tawo. Kondi an sugad nga mga milagro diri kay kasaysayan la. “Hi Jesu-Kristo amo man kakulop, ngan niyan, oo, ngan ha mga katuigan,” siring han Hebreo 13:8. Hiya nagmamando yana sugad nga langitnon nga Hadi, andam ngan may abilidad ha paggamit han iya hatag-han-Dios nga mga gahum ha paghimo hin milagro ha mas makatarag-ob gud nga paagi kay han iya ginbuhat han nakanhi pa hiya ha tuna sugad nga tawo. Ha diri mag-iiha, gagamiton ito ni Jesus ha pagtambal han masinugtanon nga katawohan. An mga Saksi ni Jehova malilipay ha pagbulig ha imo nga mahibaro hin dugang pa mahitungod hinin makalilipay nga paglaom para ha tidaraon.

[Mga Retrato ha pahina 5]

An mga milagro ni Jesus kapahayagan han “daku nga gahum han Dios”

[Retrato ha pahina 7]

Hi Jesus usa nga tawo nga may hilarom nga mga pagbati