E Splendor di Yehova Su Creacion

‘Zomer y Winter Lo No Caba Nunca’

SOLO ta kima den desierto. Na otro parti di tera, solo ta core cu friu despues di winter. Si, e cayente di solo ta un di e factornan principal cu ta influencia clima y temporadanan.

Na varios parti di mundo tin cambio di temporada, y kisas bo mes a yega di experencia nan. Pero ki efecto e temporadanan aki por tin riba bo? Lo bo no keda encanta cu e frescura di lente ora bo mira mata y palo cuminsa floria? Con lo bo sinti bo riba un anochi agradabel di zomer? Lo bo no disfruta di e dianan refrescante di herfst cu nan despliegue briyante di blach’i mata cu ta cambia color? Y e bista di un selva cubri cu sneu lo no tin un efecto trankilisante riba bo?

Kico ta causa cambio di temporada? Pa ta spesifico, esei ta e inclinacion di tera, esta, e echo cu e ta para un tiki schuin riba su as en relacion cu e trayecto di su orbita rond di solo. E inclinacion aki ta mas o menos 23,5 grado. Si no tawata pa e inclinacion aki, lo no tawatin temporada. E clima lo tawata semper mescos. Esaki lo a afecta vegetacion y nan ciclo di produccion di cosecha.

Bo por mira bon cla cu ta e Creador a percura pa cambio di temporada. Dirigiendo su mes na Yehova Dios, e salmista a bisa corectamente: “Ta abo a establece tur frontera di mundo; ta abo a traha zomer y winter.”—Salmo 74:17. *

For di e punto di bista di nos aki riba tera, e posicion di solo, luna y streyanan ta indica bon cla den ki temporada nos ta. Ora Dios a crea nos sistema solar, el a decreta: “Laga tin lusnan na e firmamento di e shelonan . . . , y laga nan sirbi como señalnan y pa temporadanan di aña, y pa dianan y añanan.” (Genesis 1:14) Den transcurso di un aña, tera ta alcansa dos punto den su orbita caminda solo ta para 12 or di merdia stret riba evenaar. E dos ocasionnan aki yama equinox, y den hopi pais nan ta marca e cuminsamento di lente y herfst. Durante e equinoxnan, e periodo di claridad di lus y scuridad ta casi igual rond mundo.

No ta solamente movecion di solo, luna y tera ta causa cambio di temporada. Clima y weer tambe ta hunga un rol, y tur ta combina hunto den un sistema complica cu ta sostene bida. Apostel cristian Pablo y su compañero Barnabas, papiando cu e hendenan cu a biba na Asia Menor—di cua hopi tawata conoce agricultura y produccion di cuminda—a declara cu ta Dios ta esun cu ta “manda awasero for di shelo y tempo di bon cosecha pa boso, y a satisface boso curason cu cuminda y alegria.”—Echonan 14:14-17.

E proceso maraviyoso di fotosintesis ta sostene vegetacion riba tera y matanan microscopico (fytoplankton) den lama. Pa motibo di esaki, e sistema actual cu bestia ta depende di otro pa cuminda (voedselketen) y e red di varios forma di bida ta reacciona riba weer y clima den maneranan sumamente complica. Pablo a mustra aptamente cu ta Yehova su man ta den tur esaki, bisando: “Suela cu ta bebe e awasero cu ta cai cu frecuencia riba dje, y ta produci vegetacion cu ta util pa esnan pa kendenan beneficio e ta wordo cultiva tambe, ta ricibi un bendicion di Dios.”—Hebreonan 6:7.

Si bo djis para y pensa riba kico ta sosode den e luganan caminda lente ta trece temperaturanan agradabel, dianan riba cua claridad ta dura  mas largo, mas solo y bon awasero, e palabra “bendicion” ta haya un nificacion nobo. Flornan ta sali y insectonan ta aparece for di nan refugio di winter, cla pa polinisa flor. Parhanan, manera e blauwe gaai Mericano cu bo ta mira aki, ta yena mondinan cu color y canto, y e paisahe ta yena cu bida. E ritmo di bida ta bai mas lihe; mata nobo ta nace y otronan cu tawata parce morto ta bolbe haya bida. (Cantica di Salomon 2:12, 13) Esaki ta habri caminda pa cosecha por tuma luga na cabamento di zomer of den herfst.—Exodo 23:16.

E manera cu Yehova ta laga planeta tera move—dunando nos dia y anochi, temporadanan y tempo di sembra y di cosecha—ta mustra con maraviyoso su creacion ta. Nos tin sigur cu despues di zomer ta bini winter. Al fin y al cabo, ta Dios mes a priminti: “Mientras cu tera ta permanece, tempo di sembra y tempo di cosecha, y frialdad y calor, y zomer y winter, y dia y anochi lo no caba.”—Genesis 8:22.

[Nota]

[Cuadro/Plachi na pagina 9]

Un ‘Satellite’ Importante pa Bida

Semper luna a inspira y asombra hende. Pero bo tawata sa cu luna tin influencia riba e temporadanan? Presencia di luna ta yuda wanta e grado di inclinacion di tera segun cu e ta drei rond di su as. E cientifico y escritor Andrew Hill a bisa cu esaki ta “yuda produci e condicionnan riba Tera cu por sostene bida.” Si no tawatin un satellite natural grandi pa stabilisa e inclinacion di nos planeta, temperaturanan lo a subi y probablemente haci bida riba tera imposibel. Pesei un team di astronomo a yega na e conclusion cu “bo por bisa cu Luna ta actua manera un posibel regulado di clima pa Tera.”—Salmo 104:19.

[Reconocemento]

Luna: U.S. Fish & Wildlife Service, Washington, D.C./Bart O’Gara

[Plachi na pagina 9]

Camel, Nort Africa y e Peninsula di Arabia