Nagakalipay Ka ba sa “Balaod ni Jehova”?
Nagakalipay Ka ba sa “Balaod ni Jehova”?
“Malipayon ang tawo . . . [kansang] kalipay anaa sa balaod ni Jehova.”—SALMO 1:1, 2.
1. Nganong kita malipayon ingong mga alagad ni Jehova?
SI Jehova nagapaluyo ug nagapanalangin kanato ingong iyang maunongong mga alagad. Tinuod, nag-atubang kita ug daghang pagsulay. Apan, nakatagamtam usab kita ug tinuod nga kalipay. Dili kini ikatingala, tungod kay kita nag-alagad sa “malipayong Diyos,” ug ang iyang balaang espiritu nagpatunghag kangaya diha sa atong kasingkasing. (1 Timoteo 1:11; Galacia 5:22) Ang kangaya maoy kahimtang sa tinuod nga kalipay nga miresulta tungod sa pagpaabot o pagkabaton ug usa ka butang nga maayo. Ug ang atong langitnong Amahan nagahatag gayod kanato ug maayong mga gasa. (Santiago 1:17) Dili ikatingala nga kita malipayon!
2. Unsang mga salmoha ang atong hisgotan?
2 Ang kalipay gipasiugda diha sa basahon sa Mga Salmo. Pananglitan, gipasiugda kini diha sa Salmo 1 ug 2. Ang unang mga sumusunod ni Jesu-Kristo nagtuo nga ang ikaduhang salmo sinulat ni Haring David sa Israel. (Buhat 4:25, 26) Ang wala-hinganli nga tigkomposo sa unang salmo nagsugod sa iyang inspiradong awit pinaagi sa mga pulong: “Malipayon ang tawo nga wala magalakaw sa tambag sa mga daotan.” (Salmo 1:1) Niining artikuloha ug sa sunod, tan-awon nato kon sa unsang paagi ang Salmo 1 ug 2 naghatag kanato ug katarongan nga magmaya.
Ang Yawi sa Kalipay
3. Sumala sa Salmo 1:1, unsa ang pipila ka katarongan kon nganong ang tawong diyosnon malipayon?
3 Ang Salmo 1 nagpakita kon nganong ang tawong diyosnon malipayon. Naghatag ug pipila ka katarongan sa maong kalipay, ang salmista miawit: “Malipayon ang tawo nga wala magalakaw sa tambag sa mga daotan, ug wala magatindog sa dalan sa mga makasasala, ug wala magalingkod sa lingkoranan sa mga mabiaybiayon.”—Salmo 1:1.
4. Unsang sulondan nga dalan ang gisubay ni Zacarias ug Elisabet?
4 Aron tinuod nga magmalipayon, kinahanglang mosunod kita sa matarong nga mga kinahanglanon ni Jehova. Si Zacarias ug Elisabet, kinsa nakabaton ug makalilipayng pribilehiyo nga mahimong mga ginikanan ni Juan Bawtista, maoy “matarong atubangan sa Diyos tungod sa paglakaw nga walay-ikasaway uyon sa tanang sugo ug legal nga mga kinahanglanon ni Jehova.” (Lucas 1:5, 6) Kita magmalipayon kon kita mosubay sa samang dalan ug dili gayod ‘molakaw diha sa tambag sa mga daotan’ o magiyahan sa ilang dili-diyosnong mga tambag.
5. Unsay makatabang kanato sa paglikay “sa dalan sa mga makasasala”?
5 Kon atong isalikway ang panghunahuna sa mga daotan, kita dili ‘motindog diha sa dalan sa mga makasasala.’ Sa pagkatinuod, sa literal kita dili moadto sa mga dapit diin sila magkanunayan—sa mga dapit sa imoral nga kalingawan o sa mga balay sa kahilayan. Komosta kon kita matental sa pagduyog sa mga makasasala diha sa ilang dili-kasulatanhong panggawi? Nan mag-ampo kita alang sa tabang sa Diyos aron molihok nga kaharmonya sa giingon ni apostol Pablo: “Ayaw pagpayugo nga dili timbang sa mga dili-magtutuo. Kay aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit?” (2 Corinto 6:14) Kon kita mosalig sa Diyos ug kon kita “putli ug kasingkasing,” atong isalikway ang espiritu ug estilo sa pagkinabuhi sa mga makasasala ug makabaton ug hinlo nga mga motibo ug mga tinguha, uban ang “pagtuo nga walay pagkasalingkapaw.”—Mateo 5:8; 1 Timoteo 1:5.
6. Nganong angay kitang magbantay labot sa mga mabiaybiayon?
6 Aron mapahimut-an si Jehova, seguradong kita ‘dili gayod molingkod sa lingkoranan sa mga mabiaybiayon.’ Ang uban nagbiaybiay sa pagkadiyosnon mismo, apan niining “kataposang mga adlaw,” ang kanhing mga Kristohanon nga nahimong mga apostata kasagarang napamatud-an nga hilabihan ka mabiaybiayon. Gipasidan-an ni apostol Pedro ang mga isigkamagtutuo: “Mga hinigugma, . . . una sa tanan hibaloi ninyo kini, nga sa kataposang mga adlaw adunay mangabot nga mga mabiaybiayon uban sa ilang mga pagbiaybiay, nga magpahiuyon sa ilang kaugalingong mga tinguha ug magaingon: ‘Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.’” (2 Pedro 3:1-4) Kon kita dili gayod ‘molingkod sa lingkoranan sa mga mabiaybiayon,’ malikayan nato ang katalagman nga seguradong mahitabo kanila.—Proverbio 1:22-27.
7. Nganong angay kitang magpatalinghog sa giingon sa Salmo 1:1?
7 Gawas kon atong patalinghogan ang pangbukas nga mga pulong sa Salmo 1, mahimong mawala ang espirituwalidad nga atong nabatonan pinaagi sa pagtuon sa Kasulatan. Gani, mahimong mograbe pa ang atong kahimtang. Kon sundon nato ang tambag sa daotan, mahimong mosugod pagkawala ang atong espirituwalidad. Unya basin kanunay na kitang makig-uban kanila. Sa ngadtongadto, basin kita mahimo pa ganing dili-matinuohon nga apostatang mga mabiaybiayon. Dayag nga ang pagpakighigala sa mga daotan makapatungha ug dili-diyosnong espiritu sa sulod nato ug makadaot sa atong relasyon uban kang Jehova nga Diyos. (1 Corinto 15:33; Santiago 4:4) Hinaot nga dili gayod nato tugotan nga mahitabo kana kanato!
8. Unsay motabang kanato sa pagsentro sa atong hunahuna sa espirituwal nga mga butang?
8 Ang pag-ampo motabang kanato sa pagsentro sa atong hunahuna nganha sa espirituwal nga mga butang ug sa paglikay sa pagpakig-uban sa mga daotan. “Ayaw kabalaka sa bisan unsang butang,” misulat si Pablo, “apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” Ang apostol nagdasig sa pagkonsiderar sa mga butang nga matuod, maugdang, matarong, maputli, hiligugmaon, dungganon, hamili, ug dalayegon. (Filipos 4:6-8) Hinaot nga kita molihok nga kaharmonya sa tambag ni Pablo ug dili gayod mopaubos sa atong moralidad aron mahisama sa mga daotan.
9. Bisan tuod likayan nato ang daotang mga buhat, sa unsang paagi kita maningkamot sa pagtabang sa tanang matang sa mga tawo?
9 Bisan tuod isalikway nato ang daotang mga buhat, kita mohatag ug mataktikanhong pagpamatuod sa uban, maingon nga si apostol Pablo misulti ngadto sa Romanong Gobernador nga si Felix “bahin sa pagkamatarong ug pagpugong-sa-kaugalingon ug sa paghukom nga moabot.” (Buhat 24:24, 25; Colosas 4:6) Atong ginawali ang maayong balita sa Gingharian ngadto sa tanang matang sa mga tawo, ug ato silang gitagad sa maluloton nga paagi. Kita masaligon nga kadtong “hustong nakiling alang sa kinabuhing walay kataposan” mahimong mga magtutuo ug magkalipay sa balaod sa Diyos.—Buhat 13:48.
Siya Nagakalipay sa Balaod ni Jehova
10. Unsay makatabang sa pagpatisok sa Kasulatan diha sa atong hunahuna ug kasingkasing panahon sa atong personal nga pagtuon?
10 Mahitungod sa tawong malipayon, ang salmista mipadayon sa pag-ingon: “Ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii.” (Salmo 1:2) Ingong mga alagad sa Diyos, kita ‘magakalipay sa balaod ni Jehova.’ Kon posible, panahon sa atong personal nga pagtuon ug pagpamalandong, kita mahimong mobasa “sa hinayng tingog,” nga litokon ang mga pulong. Ang pagbuhat niini samtang nagabasa sa bisan unsang bahin sa Kasulatan motabang sa pagpatisok niini diha sa atong hunahuna ug kasingkasing.
11. Nganong angay natong basahon ang Bibliya “adlaw ug gabii”?
11 “Ang matinumanon ug maalamong ulipon” nagdasig kanato sa pagbasa sa Bibliya sa adlaw-adlaw. (Mateo 24:45) Tungod sa hugot nga tinguha nga mas masinati sa mensahe ni Jehova alang sa katawhan, maayo nga basahon nato ang Bibliya “adlaw ug gabii”—oo, bisan sa mga panahon nga kita dili makatulog tungod sa usa ka hinungdan. Giawhag kita ni Pedro: “Sama sa mga bata nga bag-o pang nahimugso, ugmara ang pagpangandoy sa walay sambog nga gatas nga iya sa pulong, nga pinaagi niini kamo managtubo ngadto sa kaluwasan.” (1 Pedro 2:1, 2) Malipay ka ba sa pagbasa sa Bibliya sa adlaw-adlaw ug sa pagpamalandong sa Pulong ug mga katuyoan sa Diyos sa magabii? Mao kanay gibati sa salmista.—Salmo 63:6.
12. Unsay atong buhaton kon kita nagakalipay sa balaod ni Jehova?
12 Ang atong dumalayong kalipay nagdepende sa atong pagkalipay sa balaod sa Diyos. Kini hingpit ug matarong, ug adunay dakong ganti sa pagtuman niana. (Salmo 19:7-11) Ang disipulo nga si Santiago misulat: “Siya nga magasud-ong pag-ayo sa hingpit nga balaod nga iya sa kagawasan ug magpadayon diha niana, kini nga tawo, tungod kay siya dili usa ka malimtanong tigpaminaw, kondili usa ka magtutuman sa buluhaton, malipayon siya sa iyang pagbuhat niini.” (Santiago 1:25) Kon kita nagakalipay gayod sa balaod ni Jehova, dili molabay ang adlaw nga dili nato mahatagag pagtagad ang espirituwal nga mga butang. Sa pagkatinuod, matukmod kita sa ‘pagsusi sa lawom nga mga butang sa Diyos’ ug sa pag-una sa mga intereses sa Gingharian diha sa atong kinabuhi.—1 Corinto 2:10-13; Mateo 6:33.
Siya Mahisama sa Usa ka Kahoy
13-15. Sa unsang diwa nga kita mahisama sa kahoy nga gitanom sa daplin sa katubigan?
13 Nagpadayon sa paghubit sa tawong matul-id, ang salmista miingon: “Siya mahisama gayod sa usa ka kahoy nga natanom sa daplin sa kasapaan sa tubig, nga mobunga sa iyang panahon ug ang iyang mga dahon dili malaya, ug ang tanan nga ginabuhat niya magmalamposon.” (Salmo 1:3) Sama sa ubang dili-hingpit nga mga tawo, kita nga nag-alagad kang Jehova makaagom ug mga kalisdanan sa kinabuhi. (Job 14:1) Kita tingali nag-antos sa paglutos ug sa lainlain pang mga pagsulay may kalabotan sa atong pagtuo. (Mateo 5:10-12) Apan, uban sa tabang sa Diyos kita makalahutay niining maong mga pagsulay, sama ra nga ang lig-on nga kahoy makabarog batok sa makusog nga hangin.
14 Ang kahoy nga natanom diha sa dapit diin ang tubig walay-paghubas dili malawos sa ting-init o sa panahon sa hulaw. Kon kita maoy mga tawo nga mahinadlokon sa Diyos, ang atong kusog naggikan sa walay-paghubas nga Tuboran—si Jehova nga Diyos. Si Pablo nangayog tabang sa Diyos ug nakaingon: “Sa tanang butang ako adunay kusog pinaagi kaniya [Jehova] nga naghatag ug gahom kanako.” (Filipos 4:13) Kon kita gigiyahan ug gipalig-on sa espirituwal pinaagi sa balaang espiritu ni Jehova, kita dili malawos, nga mahimong dili-mabungahon o patay sa espirituwal. Kita magmabungahon diha sa pag-alagad sa Diyos ug magpasundayag usab sa bunga sa iyang espiritu.—Jeremias 17:7, 8; Galacia 5:22, 23.
15 Pinaagi sa paggamit sa Hebreohanong pulong nga gihubad ug ‘sama,’ ang salmista migamit ug simile. Iyang gitandi ang duha ka butang nga dili managsama, apan nabatonan niana ang susamang kalidad. Ang mga tawo lahi sa mga kahoy, apan ang pagkalabong sa kahoy nga gitanom sa daplin sa katubigan dayag nga nagpahinumdom sa salmista sa espirituwal nga kauswagan niadtong kansang “kalipay anaa sa balaod ni Jehova.” Kon kita magakalipay sa balaod sa Diyos, ang atong mga adlaw mahisama nianang iya sa kahoy. Sa pagkatinuod, kita mahimong mabuhi sa walay kataposan.—Juan 17:3.
16. Ngano ug sa unsang paagi nga ‘ang tanan nga atong buhaton magmalamposon’?
16 Samtang ginasubay nato ang matul-id nga dalan, si Jehova motabang kanato sa pag-antos sa mga pagsulay ug mga kalisdanan. Kita malipayon ug mabungahon diha sa pag-alagad sa Diyos. (Mateo 13:23; Lucas 8:15) ‘Ang tanan nga atong buhaton magmalamposon’ tungod kay ang atong pangunang tumong mao man ang pagtuman sa kabubut-on ni Jehova. Tungod kay ang iyang mga katuyoan kanunay mang molampos ug kita nagakalipay sa iyang mga sugo, kita mouswag sa espirituwal. (Genesis 39:23; Josue 1:7, 8; Isaias 55:11) Tinuod kini bisan pag kita nag-atubang ug mga kalisdanan.—Salmo 112:1-3; 3 Juan 2.
Ang Daotan Morag Mauswagon
17, 18. (a) Sa unsa gipakasama sa salmista ang mga daotan? (b) Bisan pag ang mga daotan mouswag sa materyal, nganong sila walay dumalayong kasegurohan?
17 Pagkalahi sa kahimtang sa mga daotan nianang iya sa mga matarong! Ang mga daotan mora tingalig mauswagon sa materyal sa mubo nga panahon, apan sila wala mouswag sa espirituwal. Dayag kini diha sa padayong gisulti sa salmista: “Dili ingon niana ang daotan, kondili ingon sa tahop nga ginapadpad sa hangin. Mao nga dili makabarog ang mga daotan sa paghukom, ni ang mga makasasala diha sa pundok sa mga matarong.” (Salmo 1:4, 5) Matikdi nga ang salmista miingon, ‘dili ingon niana ang mga daotan.’ Iyang gipasabot nga sila dili sama sa mga tawong diyosnon, nga bag-o lang gitandi sa mabungahon, tag-as-ug-kinabuhi nga mga kahoy.
18 Bisan pag ang mga daotan mouswag sa materyal, sila walay dumalayong kasegurohan. (Salmo 37:16; 73:3, 12) Sila sama sa dili-makataronganon nga tawong dato nga gihisgotan ni Jesus diha sa usa ka ilustrasyon sa dihang gihangyo siya sa paghukom sa usa ka butang may kalabotan sa panulondon. Giingnan ni Jesus kadtong atua didto: “Bukha kanunay ang inyong mga mata ug pagbantay batok sa tanang matang sa hakog nga pangibog, tungod kay bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” Giilustrar ni Jesus kining puntoha pinaagi sa pag-ingon nga ang yuta sa usa ka tawong dato nagpatungha ug maayo kaayong abot nga tungod niana nagplano siya nga gub-on niya ang iyang mga kamalig ug tukoron ang mas dagkong mga kamalig nga kapondohan sa tanan niyang maayong mga butang. Dayon ang tawo nagplano nga mokaon, moinom, ug maglipaylipay. Apan ang Diyos miingon: “Ikaw nga walay buot, karong gabhiona ilang pangayoon nga mapugsanon ang imong kalag gikan kanimo. Nan, kinsa ang magapanag-iya sa mga butang nga imong gitigom?” Aron sa pagpasiugda sa iyang punto, si Jesus midugang: “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”—Lucas 12:13-21.
19, 20. (a) Hubita ang karaang proseso sa paggiok ug pagtahop. (b) Ngano man nga ang mga daotan gipakasama sa tahop?
19 Ang daotan dili “dato ngadto sa Diyos.” Busa, sila walay kasegurohan ug kalig-on sama sa tahop, ang nipis nga panit sa tipasi. Human aniha ang trigo sa karaang mga panahon, kini dad-on sa giokanan, usa ka patag nga luna kasagaran diha sa dapit nga nabungtod. Didto ang mga balsa nga adunay hait nga bato o puthaw nga ngipon-ngipon diha sa ilawom guyoron sa mga mananap agi sa trigo aron madugmok ang mga dagami ug magbulag ang lugas ug tahop. Dayon, usa ka pala nga pangtahop ang gamiton sa pagpalid niana. (Isaias 30:24) Ang lugas mangahulog ug balik nganha sa giokanan, samtang ang dagami mapalid sa usa ka daplin ug ang tahop mapadpad sa layo. (Ruth 3:2) Human ayaga ang lugas aron makuha ang gagmayng mga bato ug ang uban pang nasagol niana nga wala kinahanglana, kini andam nang ipondo o galingon. (Lucas 22:31) Apan wala na ang tahop.
20 Maingon nga ang mga lugas nangahulog sa yuta ug natipigan samtang ang tahop napadpad, ang mga matarong magpabilin usab ug ang mga daotan pagawagtangon. Apan, seguradong malipay kita nga ang mga mamumuhat ug daotan sa dili madugay mahanaw na sa walay kataposan. Kon wala na sila, ang mga tawo nga nagakalipay sa balaod ni Jehova pagapanalanginan gayod. Sa pagkatinuod, ang masinugtanong katawhan sa ngadtongadto makadawat sa gasa sa Diyos nga kinabuhing walay kataposan.—Mateo 25:34-46; Roma 6:23.
Ang Bulahan nga “Dalan sa mga Matarong”
21. Sa unsang paagi si Jehova ‘nahibalo sa dalan sa mga matarong’?
21 Ang unang salmo natapos niining mga pulonga: “Nahibalo si Jehova sa dalan sa mga matarong, apan ang dalan sa mga daotan mahanaw.” (Salmo 1:6) Sa unsang paagi ang Diyos ‘nahibalo sa dalan sa mga matarong’? Aw, kon kita nagasubay sa matul-id nga dalan, kita makaseguro nga ang atong langitnong Amahan makamatikod sa atong diyosnong pagkinabuhi ug maglantaw kanato ingong iyang inuyonan nga mga alagad. Nan, kita makatugyan ug angayng magtugyan kaniya sa tanan natong kabalaka nga masaligon nga siya may kahingawa kanato.—Ezequiel 34:11; 1 Pedro 5:6, 7.
22, 23. Unsay mahitabo sa mga daotan ug sa mga matarong?
22 Ang “dalan sa mga matarong” magpabilin sa walay kataposan, apan ang mga daotan nga dili magpatul-id mangahanaw tungod sa grabeng paghukom nga ipakanaog ni Jehova. Ug ang ilang “dalan,” o dalan sa kinabuhi, matapos uban kanila. Makasalig kita sa katumanan sa mga pulong ni David: “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:10, 11, 29.
23 Pagkamalipayon nato kon kita makapribilehiyo sa pagpuyo sa paraisong yuta sa dihang ang mga daotan dili na maglungtad! Unya ang mga maaghop ug mga matarong makatagamtam sa tinuod nga pakigdait tungod kay sila kanunayng magakalipay sa “balaod ni Jehova.” Apan, sa dili pa kana matuman “ang mando ni Jehova” kinahanglang ipatuman. (Salmo 2:7a) Ang sunod nga artikulo motabang kanato sa pagsabot kon unsa kanang maong mando ug kon unsay kahulogan niana alang kanato ug sa tibuok tawhanong pamilya.
Unsaon Nimo Pagtubag?
• Nganong ang tawong diyosnon malipayon?
• Unsay nagpakita nga kita nagakalipay sa balaod ni Jehova?
• Sa unsang paagi ang usa ka tawo nahisama sa kahoy nga natanom sa daplin sa katubigan?
• Sa unsang paagi lahi ang dalan sa matarong nianang iya sa daotan?
[Mga Pangutana sa Pagtuon]
[Hulagway sa panid 11]
Ang pag-ampo motabang kanato sa paglikay sa pagpakig-uban sa mga daotan
[Hulagway sa panid 12]
Nganong ang tawong matarong sama sa kahoy?