Abo Tin Delicia den ‘e Lei di Yehova’?

“Bendiciona ta e hende . . . [kende] su delicia ta den e lei di SEÑOR.”—SALMO 1:1, 2.

1. Pakico sirbidonan di Yehova ta felis?

YEHOVA ta yuda nos y ta bendiciona nos como su sirbidonan leal. Aunke nos por haya nos cu hopi prueba, toch nos ta berdaderamente felis. Y esaki no ta nada straño pasobra nos ta sirbi un “Dios felis”, y su spirito santo ta produci goso den nos curason. (1 Timoteo 1:11, NW; Galationan 5:22) Goso ta un sintimento di berdadero felicidad door cu bo a haya un cos bon of ta spera di hay’e. Y nos Tata celestial sigur ta duna nos bon regalo. (Santiago 1:17) Nada straño anto cu nos ta felis!

2. Cua salmonan nos ta bai considera?

² E buki di Salmo ta pone hopi enfasis riba felicidad. Nos ta haya un ehempel di esaki den Salmo 1 y 2. Segun e prome siguidonan di Hesucristo ta Rei David di Israel a skirbi e di dos salmo. (Echonan 4:25, 26) E compositor di e prome salmo—kende su nomber no ta ser menciona—ta cuminsa su cantica inspira cu e palabranan: “Bendiciona [“Felis”, NW] ta e hende cu no ta cana den e conseho di malbadonan.” * (Salmo 1:1) Laga nos mira tanto den e articulo aki como den e siguiente con Salmo 1 y 2 ta duna nos motibo pa alegra.

E Secreto di Felicidad

3. Segun Salmo 1:1, cua ta algun di e motibonan pakico un hende cu ta cumpli cu lei di Dios ta felis?

³ Salmo 1 ta mustra pakico un persona cu ta cumpli cu lei di Dios ta felis. E salmista a duna algun motibo pa e felicidad ei ora el a canta: “[Felis] ta e hende cu no ta cana den e conseho di malbadonan, ni ta para den e caminda di pecadonan, ni ta sinta riba e stul di bofonadonan!”—Salmo 1:1.

4. Ki bida ehemplar Zacarias cu Elisabet tawatin?

⁴ Pa nos por ta berdaderamente felis, nos mester cumpli cu e rekisitonan husto di Yehova. Zacarias cu Elisabet, kendenan tawatin e honor y goso di bira mayornan di Huan Bautista, “tawata husto den bista di Dios y tawata cana ireprochabel den tur e mandamentonan y ordenansanan di Señor.” (Lucas 1:5, 6) Nos por ta felis si nos tambe haci mescos y nenga firmemente di “cana den e conseho di malbadonan” of bai tras di nan conseho pecaminoso.

5. Kico por yuda nos evita “e caminda di pecadonan”?

⁵ Si nos ta rechasa e manera di pensa di hende malbado, nos lo no “para den e caminda di pecadonan.” De echo, nos lo no bai mes e camindanan  cu nan sa frecuenta—den luganan di mal reputacion of caminda tin entretenimento inmoral. Kico nos por haci ora nos ta sinti nos tenta pa join pecadonan den nan conducta cu Bijbel ta condena? Na momentonan asina laga nos pidi Dios pa e yuda nos actua na harmonia cu e palabranan di apostel Pablo: “No uni boso mes den yugo desigual cu incredulonan, pasobra ki compañerismo husticia tin cu inhusticia, y ki comunion lus tin cu scuridad?” (2 Corintionan 6:14) Si nos ta depende riba Dios y tin un “curason puro”, nos lo rechasa e spirito y estilo di bida di pecadonan y nos lo tin motivacion y deseonan limpi, hunto cu “un fe sinsero.”—Mateo 5:8; 1 Timoteo 1:5.

6. Pakico nos mester tene cuidou cu bofonadonan?

⁶ Si nos kier agrada Yehova, definitivamente nos tin cu evita di “sinta riba e stul di bofonadonan.” Algun hende ta haci bofon di e idea so caba cu hende mester cumpli cu lei di Dios, pero den e “ultimo dianan” aki, personanan cu un tempo tawata cristian y cu awor a bira apostata hopi bes ta haci bofon cu asta mas desprecio. Apostel Pedro a spierta su rumannan den fe: “Stimanan, . . . sabi esaki prome cu tur cos, cu den e ultimo dianan bofonadonan lo bin cu nan bofon, siguiendo nan mes pasionnan, y bisando: ‘Unda e promesa di su binida ta? Pasobra desde cu e tatanan a muri, tur cos ta keda mescos cu nan tawata for di principio di creacion.’” (2 Pedro 3:1-4) Door di nunca “sinta riba e stul di bofonadonan”, nos lo evita e desaster cu sigur lo bini riba nan.—Proverbionan 1:22-27.

7. Pakico nos tin cu tuma e palabranan di Salmo 1:1 na pecho?

⁷ Si nos no tuma e palabranan di introduccion di Salmo 1 na pecho, nos lo por perde e balornan spiritual cu nos a haya atrabes di un studio di e Scritura. De echo, nos lo por bai di malo pa piyo. Nos lo por cuminsa bai atras ora nos ta sigui e conseho di e malbadonan. Despues nos por cuminsa asocia cu nan regularmente. Cu tempo, nos por asta bira apostatanan sin fe cu ta haci bofon. Ta obvio cu amistad cu e malbadonan por promove un spirito malbado den nos y por caba cu nos relacion cu Yehova Dios. (1 Corintionan 15:33; Santiago 4:4) Laga nos nunca permiti esei sosode cu nos!

8. Kico lo yuda nos mantene nos mente enfoca riba cosnan spiritual?

⁸ Oracion lo yuda nos tene nos mente enfoca riba cosnan spiritual y evita di sera  amistad cu hende malbado. Pablo a skirbi: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” E apostel a anima cristiannan pa pensa riba loke ta berdadero, honorabel, husto, puro, bunita, di bon fama, birtuoso y digno di alabansa. (Filipensenan 4:6-8) Laga nos actua na harmonia cu e conseho di Pablo y nunca baha na nivel di e malbadonan.

9. Aunke cu nos ta evita practicanan malbado, con nos ta purba yuda tur tipo di hende?

⁹ Aunke nos ta rechasa practicanan malbado, nos ta duna testimonio cu tacto, mescos cu apostel Pablo a papia cu gobernado Romano Felix “tocante di husticia, dominio propio y e huicio cu ta bin.” (Echonan 24:24, 25; Colosensenan 4:6) Nos ta predica e bon nobo di e Reino na tur tipo di hende, y nos ta trata nan na un manera amabel. Nos tin e confiansa cu esnan cu tin “e disposicion corecto pa bida eterno” lo bira creyente y haya delicia den e lei di Dios.—Echonan 13:48, NW.

E Tin Delicia den e Lei di Yehova

10. Kico lo yuda nos graba e lei di Dios den nos mente y curason durante nos studio personal?

¹⁰ Relaciona cu e homber felis, e salmista ta bisa mas aleu: “Su delicia ta den e lei di SEÑOR, y den su lei e ta medita [“lesa na bos abou”, NW] di dia y anochi.” (Salmo 1:2) Como sirbidonan di Dios, nos tin ‘delicia den e lei di Yehova.’ Si ta posibel, durante e oranan cu nos tin nos studio personal y ta medita, nos por “lesa na bos abou”, pronunciando e palabranan. Ora nos ta haci esaki na momento cu nos ta lesa cualkier parti di e Scritura, esei lo por yuda nos graba e lei di Dios den nos mente y curason.

11. Pakico nos tin cu lesa Bijbel “di dia y anochi”?

¹¹ “E esclabo fiel y prudente” a bin ta anima nos pa lesa Bijbel tur dia. (Mateo 24:45) Como cu nos tin un deseo fuerte pa conoce Yehova su mensahe pa humanidad miho, lo ta bon pa nos lesa Bijbel “di dia y anochi”—si, asta ora cu pa un motibo of otro nos no por pega soño. Pedro a urgi nos: “Mescos cu yiunan resien naci, anhela na e lechi puro di e palabra, asina cu pa medio di dje boso por crece den salbacion.” (1 Pedro 2:1, 2) Abo tin delicia den lesa Bijbel tur dia y medita anochi riba Dios su Palabra y propositonan? Esei tawata e sintimento di e salmista.—Salmo 63:6.

12. Kico nos lo haci si nos tin delicia den e lei di Yehova?

¹² Si nos tin delicia den e lei di Dios, nos felicidad lo ta eterno. E lei ta perfecto y husto, y tin un gran recompensa pa esnan cu ta siguie. (Salmo 19:7-11) Disipel Santiago a skirbi: “Esun cu fiha su bista riba e lei perfecto, e lei di libertad, y ta permanece den dje, sin bira un tendedo lubidado, sino un cumplido berdadero, e hende aki lo ta bendiciona [“felis”, NW] den loke e ta haci.” (Santiago 1:25) Si realmente nos tin delicia den e lei di Yehova,  lo no pasa ni un dia sin cu nos ta duna atencion na asuntonan spiritual. En berdad, nos lo ta motiva pa ‘investiga e profundidadnan di Dios’ y tene interesnan di Reino na prome luga den bida.—1 Corintionan 2:10-13; Mateo 6:33.

Lo E Ta Manera un Palo

13-15. Den ki sentido nos por ta manera un palo planta banda di un fuente cu tin hopi awa?

¹³ Den su descripcion mas aleu di e persona recto, e salmista a bisa: “E lo ta manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.” (Salmo 1:3) Nos cu ta sirbi Yehova ta pasa dificultad den bida mescos cu tur otro hende imperfecto. (Job 14:1) Kisas nos ta sufri persecucion y varios otro prueba relaciona cu nos fe. (Mateo 5:10-12) Sinembargo, cu yudansa di Dios, nos por logra wanta e pruebanan aki cu exito, mescos cu un palo saludabel ta soporta bientonan relativamente fuerte.

¹⁴ Un palo planta banda di un fuente cu semper tin awa no ta seca den clima cayente ni durante secura. Si nos ta hende cu ta teme Dios, nos fortalesa ta bini di un Fuente infalibel—Yehova Dios. Pablo a acudi na Dios pa yudansa y por a bisa: “Pa tur cos mi tin e forsa den birtud di esun [Yehova] cu ta duna mi poder.” (Filipensenan 4:13, NW) Ora nos tin e guia y sosten spiritual di Yehova su spirito santo, nos no ta marchita, ni bira improductivo, ni muri spiritualmente. Nos ta productivo den sirbishi di Dios y ta manifesta tambe e fruta di su spirito.—Yeremias 17:7, 8; Galationan 5:22, 23.

¹⁵ Door di uza e palabra Hebreo traduci como “manera”, e salmista a compara dos cos cu ta distinto di otro, pero cu den cierto sentido ta mescos. Hende ta diferente for di palo, pero aparentemente e aspecto bunita di un palo berde tur na blachi, planta banda di un fuente cu tin hopi awa, a recorda e salmista di e prosperidad spiritual di hende cu tin ‘delicia den e lei di Yehova.’ Si nos tin delicia den e lei di Dios, nos dianan por bira hopi manera esnan di un palo. De echo, nos por biba pa semper.—Huan 17:3.

16. Pakico y den ki sentido ‘tur loke nos haci ta prospera’?

¹⁶ Segun cu nos ta hiba un bida recto, Yehova ta yuda nos soporta e presion di prueba- y dificultadnan. Nos ta gososo y fructifero den sirbishi di Dios. (Mateo 13:23; Lucas 8:15) ‘Tur loke nos haci ta prospera’ pasobra nos meta principal ta pa haci e boluntad di Yehova. Siendo cu su propositonan semper ta prospera y nos tin delicia den su mandamentonan, nos tambe ta prospera spiritualmente. (Genesis 39:23; Hosue 1:7, 8; Isaias 55:11) Esaki ta e caso asta ora nos haya nos cu contratiempo.—Salmo 112:1-3; 3 Huan 2.

E Malbadonan Ta Parce di Prospera

17, 18. (a) Cu kico e salmista a compara e malbadonan? (b) Asta si e malbadonan bai dilanti den sentido material, pakico nan no tin siguridad permanente?

¹⁷ Ki un gran diferencia tin entre e destino di e malbadonan y esun di e hustonan! Pa un tempo por parce cu hende malbado ta prospera den sentido material, pero nan no ta prospera spiritualmente. Esaki ta bisto for di e siguiente palabranan di e salmista: “Ma no ta asina cu e malbadonan; nan ta manera bagas cu biento ta supla bai cu ne. Pesei den e huicio e malbadonan lo no keda para, ni pecadonan den e asamblea di e hustonan.” (Salmo 1:4, 5) Ripara cu e salmista ta bisa cu “no ta asina cu e malbadonan.” E kiermen cu e malbadonan no ta manera e hendenan cu ta cumpli cu lei di Dios, y cu a caba di ser compara cu palonan productivo y cu ta biba largo.

¹⁸ Asta si e malbadonan bai dilanti den sentido material, nan no tin siguridad permanente. (Salmo 37:16; 73:3, 12) Nan ta manera e homber rico bobo cu Hesus a menciona den  un ilustracion cu el a conta ora nan a pidie pa interveni den un asunto di herencia. Hesus a bisa e hendenan presente: “Tene cuidou, y warda boso di tur golosidad; pasobra bida di hende no ta consisti di e abundancia di e cosnan cu e tin.” Pa ilustra e punto aki Hesus a papia di e tereno di un cierto homber rico cu a produci asina bon te cu el a plania pa basha su mangasinanan abou y traha otronan mas grandi pa warda tur su bienesnan. Anto e homber a plania pa come, bebe y fiesta. Ma Dios a bis’e: “Abo, bobo! Awenochi mes bo alma lo wordo exigi for di bo; y awor ken lo bira doño di loke bo a prepara?” Pa enfatisa su punto, Hesus a agrega: “Asina ta e hende cu ta montona tesoro pa su mes, y no ta rico pa cu Dios.”—Lucas 12:13-21.

19, 20. (a) Splica con e proceso di bati y bienta grano tawata bai den pasado. (b) Pakico Bijbel ta compara e malbadonan cu bagas?

¹⁹ E malbadonan no ta “rico pa cu Dios.” Pesei, mescos cu bagas—e casca fini di pipita di grano—nan no tin siguridad ni stabilidad. Den antiguedad, despues cu e cunukeronan a cosecha grano, nan tawata bai cu ne na un plenchi di bati maishi, por lo general un area plat situa riba un tereno halto. Einan nan tawata pone bestia hala tabla cu djente di piedra of di hero skerpi bou di nan riba e grano pa kibra e tapushinan na pida pida y los e grano for di e bagas. Despues, nan tawata uza un scop of forki di bienta pa hisa henter e mescla y tir’e na laira contra biento. (Isaias 30:24) E grano tawata cai bek riba e vloer di bati maishi, mientras cu biento tawata supla e garnchinan fini fini di yerba y e bagas bai cu ne. (Rut 3:2) Despues nan tawata pasa e grano door di un sefta pa elimina piedra chikito y otro impuresa, y e ora ei e tawata cla pa warda of mula. (Lucas 22:31) Pero e bagas no t’ei mas.

²⁰ Mescos cu e pipitanan di grano tawata cai riba tera y keda conserva mientras cu e bagas a bula bai, asina e hustonan lo keda y e malbadonan lo ser elimina. Siguramente anto, nos ta contento cu e malbadonan ei lo disparce pa semper. Unabes nan no t’ei mas, hende cu tin delicia den e lei di Yehova lo haya gran bendicion. Realmente, cu tempo humanidad obediente lo ricibi e don di Dios di bida eterno.—Mateo 25:34-46; Romanonan 6:23.

 ‘E Caminda Bendiciona di e Hustonan’

21. Den ki sentido Yehova ‘conoce e hustonan’?

²¹ E prome salmo ta conclui cu e palabranan aki: “SEÑOR conoce e caminda di e hustonan, ma e caminda di e malbadonan lo perece.” (Salmo 1:6) Con Dios ta ‘conoce e hustonan’? Wel, si nos ta hiba un bida recto, nos por ta sigur cu nos Tata celestial ta tuma nota con nos ta cumpli cu su lei den nos bida y ta mira nos como su sirbidonan aproba. Di nos parti, nos por y mester tira tur nos precupacionnan riba dje cu e conviccion cu di berdad e ta percura pa nos.—Ezekiel 34:11; 1 Pedro 5:6, 7.

22, 23. Kico lo sosode cu e malbadonan y cu e hustonan?

²² “E caminda di e hustonan” lo permanece pa semper, pero e malbadonan incorigibel lo perece pa motibo di Yehova su huicio desfaborabel contra nan. Y nan lo caba na nada hunto cu nan “caminda” of sistema di bida. Nos por tin confiansa cu e siguiente palabranan di David lo cumpli: “Aki poco tempo e malbado lo no t’ei mas; maske cuanto bo busca su luga, e lo no t’ei. Ma e humildenan lo hereda e tera, y lo deleita nan mes den pas abundante. E hustonan lo hereda e tera, y lo biba den dje pa semper.”—Salmo 37:10, 11, 29.

²³ Si nos haya e privilegio di por biba den un paradijs riba tera ora e malbadonan no t’ei mas, esei lo duna nos gran felicidad. E ora ei e humildenan y e hustonan lo disfruta di berdadero pas pasobra semper nan lo haya ‘delicia den e lei di Yehova.’ Pero prome cu esei, mester efectua e “decreto” di Yehova. (Salmo 2:7a) E siguiente articulo lo yuda nos mira kico e decreto ei ta y kico lo e nifica pa nos y pa henter e famia humano.

[Nota]

Con Lo Bo Contesta?

• Pakico un persona cu ta cumpli cu lei di Dios ta felis?

• Kico ta mustra cu nos tin delicia den e lei di Yehova?

• Con un persona por ta manera un palo cu ta haya bon awa?

• Ki diferencia tin entre e caminda di e hustonan y esun di e malbadonan?

[Preguntanan di Estudio]

[Plachi na pagina 11]

Oracion lo yuda nos pa no sera amistad cu e malbadonan

[Plachi na pagina 12]

Den ki sentido un persona husto ta manera un palo?