ʼE Koutou Maʼu Koa He Fiafia ʼi “Te Lao ʼa Sehova”?
ʼE Koutou Maʼu Koa He Fiafia ʼi “Te Lao ʼa Sehova”?
“Manuʼia te tagata . . . [ʼaē] ko tona fiafia ʼe ʼi te lao ʼa Sehova.”—Pesalemo 1:1, 2.
1. He koʼe ʼe tou fiafia ʼi totatou ʼuhiga kaugana kia Sehova?
ʼE TOKONI mai Sehova kia tatou pea mo ina tapuakinaʼi tatou heʼe ko tatou ko tana ʼu kaugana agatonu. ʼE moʼoni, ʼe tou tau mo te ʼu faigataʼaʼia lahi, kae ʼe tou maʼu te fiafia moʼoni. ʼE mole fakapunamaʼuli ia te faʼahi ʼaia, heʼe tou tauhi ki “te ʼAtua fiafia,” pea ʼe fakatupu e tona laumālie maʼoniʼoni ia te fiafia ʼi ʼotatou loto. (1 Timoteo 1:11, MN; Kalate 5:22) Ko te fiafia moʼoni ʼe ko te ʼamanaki ki he meʼa ʼe lelei. Pea ko tatatou Tāmai ʼaē ʼe ʼi selo ʼe ina foaki moʼoni mai te ʼu meʼa ʼofa matalelei. (Sakopo 1:17) Ko te tupuʼaga la ʼaia ʼo tatatou fiafia!
2. Ko te ʼu pesalemo fea ʼaē ka tou talanoa anai kiai?
2 ʼE fakahā lelei te fiafia ʼi te tohi ʼo Pesalemo. Pea ʼe talanoa tāfito kiai ia te tohi ʼo Pesalemo kapite 1 pea mo te kapite 2. Neʼe ʼui e te kau ʼuluaki tisipulo ʼa Sesu Kilisito, neʼe ko Tavite te Hau ʼo Iselaele, ʼaē neʼe ina tohi te lua pesalemo. (Gaue 4:25, 26) ʼE mole tou ʼiloʼi te higoa ʼo te tagata ʼaē neʼe ina tohi te ʼuluaki pesalemo, kae ʼe ina kamata tana hiva ʼaki te ʼu palalau ʼaenī: “Manuʼia te tagata ʼaē neʼe mole haʼele ʼi te tokoni ʼa te kau agakovi.” (Pesalemo 1:1) ʼI te alatike ʼaenī pea mo ʼaē ka hoa mai, ʼe tou vakaʼi ai anai te ʼuluaki kapite pea mo te lua kapite ʼo Pesalemo, te ʼu tupuʼaga ʼaē ʼe tonu ke tou fiafia ai.
Te Kalavi ʼo Te Fiafia
3. ʼO mulimuli ki te manatu ʼaē ia Pesalemo 1:1, koteā te ʼu tupuʼaga ʼo te fiafia ʼa he tahi ʼe pipiki ki te ʼAtua?
3 ʼE fakahā ʼi te kapite 1 ʼo te pesalemo pe koʼe ʼe fiafia he tahi ʼe tauhi ki te ʼAtua. ʼAki te hiva neʼe fai e te tagata fai pesalemo, neʼe ina fakahā te ʼu tupuʼaga ʼo te taʼi fiafia ʼaia: “Manuʼia te tagata ʼaē neʼe mole haʼele ʼi te tokoni ʼa te kau agakovi, pea neʼe mole tuʼu ʼi te ala ʼo te kau agahala, pea neʼe mole heka ʼi te hekaʼaga ʼo te hahaʼi vāvā.”—Pesalemo 1:1.
4. Koteā te faʼifaʼitaki lelei neʼe tuku mai e Sakalia pea mo Elisapeta ʼi tonā maʼuli?
4 Ke tou maʼu te fiafia moʼoni, ʼe tonu ke tou maʼuliʼi te ʼu fakatotonu faitotonu ʼa Sehova. Ko Sakalia pea mo Elisapeta, ʼaē neʼe nā maʼu te pilivilesio fakafiafia ke nā liliu ko te ʼu mātuʼa ʼa Soane Patita, “neʼe nā agatonu ia muʼa ʼo te ʼAtua, koteʼuhi neʼe nā fakalogo fakalelei ki te ʼu fakatotonu pea mo te ʼu fakamaʼua ʼa Sehova ʼaē ʼe ʼalutahi mo te lao.” (Luka 1:5, 6, MN ) Kapau ʼe tou mulimuli ki tanā faʼifaʼitaki ʼe feala ke tou maʼuli fiafia pea mo tou tekeʼi mālohi te “haʼele ʼi te tokoni ʼa te kau agakovi” peʼe ko tanatou ʼu tokoni faka ʼaposita.
5. Koteā ʼaē ʼe lava tokoni mai kia tatou ke tou tekeʼi “te ala ʼo te kau agahala”?
5 Kapau ʼe tou fakafeagai ki te manatu ʼa te kau agakovi, ʼe mole tou ‘tutuʼu anai ʼi te ala ʼo te kau agahala.’ ʼIo, ʼe mole tou nonofo moʼoni mo te kau agahala—ʼi te ʼu faʼahi ʼaē ʼe nātou fai ai tanatou ʼu fakafiafia heʼeʼaoga peʼe ko te ʼu koga meʼa ʼaē ʼe fai ai tanatou ʼu aga māmio kovi. Kae e feafeaʼi la mo kapau ʼe tou fia fakatahi mo te kau agahala ʼi tanatou ʼu aga heʼeʼaoga? Tou faikole ki te ʼAtua ke tokoni mai ke feala hatatou fakalogo ki te ʼu palalau ʼaenī ʼa te ʼapositolo ko Paulo: “Aua tautou pipiki tahi mo te hahai e mole tui; pe feafeai te fakatahi a te agatonu mo te agahala? Pe ko te fakatahi fea e maù a te malama mo te fakapouli?” (2 Kolonito 6:14) Kapau ʼe tou falala ki te ʼAtua pea mo “loto maʼa,” ʼe tou tekeʼi anai te aga pea mo te faʼahiga maʼuli ʼa te kau agahala, pea ʼe maʼa anai tatatou ʼu fakatuʼutuʼu pea mo te ʼu meʼa ʼaē ʼe tou holi kiai, pea ko tatatou “tui e mole lohi.”—Mateo 5:8; 1 Timoteo 1:5.
6. He koʼe ʼe tonu ke tou tokakaga ʼo ʼuhiga mo te hahaʼi vāvā?
6 ʼE mahino ia ke leleiʼia tatou e Sehova, ʼe ‘mole tonu ke tou heheka mo te hahaʼi vāvā.’ Ko ʼihi ʼe nātou vāʼi ia nātou ʼaē ʼe fakalogo ki te ʼu lao ʼa te ʼAtua, kae ʼi te ʼu “aho fakamuli” ʼaenī ko te kau Kilisitiano ʼaē kua liliu ko he kau ʼaposita, ʼi te agamāhani ʼe nātou fai he ʼu palalau faka manukinuki. Neʼe fakatokagaʼi fēnei e te ʼapositolo ko Petelo tona ʼu tēhina Kilisitiano: “Kau ʼofaina, . . . [ʼe] koutou ʼiloʼi muʼa te meʼa ʼaenī: ʼi te ʼu ʼaho fakaʼosi ʼe ʼōmai anai te kau vāvā pea mo tanatou manuki, ʼo nātou haʼele ʼo mulimuli pe ki tanatou ʼu holi pea mo ʼui maʼa nātou: ‘ ʼE ʼifea koa tana ʼi henī ʼaē neʼe fakapapauʼi mai? Heʼe talu mai te ʼaho ʼaē neʼe momoe ai tatatou ʼu kui ʼi te mate ko meʼa fuli pe ʼe hoko atu ohage ko te kamataʼaga ʼo te fakatupu.’ ” (2 Petelo 3:1-4, MN ) Kapau ʼe mole tou ‘heheka mo te hahaʼi vāvā,’ pea ʼe mole hoko anai kia tatou te tuʼutāmaki ʼaē ka tō kia nātou.—Tāʼaga Lea 1:22-27.
7. He koʼe ʼe tonu ke tou taupau maʼu te ʼu palalau ʼo te Pesalemo 1:1?
7 Kapau ʼe mole tou taupau te ʼu ʼuluaki palalau ʼo te Pesalemo kapite 1, ʼe feala ke pulinoa totatou maʼuli fakalaumālie ʼaē neʼe tou ako mai te Tohi-Tapu. ʼE feala ke tou fai he ʼu meʼa kovi. Ko te meʼa ʼaē ka tou ʼuluaki fai mokā tou vaivai fakalaumālie, ko te fakalogo ki te tokoni ʼa te kau agakovi. ʼOsi ʼaia pea ʼe tou fakakaugā tuʼumaʼu mo nātou. Pea ʼe feala mo tatou ke tou liliu ko he kau ʼaposita ʼe nātou fai he ʼu manukinuki. ʼE mahino ia, ko te fakakaugā mo te kau agakovi ʼe feala ke fakatupu ai he manatu heʼe lotu ia tatou, pea ʼe feala ke ina maumauʼi tatatou felogoi lelei mo Sehova ʼAtua. (1 Kolonito 15:33; Sakopo 4:4) ʼOfa pe ke ʼaua naʼa hoko he meʼa feiā kia tatou!
8. Koteā ʼaē ka tokoni mai anai kia tatou ke tou manatuʼi tuʼumaʼu te ʼu meʼa fakalaumālie?
8 ʼE tokoni mai anai te faikole ke tou manatuʼi tuʼumaʼu te ʼu meʼa fakalaumālie pea mo tou tekeʼi te ʼu fakakaugā kovi. Neʼe ʼui fēnei e te ʼapositolo ko Paulo: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” Neʼe fakaloto mālohiʼi e te ʼapositolo ko Paulo ke faka maʼuhigaʼi te ʼu meʼa ʼaē ʼe moʼoni, te ʼu meʼa ʼaē ʼe tau mo he fakaʼapaʼapa, te ʼu meʼa faitotonu, te ʼu meʼa ʼaē ʼe maʼa, te ʼu meʼa ʼaē ʼe fakavikiviki, te ʼu meʼa ʼaē ʼe lelei hona talanoaʼi, te vilitute pea mo te ʼu meʼa ʼaē ʼe ke vikiʼi. (Filipo 4:6-8) Tou mulimuli ki te tokoni ʼa Paulo pea ʼaua naʼa tou fakalogo ʼi he temi ki te kau agakovi.
9. Logola ʼe mole tou fai te ʼu aga ʼaē ʼe kovi, kae ʼe tou tokoni feafeaʼi ki te hahaʼi fuli?
9 ʼE tou faka mafola ki te hahaʼi kae ʼe tou fakafeagai ki tanatou ʼu aga kovi, ohage pe ko te ʼapositolo ko Paulo ʼi tana palalau ʼaē ki te Kovana Loma ko Felise “ ʼo ʼuhiga mo te faitotonu pea mo te loto lolomi pea mo te fakamāu ka haʼu.” (Gaue 24:24, 25, MN; Kolose 4:6) ʼE tou faka mafola te logo lelei ʼo te Puleʼaga ki te hahaʼi fuli, pea ʼe tou agalelei kia nātou. ʼE tou falala ko te hahaʼi ʼaē ʼe nātou “lotolelei ki te maʼuli heʼegata” ʼe nātou liliu anai ko ni hahaʼi tui pea mo nātou leleiʼia te lao ʼa te ʼAtua.—Gaue 13:48, MN.
ʼE Fiafia ʼi Te Lao ʼa Sehova
10. Koteā ʼaē ka tokoni mai anai kia tatou ʼi te ʼu temi ʼaē ʼe tou ako takitokotahi ai ke tou manatuʼi tuʼumaʼu ʼi totatou ʼatamai pea mo totatou loto?
10 ʼO ʼuhiga mo te tagata fiafia, ʼe toe ʼui e te tagata fai pesalemo: “Ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po.” (Pesalemo 1:2) ʼI totatou ʼuhiga kaugana ʼo te ʼAtua, ʼe tou ‘fakafiafia ʼi te lao ʼa Sehova.’ Mokā ʼe fealagia, ʼe lagi tou lau “leʼo veliveli” te folafola ʼi te ʼu temi ʼaē ʼe tou ako takitokotahi ai pea mo metitasio ai. Ka tou fai feiā mokā tou lau he ʼu vaega ʼo te Tohi-Tapu, ʼe tokoni mai anai ke tou manatuʼi tuʼumaʼu ʼi totatou ʼatamai pea mo totatou loto.
11. He koʼe koa ʼe tonu ke tou lau te Tohi-Tapu ʼi te “ ʼaho mo te po”?
11 ʼE fakaloto mālohiʼi tatou e te “kaugana agatonu mo poto” ke tou lau te Tohi-Tapu ʼi te ʼaho fuli. (Mateo 24:45, MN ) Mai tona ʼaluʼaga ʼaē ʼe tou faiga mālohi ke mālama lahi age te hahaʼi ki te logo ʼa Sehova, ʼe tonu ke tou lau te Tohi-Tapu ʼi te “ ʼaho mo te po”—ei, māʼiape la mo te ʼu temi ʼaē ʼe mole tou mamoe ai. ʼE fakaloto mālohiʼi tatou fēnei e Petelo: “Ohage ko he ʼu fānau meamea, koutou holi mālohi ki te huʼa pipi maʼa ʼo te folafola, ke feala ʼaki te meʼa ʼaia ke koutou tuputupu ki te hāofaki.” (1 Petelo 2:1, 2, MN ) ʼE koutou fiafia koa mokā koutou lau te Tohi-Tapu ʼi te ʼaho fuli pea mo metitasioʼi te Folafola ʼa te ʼAtua pea mo tana ʼu fakatuʼutuʼu ʼi te pōʼuli? Neʼe fiafia te tagata fai pesalemo ʼi tana fai te faʼahi ʼaia.—Pesalemo 63:3.
12. Koteā anai te meʼa ka tou fai mo kapau ʼe tou fiafia ʼi te lao ʼa Sehova?
12 ʼE fakalogo totatou fiafia heʼegata ki tatatou fiafia ʼi te lao ʼa te ʼAtua. Ko tana Lao ʼe haohaoa pea mo faitotonu, pea ʼe tou maʼu te ʼu tapuakina mokā ʼe tou taupau. (Pesalemo 19:7-11) ʼE ʼui fēnei e te tisipulo ko Sakopo: “Ko ia ʼaē ʼe loloto tana fakasiosio ki te lao haohaoa ʼo te ʼāteaina, pea mo haga nofo ai, ʼe fiafia anai te tagata ʼaia ʼi hona maʼuliʼi, koteʼuhi kua liliu ia ko he tahi ʼe ina fai te gāue, kae mole ko he tagata ʼe ina logoʼi kae ʼe loto galogalo.” (Sakopo 1:25, MN ) Kapau ʼe tou leleiʼia te lao ʼa Sehova, ʼe mole fakalaka anai he ʼaho ka mole tou vakaʼi te ʼu meʼa fakalaumālie. ʼIo, ʼe tou fia fakamuʼamuʼa anai ʼi totatou maʼuli ‘te kumi ʼo te ʼu meʼa fakalaumālie ʼa te ʼAtua,’ pea mo te ʼu meʼa ʼo te Puleʼaga.—1 Kolonito 2:10-13; Mateo 6:33.
ʼE Liliu Anai Ohage Ko He Fuʼu ʼAkau
13-15. ʼE faka ʼuhiga feafeaʼi tatatou hage ko he fuʼu ʼakau ʼe to ōvi ʼi he matapuna vai?
13 ʼE toe talanoa te tagata fai pesalemo ki te tagata ʼaē ʼe faitotonu: “ ʼE liliu moʼoni anai ohage ko he fuʼu ʼakau ʼe to ōvi ki te vaitafe, ʼe fua ʼi tona temi totonu pea ʼe mole fefe tona ʼu lau, pea ko meʼa fuli ʼaē ʼe ina fai ʼe lava lelei anai.” (Pesalemo 1:3) Ohage pe ko te tagata heʼe haohaoa fuli, ʼe tou tau mo te ʼu fihifihia ʼi tatatou tauhi kia Sehova. (Sopo 14:1) ʼE lagi tou mamahi pea mo fihifihia ʼuhi ko tatatou tui. (Mateo 5:10-12) Kae ʼaki te tokoni ʼa te ʼAtua, ʼe tou lava tauʼi te ʼu ʼahiʼahi ʼaia, ohage pe ko he fuʼu ʼakau lelei ʼe mole toka logola te ʼu matagi lalahi.
14 Ko he fuʼu ʼakau ʼe to ōvi ki he mata vai, ʼe fakapala tuʼumaʼu pea ʼe mole moamoa anai ʼi te temi vela. Kapau ʼe tou manavasiʼi ki te ʼAtua, ʼe tou maʼu anai totatou mālohi mai te Matapuna lahi—ko Sehova ʼAtua. Neʼe kumi tokoni ia Paulo ki te ʼAtua pea neʼe feala ke ina ʼui fēnei: “ ʼE ʼau maʼu te mālohi kia meʼa fuli, ʼuhi ko [Sehova] ʼaē ʼe ina foaki mai te mālohi.” (Filipo 4:13, MN ) Ka takitaki tatou pea mo tokoniʼi fakalaumālie tatou e te laumālie maʼoniʼoni ʼo Sehova, ʼe mole tou toe vaivai anai, pea ʼe tou tuputupu pea mo gāue mālohi ʼi te faʼahi fakalaumālie. ʼE tou tuputupu ʼi te tauhi ki te ʼAtua pea ʼe tou fakahā te ʼu fua ʼo te laumālie maʼoniʼoni.—Selemia 17:7, 8; Kalate 5:22, 23.
15 Ko te kupu faka Hepeleo ʼaē neʼe fakaliliu ʼaki te kupu “ohage,” neʼe fakaʼaogaʼi e te tagata fai pesalemo moʼo fai ʼaki hana ʼu palalau fakatā. Neʼe ina fakatatau te ʼu meʼa kehekehe e lua, kae e ʼi ai te koga e nā tatau ai. Ko te hahaʼi ʼe mole tatau mo te ʼu fuʼu ʼakau, kae ʼe maʼuli lelei he fuʼu ʼakau mokā ʼe to ōvi ki he matapuna vai, koia ʼaē ʼe fakaʼaogaʼi ai e te tagata fai pesalemo te fakatātā ʼaia moʼo fakatatau kiai te tuputupu fakalaumālie ʼo te hahaʼi ʼaē ʼe ‘nātou fiafia ʼi te lao ʼa Sehova.” Kapau ʼe tou leleiʼia te lao ʼa te ʼAtua, ʼe liliu anai totatou maʼuli ohage ko te maʼuli ʼo te fuʼu ʼakau, ei ʼe feala anai hatatou maʼuʼuli ʼo heʼegata.—Soane 17:3.
16. He koʼe ko ‘meʼa fuli ʼe tou fai ʼe fua lelei,’ pea ʼi te ʼu faʼahi fea?
16 Ka tou maʼuli agatonu, ʼe tokoni mai Sehova ke tou tauʼi te ʼu fihifihia. ʼE tou fiafia pea mo tou tuputupu ʼi te tauhi ki te ʼAtua. (Mateo 13:23; Luka 8:15) ‘ ʼE fua lelei ia meʼa fuli ʼe tou fai’ koteʼuhi ʼe tou faiga tuʼumaʼu ke tou fai te finegalo ʼo te ʼAtua. Mai tona ʼaluʼaga ʼaē ʼe hoko tuʼumaʼu tana ʼu fakatuʼutuʼu, pea ʼe tou fiafia ʼi tana ʼu fakatotonu, ʼe tou tuputupu ʼi te faʼahi fakalaumālie. (Senesi 39:23; Sosue 1:7, 8; Isaia 55:11) ʼE moʼoni te faʼahi ʼaia māʼiape la mokā tou tau mo ni ʼu fihifihia.—Pesalemo 112:1-3; 3 Soane 2.
ʼE Hage ʼe Maʼuli Lelei Te Kau Agakovi
17, 18. (a) Koteā ʼaē neʼe fakatatau kiai te kau agakovi e te tagata fai pesalemo? (b) Māʼiape la mo kapau ʼe koloaʼia te kau agakovi, he koʼe ʼe mole fualoa tonatou maʼuli tokalelei?
17 ʼE kehekehe ʼaupito te maʼuli ʼo te kau agakovi pea mo te kau faitotonu! ʼE hage ʼe maʼu koloā te kau agakovi, kae ʼe mole nātou koloaʼia ʼi te faʼahi fakalaumālie. ʼE hā lelei te faʼahi ʼaia ʼi te ʼu palalau ʼaenī ʼa te tagata fai pesalemo: “ ʼE mole feiā te kau agakovi, kae ʼe nātou hage ko te kiliʼi fulumeto ʼaē ʼe viligia ʼi te matagi. Koia la ʼaē ʼi te fakamāu, ʼe mole tutuʼu anai te kau agakovi, mo te kau agahala ʼi te fakatahi ʼo te kau faitotonu.” (Pesalemo 1:4, 5) Koutou fakatokagaʼi te meʼa ʼe ʼui e te tagata fai pesalemo, “ ʼe mole feiā te kau agakovi.” Ko tona faka ʼuhiga ʼe mole nātou hage ko te hahaʼi ʼaē ʼe ʼoʼofa ki te ʼAtua, ʼaē neʼe fakatatau ki te ʼu fuʼu ʼakau ʼe nātou fua pea mo tologa.
18 Tatau aipe mo kapau ʼe koloaʼia te kau agakovi, kae ʼe mole fualoa tonatou maʼuli fīmālie. (Pesalemo 37:16; 73:3, 12) ʼE nātou hage ko te tagata maʼu koloā vale ʼaē neʼe talanoa ki ai ia Sesu ʼi tana lea fakatātā, ʼi te temi ʼaē neʼe ina fehuʼi age ai ke ina fai he tonu ʼo ʼuhiga mo he tofiʼa. Neʼe ʼui fēnei age e Sesu kia nātou neʼe nonofo ai: “Koutou vakai mo tokaga ki te manumanu koloa, koteuhi e mole fakalogo te mauli o he tagata ki te u koloa e ina mau.” Moʼo fakamahino te faʼahi ʼaia, neʼe ʼui e Sesu ko te ʼu kele ʼo te tagata maʼu koloā neʼe fua ʼo lahi ʼaupito, pea neʼe ina fakatuʼutuʼu ke ina holoʼi tona ʼu faleoko kae ke ina toe laga niʼihi ʼe lalahi ake moʼo tānaki kiai tana ʼu meʼa lelei fuli. ʼOsi ʼaia pea kai, mo ʼinu, pea mo fakafiafia. Kae neʼe ʼui fēnei e te ʼAtua: “Tagata vale! I te po aeni e too ai tou laumalie maia koe. Pea kia mea nee ke teuteu, ko ai anai ka ina mau?” Moʼo fakahā lelei ia te maʼuhiga ʼo tana manatu, neʼe toe ʼui fēnei e Sesu: “E feia iaʼia e tanaki koloa kia te iape, kae e mole tanaki koloa ki te Atua.”—Luka 12:13-21.
19, 20. (a) Koutou fakamahino pe neʼe gāueʼi feafeaʼi te fulumeto. (b) He koʼe koa ʼe fakatatau te kau agakovi ki te kiliʼi fulumeto?
19 Ko te kau agakovi ʼe mole nātou “tanaki koloa ki te Atua.” ʼUhi ko te faʼahi ʼaia, ʼe mole nātou maʼu te fīmālie ke tukupau, ohage pe ko te kiliʼi fulumeto. ʼI te temi muʼa ʼi te ʼosi tae ʼo te fulumeto, neʼe folahi ʼi he kele halafalafa māʼoluga. Pea ʼaki te ʼu saliote neʼe toho e te ʼu manu kae neʼe fakapipiki kiai ia te ʼu foʼi maka māsila, neʼe nātou momosi te ʼu kauʼi fulumeto pea nātou tānaki kehe te ʼu fulumeto mo te kiliʼi fulumeto. ʼOsi ʼaia, pea ʼaki te huo lulu fulumeto neʼe tae te kauʼi fulumeto ʼaē neʼe momosi pea mo te ʼu fulumeto fuli, pea neʼe tūʼi ki ʼaluga ke agi kiai te matagi. (Isaia 30:24) ʼE tō ifo ki lalo te ʼu fulumeto, kae viligia ʼi te matagi te ʼu kiliʼi fulumeto. (Lute 3:2) ʼOsi ʼaia pea fakamaʼa te ʼu fulumeto ʼi te tami, ke toʼo ai te ʼu eveʼi ʼotaʼota, pea kua tokalelei leva te fulumeto ke tānaki peʼe ke momosi. (Luka 22:31) Kua ʼave te kiliʼi fulumeto e te matagi.
20 Ohage pe ko te fetōki ifo ʼo te fulumeto pea tānaki kehe ke fakaʼaogaʼi, kae viligia ʼi te matagi te kiliʼi fulumeto, ʼo toe feiā mo te kau agatonu, ʼe nātou nonofo anai kae pulihi te kau agakovi. ʼE tou fiafia ʼi te kua vave pulihi ʼo te kau agakovi ʼaia. ʼI tonatou kua pulihi, ʼe tapuakina lahi anai te hahaʼi ʼaē ʼe nātou fiafia ʼi te lao ʼa Sehova. ʼE maʼu moʼoni anai e te hahaʼi fakalogo ia te meʼa ʼofa ʼo te ʼAtua, ʼaē ko te maʼuli heʼegata.—Mateo 25:34-46; Loma 6:23.
ʼE Tapuakina “Te Ala ʼo Te Kau Faitotonu”
21. Koteā tona faka ʼuhiga te ʼui ʼaē ko Sehova ʼe ina ‘ ʼiloʼi te kau faitotonu’?
21 Ko te ʼuluaki kapite ʼo te pesalemo ʼe fakaʼosi fēnei: “ ʼE ʼiloʼi e Sehova te ala ʼo te kau faitotonu, kae ʼe pulinoa anai te ala ʼo te kau agakovi.” (Pesalemo 1:6) ʼE ‘ ʼiloʼi feafeaʼi e te ʼAtua te ala ʼo te kau faitotonu’? Kapau ʼe tou haga nofo agatonu, ʼe feala ke tou tui papau ko tatatou Tāmai ʼaē ʼe ʼi selo ʼe ina fakamoʼoni ki totatou maʼuli faka lotu pea ʼe ina faka ʼuhiga ia tatou ko tana ʼu kaugana agatonu. Pea ko tatou ʼe feala pea ʼe tonu ke tou tuku fuli tatatou tuʼania kia te ia heʼe tou tui papau ʼe tokaga moʼoni kia tatou.—Esekiele 34:11; 1 Petelo 5:6, 7.
22, 23. Koteā ʼaē ka hoko ki te kau agakovi pea mo te kau faitotonu?
22 Ko “te ala ʼo te kau faitotonu” ʼe tuʼu anai ʼo talu ai, kae ko te kau agakovi ʼaē ʼe mole nātou fia fetogi tanatou aga, ʼe matehi anai nātou ʼuhi ko te ʼaho fakamāu ʼo Sehova, pea pulihi ai mo tonatou faʼahiga maʼuli. ʼE tou falala ʼe fakahoko anai te ʼu palalau ʼaenī ʼa Tavite: “Kei toe he kiʼi temi siʼipe, pea pulihi anai te tagata agakovi; pea ʼe mahino papau ia ʼe ke vakaʼi anai tona nofoʼaga, ka kua puli ia. Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei. ʼE maʼu anai te kele e te kau faitotonu, pea ʼe nātou nonofo ai anai ʼo talu ai.”—Pesalemo 37:10, 11, 29.
23 ʼE tou fiafia lahi anai mo kapau ʼe tou maʼuʼuli ʼi te palatiso ʼi te kele mokā fakaʼauha anai te kau agakovi! Ko te hahaʼi agavaivai pea mo agatonu, ʼe nātou maʼu anai te tokalelei moʼoni koteʼuhi ʼe nātou fiafia tuʼumaʼu anai ʼi “te lao ʼa Sehova.” Kae ʼi muʼa ʼo te hoko ʼo te ʼu meʼa ʼaia, ʼe tonu muʼa ke fakahoko ia “te fakatotonu ʼa Sehova.” (Pesalemo 2:7a) ʼE fakahā mai anai ʼi te alatike ka hoa mai pe koteā te fakatotonu ʼaia pea koteā tona faka ʼuhiga kia tatou pea mo te malamanei.
ʼE Koutou Tali Feafeaʼi Anai?
• He koʼe koa ʼe fiafia he tahi ʼe tauhi ki te ʼAtua?
• Koteā ʼaē ʼe ʼasi mai ʼe tou fiafia ʼi te lao ʼa Sehova?
• ʼE liliu feafeaʼi he tahi ohage ko he fuʼu ʼakau ʼe fakapala lelei?
• Koteā te kehekehe ʼo te ala ʼo te kau faitotonu pea mo te ala ʼo te kau agakovi?
[Fehuʼi]
[Paki ʼo te pasina 11]
ʼE tokoni mai anai te faikole ke mole tou fakakaugā mo te kau agakovi
[Paki ʼo te pasina 12]
He koʼe ʼe fakatatau te tagata faitotonu ki he fuʼu ʼakau?