“An Pagboot ni Jehova” Dai Masusudya

“Pabayae akong sambiton an pagboot ni Jehova; sia nagsabi sa sako: ‘Ika an sakong aki . . . Hagada sako, tanganing itao ko sa saimo an mga nasyon bilang saimong mana.’”​—SALMO 2:​7, 8.

1. Ano an kalaenan kan katuyohan nin Dios asin kan sa mga nasyon?

SI Jehova Dios may katuyohan para sa katawohan asin sa daga. An mga nasyon igwa man nin katuyohan. Alagad magkalaen nanggad an mga katuyohan na ini! Dapat sanang laoman ta ini, huling sinasabi nin Dios: “Kun paanong an kalangitan mas halangkaw sa daga, siring man an sakong mga dalan mas halangkaw sa saindong mga dalan, asin an sakong mga kaisipan kisa saindong mga kaisipan.” Siertong maootob an katuyohan nin Dios, huli ta sinabi pa nia: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan masagom an daga asin papagbungahon saka patuboon iyan, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an ikinakaogma kong marhay, asin iyan siertong magigin mapanggana sa sakuyang sinobolan kaiyan.”​—Isaias 55:9-11.

2, 3. Ano an linilinaw sa ikaduwang salmo, alagad anong mga hapot an ibinangon?

 ² Linilinaw sa ikaduwang salmo na maootob an katuyohan nin Dios mapadapit sa saiyang Mesiyanikong Hade. An kompositor kaiyan, si Hadeng David kan suanoy na Israel, pinasabngan nin Dios na ihula na maabot an sarong makahulogan na panahon na magkakariribok an mga nasyon. An mga namamahala kaiyan matindog tumang ki Jehova Dios asin sa saiyang Linahidan. Minsan siring, an salmista nag-awit man: “Pabayae akong sambiton an pagboot ni Jehova; sia nagsabi sa sako: ‘Ika an sakong aki . . . Hagada sako, tanganing itao ko sa saimo an mga nasyon bilang saimong mana asin an kaporoporohi kan daga bilang saimong mga sadiri.’”​—Salmo 2:​7, 8.

³ Ano an magigin kahulogan para sa mga nasyon kan “pagboot ni Jehova”? Paano daw iyan makakaapektar sa katawohan sa pankagabsan? Tunay nanggad, ano daw an magigin kahulogan kan mga pangyayaring ini para sa gabos na matatakton sa Dios na nagbabasa kan ikaduwang salmo?

Nagkakariribok an mga Nasyon

4. Paano nindo susumaryohon an pangenot na mga punto kan Salmo 2:​1, 2?

⁴ Nagtataram manongod sa ginigibo kan mga nasyon asin kan mga namamahala dian, pinonan kan salmista an saiyang komposisyon paagi sa pag-awit: “Taano ta maribok an mga nasyon asin an mga grupo nasyonal mismo nagpaparagumodgumod nin daing halagang bagay? Naninindogan an mga hade kan daga asin an haralangkaw na opisyal mismo nagsururog tumang ki Jehova asin tumang sa saiyang linahidan.”​—Salmo 2:​1, 2. *

5, 6. Anong “daing halagang bagay” an ‘pigpaparagumodgumod’ kan mga grupo nasyonal?

⁵ Anong “daing halagang bagay” an ‘pigpaparagumodgumod’ kan mga grupo nasyonal sa presenteng aldaw? Imbes na akoon an Linahidan nin Dios​—an Mesiyas, o Cristo​—an mga nasyon “nagpaparagumodgumod,” o pinagpaparahorophorop, kun paano mapagdadanay an saindang sadiring autoridad. An mga tataramon na ini kan ikaduwang salmo nagkaigwa man nin kaotoban kan enot na siglo C.E. kan an Judio asin Romanong mga autoridad nagtarabangan tanganing gadanon an Designadong Hade nin Dios, si Jesu-Cristo. Minsan siring, an mayor na kaotoban nagpoon kan 1914 kan si Jesus patukawon bilang langitnon na Hade. Poon kaidto, mayo ni sarong politikal na organisasyon sa daga an nagrekonoser sa pinatukaw sa tronong Hade nin Dios.

⁶ Ano an boot sabihon kan maghapot an salmista ‘kun taano ta an mga grupo nasyonal nagpaparagumodgumod nin daing halagang bagay’? An saindang katuyohan an daing halaga; iyan basang sana asin seguradong masusudya. Dai ninda kayang magtao nin katoninongan asin pagkaoroyon sa kinaban na ini. Pero, naghihiro sinda sagkod na pati pamamahala nin Dios kinakalaban ninda. Sa katunayan, nagkasararo sinda sa maluminaban na paninindogan asin nagsururog tumang sa Kaharohalangkawe  asin sa saiyang Linahidan. Abaang kabalisngagan!

An Mapangganang Hade ni Jehova

7. Sa pamibi, paano iinaplikar kan enot na mga parasunod ni Jesus an Salmo 2:​1, 2?

⁷ Iinaplikar kan mga parasunod ni Jesus sa saiya an mga tataramon sa Salmo 2:​1, 2. Kan pinaglalamag huli sa saindang pagtubod, sinda namibi: “Soberanong Kagurangnan [na Jehova], ika an Saro na guminibo kan langit asin daga asin dagat patin kan gabos na bagay na yaon dian, asin na paagi sa banal na espiritu nagsabi paagi sa ngoso kan samong apoon na si David, an saimong oripon, ‘Taano an mga nasyon ta naribok asin an mga banwaan naghohorophorop sa mga bagay na daing halaga? An mga hade kan daga nanindogan asin an mga namamahala nagsururog tumang ki Jehova asin tumang sa saiyang linahidan.’ Dawa siring, si Herodes [Antipas] sagkod si Poncio Pilato kaibanan an mga tawo nin mga nasyon asin mga banwaan nin Israel sa katotoohan nagtiripon sa siudad na ini tumang sa saimong banal na oripon na si Jesus, na saimong linahidan.” (Gibo 4:24-27; Lucas 23:1-12) * Iyo, nagkaigwa nin pagkasapakat tumang sa linahidan na lingkod nin Dios na si Jesus kan enot na siglo. Minsan siring, an salmong ini nagkaigwa nin saro pang kaotoban pakalihis nin dakol na siglo.

8. Paano minaaplikar sa mga nasyon sa presenteng aldaw an Salmo 2:3?

⁸ Kan an suanoy na Israel igwa nin hadeng tawo, siring baga ki David, an paganong mga nasyon asin namamahala nagsararo tumang sa Dios asin sa saiyang pinatukaw sa trono na linahidan. Alagad kumusta man sa satong panahon? An mga nasyon sa presenteng aldaw habong sumunod sa mga kahagadan ni Jehova asin kan Mesiyas. Kun siring, sinda ilinaladawan na nagsasabi: “Paratodon ta an saindang mga panggapos asin iapon ta an saindang mga lubid!” (Salmo 2:3) An ano man na restriksion na ipinapaotob nin Dios asin kan saiyang Linahidan kinokontra kan mga namamahala asin mga nasyon. Siempre, magigin basang sana an ano man na paghihingoa na paratodon an mga panggapos asin iapon an siring na mga lubid.

Pinag-oolog-olog Sinda ni Jehova

9, 10. Taano ta pinag-oolog-olog ni Jehova an mga nasyon?

⁹ Si Jehova dai nahahadit sa ano man na mga paghihingoa kan mga namamahala sa mga nasyon na mag-establisar nin sadiri nindang soberaniya. An ikaduwang salmo nagpapadagos: “An mismong Saro na nagtutukaw sa kalangitan magngingisi; si Jehova mismo mag-oolog-olog sa sainda.” (Salmo 2:4) Ipinadagos nin Dios an saiyang katuyohan na garo baga an mga namamahalang ini daing halaga. Nginingisihan nia an saindang pagkadaing galang asin pinag-oolog-olog nia sinda. Pabayae sindang maghambog kan plano nindang gibohon. Ngingisihan sana sinda ni Jehova. Nginingisihan nia an saindang basang sanang pagkontra.

¹⁰ Sa iba pang kabtang kan saiyang salmo, si David nagtaram manongod sa kaiwal na mga tawo saka nasyon asin nag-awit: “Ika, O Jehova na Dios  nin mga hukbo, an Dios nin Israel. Magmata ka tanganing tawan mo nin atension an gabos na nasyon. Dai mo pagpahelingan nin pabor an siisay man na nakakadanyar na traydor. Pirme sindang nagbabalik sa banggi; pirme sindang nagbabaratok na siring sa ayam asin nagririlibot sa siudad. Uya! Pinapabulakbugak ninda an saindang ngoso; mga espada an nasa saindang ngabil, huli ta siisay an naghihinanyog? Alagad pagngingisihan mo sinda, O Jehova; oolog-ologon mo an gabos na nasyon.” (Salmo 59:5-8) Nginingisihan ni Jehova an paghambog asin pagkaribaraw kan mga nasyon sa saindang kamangmangan tumang sa saiya.

11. Ano an mangyayari kun an mga nasyon maghingoang kontrahon an katuyohan nin Dios?

¹¹ An mga tataramon sa Salmo 2 nagpapakosog sa satong pagtubod na kaya nin Dios na resolberan an ano man na problema. Puede kitang magkaigwa kan kombiksion na pirme niang ginigibo an saiyang kabotan asin dai nia noarin man pinapabayaan an saiyang maimbod na mga lingkod. (Salmo 94:14) Kaya, kun siring, ano an mangyayari kun an mga nasyon maghingoang kontrahon an katuyohan ni Jehova? Segun sa salmong ini, an Dios “mataram sa sainda sa saiyang kaanggotan,” na garo baga may kaibang tanog nin makosogon na dagoldol. Dugang pa, “sa naglalaad niang kabangisan,” na garo baga may kaibang grabeng silyab nin kitkilat, “riribokon nia sinda.”​—Salmo 2:5.

Pinatukaw an Hade nin Dios

12. Sa anong pagpatukaw sa trono minaaplikar an Salmo 2:6?

¹² An sunod na sinabi Jehova paagi sa salmista daing duda na ikinaaburido kan mga nasyon. Ipinahayag nin Dios: “Ako mismo nagpatukaw kan sakuyang hade sa Sion, an sakong banal na bukid.” (Salmo 2:6) An Bukid nin Sion sarong bulod sa Jerusalem na duman si David pinatukaw bilang hade sa bilog na Israel. Alagad an Mesiyanikong hade dai matukaw sa sarong trono sa siudad na iyan o dawa saen pa man na lugar sa daga. Sa katunayan, pinatukaw na ni Jehova si Jesu-Cristo bilang saiyang piniling Mesiyanikong Hade sa langitnon na Bukid nin Sion.​—Kapahayagan 14:1.

13. Ano an ipinakipagtipan ni Jehova sa saiyang Aki?

¹³ Nagtataram ngonyan an Mesiyanikong Hade. Sia nagsasabi: “Pabayae akong sambiton an pagboot ni Jehova [na nakipagtipan sa saiyang Aki para sa Kahadean]; sia [si Jehova Dios] nagsabi sa sako: ‘Ika an sakong aki; ako, ngonyan, ako nagin saimong ama.’” (Salmo 2:7) Nasambitan ni Cristo an tipan para sa Kahadean kan sabihan nia an saiyang mga apostol: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.”​—Lucas 22:​28, 29.

14. Taano ta masasabing si Jesus may dai makukuestion na deretso sa pagkahade?

¹⁴ Siring kan ihinula sa Salmo 2:​7, rinekonoser ni Jehova si Jesus bilang Saiyang Aki kan sia bautismohan asin paagi sa pagbuhay liwat sa saiya bilang espiritu. (Marcos 1:9-11; Roma 1:4; Hebreo 1:5; 5:5) Iyo, an Hade sa langitnon na Kahadean iyo an bugtong na Aki nin Dios. (Juan 3:16) Bilang an makahadeng gikan ni Hadeng David, si Jesus may dai makukuestion na deretso sa pagkahade. (2 Samuel 7:4-17; Mateo 1:​6, 16) Segun sa salmong ini, sinasabihan nin Dios an saiyang Aki: “Hagada sako, tanganing itao ko sa saimo an mga nasyon bilang saimong mana asin an kaporoporohi kan daga bilang saimong mga sadiri.”​—Salmo 2:8.

15. Taano ta hinahagad ni Jesus an mga nasyon bilang saiyang mana?

¹⁵ An Hade​—an sadiring Aki nin Dios​—igwa nin  posisyon na pinakaharani ki Jehova. Si Jesus an probado, maimbod, asin masasarigan ni Jehova. Dugang pa, yaon ki Jesus an mana bilang Panganay nin Dios. Tunay nanggad, si Jesu-Cristo “an ladawan kan Dios na dai naheheling, an panganay sa gabos na linalang.” (Colosas 1:15) An kaipuhan sana niang gibohon iyo an humagad asin ‘itatao sa saiya nin Dios an mga nasyon bilang saiyang mana asin an kaporoporohi kan daga bilang saiyang sadiri.’ Ginibo ni Jesus an paghagad na ini bilang an saro na ‘naoogma sa mga bagay na may koneksion sa mga aki nin tawo’ asin huli sa saiyang makosog na pagmawot na otobon an kabotan kan saiyang langitnon na Ama mapadapit sa daga asin sa katawohan.​—Talinhaga 8:​30, 31.

An Pagboot ni Jehova Tumang sa mga Nasyon

16, 17. Segun sa Salmo 2:​9, ano an kaaabtan kan mga nasyon?

¹⁶ Huling an ikaduwang salmo naootob na ngonyan, durante kan dai naheheling na presensia ni Jesu-Cristo, ano an kaaabtan kan mga nasyon? Sa dai na mahahaloy gigibohon kan Hade an sinabi nin Dios: “Sinda [an mga nasyon] saimong papasaon nin setrong batbat, siring sa lalagan kan paragibo nin koron roronoton mo sinda.”​—Salmo 2:9.

¹⁷ An mga setro nin mga hade kan suanoy na mga panahon simbolo nin makahadeng autoridad. May mga setro na gibo sa batbat, siring kan nasambitan sa salmong ini. An piguratibong pagtaram na ginamit digdi nagpaparisa kun paanong pasil sanang lalaglagon kan Cristong Hade an mga nasyon. Paagi sa mapuersang paghampak nin setrong batbat mapapasa an lalagan kan paragibo nin koron na gibo sa dalipay, na biyong mararaot iyan.

18, 19. Tanganing kamtan an pag-oyon nin Dios, ano an kaipuhan na gibohon kan mga hade sa daga?

¹⁸ Kaipuhan daw na maheling kan mga namamahala sa nasyon an mapanlaglag na pagpasa na iyan? Dai, huli ta nakikiolay sa sainda an salmista paagi sa mga tataramon na ini: “Ngonyan, O mga hade, gumamit kamo nin pakarorop; pabayae nindo na kamo itanos, O mga hokom kan daga.” (Salmo 2:10) An mga hade sinasabihan na maghimate, na gumamit nin pakarorop. Maninigo nindang isipon an kadaihan nin halaga kan saindang mga plano, na laen na marhay sa gigibohon kan Kahadean nin Dios sa kapakinabangan kan katawohan.

¹⁹ Tanganing kamtan an pag-oyon nin Dios, kaipuhan na bagohon kan mga hade sa daga an saindang ginigibo. Sinasadol sinda na “maglingkod ki Jehova na may pagkatakot asin maggayagaya na may pagtakig.” (Salmo 2:11) Ano an magigin resulta kun gigibohon ninda iyan? Imbes na maribok an isip, puede sindang maggayagaya sa mga oportunidad na ibubugtak sa atubangan ninda kan Mesiyanikong Hade. Kakaipuhanon kan mga namamahala sa daga na haleon an kapalangkawan asin kaabhawan na ipinapaheling ninda sa saindang pamamahala. Dugang pa, kaipuhan nindang magbago na daing pag-atraso asin gumamit nin pakarorop mapadapit sa dai mapapantayan na kahalangkawan kan soberaniya ni Jehova asin sa dai malalabanan na kapangyarihan nin Dios asin kan saiyang Mesiyanikong Hade.

“Humadok sa Aki”

20, 21. Ano an boot sabihon kan “humadok sa aki”?

²⁰ Ipinapaabot ngonyan kan Salmo 2 an maheherakon na pangagda sa mga namamahala sa mga nasyon. Imbes na magsururog sa pakikilaban, sinasadol sinda: “Humadok sa aki, tanganing Sia [si Jehova Dios] dai maanggot asin dai kamo mapara, huli ta an saiyang kaanggotan madaling lumaad.” (Salmo 2:12a) Maninigong himateon an Soberanong Kagurangnan na Jehova kun sia nagpapaluwas nin pagboot. Kan patukawon nin Dios an saiyang Aki sa trono, an mga namamahala sa daga maninigo kutanang puminondo na sa ‘pagparagumodgumod nin daing halagang bagay.’ Maninigo kutanang rinekonoser tolos ninda an Hade asin itinao sa saiya an lubos na pagkuyog.

²¹ Taano ta maninigong “humadok sa aki”? Kan isurat an salmong ini, an paghadok sarong kapahayagan nin pakikikatood asin ginigibo iyan tanganing maogmang akoon sa harong an mga bisita, na dian ninda namamatean an pag-istimar. An paghadok puede man na magin akto nin kaimbodan. (1 Samuel 10:1) Sa bersikulong ini kan ikaduwang salmo, pinagbobotan nin Dios an mga nasyon na humadok, o maogmang akoon, an saiyang Aki bilang linahidan na Hade.

22. Dapat na himateon kan mga namamahala sa mga nasyon an anong patanid?

²² An mga habong magrekonoser sa autoridad kan piniling Hade nin Dios nag-iinsulto ki Jehova. Dai ninda minimidbid an unibersal na soberaniya  ni Jehova Dios asin an saiyang autoridad saka kakayahan na pumili kan Hade na pinakamarahay na namamahala para sa katawohan. Manonompongan kan mga namamahala sa mga nasyon na bigla sindang aabotan kan nagpuputok na kaanggotan nin Dios, sa panahon na sinda naghihingoang gibohon an sadiri nindang mga plano. “An saiyang kaanggotan madaling lumaad,” o biglang nag-aarab-adab asin dai malalabanan. An mga namamahala sa mga nasyon dapat na mapagpasalamat na akoon an patanid na ini asin humiro kaoyon kaiyan. An paggibo kaiyan nangangahulogan nin buhay.

23. May panahon pa para sa mga indibiduwal na gibohon an ano?

²³ An dramatikong salmo na ini nagtatapos: “Maogma an gabos na minapaili sa saiya [ki Jehova].” (Salmo 2:12b) May panahon pa para sa mga indibiduwal na makanompong nin kaligtasan. Totoo iyan dawa sa indibiduwal na mga namamahala na nagsusuportar sa mga plano kan mga nasyon. Puede sindang dumulag pasiring ki Jehova, na nagtatao nin pailihan sa irarom kan pamamahala kan Kahadean. Alagad kaipuhan nindang humiro bago laglagon kan Mesiyanikong Kahadean an nagkokontrang mga nasyon.

24. Paano kita magkakaigwa nin mas nakakakontentong buhay dawa sa maribok na kinaban na ini?

²⁴ Kun mahigos niatong pag-aadalan an Kasuratan asin iaaplikar sa buhay an mga konseho kaiyan, puede kitang magkaigwa nin mas nakakakontentong pamumuhay dawa ngonyan sa maribok na kinaban na ini. An pag-aplikar kan mga konseho sa Kasuratan nagbubunga nin mas maogmang relasyon sa pamilya asin pakalibre sa dakol na kahaditan asin takot na nangyayari sa kinaban na ini. An pagsunod sa mga giya sa Biblia nagtatao nin kompiansa na pinapaogma ta an Kaglalang. Mayo na nin iba pa apuera sa Unibersal na Soberano an makakatao nin garantiya “sa buhay ngonyan asin sa madatong” pakatapos na haleon nia sa daga an mga nagkokontra sa kun ano an matanos paagi sa paghabo sa pamamahala kan Kahadean.​—1 Timoteo 4:8.

25. Huling “an pagboot ni Jehova” dai masusudya, ano an malalaoman ta na mangyayari sa satong panahon?

²⁵ “An pagboot ni Jehova” dai masusudya. Bilang Kaglalang niato, aram nin Dios kun ano an pinakamarahay para sa katawohan asin ootobon nia an saiyang katuyohan na bendisyonan an makinuyog na mga tawo nin katoninongan, pagkakontento, asin nagdadanay na katiwasayan sa irarom kan Kahadean kan saiyang namomotan na Aki. Mapadapit sa satong panahon, si propeta Daniel nagsurat: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. . . . Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.” (Daniel 2:44) Kun siring, daing duwa-duwa na ini na nanggad an panahon na “humadok sa Aki” asin paglingkodan an Soberanong Kagurangnan, si Jehova!

[Mga Nota sa Ibaba]

Ano an Isisimbag Nindo?

• Anong “daing halagang bagay” an ‘pigpaparagumodgumod’ kan mga grupo nasyonal?

• Taano ta pinag-oolog-olog ni Jehova an mga nasyon?

• Ano an pagboot nin Dios tumang sa mga nasyon?

• Ano an boot sabihon kan “humadok sa aki”?

[Mga Hapot Para sa Pag-adal]

[Ritrato sa pahina 16]

Si David nag-awit manongod sa mapangganang Mesiyanikong Hade

[Ritrato sa pahina 17]

An mga namamahala asin an banwaan nin Israel nakipagkasapakat tumang ki Jesu-Cristo

[Ritrato sa pahina 18]

Si Cristo pinatukaw na bilang Hade sa langitnon na Bukid nin Sion