“Ang Mando ni Jehova” Dili Mapakyas

“Isulti ko ang mando ni Jehova; siya miingon kanako: ‘Ikaw mao ang akong anak . . . Pangayo kanako, aron ikahatag ko ang mga nasod ingong imong panulondon.’”—SALMO 2:7, 8.

1. Unsay kalainan tali sa katuyoan sa Diyos ug nianang sa mga nasod?

SI Jehova nga Diyos adunay katuyoan alang sa katawhan ug sa yuta. Ang mga nasod may katuyoan usab. Apan pagkalahi niining maong mga katuyoan! Angay natong dahomon kini, kay ang Diyos nag-ingon: “Ingon nga ang mga langit mas taas kay sa yuta, mao man usab ang akong mga dalan mas taas kay sa inyong mga dalan, ug ang akong mga hunahuna kay sa inyong mga hunahuna.” Ang katuyoan sa Diyos seguradong matuman, tungod kay siya nagpadayon sa pagsulti: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon ang yuta matumog gayod niini ug magpabunga niini ug magpasalingsing, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:9-11.

2, 3. Unsay giklaro diha sa ikaduhang salmo, apan unsang mga pangutana ang gipatungha?

 ² Giklaro diha sa ikaduhang salmo nga matuman ang katuyoan sa Diyos mahitungod sa iyang Mesiyanikong Hari. Ang nagkomposo niini, si Haring David sa karaang Israel, giinspirar sa Diyos sa pagtagna nga moabot unya ang panahon sa dihang ang mga nasod magkaguliyang. Ang ilang mga magmamando mobarog batok kang Jehova nga Diyos ug sa iyang Dinihogan. Apan, ang salmista miawit usab: “Isulti ko ang mando ni Jehova; siya miingon kanako: ‘Ikaw mao ang akong anak . . . Pangayo kanako, aron ikahatag ko ang mga nasod ingong imong panulondon ug ang mga kinatumyan sa yuta ingong imong gipanag-iya.’”—Salmo 2:7, 8.

³ Unsay kahulogan sa “mando ni Jehova” alang sa mga nasod? Sa unsang paagi kini nag-apektar sa mga tawo sa katibuk-an? Sa pagkatinuod, unsay kahulogan niini nga mga kaugmaran alang sa tanang mahinadlokon-sa-Diyos nga mga magbabasa sa ikaduhang salmo?

Ang mga Nasod Nagkaguliyang

4. Unsaon nimo pagsumaryo ang pangunang mga punto sa Salmo 2:1, 2?

⁴ Nagtumong sa mga buhat sa mga nasod ug sa mga magmamando niini, ang salmista nagsugod sa iyang awit pinaagi sa pag-ingon: “Nganong nagkaguliyang ang mga nasod ug ang nasodnong mga pundok nagyagubyob ug walay-pulos nga butang? Ang mga hari sa yuta mibarog ug ang hataas nga mga opisyal naghugpong ingong usa batok kang Jehova ug batok sa iyang dinihogan.”—Salmo 2:1, 2. *

5, 6. Ang nasodnong mga pundok “nagyagubyob” ug unsang “walay-pulos nga butang”?

⁵ Unsang “walay-pulos nga butang” ang ‘ginayagubyob’ sa modernong-adlaw nga nasodnong mga pundok? Imbes dawaton ang Dinihogan sa Diyos—ang Mesiyas, o Kristo—ang mga nasod “nagyagubyob,” o namalandong, sa pagpatunhay sa ilang kaugalingong awtoridad. Kining mga pulonga sa ikaduhang salmo natuman usab sa unang siglo K.P. sa dihang ang Hudiyohanon ug Romanhon nga mga awtoridad nagtinabangay sa pagpatay sa Tinudlong-Hari sa Diyos, si Jesu-Kristo. Apan, ang dakong katumanan nagsugod sa 1914 sa dihang si Jesus gipalingkod ingong langitnong Hari. Sukad niadto, walay politikanhong organisasyon sa yuta nga miila sa naentronong Hari sa Diyos.

⁶ Unsay gipasabot sa dihang ang salmista nangutana ‘nganong ang nasodnong mga pundok nagyagubyob ug walay-pulos nga butang’? Ang ilang katuyoan mao ang walay-pulos; kini kawang ug mapakyas gayod. Dili sila makapatungha ug kalinaw ug kaharmonya niining yutaa. Bisan pa niana, sila misupak pa gani sa pagmando sa Diyos. Sa pagkatinuod, sila nagkahiusa sa pagpakig-away ug naghugpong batok sa Labing Hataas ug sa iyang Dinihogan. Pagkabinuang gayod!

 Ang Madaogong Hari ni Jehova

7. Diha sa pag-ampo, sa unsang paagi ang unang mga sumusunod ni Jesus nagpadapat sa Salmo 2:1, 2?

⁷ Ang mga sumusunod ni Jesus nagpadapat kaniya sa mga pulong sa Salmo 2:1, 2. Gilutos tungod sa ilang pagtuo, sila miampo: “Soberanong Ginoo [Jehova], ikaw mao ang Usa nga naghimo sa langit ug sa yuta ug sa dagat ug sa tanang butang diha niana, ug si kinsa pinaagi sa balaang espiritu miingon pinaagi sa baba sa among katigulangang si David, nga imong alagad, ‘Nganong ang mga nasod nagkaguliyang ug ang mga katawhan nagapamalandong sa mga butang nga walay-pulos? Ang mga hari sa yuta mibarog ug ang mga magmamando naghugpong ingong usa batok kang Jehova ug batok sa iyang dinihogan.’ Gani, si Herodes [Antipas] ug si Poncio Pilato uban sa mga tawo sa kanasoran ug uban sa mga katawhan sa Israel sa pagkatinuod nagkatigom niini nga siyudad batok sa imong balaang alagad nga si Jesus, kinsa imong gidihogan.” (Buhat 4:24-27; Lucas 23:1-12) * Oo, dihay panagkunsabo batok sa dinihogang alagad sa Diyos nga si Jesus sa unang siglo. Apan, kining salmoha adunay laing katumanan daghang siglo sa ulahi.

8. Sa unsang paagi ang Salmo 2:3 mapadapat sa modernong-adlaw nga mga nasod?

⁸ Sa dihang ang karaang Israel may tawhanong hari, sama kang David, ang paganong mga nasod ug mga magmamando nagtigom batok sa Diyos ug sa iyang naentrono nga dinihogan. Apan komosta sa atong panahon? Ang modernong-adlaw nga mga nasod dili gustong motuman sa mga kinahanglanon ni Jehova ug sa Mesiyas. Busa, sila gihulagway nga nag-ingon: “Bugtoon nato ang ilang mga gapos ug isalibay ang ilang mga higot gikan kanato!” (Salmo 2:3) Ang bisan unsang mga pagdili nga gipahamtang sa Diyos ug sa iyang Dinihogan supakon sa mga magmamando ug sa mga nasod. Siyempre, ang bisan unsang mga paningkamot sa pagbugto sa maong mga gapos ug pagsalibay sa maong mga higot makawang lamang.

Himoon Sila ni Jehova nga Yubitonon

9, 10. Nganong himoon ni Jehova nga yubitonon ang tanang kanasoran?

⁹ Si Jehova dili maapektahan sa bisan unsang mga paningkamot sa nasodnong mga magmamando sa pagpalig-on sa ilang kaugalingong pagkasoberano. Ang ikaduhang salmo nagpadayon: “Ang Usa nga nagalingkod sa kalangitan magakatawa; himoon sila ni Jehova nga yubitonon.” (Salmo 2:4) Ipadayon sa Diyos ang iyang katuyoan nga daw kining maong mga magmamando dili gayod hinungdanon. Siya mokatawa sa ilang pagkamapahitas-on ug maghimo kanilang yubitonon. Pahamboga sila kon unsay gusto nilang buhaton. Kang Jehova sila kataw-anan. Siya mokatawa sa ilang kawang nga pagsupak.

¹⁰ Sa laing bahin sa iyang mga salmo, si David naghisgot sa kaaway nga mga tawo ug mga nasod ug miawit: “Ikaw, Oh Jehova nga Diyos sa mga panon, mao ang Diyos sa Israel. Pagmata ug iliso ang imong pagtagad sa tanang kanasoran. Ayaw pakitaig kaluoy si bisan kinsa nga madaotong mga  maluibon. Mopauli sila kanunay sa magabii; mopaghot sila kanunay sama sa usa ka iro ug magalibotlibot sa siyudad. Tan-awa! Sila nagapabugwak sa ilang baba; mga espada ang anaa sa ilang mga ngabil, kay kinsa ang nagapatalinghog? Apan ikaw, Oh Jehova, magakatawa kanila; imong himoon nga yubitonon ang tanang kanasoran.” (Salmo 59:5-8) Si Jehova mokatawa sa pagpanghambog ug kalibog sa mga nasod diha sa ilang binuang nga dalan batok kaniya.

11. Unsay mahitabo sa dihang ang mga nasod mosulay sa pagsupak sa katuyoan sa Diyos?

¹¹ Ang giingon sa Salmo 2 magpalig-on sa atong pagtuo nga ang Diyos makasulbad sa bisan unsang problema. Makasalig gayod kita nga siya kanunayng magtuman sa iyang kabubut-on ug dili gayod motalikod sa iyang maunongong mga alagad. (Salmo 94:14) Busa, unsay mahitabo sa dihang ang mga nasod maningkamot sa pagsupak sa katuyoan ni Jehova? Sumala niining salmoha, ang Diyos “mosulti kanila sa iyang kasuko,” nga ang tingog sama sa dinahunog sa dalugdog. Dugang pa, “sa iyang kapungot,” nga sama sa makusog nga kilat, “iyang gubton sila.”—Salmo 2:5.

Gipalingkod ang Hari sa Diyos

12. Ang Salmo 2:6 mapadapat sa unsang pagkaentrono?

¹² Ang sunod nga gisulti ni Jehova pinaagi sa salmista sa walay duhaduha nakapatugaw sa mga nasod. Ang Diyos nag-ingon: “Ako, ako mismo, nagpahimutang sa akong hari ibabaw sa Zion, ang akong bukid nga balaan.” (Salmo 2:6) Ang Bukid sa Zion maoy usa ka bukid sa Jerusalem diin si David gipalingkod nga hari ibabaw sa tibuok Israel. Apan ang Mesiyanikong Hari dili molingkod sa usa ka trono diha sa maong siyudad o sa laing dapit sa yuta. Sa pagkatinuod, gipalingkod na ni Jehova si Jesu-Kristo ingong iyang pinili nga Mesiyanikong Hari diha sa langitnong Bukid sa Zion.—Pinadayag 14:1.

13. Unsang pakigsaad ang gihimo ni Jehova uban sa iyang Anak?

¹³ Ang Mesiyanikong Hari misulti na. Siya miingon: “Isulti ko ang mando ni Jehova [kinsa mihimog pakigsaad uban sa iyang Anak alang sa Gingharian]; siya [Jehova nga Diyos] miingon kanako: ‘Ikaw mao ang akong anak; ako, karong adlawa, ako nahimong imong amahan.’” (Salmo 2:7) Gihisgotan ni Kristo ang pakigsaad sa Gingharian sa dihang giingnan niya ang iyang mga apostoles: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian.”—Lucas 22:28, 29.

14. Nganong ikaingon nga dili malalis nga si Jesus adunay katungod nga mahimong hari?

¹⁴ Sumala sa gitagna sa Salmo 2:7, giila ni Jehova si Jesus ingong Iyang Anak panahon sa iyang bawtismo ug pinaagi sa pagbanhaw kaniya ngadto sa espirituhanong kinabuhi. (Marcos 1:9-11; Roma 1:4; Hebreohanon 1:5; 5:5) Oo, ang Hari sa langitnong Gingharian mao ang bugtong Anak sa Diyos. (Juan 3:16) Ingong harianong kaliwat ni Haring David, dili malalis nga si Jesus adunay katungod nga mahimong hari. (2 Samuel 7:4-17; Mateo 1:6, 16) Sumala niining salmoha, giingnan sa Diyos ang iyang Anak: “Pangayo kanako, aron ikahatag ko ang mga nasod ingong imong panulondon ug ang mga kinatumyan sa yuta ingong imong gipanag-iya.”—Salmo 2:8.

15. Nganong pangayoon ni Jesus ang mga nasod ingong iyang panulondon?

 ¹⁵ Ang Hari—ang kaugalingong Anak sa Diyos—adunay posisyon nga ikaduha kang Jehova. Si Jesus nasulayan na, maunongon, ug masaligan ni Jehova. Dugang pa, si Jesus adunay panulondon ingong Panganay sa Diyos. Sa pagkatinuod, si Jesu-Kristo “mao ang larawan sa dili-makita nga Diyos, ang panganay sa tanang kalalangan.” (Colosas 1:15) Ang buhaton lamang niya mao ang pagpangayo ug ang Diyos ‘mohatag kaniya sa mga nasod ingong iyang panulondon ug sa mga kinatumyan sa yuta ingong iyang gipanag-iya.’ Pangayoon kini ni Jesus ingong usa kinsa ‘nahinangop sa mga butang may kalabotan sa mga anak sa mga tawo’ ug tungod sa iyang hugot nga tinguha sa pagtuman sa kabubut-on sa iyang langitnong Amahan ngadto sa yuta ug sa katawhan.—Proverbio 8:30, 31.

Ang Mando ni Jehova Batok sa mga Nasod

16, 17. Sumala sa Salmo 2:9, unsay sangpotan sa mga nasod?

¹⁶ Tungod kay ang ikaduhang salmo nagakatuman karon, panahon sa dili-makitang presensiya ni Jesu-Kristo, unsay sangpotan sa mga nasod? Sa dili madugay tumanon sa Hari ang giingon sa Diyos: “Imong dugmokon sila [mga nasod] pinaagi sa setro nga puthaw, imong pulpogon sila ingon sa usa ka sudlanan sa magkukulon.”—Salmo 2:9.

¹⁷ Ang mga setro sa mga hari sa karaang panahon maoy mga simbolo sa harianong awtoridad. Ang ubang setro hinimo sa puthaw, sama nianang gihisgotan niining maong salmo. Ang mahulagwayong pinulongan nga gigamit dinhi nagpaila nga sayon kaayong laglagon ni Kristo nga Hari ang mga nasod. Ang puwersadong pagbakyaw sa usa ka puthaw nga setro makadugmok sa kulon sa magkukulon, nga magpulpog gayod niana.

18, 19. Aron maangkon ang pag-uyon sa Diyos, unsay kinahanglang buhaton sa mga hari sa yuta?

¹⁸ Kinahanglan bang masaksihan sa nasodnong mga magmamando kanang malaglagong pagdugmok? Dili, ang salmista mihangyo kanila pinaagi niining mga pulonga: “Karon, Oh mga hari, gamita ang hait nga salabotan; magpatul-id kamo, Oh mga maghuhukom sa yuta.” (Salmo 2:10) Ang mga hari gihangyo sa pagpatalinghog, sa pagpakitag hait nga pagsabot. Kinahanglang hunahunaon nila nga walay pulos ang ilang mga plano, nga kasukwahi sa himoon sa Gingharian sa Diyos alang sa kaayohan sa katawhan.

¹⁹ Aron maangkon ang pag-uyon sa Diyos, ang mga hari sa yuta kinahanglang mag-usab sa ilang dalan. Sila gitambagan nga ‘alagaron si Jehova uban ang kahadlok ug magmalipayon uban ang pagkurog.’ (Salmo 2:11) Unsay mahitabo kon himoon nila kana? Imbes magkaguliyang, sila mahimong magmaya sa mga palaaboton nga ihatag kanila sa Mesiyanikong Hari. Kinahanglang talikdan sa mga magmamando sa yuta ang garbo ug kamapahitas-on nga ilang gipasundayag diha sa ilang pagmando. Dugang pa, kinahanglang mag-usab sila nga walay langan ug magpakita ug hait nga pagsabot mahitungod sa dili-matumbasan nga pagkalabaw sa pagkasoberano ni Jehova ug sa dili-mapugngang gahom sa Diyos ug sa iyang Mesiyanikong Hari.

“Hagki Ninyo ang Anak”

20, 21. Unsay kahulogan sa ‘paghalok sa anak’?

²⁰ Karon ang Salmo 2 maluluy-ong nagdapit sa mga magmamando sa mga nasod. Imbes maghugpong agig pagsupak, sila gitambagan: “Hagki ninyo ang anak, aron dili Siya [Jehova nga Diyos] masuko ug dili kamo mangahanaw gikan sa dalan, kay ang iyang kasuko dali rang mosilaob.” (Salmo 2:12a) Ang Soberanong Ginoong Jehova kinahanglang sugton sa dihang siya magpakanaog ug mando. Sa dihang gipalingkod na sa Diyos ang iyang Anak sa trono, ang mga magmamando sa yuta angay untang mohunong na sa ‘pagyagubyob ug walay-pulos nga butang.’ Giila unta dayon nila ang Hari ug bug-os nga nagmasinugtanon kaniya.

²¹ Nganong ‘hagkan ang anak’? Sa dihang gikomposo kining maong salmo, ang paghalok maoy pagpakighigala ug gigamit sa pag-abiabi sa mga bisita ngadto sa panimalay sa usa, diin matagamtam nila ang pagkamaabiabihon. Ang paghalok mahimong usa usab ka buhat sa pagkamaunongon. (1 Samuel 10:1) Niining bersikuloha sa ikaduhang salmo, ang Diyos nagsugo sa mga nasod sa paghalok, o pag-abiabi, sa iyang Anak ingong dinihogang Hari.

22. Ang mga magmamando sa mga nasod kinahanglang magpatalinghog sa unsang pasidaan?

 ²² Kadtong dili moila sa awtoridad sa pinili nga Hari sa Diyos nag-insulto kang Jehova. Wala nila ilha ang unibersohanong pagkasoberano ni Jehova nga Diyos ug ang iyang awtoridad ug katakos sa pagpili sa Hari nga mao ang kinamaayohang magmamando sa katawhan. Ang mga magmamando sa mga nasod makaamgo nga ang kapungot sa Diyos kalit lang modangat kanila, sa dihang sila naningkamot sa pagpatuman sa ilang kaugalingong mga plano. “Ang iyang kasuko dali rang mosilaob,” ug dili kapugngan. Ang nasodnong mga magmamando kinahanglang mapasalamaton nga modawat niining maong pasidaan ug molihok nga kaharmonya niana. Ang pagbuhat niana nagkahulogan ug kinabuhi.

23. Aduna pay panahon sa mga indibiduwal sa pagbuhat sa unsa?

²³ Kining madulaong salmo mihinapos: “Malipayon silang tanan nga modangop kaniya [Jehova].” (Salmo 2:12b) Aduna pay panahon alang sa tagsatagsa ka tawo sa pagpangitag luwas nga dapit. Tinuod usab kana bisan sa tagsatagsa ka magmamando nga nagpaluyo sa mga plano sa mga nasod. Sila makakalagiw ngadto kang Jehova, kinsa magtaganag dangpanan ilalom sa pagmando sa Gingharian. Apan kinahanglan silang molihok sa dili pa dugmokon sa Mesiyanikong Gingharian ang masinupakong mga nasod.

24. Sa unsang paagi kita makakinabuhi nga mas matagbawon bisan niining gubot nga kalibotan?

²⁴ Kon kita makugihong magtuon sa Kasulatan ug magpadapat sa tambag niini diha sa atong kinabuhi, kita makakinabuhi nga mas matagbawon bisan karon niining gubot nga kalibotan. Ang pagpadapat sa tambag sa Kasulatan moresulta sa mas malipayong mga relasyon sa pamilya ug kagawasan gikan sa daghang kabalaka ug kahadlok nga naghasol niining kalibotana. Pinaagi sa pagsunod sa mga giya sa Bibliya kita makasalig nga kita nakapahimuot sa Maglalalang. Walay lain gawas sa Unibersohanong Soberano ang makagarantiya sa “kinabuhi karon ug sa umaabot” human niya wagtangon sa yuta kadtong mosupak kon unsay matarong pinaagi sa pagsalikway sa pagmando sa Gingharian.—1 Timoteo 4:8.

25. Tungod kay “ang mando ni Jehova” dili mapakyas, unsay atong madahom nga mahitabo sa atong panahon?

²⁵ “Ang mando ni Jehova” dili mapakyas. Ingong atong Maglalalang, ang Diyos nahibalo kon unsay labing makaayo sa katawhan ug magtuman sa iyang katuyoan aron sa pagpanalangin sa masinugtanong katawhan uban ang kalinaw, pagkakontento, ug dumalayong kasegurohan ilalom sa Gingharian sa iyang pinalanggang Anak. Mahitungod sa atong panahon, ang manalagnang si Daniel misulat: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Nan, panahon na gayod karon nga ‘hagkan ang Anak’ ug alagaron ang Soberanong Ginoo, si Jehova!

[Mga footnote]

Unsaon Nimo Pagtubag?

• Unsang “walay-pulos nga butang” ang ‘ginayagubyob’ sa nasodnong mga pundok?

• Nganong himoon ni Jehova ang mga nasod nga yubitonon?

• Unsay mando sa Diyos batok sa mga nasod?

• Unsay kahulogan sa ‘paghalok sa anak’?

[Mga Pangutana sa Pagtuon]

[Hulagway sa panid 16]

Si David miawit bahin sa madaogong Mesiyanikong Hari

[Hulagway sa panid 17]

Ang mga magmamando ug ang katawhan sa Israel nagkunsabo batok kang Jesu-Kristo

[Hulagway sa panid 18]

Si Kristo gipalingkod ingong Hari sa langitnong Bukid sa Zion