“Alon Jiowa” Esap Tongeni Sopwongau

“Upwe pwarata alon ewe SAMOL: A fen apasa ngeniei, ‘En nei at . . . Kopwe tingor rei, o upwe ngonuk ekkewe mu pwe repwe alemwirium, pwal unusen fonufan pwe epwe fonuom.’”​—KÖLFEL 2:7, 8.

1. Ifa sokkofesennin an Kot kokkot me kokkotun ekkewe muu?

 MEI wor an Jiowa Kot kokkot fan iten aramas me ewe fonufan. Ekkewe muu mei pwal wor ar kokkot. Nge a ifa me sokkofesennin ekkeei kokkot! Sia silei pwe repwe sokkofesen, pokiten Kot a apasa: “Pun usun lang a tekia seni fanufan, iei usun ai al ra tekia seni ami al kana, nge ai ekiek seni ami ekiek kana.” An Kot we kokkot epwe wesewesen pwonueta, pokiten a pwal apasa: “Usun ran me sno ra pungutiu me lang, nge resap liwinta, pwe repwe mwo achonu pwul o arasi fanu o apwuku ira, epwe pwal wor fotan chon fofot me enen chon mongo, iei usun ai kapas esap liwinto rei fan pon, pwe epwe afisata mine ua tipeni o apwonueta mine ua akunou ngeni.”​—Aisea 55:9-11.

2, 3. Met ewe oruuen kol mi fel a affata me ikkefa ekkewe kapas eis ra ppiita?

² Pwe an Kot kokkot ussun noun we Messaia me King epwe pwonueta a ffatolo lon ewe  oruuen kol mi fel. Kot a emmweni ewe soumak, King Tafit lon Israel loom, pwe epwe oesini ussun eu fansoun ekkewe muu repwe fitikoko watte. Ekkewe sou nemenem repwe u ngeni Jiowa Kot me noun we Mi Kepit. Iwe nge, ewe soumak kol mi fel a pwal koluwu: “Upwe pwarata alon ewe SAMOL; A fen apasa ngeniei, ‘En nei at, . . . Kopwe tingor rei, o upwe ngonuk ekkewe mu pwe repwe alemwirium.’”​—Kol Fel 2:7, 8.

³ Met “alon ewe SAMOL” a wewe ngeni fan iten ekkewe muu? Ifa ussun epwe kku aramas meinisin? Pwungun pwe ifa weween alon Jiowa fan iten ekkewe chon allea ewe oruuen kol mi fel meinisin mi niuokkusiiti Kot?

Ekkewe Muu Ra Fitikoko Watte

4. Ifa ussun kopwe menlapei ekkewe mettoch mi lamot lon Kol Fel 2:1, 2?

⁴ Ewe soumak kol mi fel a kapas ussun fofforun ekkewe muu me nour kewe sou emmwen ren an koluwu: “Pwota chon ekewe mwu ra rawangau, nge ekewe aramas ra ekingau won mine a lomotongau? Ekewe king won fanufan ra uta, ekewe sounemenem ra pwungupwungfengen usun ar repwe u ngeni ewe Samol mi Lapalap, pwal ngeni noun we mi kepit.”​—Kol Fel 2:1, 2. *

5, 6. Ekkewe muun fonufan ra “ekingau” won met mi “lamotongau”?

⁵ Ifa ewe mettoch “a lamotongau” ekkewe muu ikenai ra “ekingau” ren? Ekkewe muun fonufan rese etiwa noun Kot mi Kepit​—ewe Messaia, are Kraist​—nge ra “ekingau,” are ekkekieki won ifa ussun repwe amwochu pwisin ar nemenem. Ekkewe kapas lon ewe oruuen kol mi fel a pwal pwonueta lon ewe aewin senturi C.E. lupwen ekkewe sou nemenemen Jus me Rom ra tipeeufengen pwe repwe nnielo ewe emon Kot a seikata epwe King, Jises Kraist. Iwe nge, pwonuetaan mi lapalap a poputa lon 1914 lupwen Jises a eani ewe wiis King lon lang. Seni ena fansoun, esor eu muu won fonufan a etiwa ewe King mi seikita me ren Kot.

⁶ Ifa weween an ewe soumak kol mi fel eani ewe kapas eis, pwata ‘ekewe aramas ra ekingau won mine a lomotongau’? Ar we kokkot a lamotongau; a lamot mwaal me epwe sopwongau. Rese tongeni wato kinamwe me tipeeu won fonufan. Nge ra u ngeni an Kot nemenem. Ren enletin, ra tipeeufengen pwe repwe u ngeni ewe Mi Tekia Seni Meinisin me noun we Mi Kepit. Mwa met ren tiparocher!

 Noun Jiowa King Mi Pworacho

7. Lon iotek, ifa ussun noun Jises kewe chon kaeo loom ra weweiti alon Kol Fel 2:1, 2?

⁷ Me ren noun Jises kewe chon kaeo Kol Fel 2:1, 2 a weneiti i. Ra riaffou mwaal pokiten ar luku me ra iotek: “Samol Lapalap [Jiowa], en mi foriata lang me fonufan me sat, o pwal masouer meinisin, en mi apasa ren ewe Ngun mi Fel ren auen semem Tafit, noum we chon angang, ‘Pwata ekkewe re Jentail ra lingeringer, o pwata ekkewe aramas ra chok ekiek mwal? Ekkewe kingen fonufan ra pwisin uta, o ekkewe sou nemenem ra mwichefengen, ra u ngeni ewe Samol, pwal ngeni noun we mi kepit.’ Pun enlet, Erot [Antipas] me Pontius Pailat, eti ekkewe re Jentail, pwal ekkewe aramasen Israel, ra fen mwichfengen lon ei telinim, o ra u ngeni noum we at mi fel, Jises, atewe ka epiti.” (Fofor 4:24-27; Luk 23:1-12) * Ewer, ra rauangau ngeni noun Kot we chon angang mi kepit Jises lon ewe aewin senturi. Iwe nge, ei kol mi fel epwe pwal pwonueta fitepuku ier mwirin.

8. Ifa ussun Kol Fel 2:3 a weneiti ekkewe muu ikenai?

⁸ Lupwen emon king a nemenem lon Israel loom, awewe chok ren Tafit, ekkewe muun ekis me nour kewe sou nemenem ra chufengen pwe repwe u ngeni Kot me noun we mi kepit. Nge ifa ussun lon ach ei fansoun? Ekkewe muun fonufan ikenai rese mochen alleasochisi allukun Jiowa me ewe Messaia. A ussun ita pwe ra apasa: “Sipwele mutalo ach keei fotek me rer, o pout senikich ar keei riri.” (Kol Fel 2:3) Ekkewe sou nemenem me ekkewe muu repwe u ngeni allukun Kot me noun we mi Kepit meinisin. Pwungun pwe, ar sotun le mutalo ekkena fotek me poutalo ekkena fofo meinisin repwe sopwongau.

Jiowa A Amangaueer

9, 10. Met popun Jiowa a amangaua ekkewe muu?

⁹ Jiowa ese osukosuk ren angangen ekkewe sou nemenemen fonufan le efisata pwisin ar nemenem. Ewe oruuen kol mi fel a pwal apasa: “Kot ewe mi mot won an lenien motun king lon lang a takir, ewe Samol a amangaueer.” (Kol Fel 2:4) Kot a akkapwonueta an we kokkot nge a ussun ita pwe esor lamoten ekkeei sou nemenem. A takiri ar lamalam tekia me a amangaueer. Ra sikasini met repwe fori. Iwe, me ren Jiowa ir minen atakirikir. Jiowa a takirir ren sopwongauen ar u ngeni i.

¹⁰ Lon pwal eu kol mi fel, Tafit a mak ussun ekkewe mwan me muu mi oputa i me a koluwu: “SAMOL, Kot Sapaot, en chok Koten Israel. Kopwe pwata, pwe kopwe afeiengaua ekkewe mu meinisin; kosap aimuelo emon leir ekkewe mi lamenata minne mi ngau ren ar rauarauengau. Iteiten lekuniol meinisin ra chok liwinto, ra akurang usun chok ekkewe kolak, o  ra feilfetal lon ei telinim. Ra nom ikenan, ra chok akurang ren auer, ra asefata tinauer​—pun ra chok ekieki, ‘Io epwe rong kich?’ Nge en, SAMOL, ka chok takiri ir; ka turunufasei ekkewe mu meinisin.” (Kol Fel 59:5-8) Jiowa a takiri an ekkewe muu sikasik me osukosuk lon ar lukumach le u ngeni i.

11. Met a fis lupwen ekkewe muu ra sotun u ngeni an Kot kokkot?

¹¹ Ekkewe kapas lon Kol Fel 2 ra apochokkula ach luku pwe Kot a tongeni pwakini osukosuk meinisin. Sia lukuluk pwe a tongeni apwonueta letipan fansoun meinisin me esap tongeni likitaalo noun kewe chon angang mi tuppwol. (Kol Fel 94:14) Iwe, met epwe fis lupwen ekkewe muu ra sotun le u ngeni an Jiowa kokkot? Me ren ei kol mi fel, Kot “epwe kapas ngenir lon an song,” ussun chok akurangen chopulap. Pwal och, “ren an lingeringer,” ussun chok fiifi, “epwe aniua ir.”​—Kol Fel 2:5.

Kot A Seikata Noun We King

12. Kol Fel 2:6 a weneiti seikitaan io?

¹² Ese mwaal met Jiowa a apasa ren ewe soumak kol mi fel a aosukosuka ekkewe muu. Kot a apasa: “Ua fen seikata ai king won ai chuk fel, Saion.” (Kol Fel 2:6) Chuuk Saion eu chuuk mi kukkun lon Jerusalem ia Tafit a seikita ie ussun emon king won Israel meinisin. Nge ewe Messaia, me King esap mommot lon eu leenien motun king lon ena telinimw are lon pwal eu leeni won fonufan. Ren enletin, Jiowa a fen seikata Jises Kraist ussun noun we Messaia me King won Chuuk Saion lon lang.​—Pwarata 14:1.

13. Ifa ewe pwon Jiowa a forifengen me Noun we?

¹³ Ewe Messaia me King a kapas iei. A apasa: “Upwe pwarata alon ewe SAMOL: [ewe a fen fori eu pwon fan iten ewe Muu ren Noun we]; [Jiowa Kot] a fen apasa ngeniei, ‘En nei at, ua fen efisuketa ikenai.’” (Kol Fel 2:7) Kraist a kapas ussun ewe pwon fan iten eu Muu lupwen a ereni noun kewe aposel: “Ami oua fen nonnom rei lon ai kewe riaffou. Iwe, usun Semei a fen filata pwe upwe angei eu mu, iei usun ua pwal filikemita.”​—Luk 22:28, 29.

14. Met popun sipwe tongeni apasa pwe mi fich ngeni Jises chok ewe wiis king?

¹⁴ Ussun chok a fen oesini lon Kol Fel 2:7, Jiowa a pwaralo pwe Jises Noun we lupwen a papatais me ren an amanauata i ngeni manau lon lang. (Mark 1:9-11; Rom 1:4; Ipru 1:5; 5:5) Ewer, Noun Kot alaemon ewe Kingen ewe Muu lon lang. (Jon 3:16) Pokiten Jises mwirimwirin King Tafit, mei wor an pwuung le eani ewe wiis King. (2 Samuel 7:4-17; Mattu 1:6, 16) Me ren ei kol mi fel, Kot a ereni Noun we: “Kopwe tingor rei, o upwe ngonuk ekkewe mu pwe repwe alemwirium, pwal unusen fonufan pwe epwe fonuom.”​—Kol Fel 2:8.

15. Met popun Jises a tingor pwe ekkewe muun fonufan epwe alemwirian?

¹⁵ Ewe King​—Noun Kot​—a eani ewe wiis nampa ruu chok fan Jiowa. Jises noun Jiowa mi murinno, tuppwol, me emon sipwe lukuluk won. Pwal och, epwe nom ren Jises ewe alemwir pokiten i noun Kot Mwanichi.  Pwungun pwe Jises Kraist “a weichiki Kot, ewe sise tongeni kuna, usun chok pwe i mwanichien forien Kot kewe meinisin.” (Kolose 1:15) Jises epwe chok tingor me Kot ‘epwe ngeni ekkewe mu pwe repwe alemwirian, pwal unusen fonufan pwe epwe fonuan.’ Jises a eani ei tingor pokiten an ‘pwapwa ren ekewe aramasen fanufan’ me pokiten a fokkun mochen apwonueta letipen Seman we lon lang ngeni fonufan me aramas.​—An Salomon Fos 8:30, 31.

Alon Jiowa Ngeni Ekkewe Muu

16, 17. Me ren Kol Fel 2:9, met epwe fis ngeni ekkewe muun fonufan?

¹⁶ Pokiten ewe oruuen kol mi fel a pwoppwonueta iei, atun an Jises Kraist nonnom sise tongeni kuna, met epwe fis ngeni ekkewe muu? Ekiselo chok ewe King epwele apwonueta alon Kot we: “Kopwap atailo ir ren efoch wokumecha, o amokurelo usun chok eu sepi mi for seni pwul.”​—Kol Fel 2:9.

¹⁷ Me loom, wokun ekkewe king ra esissinata ar nemenem mi tekia. Ekkoch wok ra ffor seni mecha, ussun ei kol mi fel a mak ussun. Ewe kapas awewe lon ei kol mi fel a pwarata mecheresin an Kraist ewe King ataielo ekkewe muu. Efoch wokun mecha a tongeni muttir amoku eu sepi mi ffor seni ppwul pwe epwe unusen talo.

18, 19. Met a lamot pwe ekkewe kingen fonufan repwe fori pwe repwe angei an Kot chen?

¹⁸ Ekkewe sou nemenem rese tongeni su seni ar kuna ei kata wachemuk? Aapw, popun ewe soumak kol mi fel a tingoreer ren ekkeei kapas: “Iei minne, ami king kena, oupwe tipatchemelo; o ami sou nemenemen fonufan, oupwe miritilo.” (Kol Fel 2:10) A lamot pwe ekkewe king repwe auseling, me ekiekiochu ei poraus. Ita repwe ekieki ussun lamotongauen ar kokkot me lamoten met an Kot we Muu epwe fori fan asengesin aramas.

¹⁹ A lamot pwe ekkewe kingen fonufan repwe siwili ar kewe foffor ika ra mochen angei an Kot chen. Ewe kol mi fel a pese ngeniir le “angang ngeni ewe SAMOL eti nuiokus; ren chechech.” (Kol Fel 2:11) Nge epwe ifa mwiriloon ar fori ena? Resap fitikoko wachemuk nge repwe chengel pokiten ekkewe apilukulukoch ewe Messaia me King epwe isetiu mwer. Epwe lamot pwe ekkewe sou nemenemen fonufan repwe poutalo ar lamalam tekia. Pwal och, resap mmang le siwil me pwarata mirit ussun an Jiowa nemenem mi tekia seni meinisin me manamanen Kot me noun we Messaia me King.

“Mitiri Ewe Nau”

20, 21. Met weween ach “mitiri ewe nau”?

²⁰ Kol Fel 2 a awora eu etiwetiw mi umoumoch fan iten ekkewe sou nemenemen ekkewe muu. Resap chufengen le u ngeni Kot, nge repwe: ‘Mitiri ewe nau pwe [Jiowa Kot] ete song, nge resap mafeiengau. Pun a muttir fis an song.’ (Kol Fel 2:12a) A lamot ach alleasochisi ewe Samol Jiowa, ewe Epinikepisom lupwen a fori eu alluk. Lupwen Kot a awiisa ngeni Noun we pwe epwe mommot lon ewe leenien motun King, ita ekkewe sou nemenemen fonufan repwe kaulo ar “ekingau.” Repwe ita muttir etiwa ewe King me unusen alleasochisi i.

²¹ Met popun repwe “mitiri ewe nau”? Lupwen a ffor ei kol mi fel, aramas ra pwarata ar chiechi ren ar mitiri emon me lupwen ra kapong ngeni ekkewe wasola lon imwer ia repwe pwapwafengen ie. Epwe pwal tongeni pwarata an emon tuppwol. (1 Samuel 10:1) Lon ei wokisin lon ewe oruuen kol mi fel, Kot a alluku ngeni ekkewe muu pwe repwe mitiri, are awasolaochu Noun we pun i emon King mi kepit.

22. A lamot pwe ekkewe sou nemenemen fonufan repwe alleasochisi menni kapasen ourour?

²² Chokkewe rese mochen anomuur fan nemenemen ewe emon Kot a filata pwe epwe King ra turunufasei Jiowa. Rese mochen etiwa an Jiowa Kot pwuung le nemeni mettoch meinisin me pwungun me tufichin le filata ewe King mi murinno seni meinisin epwe nemeni aramas meinisin. Ekkewe  sou nemenemen fonufan repwe miritiiti pwe an Kot song epwe muttir toriir lupwen ra sotun apwonueta ar kewe kokkot. “An we song mi chok muttir,” are muttir pwichita are esap amwochu. A lamot pwe ekkewe sou nemenemen fonufan repwe etiwa ei kapasen ourour fan kilisou. Manauer a alongolong won.

23. Mei chuen wor fansoun pwe aramas repwe fori met?

²³ Ei kol mi fel mi amwarar a muchulo ren ekkeei kapas: “Mi feioch ir meiniein mi opelong lon i [Jiowa].” (Kol Fel 2:12b) Mei chuen wor fansoun pwe aramas repwe kuna tumun. A pwal pwung ren ekkewe sou nemenem mi fen angang le alisata kokkotun ekkewe muu. Repwe tongeni su ngeni Jiowa, ewe emon a awora tumun fan nemenemen Muun we. Nge a lamot ar repwe fori mwen an Messaia we Muu epwe ataielo ekkewe muu mi u ngeni.

24. Ifa ussun sipwe tongeni manaueni manau mi menemenoch pwal mwo nge lon ei fonufan mi osukosuk?

²⁴ Ika sia achocho le kaeo ewe Paipel me apwonueta ekkewe fon lon manauach, sipwe tongeni manaueni manau mi menemenoch pwal mwo nge iei lon ei fonufan mi osukosuk. Ach apwonueta ekkewe fon lon ewe Paipel epwe uwani pwapwa lon famili me angasakichelo seni chommong osukosuk me niuokkus mi aosukosuka ei fonufan. Ach alleasochisi ekkewe emmwen seni ewe Paipel a alukulukukich pwe sia apwapwai ewe Chon Forata. Esor emon chilon chok ewe Epinikepisom won unusen lang me fonufan epwe tongeni ngenikich “ewe manau lon ei fansoun, o pwal ren ewe manau epwe feito” mwirin an limetawu seni fonufan chokkewe mi u ngeni minne mi pwung pokiten rese etiwa nemenemen ewe Muu.​—1 Timoti 4:8.

25. Pokiten “alon ewe SAMOL” ese tongeni sopwongau, met sipwe tongeni kuna lon ach ei fansoun?

²⁵ “Alon ewe SAMOL” ese tongeni sopwongau. Pokiten Kot ewe Chon Forata, a silei minne mi murinno fan iten aramas me epwe apwonueta an kokkot le efeiochu aramas ren kinamwe, menemenoch, me lukulukoch fan ewe Muun Noun we mi achengicheng. Ewe soufos Taniel a mak ussun ach ei fansoun: “Lon fansoun mwun ekewe king, ewe Koten lang epwe auta eu mwu esap tongeni tala. . . . Epwe ataela o arosala ekewe lusun mwu, nge epwe pusin nom tori feilfeilachok.” (Taniel 2:44) Pwungun pwe iei ewe fansoun ach sipwe “mitiri” ewe Nau me angang ngeni ach Samol Jiowa, ewe Epinikepisom!

[Ekkewe pwóróus fan]

Ifa Ussun Kopwe Polueni?

• Ifa ewe mettoch “a lamotongau” ekkewe muun fonufan ra ”ekingau” ren?

• Met popun Jiowa a amangaua ekkewe muun fonufan?

• Ifa alon Kot ngeni ekkewe muun fonufan?

• Met weween ach “mitiri ewe nau”?

[Ekkewe Kapas Eis fan Iten ewe Lesen]

[Sasing lon pekin taropwe 12]

Tafit a kol ussun ewe Messaia me King mi pworacho

[Sasing lon pekin taropwe 13]

Ekkewe sou nemenem me ekkewe aramasen Israel ra rauangaua Jises Kraist

[Sasing lon pekin taropwe 14]

Kraist a fen eani ewe wiis King won ewe Chuukun Saion won lang