Ena Sega ni Guce ‘na iLesilesi i Jiova’

“Au na tukuna nai lesilesi, sa kaya vei au ko Jiova, ko iko na luvequ . . . Kerea maivei au, ka’u na solia na veimatanitu me nomui votavota.”—SAME 2:7, 8.

1. E duidui vakacava na inaki ni Kalou kei na nodra inaki na veimatanitu?

NA KALOU o Jiova e tiko na nona inaki me baleta na kawatamata kei na vuravura. E tiko tale ga nodra inaki na veimatanitu. Ia era duidui sara vakalevu na inaki oqo! E dodonu meda namaka oqo baleta ni kaya na Kalou: “Me vaka na kena cecere cake na lomalagi ki vuravura, sa cecere cake vakakina na noqui valavala ki na nomudoui valavala, kei na noqu vakanananu ki na nomudou vakanananu.” Ena vakayacori dina ga na inaki ni Kalou, ni tomana: “Me vaka sa tau sobu na uca, kei na ucavulavula mai lomalagi, ka sa sega ni lesu tale yani kina, ia sa vakasuasuataka mada ga na qele, ka vakabulabulataka ka me kubu, me vuataka kina na sila vua sa kaburaka, kei na madrai vua sa kania; ena vaka talega kina na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u a tala kina.”—Aisea 55:9-11.

2, 3. Na cava e vakamatatataki ena ikarua ni same, ia na taro cava era basika kina?

² Na kena vakayacori na inaki ni Kalou me baleti koya na Tui Lumuti e vakamatatataki vinaka ena ikarua ni same. Na kena daunivucu, o Tui Tevita e Isireli makawa, a uqeti vakalou me tukuna ni na yaco na gauna era na cudru kina na veimatanitu. Era na tuvaivalu na kena iliuliu mera saqata na Kalou o Jiova kei koya na nona Lumuti. E lagata tale ga na daunisame: “Au na tukuna nai lesilesi, sa kaya vei au ko Jiova, ko iko na luvequ . . . Kerea maivei au, ka’u na solia na veimatanitu me nomui votavota, kei nai yalayala kei vuravura mo taukena.”—Same 2:7, 8.

³ Na cava na ibalebale ni ‘ilesilesi i Jiova’ vei ira na veimatanitu? E tara ira vakacava na kawatamata? Na cava na ibalebale ni veika oqo vei ira kece era rerevaka na Kalou era dau wilika na ikarua ni same?

Ra Cudru na Veimatanitu

4. O na umana vakacava na tikina bibi ena Same 2:1, 2?

⁴ Ni tukuna tiko na veika era cakava na veimatanitu kei ira na iliuliu, e tekivuna kina vaka oqo na daunisame nona sere: “E na cava era sa daucudru na veimatanitu, ka vakananuma na ka wale ko ira na lewe ni veivanua? Era sa tuvai valu na tui kei vuravura, a ra sa bose vata ko ira na kena turaga, me ra veivala kei Jiova, kei koya ka lumuta ko koya.”—Same 2:1, 2. *

5, 6. Na “ka wale” cava era “vakananuma” na lewe ni veivanua?

⁵ “Na ka wale” cava era “vakananuma” na leweniveivanua ena gauna oqo? Era sega ni ciqoma na veimatanitu na Lumuti ni Kalou—na Mesaia, se Karisito—ia era “vakananuma” ga se vakasamataka me tomani tiko ga nodra veiliutaki. Na vosa oqo ena ikarua ni same a vakayacori tale ga ena imatai ni senitiuri S.K. ena nodra cakacaka vata na nodra iliuliu na Jiu kei na nodra iliuliu na kai Roma mera vakamatea na Tui digitaki ni Kalou, o Jisu Karisito. Ia, sa qai vakayacori ena kena ivakatagedegede e levu cake me tekivu ena 1914 ni sa vakatikori o Jisu me Tui vakalomalagi. Me tekivu mai oya, e sega vakadua ni bau dua na matanitu vakapolitiki e vuravura me ciqoma na Tui lumuti ni Kalou.

⁶ Na cava na ibalebale ni nona taroga na daunisame, ‘na cava era vakananuma kina na ka wale na leweniveivanua’? E ka wale na nodra inaki; e matewale, ena guce dina ga. Era sega ni kauta rawa mai na sauta kei na veiyaloni e vuravura. Ia, era via saga sara mera lai saqata na veiliutaki ni Kalou. Era duavata ena nodra dau veicati ra qai bose vata mera saqati koya sa Cecere Sara kei na nona Lumuti. Sa ka vakalialia dina!

Tui Qaqa i Jiova

7. Era vakayagataka vakacava ena nodra masu na imuri taumada i Jisu na Same 2:1, 2?

⁷ Era vakayagataka na imuri i Jisu na vosa e cavuti ena Same 2:1, 2 me dusi koya ga. Nira tusaqati ena nodra vakabauta, era masulaka: “Kemuni na Turaga [Jiova], koi kemuni na Kalou, ko ni a buli lomalagi, kei vuravura, kei na waitui, kei na ka kecega sa tu kina: e na gusu i Tevita na nomuni tamata ko ni a kaya, sa daucudru na veimatanitu e na vuku ni cava, ka sa vakananuma na ka wale ko ira na lewe ni veivanua? Era sa tuvai valu na tui kei vuravura, a ra sa soqoni vata ko ira na turaga me ra veivala kei Jiova, kei na nona Karisito. Ni sa dina era sa soqoni vata e na koro oqo me ra veivala kaya na Luvemuni yalosavasava ko Jisu, ko koya ko ni a lumuta, koi rau ko Eroti kei Ponitio Pailato, kei ira na veimatanitu, kei ira na Isireli.” (Cakacaka 4:24-27; Luke 23:1-12) * Io, a bukiveretaki ena imatai ni senitiuri o Jisu na lumuti ni Kalou. Ia, na same oqo ena qai vakayacori tale ena vica vata na senitiuri e muri.

8. E tukuni ira vakacava na veimatanitu nikua na Same 2:3?

⁸ Ni a tiko na nodra tui e Isireli makawa, me vakataki Tevita, era duavata sara na veimatanitu lotu butobuto kei na kedra iliuliu mera saqata na Kalou kei koya e lumuta me nona tui. Ia vakacava ena noda gauna? Na veimatanitu nikua era sega ni via muria na veika erau vinakata o Jiova kei koya na Mesaia. Sa rauta me tukuni nira kaya tiko: “Tou drutilaka sara na kedraui vesu, ka biuta tani vei keda na nodrau dali.” (Same 2:3) Na veika erau vakatabuya na Kalou kei na nona Lumuti era na saqata na iliuliu kei na veimatanitu. Ia, ena matewale na sasaga cava ga e tovolei me drutilaki kina na ivesu kei na dali oqo.

Vakalialiai Ira o Jiova

9, 10. Na cava e vakalialiai ira kina na veimatanitu o Jiova?

⁹ E sega ni kauaitaka o Jiova na nodra sasaga na iliuliu ni veimatanitu mera liutaki ira ga. E tomana na ikarua ni same: “Ko koya sa tiko mai lomalagi ena dredre: ena vakalialiai ira na Turaga [Jiova].” (Same 2:4) E vakayacora ga na Kalou na nona inaki me vaka sara ga e sega na kedra yaga na iliuliu oqo. E dredrevaka na nodra viavialevu qai vakalialiai ira. Era dokadokataka na veika era nakita mera cakava, ia o Jiova e raici ira mera ka ni lasa. E dredrevaka na matewale ni nodra veisaqati.

¹⁰ Ena so tale na nona same, e tukuni ira na meca kei na veimatanitu o Tevita qai lagata: “Ia koi kemuni, Jiova, na Kalou ni lewe vuqa, na Kalou ni Isireli, mo ni yadra me cudruvi ira kece na veimatanitu: mo ni kakua ni vosoti ira na caka cala era sa dautalaidredre. Era daulesu mai kei na yakavi; era ososo me vaka na koli, ka vakavolivolita na koro. Raica, era sa dausova vosa e na gusudra: sa tiko nai seleiwau e na  tebenigusudra: ni ra sa kaya tiko, o cei sa rogoca? Ia koi kemuni, Jiova, ko ni na dredrevaki ira; ko ni na vakalialiai ira kecega na veimatanitu.” (Same 59:5-8) E dredrevaka o Jiova na nodra dokadoka kei na nodra veilecayaki na veimatanitu ena nodra sasaga vakalialia mera saqati koya.

11. Na cava ena yaco nira saga na veimatanitu mera vorata na inaki ni Kalou?

¹¹ Na vosa e cavuti ena Same 2 e vaqaqacotaka noda vakabauta ni Kalou e rawa ni walia na leqa cava ga. E rawa nida nuidei ni na vakayacora na nona inaki qai sega ni biuti ira na nona tamata yalodina. (Same 94:14) Koya gona, na cava ena yaco nira saga na veimatanitu mera vorata na inaki i Jiova? E tukuni ena Same oqo ni Kalou ena “vosa vei ira . . . ena nona cudru,” me vaka na vavadugudugu ni kurukuru. Kuria ni “nona cudru katakata,” e vaka na lidi ni livaliva, ena “vakararawataki ira.”—Same 2:5.

Buli Koya na Tui

12. O cei e tukuni ena Same 2:6 ni buli me tui?

¹² Na veika e kaya tarava o Jiova ena gusu i koya na daunisame e vakararawataki ira dina na veimatanitu. E kacivaka na Kalou: “Ia koi au ga, ka’u sa buli koya na noqu tui e na noqu ulu-ni-vanua tabu ko Saioni.” (Same 2:6) Na ulunivanua o Saioni e koto e Jerusalemi, a buli kina o Tevita me nodra tui na Isireli. Ia na Tui Lumuti ena sega ni dabeca na idabedabe vakatui ena koro oqori se ena dua tale na vanua e vuravura. O Jiova sa buli Jisu Karisito oti me nona Tui Lumuti ena ulunivanua o Saioni e lomalagi.—Vakatakila 14:1.

13. Na cava e veiyalayalatitaka o Jiova vei Luvena?

¹³ Sa qai vosa na Tui Lumuti. E kaya: “Au na tukuna nai lesilesi, sa kaya vei au ko Jiova [sa veiyalayalati kei Luvena me baleta na Matanitu], ko iko na luvequ: au [Kalou o Jiova] sa vakatuburi iko e na siga oqo.” (Same 2:7) E tukuna tiko o Karisito na veiyalayalati ni Matanitu ni kaya vei iratou nona yapositolo: “Oi kemudou ga, dou sa dautiko vata kei au e na noqu vosota na dauveivakatovolei. Ia ka’u sa solia vei kemudou e dua na matanitu me vaka sa solia mai vei au ko Tamaqu.”—Luke 22:28, 29.

14. Na cava e rawa ni tukuni kina ni dodonu ga me tui o Jisu?

¹⁴ Me vaka e tukuni vakailiu ena Same 2:7, o Jiova a ciqomi Jisu me Luvena ena gauna e papitaiso kina, vaka kina nona vakaturi koya ina bula vakayalo. (Marika 1:9-11; Roma 1:4; Iperiu 1:5; 5:5) Io, na Tui ni Matanitu vakalomalagi na Luvena duabau ga e vakatubura na Kalou. (Joni 3:16) Ni basika mai ena yatukawa i Tui Tevita, sa dodonu ga kina me tui o Jisu. (2 Samuela 7:4-17; Maciu 1:6, 16) Me vaka e tukuni ena same oqo, e kaya na Kalou vei Luvena: “Kerea maivei au, ka’u na solia na veimatanitu me nomui votavota, kei nai yalayala kei vuravura mo taukena.”—Same 2:8.

15. Na cava e kerea kina o Jisu na veimatanitu me nona ivotavota?

¹⁵ Na Tui, na Luve ni Kalou, e taravi Jiova. O Jisu e vakadinadinataki Jiova ena veika e sotava, e yalodina, qai dau nuitaki koya. Kuria oya ni o Jisu e nona na ivotavota me vaka ni  Ulumatua ni Kalou. Sa rauta me tukuni ni o Jisu Karisito “na i yaloyalo ni Kalou tawa raici. Sa ulumatua ko koya, ka sa ulu ni veika buli kece ga.” (Kolosa 1:15, VV) Sa vo ga vua me kerea, ia na Kalou ena qai solia vua ‘na veimatanitu me nona ivotavota, kei na iyalayala kei vuravura me taukena.’ Sa qai kerea o Jisu na veika oqo ni “dau marautaki ira na luve ni tamata,” kei na nona gagadre me cakava na loma i Tamana vakalomalagi e vuravura vaka kina vei ira na kawatamata.—Vosa Vakaibalebale 8:30, 31.

iLesilesi i Jiova Vei Ira na Veimatanitu

16, 17. Me vaka e tukuni ena Same 2:9, na cava sa na vakarau sotava na veimatanitu?

¹⁶ Me vaka ni sa vakayacori tiko nikua na ikarua ni same, ena gauna vata tale ga oya sa tiko tawarairai kina o Jisu Karisito, na cava sa na vakarau sotava na veimatanitu? Sa na vakarau vakayacora na Tui na ivakaro ni Kalou: “Ko na voroti ira e nai titoko kaukamea: ko na vorolaki ira me vaka na bilo nei koya na dautuli kuro.”—Same 2:9.

¹⁷ Na nodra ititoko na tui ena gauna makawa e vakaraitaka ni tu vei ira na lewa vakatui. E so na ititoko e kaukamea, me vaka e tukuni ena same oqo. Na veivosa e vakayagataki e ke e vakaraitaka ni rawarawa nona vakarusa na veimatanitu na Tui o Karisito. Ena dua ga na ituki e vakayagataki kina na ititoko kaukamea ena vorolaka vakadua na bilo nei koya na dautuli kuro.

18, 19. Na cava e dodonu mera cakava na tui kei vuravura me vakadonui ira kina na Kalou?

¹⁸ E dodonu beka ga mera sotava na iliuliu ni veimatanitu na veivakarusai oqo? Sega, ni vakamasuti ira vaka oqo na daunisame: “Ia mo dou qai vuku oqo, koi kemudou na tui: dou vakatavulici, koi kemudou na turaga ni lewa kei vuravura.” (Same 2:10) Era kacivi na tui mera kauaitaka vakabibi, ra qai vakasamataka vakatitobu na veika ena yaco. E dodonu mera dikeva na matewale ni nodra sasaga, ni vakatauvatani kei na veika vinaka ena cakava na Matanitu ni Kalou vua na kawatamata.

¹⁹ Me vakadonui ira na Kalou, e dodonu vei ira na tui kei vuravura mera veisautaka na veika era nakita mera vakayacora. Era vakauqeti mera “qaravi Jiova e na rere, ka ia vata na reki kei na sautaninini.” (Same 2:11) Vakacava ke ra muria na ivakasala oqo? Era na sega ni cudrucudru, ia era na marautaka na veika ena vakarautaka vei ira na Tui Lumuti. E bibi vei ira na iliuliu kei vuravura mera biuta tani na dokadoka kei na viavialevu era vakaraitaka ena nodra veiliutaki. Kuria, ni dodonu mera veisau vakusarawa ra qai raica vakabibi na veiliutaki cecere duadua i Jiova kei na kaukaua sega ni vorati rawa e tu vua na Kalou kei na nona Tui Lumuti.

“Reguca na Luvena”

20, 21. Na cava na ibalebale ni “reguca na Luvena”?

²⁰ Sa qai sureti ira vakayalololoma na iliuliu ni veimatanitu na Same 2. Era vakauqeti mera kua ni bosevata ena nodra veisaqati: “Reguca na Luvena, de cudru ko koya [Kalou o Jiova], ka dou sa rusa tani mai na sala, ni sa waqawaqa . . . na nona cudru.” (Same 2:12a) E dodonu me rogoci na ilesilesi ni Turaga Sau o Jiova. Ena gauna a vakatikori Luvena kina ena nona idabedabe vakatui, sa dodonu mera kua ni “vakananuma na ka wale” na iliuliu kei vuravura. E dodonu mera ciqomi koya na Tui ra qai vakarorogo vakatabakidua vua.

²¹ Na cava mera “reguca [kina] na Luvena”? Gauna e buli kina na same oqo, na veireguci e dau ivakaraitaki ni veitokani qai vakayacori mera kidavaki kina na vulagi ina dua na vale, mera lomavakacegu kina. Na veireguci e rawa ni ivakaraitaki tale ga ni yalodina. (1 Samuela 10:1) Ena tikina oqo ni ikarua ni Same, e vakarota kina na Kalou vei ira na veimatanitu mera reguca, se ra kidavaka na Luvena baleta ni Tui lumuti.

22. Na ivakasala cava mera muria na iliuliu ni veimatanitu?

²² O ira na sega ni ciqoma na veiliutaki ni nona Tui digitaki na Kalou era sega ni dokai Jiova. Era beca tale ga na nona veiliutaki cecere  na Kalou o Jiova, na nona lewa kei na nona rawa ni digitaka na Tui e iliuliu vinaka duadua ni kawatamata. Era na qai kila na iliuliu ni veimatanitu ni na tarai ira vakasauri na cudru ni Kalou, ena gauna era via vakayacora tiko kina nodra inaki. “Sa waqawaqa . . . na nona cudru,” se caudre totolo qai sega ni tarovi rawa. E dodonu mera ciqoma na iliuliu ni veimatanitu na ivakasala vakayalololoma oqo ra qai muria sara. Na nodra cakava oqo era na vakabulai kina.

23. Na cava mera cakava na tamata yadudua ni se soli tiko na gauna?

²³ Sa qai tini na same vakairogorogo oqo: “Era sa kalougata ko ira kecega sa vakararavi vei koya [o Jiova].” (Same 2:12b) Se soli tiko na gauna vei ira na tamata yadudua mera vaqara na vanua mera bula kina. Vaka tale ga kina o ira na iliuliu yadudua era a tokona tu na inaki ni veimatanitu. E rawa nira dro vei Jiova, ni vakayagataka na veiliutaki ni nona Matanitu me veitaqomaki kina. Ia e dodonu mera yavala rawa ni bera ni vorolaka na veimatanitu na Matanitu i koya na Mesaia.

24. Eda na marau vakacava dina nida bula tu ena vuravura leqaleqa oqo?

²⁴ Kevaka eda vulica vagumatua na iVolatabu da qai muria na kena ivakasala, eda na marau dina nida bula tu ena vuravura leqaleqa oqo. Na noda muria tale ga na ivakasala vakaivolatabu ena marautaki kina na veimaliwai vakavuvale, eda na galala kina mai na lomaleqa kei na rere e solega tu na vuravura. Na muri tale ga ni veidusimaki ena iVolatabu e vakadeitaka nida vakamarautaka tiko noda Dauveibuli. Na Tui Sau ga ni lomalagi kei na vuravura e rawa ni nuitaki ena “ka ni bula oqo, kei na ka ni bula talega ena muri mai,” nira sa na kau laivi e vuravura o ira kece ga era saqata na ka dodonu ena nodra cata na veiliutaki ni Matanitu ni Kalou.—1 Timoci 4:8.

25. Ni sega ni guce ‘na ilesilesi i Jiova,’ na cava eda namaka ena gauna oqo?

²⁵ ‘Na ilesilesi i Jiova’ ena sega ni guce. Ni noda Dauveibuli, e kila na Kalou na veika e vinaka duadua vua na kawatamata, ena vakayacora tale ga nona inaki me vakalougatataki ira kina na kawatamata talairawarawa ena sautu, lomavakacegu, ra qai taqomaki tawamudu ena ruku ni veiliutaki ni Matanitu i Luvena lomani. Me baleta na noda gauna, e vola na parofita o Taniela: “E na nodra gauna na tui ko ya ena qai vakatura na Kalou ni lomalagi e dua na matanitu, ena sega sara ni vakarusai rawa . . . ena vurumemeataka ga ka vakaotia na veimatanitu oqori, ka na tu ga ka sega ni mudu.” (Taniela 2:44) Io, oqo na gauna me ‘reguci kina na Luvena’ qai qaravi na Tui Sau o Jiova!

[iVakamacala e ra]

O na Sauma Vakacava?

• Na “ka wale” cava era “vakananuma” na veimatanitu?

• Na cava e vakalialia ira kina na veimatanitu o Jiova?

• Na cava na ilesilesi ni Kalou vei ira na veimatanitu?

• Na cava na ibalebale ni “reguca na Luvena”?

[Taro]

 [iYaloyalo ena tabana e 16]

E seretaka o Tevita nona qaqa na Tui Lumuti

 [iYaloyalo ena tabana e 17]

Era bukiveretaki Jisu Karisito na iliuliu kei na lewenivanua e Isireli

[iYaloyalo ena tabana e 18]

Sa buli o Karisito me Tui ena ulunivanua o Saioni e lomalagi