‘Osẹ́ndoai Jehovah Tọn’ Ma Sọgan Gboawupo
‘Osẹ́ndoai Jehovah Tọn’ Ma Sọgan Gboawupo
“Yẹn na dọ osẹ́ndoai lọ [he Jehovah] ko dọ hlan mi, dọmọ, Hiẹ wẹ Ovi ṣie . . . Biọ mi, yẹn nasọ yí kosi lẹ na we na ogú towe.”—PSALM 2:7, 8.
1. Vogbingbọn tẹwẹ tin to lẹndai Jiwheyẹwhe tọn po akọta lẹ tọn po mẹ?
JEHOVAH JIWHEYẸWHE tindo lẹndai de na gbẹtọvi lẹ podọ na aigba. Akọta lẹ lọsu tindo lẹndai de ga. Ṣigba lehe lẹndai ehelẹ gbọnvona yedelẹ do sọ! Ehe ma dona paṣa mí gba, na Jiwheyẹwhe dọmọ: “Le olọn yì oji hú aigba do, mọkẹdẹ wẹ aliho ṣie yì oji hú aliho mìtọn, linlẹn ṣie hú linlẹn mìtọn.” Ayihaawe depope matin dọ lẹndai Jiwheyẹwhe tọn na yin hinhẹndi, na e zindonukọn dọmọ: “Le jikun po kẹnjikun po nọ sọn olọn mẹ wá, bo masọ nọ lẹgọ do finẹ, ṣigba bọ e nọ hẹn aigba yọ̀n, bosọ nọ hẹn onú wú jẹgbonu, bosọ nọ bligò, na e nido na nọkún jidotọ, podọ núdùdù na núdùtọ. Mọkẹdẹ wẹ ohó ṣie he tọ́nsọn onù ṣie na te: e ma na lẹgọ wá dè e agbá, ṣigba e na dotana nuhe yẹn jlo, e na wadagbe to nuhe mẹ yẹn do e hlan te.”—Isaia 55:9-11.
2, 3. Etẹwẹ yin hinhẹn họnwun to psalm awetọ mẹ, ṣigba kanbiọ tẹlẹ wẹ fọndote?
2 E yin hinhẹn họnwun to psalm awetọ mẹ dọ lẹndai Jiwheyẹwhe tọn gando Ahọlu Mẹssia etọn go na yin hinhẹndi. Jiwheyẹwhe gbọdo psalm-kantọ lọ, Ahọlu Davidi Islaeli hohowhenu tọn nado dọ dọdai dọ ojlẹ ayidego tọn de na wá bọ akọta lẹ na to adanjẹ. Gandutọ yetọn lẹ na blanú kavi diọnukunsọ Jehovah Jiwheyẹwhe po Mẹyiamisisadode etọn po. Ṣigba, psalm-kantọ lọ sọ jihàn dọmọ: “Yẹn na dọ osẹ́ndoai lọ [he Jehovah] ko dọ hlan mi, dọmọ, Hiẹ wẹ Ovi ṣie . . . Biọ mi, yẹn nasọ yí kosi [kavi akọta] lẹ na we na ogú towe, aigba pòdo lẹ na nutindo towe.”—Psalm 2:7, 8.
3 Etẹwẹ ‘osẹ́ndoai Jehovah tọn’ zẹẹmẹdo na akọta lẹ? Nawẹ e gando gbẹtọvi lẹ go to paa mẹ gbọn? Na taun tọn, etẹwẹ e zẹẹmẹdo na budisi Jiwheyẹwhe tọ́ he to psalm awetọ lọ hia lẹpo?
Akọta lẹ to Adanjẹ
4. Nawẹ hiẹ na basi bladopọ nuagokun Psalm 2:1, 2 mẹ tọn lẹ gbọn?
4 To alọdindlẹndo nuyiwa akọta lẹ po gandutọ yetọn lẹ po tọn mẹ, psalm-kantọ lọ bẹ hànjiji etọn jẹeji dọmọ: “Etẹwutu wẹ kosi [kavi akọta] lẹ to adanjẹ, bọ gbẹtọ lẹ do to ayihamẹlẹnpọn na onú ovọ́? Ahọlu aigba tọn lẹ ṣite, ogán lẹ sọ to núbla do [Jehovah] go, podọ do mẹyiamisisadode etọn go.”—Psalm 2:1, 2. *
5, 6. “Onú ovọ́” tẹ ji wẹ pipli akọta lẹ tọn “to ayihamẹlẹnpọn” do?
5 “Onú ovọ́” tẹ ji wẹ pipli akọta egbezangbe tọn lẹ “to ayihamẹlẹnpọn” do? Kakati nado kẹalọyi Mẹyiamisisadode Jiwheyẹwhe tọn—Mẹssia lọ, kavi Klisti— akọta lẹ to hùnhlún, kavi “to ayihamẹlẹnpọn,” do lehe yé na wagbọn bọ aṣẹpipa yetọn na zindonukọn ji. Hogbe psalm awetọ lọ tọn ehelẹ sọ tindo hẹndi de to owhe kanweko tintan W.M. to whenuena aṣẹpatọ Ju po Lomu tọn lẹ po kọngbedopọ nado hù Ahọlu-Dide Jiwheyẹwhe tọn, Jesu Klisti. Ṣigba, hẹndi titengbe lọ bẹjẹeji to 1914 whenuena Jesu yin zizedo ofìn ji taidi Ahọlu olọn tọn. Sọn whenẹnu gbọ́n, pipli tonudidọ tọn dopo tata to aigba ji ma ko kẹalọyi Ahọlu zedo ofìn ji Jiwheyẹwhe tọn gba.
6 Etẹ dọ wẹ psalm-kantọ lọ te to whenuena e kanse dọ ‘etẹwutu wẹ pipli akọta lẹ tọn to ayihamẹlẹnpọn do onú ovọ́ de ji’? Nuhe dọ e te wẹ yindọ lẹndai yetọn yin ovọ́; yèdọ osin-bado-pápá nẹgbé poun wẹ. Yé ma sọgan hẹn jijọho po pọninọ po wá aigba ehe ji. Ṣogan, yé zindonukọn jẹ obá lọ mẹ nado diọnukunsọ gandudu Jiwheyẹwhe tọn. Na taun tọn, yé ko kọngbedopọ bo bẹ yedelẹ pli dopọ nado fọ́ngu sọta Ganhunupotọ lọ po Mẹyiamisisadode etọn po. Nululu nankọ die!
Ahọlu Awhàngbatọ Jehovah Tọn
7. Nawẹ hodotọ Jesu tọn dowhenu tọn lẹ yí Psalm 2:1, 2 zan gbọn?
7 Hodotọ Jesu tọn lẹ yí ohó Psalm 2:1, 2 tọn lẹ zan gando ewọ go. To whenuena yé yin homẹkẹndo na yise yetọn, yé hodẹ̀ dọmọ: “[Jehovah] E, hiẹ wẹ Jiwheyẹwhe, he dá olọn, aigba, ohù, po nuhe tin yé mẹ lẹ po: mẹhe dọ sọn onù Davidi devi towe tọn mẹ, dọmọ, Etẹwutu wẹ Kosi lẹ to adidù, bọ gbẹtọ lẹ sọ to onú vọ́ lẹn? Ahọlu aihọn mẹ tọn lẹ fọ́n ṣite, ogán lẹ sọ ṣinyan yede pli, do [Jehovah] ji, podọ do Klisti etọn ji. Podọ na nugbo de tọn, Ovi wiwe towe Jesu, mẹhe hiẹ yí ohia amì tọn do de ji wẹ Hẹlodi [Antipa], po Pọntiu Pilati po, po Kosi lẹ po, po omẹ Islaeli tọn lẹ po pli do.” (Owalọ lẹ 4:24-27; Luku 23:1-12) * Mọwẹ, sébibla de yin awuwlena sọta devizọnwatọ yiamisisadode Jiwheyẹwhe tọn, yèdọ Jesu to owhe kanweko tintan whenu. Etomọṣo, psalm ehe na tindo hẹndi devo to owhe kanweko lẹ godo.
8. Nawẹ Psalm 2:3 sọgbe hẹ akọta egbezangbe tọn lẹ gbọn?
8 To ojlẹ he mẹ gbẹtọvi lẹ, taidi Davidi to ahọludu to Islaeli, akọta kosi lẹ po gandutọ lẹ po bẹ yedelẹ pli sọta Jiwheyẹwhe po mẹyiamisisadode etọn he to ofìn ji lọ po. Ṣigba to egbehe lo? Akọta egbezangbe tọn lẹ ma jlo na kọngbedopọ hẹ nubiọtomẹsi Jehovah po Mẹssia lọ po tọn lẹ. Enẹwutu, yé dọmọ: “Mì gbọ mí ni wẹ́n ogàn yetọn gbidigbidi, bo ze okàn yetọn dlangbé sọn mí dali.” (Psalm 2:3) Gandutọ lẹ po akọta lẹ po na jẹagọdo dogbó depope he Jiwheyẹwhe po Mẹyiamisisadode etọn po zedai. Ṣigba, vivẹnudido yetọn lẹpo nado wẹ́n ogàn mọnkọtọn bo ze okàn enẹ dlangbé na yin ovọ́.
Jehovah Yí Yé do Davlẹ
9, 10. Naegbọn Jehovah yí akọta lẹ do davlẹ?
9 Jehovah ma tlẹ kiya dọ gandutọ akọta lẹ tọn to vivẹnudo nado ze gandudu yetọn titi dai gba. Psalm awetọ zindonukọn dọmọ: “Mẹhe sinai to olọn lẹ mẹ na kò yé: [Jehovah] na yí yé do davlẹ.” (Psalm 2:4) Jiwheyẹwhe zindonukọn to lẹndai etọn hinhẹndi mẹ taidi dọ aihun poun da wẹ gandutọ aihọn tọn lẹ te. E kò yé na mẹmasi yetọn wutu bo yí yé do davlẹ. Yé ni saa doawagun to nudepope he yé to linlẹn nado wà mẹ. To nukun Jehovah tọn mẹ, aṣagbọ́nu de wẹ yé yin. E kò yé na agọjẹdomẹ ovọ́ yetọn.
10 To psalm devo mẹ, Davidi dlẹnalọdo gbẹtọ po akọta he yin kẹntọ lẹ po bo jihàn dọmọ: “Hiẹ, [Jehovah] E, Jiwheyẹwhe awhànpa lẹ tọn, Jiwheyẹwhe Islaeli tọn, Fọ́n, bo dla kosi lẹ pọ́n: a yin lẹblanunọ hlan hùngbadonu azọ́ntọ ylanwiwa tọn lẹ blo. Yé lẹgọ to whèjai. Yé to hùnhlún taidi avún, bo to zọnlinzin lẹdo tòdaho lọ. Doayi e go, yé yí onù yetọn do họ̀ jẹgbonu: ohí sọ tin to nùflo yetọn mẹ: na yé to didọmọ, Mẹnu wẹ sè? Ṣigba hiẹ, [Jehovah] na kò yé; hiẹ nasọ yí kosi lẹ do davlẹ.” (Psalm 59:5-8) Jehovah kò kosi kavi akọta lẹ na awagundido po bẹwlu po he yé yí do to agọjẹdo e to nululu yetọn mẹ.
11. Etẹwẹ nọ jọ to whenuena akọta lẹ dovivẹnu nado glọnalina lẹndai Jiwheyẹwhe tọn?
11 Hogbe Psalm 2tọ tọn lẹ hẹn yise mítọn lodo dọ Jiwheyẹwhe sọgan duto avùnnukundiọsọmẹ depope ji. Mí sọgan tindo nujikudo lọ dọ ewọ nọ hẹn ojlo etọn di to whepoponu bo ma nọ gbẹkọ devizọnwatọ nugbonọ etọn lẹ go gbede. (Psalm 94:14) To whelọnu lo, etẹwẹ nọ jọ to whenuena akọta lẹ dovivẹnu nado yinuwa sọta lẹndai Jehovah tọn? Psalm ehe dọ dọ, Jiwheyẹwhe “na dọho hlan yé to homẹgble etọn mẹ,” taidi po ogbè gángán hẹviosò tọn po. Podọ, “to adánjijẹ zogbe etọn mẹ,” taidi zizẹ abì daho tọn, e “nasọ dobuna yé.”—Psalm 2:5.
Ahọlu Jiwheyẹwhe Tọn Yin Zizedo Ofìn Ji
12. Mẹzedo ofìn ji tẹ hodọ wẹ Psalm 2:6 te?
12 Matin ayihaawe, nuhe Jehovah dọ bọdego gbọn psalm-kantọ lọ gblamẹ gblehomẹna akọta lẹ. Jiwheyẹwhe lá dọmọ: “Yẹn ko ze ahọlu ṣie do Ziọni osó wiwe ṣie ji.” (Psalm 2:6) Osó Ziọni yin pópló he yiaga de to Jelusalẹm, fie Davidi yin zizedo ofìn ji te taidi ahọlu de do Islaeli pete ji. Ṣigba Ahọlu Mẹssia ma na sinai do ofìn de ji to tòdaho enẹ mẹ kavi fidepope to aigba ji gba. Na nugbo tọn, Jehovah ko ze Jesu Klisti do ofìn ji taidi Ahọlu dide Mẹssia etọn to Osó Ziọni olọn mẹ tọn ji.—Osọhia 14:1.
13. Alẹnu tẹwẹ Jehovah basi hẹ Ovi etọn?
13 Todin, Ahọlu Mẹssia lọsu dọho. E dọmọ: “Yẹn na dọ osẹ́ndoai [Jehovah he ko basi alẹnu Ahọluduta de tọn hẹ Ovi etọn tọn; Jehovah Jiwheyẹwhe] ko dọ hlan mi, dọmọ, Hiẹ wẹ Ovi ṣie; egbé wẹ yẹn de we tọ́n.” (Psalm 2:7) Klisti dlẹnalọdo alẹnu Ahọluduta lọ tọn to whenuena e dọna apọsteli etọn lẹ dọmọ: “Mìwlẹ wẹ mẹhe ko nọte hẹ mi to whlepọn ṣie lẹ mẹ. Yẹn sọ de ahọludu [kavi basi alẹnu] de hlan mì, dile Otọ́ ṣie de hlan mi do.”—Luku 22:28, 29.
14. Naegbọn e sọgan yin didọ dọ Jesu tindo jlọjẹ mlẹnmlẹn nado duahọlu?
14 Dile e yin didọdai to Psalm 2:7 mẹ do, Jehovah do Jesu hia di Ovi Etọn to baptẹm etọn whenu podọ gbọn finfọ́n ẹn sọnku do ogbẹ̀ gbigbọmẹ tọn de mẹ dali. (Malku 1:9-11; Lomunu lẹ 1:4; Heblu lẹ 1:5; 5:5) Na nugbo tọn, Ovi dopo akàn Jiwheyẹwhe tọn wẹ yin Ahọlu Ahọluduta olọn tọn. (Johanu 3:16) Taidi ahọvi he wá sọn kúnkàn Ahọlu Davidi tọn mẹ, Jesu tindo jlọjẹ mlẹnmlẹn nado duahọlu. (2 Samuẹli 7:4-17; Matiu 1:6, 16) Sọgbe hẹ psalm ehe, Jiwheyẹwhe dọna Ovi etọn dọmọ: “Biọ mi, yẹn nasọ yí kosi [kavi akọta] lẹ na we na ogú towe, aigba pòdo lẹ na nutindo towe.”—Psalm 2:8.
15. Naegbọn Jesu biọ akọta lẹ taidi ogú etọn?
15 Ahọlu lọ—yèdọ Ovi Jiwheyẹwhe tọn—wẹ bọdo Jehovah go tlọlọ to aṣẹpipa mẹ. Jesu wẹ mẹhe Jehovah ko tẹnpọn bo mọdọ e yin nugbonọ, bosọ yin omẹ dejidego lọ. Podọ, Jesu wẹ dugu taidi Viplọnji Jiwheyẹwhe tọn. Na nugbo tọn, Jesu Klisti wẹ yin ‘apajlẹ Jiwheyẹwhe he yè ma mọ tọn, viplọnji to yé he yè dá lẹpo mẹ.’ (Kọlọsinu lẹ 1:15) Eyin ewọ gbẹ́ biọ poun, Jiwheyẹwhe na ‘yí akọta lẹ na ẹn di ogú etọn podọ aigba pòdo lẹ di nutindo etọn.’ Jesu basi obiọ ehe taidi mẹlọ he ‘nọ hùnhomẹ to nuhe gando ovi gbẹtọ tọn go lẹ mẹ’ podọ na ojlo vẹkuvẹku etọn nado hẹn ojlo Otọ́ olọn mẹ tọn etọn hlan aigba po gbẹtọvi lẹ po di wutu.—Howhinwhẹn lẹ 8:30, 31.
Osẹ́ndoai Jehovah Tọn Sọta Akọta Lẹ
16, 17. Sọgbe hẹ Psalm 2:9, etẹwẹ to tenọpọn akọta lẹ?
16 To whenuena e yindọ psalm awetọ to hẹndi mọyi todin, to ojlẹ tintin tofi mayinukundomọ Jesu Klisti tọn mẹ, etẹwẹ na yin kọdetọn lọ na akọta lẹ? Ahọlu lọ na hẹn nulila Jiwheyẹwhe tọn di to madẹnmẹ dọmọ: “Opò ogàn tọn wẹ hiẹ na do gbà yé [akọta lẹ]; hiẹ nasọ lì yé pọ́dọ́pọ́dọ́ di okò zẹ́nmẹtọ tọn.”—Psalm 2:9.
17 Opò ogàn tọn kavi Ogánpò ahọlu hohowhenu tọn lẹ tọn yin ohia aṣẹpipa ahọlu de tọn. Ogánpò delẹ nọ yin bibasi po ogàn po, taidi dehe psalm ehe dọho etọn. Hogbe yẹhiadonu tọn he yin yiyizan tofi do lehe e na bọawuna Klisti Ahọlu lọ nado và akọta lẹ sudo hia. Opò ogàn tọn de yíyí do linú okò zẹ́nmẹtọ tọn de po huhlọn po na gbà ẹ hányán, bo na lì i pọ́dọ́pọ́dọ́.
18, 19. Nado mọ alọkẹyi Jiwheyẹwhe tọn, etẹwẹ ahọlu aigba ji tọn lẹ dona wà?
18 Be gandutọ akọta tọn lẹ dona mọ vasudo mlẹnmlẹn mọnkọtọn dandan wẹ ya? Lala, na psalm-kantọ lọ vẹ̀ yé po hogbe ehelẹ po dọmọ: “Enẹwutu nuyọnẹn ni pé mì dinvie, mì ahọlu emi; na yè nisọ plọn mì, mì whẹdatọ aigba tọn emi.” (Psalm 2:10) Ahọlu lẹ yin oylọ-basina nado tuntoai bo yí wuntuntun zan. Yé dona lẹnnupọndo ovọ́-yinyin tito yetọn lẹ tọn ji, to vogbingbọnmẹ na ale he Ahọluduta Jiwheyẹwhe tọn na hẹnwa na gbẹtọvi lẹ.
19 Nado mọ alọkẹyi Jiwheyẹwhe tọn, ahọlu aigba ji tọn lẹ dona diọ walọ yetọn. Yé yin tudohomẹna nado “yí osi do sẹ̀n [Jehovah], bosọ jaya po sisọsisọ po.” (Psalm 2:11) Etẹwẹ na yin kọdetọn lọ eyin yé wàmọ? Kakati yé na to adanjẹ, kavi tin to homẹgble sinsinyẹn mẹ, yé sọgan jaya to nukundido he Ahọlu Mẹssia zedonukọnna yé lẹ mẹ. E na yin dandannu na ahọlu aigba ji tọn lẹ nado gbẹkọ goyiyi po sakla po he yé nọ dohia to gandudu yetọn mẹ lẹ go. Humọ, yé dona lẹnvọjọ matin gbàndindọn bo yí wuntuntun zan gando agayiyi mayọnjlẹ nupojipetọ-yinyin Jehovah tọn podọ huhlọn jiawu Jiwheyẹwhe po Ahọlu Mẹssia etọn po tọn go.
“Yí Nùdonùgo Na Ovi Lọ”
20, 21. Etẹwẹ e zẹẹmẹdo nado “yí nùdonùgo na Ovi lọ”?
20 Todin, Psalm 2tọ ze oylọ-basinamẹ lẹblanu tọn de donukọnna gandutọ akọta lẹ tọn. Kakati nado bẹ yedelẹ pli nado jẹagọdomẹ, ayinamẹ yin nina yé dọmọ: “Yí nùdonùgo na Ovi lọ, e [Jehovah Jiwheyẹwhe] nikaa sadi, mìwlẹ bo nasọ và to ali lọ ji, whenuena homẹgble etọn fọ́ngu vude.” (Psalm 2:12a) Oklunọ Nupojipetọ Jehovah dona yin tonusena to whenuena e na osẹ́ndoai de. To whenuena Jiwheyẹwhe ze Ovi etọn do ofìn ji, gandutọ aigba ji tọn lẹ dona ko doalọtena ‘ayihamẹlinlẹnpọn do onú ovọ́ ji.’ Yé dona ko kẹalọyi Ahọlu lọ to afọdopolọji bo setonuna ẹn to gigọ́mẹ.
21 Naegbọn yé na “yí nùdonùgo na Ovi lọ”? To ojlẹ he mẹ hànjiji psalm tọn ehe yin pipà, nùdonùgo yin dohia họntọnjihẹmẹ tọn bosọ nọ yin yíyí do dokuavọna jonọ lẹ wá owhé mẹtọn gbè, fie yé sọgan duvivi johẹmẹ tọn te. Nùdonùgo sọgan sọ yin nuyiwa godonọnamẹ, kavi nugbonọ-yinyin hlan mẹde tọn. (1 Samuẹli 10:1) To wefọ psalm awetọ lọ tọn ehe mẹ, Jiwheyẹwhe to gbedena akọta lẹ nado yí nùdonùgo, kavi dokuavọna Ovi etọn taidi Ahọlu yiamisisadode lọ.
22. Avase tẹwẹ e na pọnte na gandutọ akọta tọn lẹ nado dotoai na?
22 Mẹhe to gbigbẹ́ nado kẹalọyi aṣẹpipa Ahọlu dide Jiwheyẹwhe tọn tọn lẹ do mẹmasi hia Jehovah. Yé gbẹ́ nupojipetọ-yinyin Jehovah Jiwheyẹwhe tọn do wẹkẹ lọ ji dai bosọ gbẹ́ aṣẹpipa po nugopipe etọn po nado de Ahọlu he yọ́n hugan lọ na gbẹtọvi lẹ dai. Gandutọ akọta lẹ tọn na mọdọ adì Jiwheyẹwhe tọn na wá yé ji to ajijimẹ, to whenuena yé to tintẹnpọn nado hẹn tito yetọn titi lẹ di. “Homẹgble etọn fọ́ngu” po awubibọ po, kavi jizò do yé ji po awuyiya po bo ma sọgan yin alọhẹndotena. E na pọnte dọ gandutọ akọta lẹ tọn ni kẹalọyi avase ehe po pinpẹn-nutọn-yinyọnẹn po bo yinuwa sọgbe hẹ ẹ. Enẹ na dekọtọn do ogbẹ̀ mẹ.
23. Etẹwẹ whenu gbẹ́ pò na gbẹtọ lẹ nado wà?
23 Psalm ayidego tọn ehe yin tadona dọmọ: “Donanọ [kavi ayajẹnọ] wẹ yé he dín fibẹtado to e [Jehovah] mẹ lẹ.” (Psalm 2:12b) Whenu gbẹ́ pò na gbẹtọ lẹ dopodopo nado dín fibẹtado. Mọdopolọ, whenu gbẹ́ pò na gandutọ lẹ dopodopo he ko to godonọna tito akọta lẹ tọn nado họ̀ngán. Yé sọgan họ̀n wá Jehovah dè, mẹhe nọ wleawuna fibẹtado to gandudu Ahọluduta lọ tọn glọ. Ṣigba yé dona yinuwa whẹpo Ahọluduta Mẹssia tọn na gbidi akọta he jẹagọdo e lẹ sẹ̀.
24. Nawẹ mí sọgan wagbọn do zan gbẹzan pekọhẹnwanamẹ tọn de, etlẹ yin to aihọn ylankan ehe mẹ?
24 Eyin mí nọ yí sọwhiwhe do plọn Biblu bo nọ yí ayinamẹ etọn lẹ do yizan mẹ, mí sọgan zan gbẹzan pekọhẹnwanamẹ tọn todin to aihọn ylankan ehe mẹ. Ayinamẹ Owe-wiwe tọn lẹ yíyí-do-yizan mẹ nọ dekọtọn do haṣinṣan whẹndo tọn ayajẹnọ de mẹ bosọ nọ hẹnmẹ jẹ mẹdekannu sọn magbọjẹ po obu he gọ́ aihọn ehe mẹ lẹ po si. Hihodo nujinọtedo Biblu tọn lẹ nọ hẹn mí deji dọ mí to homẹ Mẹdatọ lọ tọn hẹn hùn. Mẹdevo depope gbọnvona Nupojipetọ Wẹkẹ tọn lọ ma sọgan na mí nujikudo “aihọn he tin to dinvie tọn, po aihọn he ja tọn po” gba to whenuena e na ko và mẹhe jẹagọdo nuhe sọgbe lẹ gbọn gbigbẹ́ gandudu Ahọluduta lọ tọn dai dali lẹ sudo.—1 Timoti 4:8.
25. To whenuena e yindọ ‘osẹ́ndoai Jehovah tọn’ ma sọgan gboawupo, etẹwẹ mí sọgan donukun dọ e na jọ to ojlẹ mítọn mẹ?
25 ‘Osẹ́ndoai Jehovah tọn’ ma sọgan gboawupo. Taidi Mẹdatọ mítọn, Jiwheyẹwhe yọ́n nuhe yin dagbe na gbẹtọvi bo nasọ hẹn lẹndai etọn di nado yí jijọho, pekọ, po hihọ́ he na dẹn-to-aimẹ po do dona gbẹtọvi tonusetọ lẹ to Ahọluduta Ovi yiwanna etọn tọn glọ. Yẹwhegán Daniẹli wlan gando ojlẹ mítọn go dọmọ: “To azán ahọlu nẹlẹ tọn lẹ mẹ wẹ Jiwheyẹwhe olọn tọn na ze ahọludu de daga, he ma na yin vivà gbede. . . . E na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.” (Daniẹli 2:44) To whelọnu lo, e họnwun dọ din wẹ ojlẹ lọ nado “yí nùdonùgo na Ovi lọ” bo sẹ̀n Oklunọ Nupojipetọ, Jehovah!
[Nudọnamẹ Odò Tọn]
^ To whenẹnu, Ahọlu Davidi wẹ yin “mẹyiamisisadode” lọ, podọ “ahọlu aigba tọn lẹ” wẹ ahọlu Filistininu lẹ he bẹ awhànfuntọ yetọn lẹ pli sọta ẹ.
^ Kandai Owe-wiwe Glẹki tọn devo lẹ sọ dohia dọ Jesu wẹ yin Mẹyiamisisadode Jiwheyẹwhe tọn he yin alọdlẹndo to psalm awetọ mẹ. Ehe yin hinhẹn họnwun to Psalm 2:7 yiyijlẹdo Owalọ lẹ 13:32, 33 po Heblu lẹ 1:5; 5:5 po go mẹ. Pọ́n Psalm 2:9 po Osọhia 2:27 po ga.
Nawẹ Hiẹ Na Na Gblọndo Gbọn?
• “Onú ovọ́” tẹ ji wẹ pipli akọta lẹ tọn “to ayihamẹlẹnpọn” do?
• Naegbọn Jehovah yí akọta lẹ do davlẹ?
• Etẹwẹ yin osẹ́ndoai Jiwheyẹwhe tọn sọta akọta lẹ?
• Etẹwẹ e zẹẹmẹdo nado “yí nùdonùgo na Ovi lọ”?
[Kanbiọ Oplọn Tọn Lẹ]
[Yẹdide to weda 16]
Davidi jihàn dogbọn Ahọlu Mẹssia awhàngbatọ lọ dali
[Yẹdide to weda 17]
Gandutọ lẹ po omẹ Islaeli tọn lẹ po blasé do Jesu Klisti go
[Yẹdide to weda 18]
Klisti ko yin zizedo ofìn ji taidi Ahọlu to Osó Ziọni olọn mẹ tọn ji