‘Jehova Thuruat’ A Hlawhchham Thei Lo

“Thuruat chu ka hril dâwn: LALPAN ka hnênah, ‘Nang zawng ka fapa i ni e . . . Mi dîl rawh, tichuan i rochun atân hnam tin ka pe . . . ang che.”​—⁠SAM 2:​7, 8.

1. Pathian thiltum leh hnamte thiltum inkârah eng danglamna nge awm?

PATHIAN JEHOVA chuan mihringte tân leh lei atân hian thiltum a nei a. Hnamte pawhin thiltum an nei a. Mahse, an thiltumte chu a va inang lo tak êm! A inang lo vang tih chu Pathian thusawi aṭang hian kan beisei tûr rêng a ni: “Vân khi lei aia a sâng zâwk angin, ka awm dânte hi in awm dânte aiin a sâng zâwk si a, ka ngaihtuahte pawh in ngaihtuahte aiin a sâng zâwk bawk a ni,” tih aṭang hian. Pathian chuan heti hian a sawi zawm avângin a thiltumte chu a famkim ngei ngei dâwn a ni: “Ruah leh vûr chu vân aṭangin a sûr ṭhîn a, khi lamah khian a kîr leh ngai lo va, lei hi a châwm zâwk a, thil a ṭotîrin a chawrtîr a, buh chi thehtu hnênah buh chi a pe a, eitu hnênah ei tûr a pe ṭhîn; chutiang bawkin ka kâ aṭanga ka thu chhuak chu a awm ang: engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tiin.​—⁠Isaia 55:​9-11.

2, 3. Sâm pahnihna hian eng nge a tih chian a; mahse, eng zawhnate nge lo chhuak?

² A Messia Lal chungchânga Pathian thiltum a thlen famkim tûrzia Sâm pahnihnaah hian chiang taka târ lan a ni. A phuahtu hmân lai Lal Davida chu, hnamte an thinur hun, hun pawimawh tak mai a lo thlen tûr thu hrilh lâwk tûrin Pathianin a thâwk khum a. An lalte’n Jehova leh a Hriak Thiha chu an kalh dâwn a ni. Mahse, fakna hla phuahtu chu heti hian a zai bawk a ni: “Thuruat chu ka hril dâwn: LALPAN ka hnênah, ‘Nang zawng ka fapa i ni e . . . Mi dil rawh, tichuan i rochun atân hnam tin ka pe ang chia, kâwlkil tâwp thlengin i ro atân ka pe bawk ang che,’” tiin.​—⁠Sâm 2:​7, 8.

³ Hnamte tâna ‘Jehova thuruat’ chuan eng awmzia nge a neih? Chu chuan engtin nge khawvêl mi nawlpuite a nghawng? Dik takin, he thil hian Sâm pahnihna chhiartu Pathian ṭih mi zawng zawngte tân eng awmzia nge a neih?

Hnamte An Thinur

4. Engtin nge Sâm 2:​1, 2-a thu pawimawhte i khaikhâwm ang?

⁴ Hnamte leh an lalte thiltih chu sawiin, fakna hla phuahtu chuan: “Hnam tin chu engati nge an thinur a, mi tinin engati nge thil sâwt lo an ngaihtuah? Leia lalte an hel a, hotute pawhin LALPA leh a hriak thiha chu an phiar hlawm a,” tia zaiin a hla chu a phuah ṭan a ni.​—⁠Sâm 2:​1, 2. *

5, 6. Mi tinin eng “thil sâwt lo” nge an “ngaihtuah”?

⁵ Tûn laia hnamte chuan eng “thil sâwt lo” nge an “ngaihtuah”? Pathian Hriak Thih​—⁠Messia, a nih loh leh Krista⁠—chu pawm aiin, hnamte chuan anmahni thuneihna humhalh dân chu an “ngaihtuah” zâwk a ni. Hêng sâm pahnihna thute hi C.E. kum zabi khatnaa Juda leh Rom thuneitute’n Pathian Lal Ruat, Isua Krista thah tuma an thawhho khân a thleng famkim bawk a. Amaherawhchu, a thlen famkimna ropui zâwk chu 1914-a Isua vân lam Lala ṭhuttîr a nih khân a inṭan a ni. Chuta ṭang chuan, leia politics pâwl pakhat tê mahin Pathianin Lala a ṭhuttîra chu an pawm lo a ni.

⁶ Fakna hla phuahtuin “mi tinin engati nge thil sâwt lo an ngaihtuah?” a tih hian eng a tihna nge ni? Thil sâwt lo a tih chu an thiltuma  chu a ni a; thil lothlâwn mai leh hlawhtling ngai lo tûr a ni. He leiah hian remna leh inlungrualna an thlen thei lo. Mahse, Pathian rorêlna dodâl khawpin an thiltum chu an kengkawh a ni. A nihna takah chuan, Anni chuan thinrim taka ṭangrualin Chungnungbera leh a Hriak Thih chu an do tlâng a ni. A va âtthlâk tak êm!

Jehova Lal Hlawhtling Chu

7. Engtin nge Isua hnungzuitu hmasate khân Sâm 2:​1, 2-na thu hi an hman?

⁷ Isua hnungzuitute chuan Sâm 2:​1, 2 thu hi amahah an hmehbel a. An rinna avânga tihduhdah an nihin, anni chuan: “Lalpa [Jehova], nang vân te, lei te, tuifinriat te, a chhûnga awmte zawng zawng Siamtu i ni; nangin thlarau thianghlimin, min thlahtu i chhiahhlawh Davida kain, hêng thu hi i sawi a ni: ‘Jentailte engati nge an thinur kha? Hnam tinin engati nge thil sâwt lo an ngaihtuah? Khawvêl lalten an ep huai huai a, hotute pawh an pungkhâwm a, Lalpa leh a Krista chungah chuan,’ tiin. He khuaah hian i chhiahhlawh thianghlim i hriak thih Isua chungah khân, Heroda [Antipas] leh Pontia Pilata nên, Jentailte leh Israel mite nên an pungkhâwm tak zet a ni,” tiin an ṭawngṭai a. (Tirhkohte 4:​24-27; Luka 23:​1-12) * Ni e, kum zabi khatnaah khân Pathian chhiahhlawh hriak thih Isua chu phiarrûk a ni a. Amaherawhchu, he fakna hla hian a hnu kum zabi engemaw zâtah chuan thlen famkimna dang a nei leh a ni.

8. Engtin nge Sâm 2:3 chuan tûn lai hnamte a sawi?

⁸ Hmân lai Israelte’n Davida ang mihring lal an neih lai khân, milem be hnamte leh rorêltute ṭangrual chuan Pathian leh a hriak thiha chu an do a ni. A nih leh, kan hun lai dinhmun hi eng nge ni ve thung? Tûn laia hnamte chuan Jehova leh Messia thil phûtte chu an zâwm duh lo va. Chuvângin, anni chu: “An phuarnate hi tichatin, an hruihrualte hi kan hnên ata i paih daih ang u,” tia sawi anga târ lan an ni. (Sâm 2:⁠3) Pathian leh a Hriak Thihin an khap thil engpawh chu rorêltute leh hnamte chuan an dodâl a ni. Chûng phuarnate tihchah leh hruihrualte paih daih tuma beihna engpawh chu a thlâwn mai a ni ang.

Jehova’n Anniho Chu A Nuihzat

9, 10. Engvângin nge Jehova’n hnamte chu a nuihzat?

⁹ Jehova chu a hnên aṭanga inlahranga mahnia ro inrêl tûra hnam rorêltute thawhrimna engmahin a nghawng lo. Sâm pahnihna chuan: “Vâna ṭhua chu a nui ang a: Lalpa chuan anniho chu a nuihzabûr ang,” tiin a sawi zawm a ni. (Sâm 2:⁠4) Chûng rorêltute chu engmah lo ang maia ngaiin Pathian chuan a thiltum chu a keng tlang zêl a. An chaltlaina chu a nuihzat a, anniho chu a nuihzabûr a ni. An thiltih tum chu chapopui rawh se. Jehova tân chuan anni chu nuihzabûr mai an ni a. An dodâlna sâwt lo tak mai chu a nuihzat a ni.

¹⁰ Davida chu fakna hla dangah, a hmêlmate leh hnamte chungchâng sawiin heti hian a zai a ni: “Aw LALPA, sipaihote Pathian, Israelho Pathian, nangmah ngei chu hnam tinrêng tlawh tûrin tho la: mi vervêk sual takte rêng rêng chu khawngaih suh ang che. Tlai lamah an lo kal leh a, ui angin an chiau chûl a, khawpui chu an vêl an vêl a. Ngai teh, an kâin an irh chhuak a; an hmuiah chuan khandaihte a awm a: ‘Tunge hria awm ni?’ an ti mai a. Nimahsela aw LALPA, nangin anni chu i nuihsan zâwk ang a; hnam tinrêng chu i nuihzabûr ang,” tiin. (Sâm 59:​5-8) Jehova chuan hnamte’n amah âtthlâk taka an dona kawnga an chapona leh buai nuai nuaina chu a nuihzat a ni.

11. Hnamte’n Jehova thiltumte kalha ṭan an khawhin eng nge lo thleng ṭhîn?

¹¹ Sâm 2-na thute chuan Pathianin eng buaina pawh a tiveng thei tih kan rinna a tichak a ni. Ani chuan a duhzâwng chu engtik lai pawhin a hlenin, a chhiahhlawh rinawm nghette a phatsan ngai lo tih kan ring nghet tlat thei a ni.  (Sâm 94:14) A nih leh, hnamte’n Jehova thiltumte kalha ṭan an khawhin eng nge lo thleng ṭhîn? Chutiang hunah chuan he fakna hlain a târ lan angin, Pathianin khawpui ri khâwk râpthlâk tak ang maiin “thinurin an hnênah thu a sawi ang.” Chu bâkah, kâwl phe zawr zawr ang maiin “thinrim takin anmahni a timangang” ang.​—⁠Sâm 2:⁠5.

Pathian Lal Siam Chu Lala Ṭhuttîr A Ni

12. Sâm 2:6 hian eng lalṭhutthlênga ṭhut chungchâng nge a sawi?

¹² Fakna hla phuahtu hmanga Jehova thusawi belh hian hnamte chu a tibuai tih rinhlelhrual a ni lo. Pathian chuan: “Keimah ngeiin ka tlâng thianghlim Zionah chuan, ka lal siam chu ka ṭhuttîr ta a ni,” tiin a puang chhuak a ni. (Sâm 2:⁠6) Zion Tlâng chu Israel ram zawng zawng chunga lala Davida siam a nihna Jerusalema tlâng pakhat a ni. Mahse, Messia Lal chu chu khawpuia lalṭhutthlêngah emaw, he khawvêl hmun danga lalṭhutthlêngah emaw a ṭhu dâwn lo. A nihna takah chuan, Jehova chuan Isua Krista chu Messia Lal atâna thlangin, vân lam Zion Tlângah chuan lal atân a ṭhuttîr daih tawh a ni.​—⁠Thu Puan 14:⁠1.

13. Eng thuthlung nge Jehova’n a Fapa nêna an siam?

¹³ Tûnah chuan Messia Lalin thu a sawi ta. Ani chuan heti hian a ti: “[Lalram atâna a fapa nêna thuthlung siamtu Jehova] thuruat chu ka hril dâwn: LALPAN [Jehova’n] ka hnênah, ‘Nang zawng ka fapa i ni e; vawiin hian ka hring che a ni,’” a ti a. (Sâm 2:⁠7) Krista’n a tirhkohte hnêna: “Thlêmna ka tawh chhûng zawng nangni mi awmpuitu in ni a; tichuan . . . ka Pain ram mi ruatsak angin ram ka rautsak che u a ni,” tia a hrilh khân Lalram thuthung chungchâng a sawi a ni.​—⁠Luka 22:​28-30.

14. Engvângin nge Isua chuan lal ni tûra dikna chuh rual loh a nei a tih theih?

¹⁴ Sâm 2:​7-a sawi lâwk angin, Jehova chuan Isua chu baptisma a chan laiin A Fapa a nihzia a puang a, thlarau lam nuna kaihthawhna hmangin a târ lang bawk. (Marka 1:​9-11; Rom 1:4; Hebrai 1:5; 5:⁠5) Ni e, vân Rama Lalber chu Pathian Fapa mal neih chhun a ni. (Johana 3:16) Lal Davida thlah lal chhûngkaw mi a nih angin, Isua chuan Lal ni tûra dikna chuh rual loh chu a nei a ni. (2 Samuela 7:​4-17; Matthaia 1:​6, 16) He Sâm ziakin a sawi angin, Pathian chuan a Fapa hnênah: “Mi dîl rawh, tichuan i rochun atân hnam tin ka pe ang chia, kâwlkil tâwp thlengin i ro atân ka pe bawk ang che,” a ti a ni.​—⁠Sâm 2:⁠8.

15. Engvângin nge Isua’n hnamte chu a rochun atân a dîl?

¹⁵ Chu Lal​—⁠Pathian Fapa ngei mai​—⁠chuan Jehova dawt chiaha thuneihna chu a chelh a. Isua chu Jehova’n a fiah tawh, mi rinawm leh innghahna tlâk a ni. Chu bâkah, Isua chuan Pathian Fatîr nihna rochan pawh a nei bawk a ni. Dik takin, Isua Krista chu “hmuh theih loh Pathian anpui, thil siam zawng zawnga piang hmasa ber” a ni. (Kolossa 1:15) A tih tûr awmchhun chu Pathianin ‘a rochun atân hnam tin a pêk a, kâwlkil tâwp thlenga a ro atân a pêk’ nâna dîl hi a ni. Isua’n hetianga a dîl chhan  chu ‘a lâwmna chu mihring fate chungah’ a nih vâng leh lei leh mihringte tâna a Pa vâna mi duhzâwng hlen chhuah a châk vâng a ni.​—⁠Thufingte 8:​30, 31.

Hnamte Chunga Jehova Thuruat

16, 17. Sâm 2:​9-a sawi angin hnamte chuan eng nge tawn an hmabâk?

¹⁶ Sâm pahnihnaa thute hi, hmuh theih lohva Isua lo awmlehna hun chhûng, tûn lai hunah hian a thlen famkim mêk avângin, hnamte chuan eng nge tawn an hmabâk? Lal chuan Pathian thu puan chhuah: “Anni [hnamte] chu thîr tiangin i tikeh ang a; bêlvawtu bêl an paih keh sawm ang hian i paih keh sawm ang,” tih chu a hlen chhuak thuai dâwn a ni.​—⁠Sâm 2:⁠9.

¹⁷ Hmân lai chuan lal tiang chuan lal thuneihna a entîr a. Tiang ṭhenkhat chu Sâma sawi ang hian, thîra siam a ni. Heta entîr nei ṭawngkam hman hian Lal Krista’n chu tiang hmanga âwlsam taka hnamte a tihboral dân tûr a kâwk a. Chutianga thîr tiang chak tak mai chuan bêlvawtu bêlleia siam bêl chu a tikehsawm hnehin, siam ṭhat leh theih tawh rual lohvin a tisawm vek dâwn a ni.

18, 19. Pathian pawm ni tûrin, leia lalte’n eng nge an tih ngai?

¹⁸ Hnam rorêltute chuan chutianga tihkehsawmna chu an tawn ngei ngei a ngai em? Ngai lo ve, fakna hla phuahtu chuan anni chu hetiang hian a ngên a: “Aw lalte u, fing tawh ula: leia rorêltute u, thununin awm tawh rawh u,” tiin. (Sâm 2:10) Lalte chu he mi chungchâng hi khûnkhân taka ngaihtuah a, an rilru pe tûra ngen an ni a. Anni chuan Pathian Ramin mihringte ṭhatna tûr thil a rawn tih tûrte nêna khaikhin chuan an thiltum hi engmah a nih lohzia an ngaihtuah tûr a ni.

¹⁹ Pathian pawm ni tûrin, leia lalte chuan an nun kawngte an thlâk tûr a ni a. ‘Ṭih chunga LALPA rawng bâwl a, khûr chunga lâwm’ tûra fuih an ni. (Sâm 2:11) Chutianga an tih chuan eng nge a rah chhuah ang? Thinur, a nih loh leh rilru thinur buai nuai nuaia awm lovin, Messia Lalin an tâna a rawn tih tûrte avângin an hlim hle zâwk dâwn a ni. Leia lalte chuan an rorêlnaa an târ lan chapona leh intihveina te chu an kalsan vek a ngai dâwn a. Chu bâkah, vuaicha hlek lova an inthlâkthleng a, Jehova lal chungnunna el phâk rual loh leh Pathian leh a Messia thiltihtheihna dan zawh rual loh chungchângah an fin a ngai bawk dâwn a ni.

“Fapa Chu Fâwp Rawh U”

20, 21. “Fapa chu fâwp rawh u” tih chu engtihna nge?

²⁰ Tûnah chuan Sâm 2-na chuan hnam rorêltute chu zahngai takin a sâwm mêk a ni. Fapa dodâla ṭang tlâng lovin: “Fapa chu fâwp rawh u, chutilochuan [Pathian Jehova] a thinur ang a, kawng lakah in boral dah ang e, a thin chu a thawk thuai dâwn si a,” tia thurâwn pêk an ni. (Sâm 2:12a) Lal chungnung ber Jehova chuan thuruat a puan chhuah hian ngaih pawimawh hle tûr a ni. Pathianin a Fapa  lalṭhutthlênga a ṭhuttîr khân, hnam rorêltute chuan “thil sâwt lo an ngaihtuah” chu an bânsan daih tûr a ni a. Lal chu an pawm nghâlin, a thu an âwih pumhlûm ṭhak tûr a ni bawk.

²¹ Engvângin nge ‘fapa chu an fawh’ ang? He fakna hla phuah a nih lai hian, infawh chu inṭhianna lantîrna leh ina mi khual lo thlengte lawmna lantîrna a ni a. Tin, rinawm nghehna, a nih loh leh rinawmna lantîrna a ni bawk. (1 Samuela 10:⁠1) He Sâm pahnihna chângah hian, Pathian chuan hnamte chu a Fapa chu hriak thih lal anga fâwp, a nih loh leh lâwm tûrin thu a pe a ni.

22. Hnam rorêltute chuan eng vaukhânna nge an ngaihsak ngei ngei tûr?

²² Pathian Lal thlan thuneihna hnâwltute chuan Jehova an hmusit tihna a ni a. Pathian Jehova’n lei leh vâna rorêl tûra dikna a neih leh mihringte tâna rorêl ṭha ber tûr Lal thlang tûra thuneihna leh theihna a neih chu an pawm lo tihna a ni. Hnam rorêltute chuan an thiltumte hlen an tum laiin Pathian thinurna chu thâwklehkhatah an tawng thut ang. “A thin chu a thawk thuai,” a nih loh leh dan theih rual lovin a alh phut ang. Hnam rorêltute chuan he vaukhânna hi an pawmin, chu mi nêna inmilin thil an ti ngei tûr a ni. Chutianga tih chu nunna a ni si a.

23. Mi tinte tân engtihna hun nge la awm?

²³ He fakna hla chhinchhiah tlâk tak mai hi: “Amaha [Jehovaa] an rinna nghat zawng zawngte chu an eng a thâwl e,” tih thua tihtâwp a ni a. (Sâm 2:12b) Mi mal tinte tân himna zawn hmuhna hun a la awm a. Hnamte ruahmanna thlâwptu rorêltu tinte tân pawh hun a la awm a ni. Chûng mite chu Lalram rorêlna hnuaia humhimna petu Jehova hnênah an tlân chhe thei a ni. Mahse, Messia Lalramin a kalhtu hmante a tihboral hma ngeia an chêt a ṭûl a ni.

24. Engtin nge he buainaa khat khawvêlah ngei pawh hian nun lungâwithlâk zâwk kan neih theih?

²⁴ Pathian Lehkha Thute taima taka kan zira, chuta fuihna thu kan hmuhte kan nunpui phawt chuan he buainaa khat khawvêlah ngei pawh hian nun lungâwithlâk zâwk kan nei thei a. Pathian Lehkha Thu fuihnate nunpuina chuan chhûngkaw inlaichînna hlimawm zâwk leh he khawvêl mite lungkham leh hlauh thil tam tak laka zalênna a thlen a ni. Bible kaihhruainate zuina chuan Siamtu kan tilâwm tih inrintâwkna min pe a ni. “Nunna tûna awm sa” leh leia Lalram rorêlna hnâwlna hmanga dikna dodâltute he lei ata a thenfai hnua “la awm leh tûr” chu Lei leh Vâna Lal Chungnungber chauh lo chuan mi dang tumahin an pe thei lo.​—⁠1 Timothea 4:⁠8.

25. ‘Jehova thuruat’ chu a hlawhchham theih loh avângin, kan hun laiah hian eng nge lo thleng tûra kan beisei theih?

²⁵ ‘Jehova thuruat’ chu a hlawhchham thei lo. Min Siamtu a nih angin, Pathian chuan mihringte tâna thil ṭha chu a hria a, a Fapa duh tak Lalram hnuaia thuâwih mihringte hnêna remna, lungawina, leh himna tluangtling pe tûra a thiltum chu a hlen chhuak dâwn a ni. Kan hun lai chungchângah, zâwlnei Daniela chuan heti hian a ziak a ni: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, . . . hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi lâwk a ni. (Daniela 2:44) Chuvângin, tûn hi ‘Fapa chu fâwpa’ Lal Chungnungber Jehova rawngbâwl tûra chêt vat hun a ni! (w04 7/15)

[Footnote-te]

Engtin Nge I Chhân ang?

• Hnamte chuan eng “thil sâwt lo” nge an “ngaihtuah”?

• Engvângin nge Jehova’n Hnamte chu a nuihzat?

• Hnamte chunga Pathian thuruat chu eng nge ni?

• “Fapa chu fâwp rawh” tih chu engtihna nge?

[Zirlai Atâna Zawhnate]

[Phêk 15-naa milem]

Israel mite leh rorêltute’n Isua Krista an do tlâng

[Phêk 16-naa milem]

Krista chu van lam Zion Tlângah Lala ṭhuttîr a ni