‘Ko e Poakiaga a Iehova’ kua Nakai Maeke ke Kaumahala

‘To tokutoku atu e au e poakiaga a Iehova, na pehe mai a ia kia au, Ko e haku a Tama a koe. Kia ole mai a koe kia au, ti ta atu ai e au e tau motu kehe mo tufaaga hāu.’​—SALAMO 2:7, 8.

1. Ko e heigoa e kehekehe he vahaloto he finagalo he Atua mo e tau motu?

KUA fai finagalo a Iehova ko e Atua ma e tau tagata mo e lalolagi. Kua fai finagalo foki e tau motu. Ka ko e tau finagalo nei kua kehekehe lahi! Lata ia tautolu ke amanaki ke he mena nei, ha kua talamai e Atua: “Ko e mena tuga ne mua he tokoluga e lagi ke he lalolagi, kua mua he tokoluga pihia haku a mahani ke he mahani ha mutolu, mo e haku tau manatu kua mua ke he tau manatu ha mutolu.” Ko e finagalo he Atua kua pauaki ni ke fakamoli ha kua talahau foki e ia: “Ko e mena tuga ne to hifo e uha mo e kiona mai he lagi, ka e nakai liu atu ki ai, ka e fakamalūaki e kelekele, ti fua mai ai, mo e gotogoto mai ai, kua tutupu mai ai e tau saito mo ia ne gana saito mo e tau mena kai mo ia ka kai. To pihia ni haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.”​—Isaia 55:9-11.

2, 3. Ko e heigoa ne fakamaali mai he salamo ke uaaki, ka ko e heigoa e tau huhu ne mafuta hake?

² Ko e finagalo he Atua hagaao ke he Patuiki faka-Mesia to fakamoli ai tuga ne fakamaaliali mai he salamo ke uaaki. Ko e tagata ne fati e salamo ia, ko e Patuiki ko Tavita i Isaraela i tuai, ne omoi he agaga he Atua ke talahau tuai to ha ha ai e magaaho ka kitia maali e vaha ka go ai e tau motu. Ko e tau pule ha lautolu to totoko atu ki a Iehova ko e Atua mo Ia ne Fakauku e ia. Pete ia, ne lologo foki e salamo: ‘To tokutoku atu e au e poakiaga a Iehova, na pehe mai a ia kia au, Ko e haku a Tama a koe. Kia ole mai a koe kia au, ti ta atu ai e au e tau motu kehe mo tufaaga hāu; mo e tau kala he lalolagi ke eke māu.’​—Salamo 2:7, 8.

³ Ko e heigoa ne pauaki he ‘poakiaga a Iehova’ ma e tau motu? Lauia fefe mogoia ai e tau tagata tokologa? Moli, ko e heigoa e kakano he tau mena tutupu nei ma e tau tagata matakutaku Atua oti ne totou e salamo ke uaaki?

Go e Tau Motu

4. Maeke fefe ia koe ke fakamaama fakaku e tau matapatu manatu he Salamo 2:1, 2?

⁴ He hagaaki atu ke he matagahua talahau tuai he tau finagalo ha Iehova mo e tau motu, ne kamata he salamo e lologo hana he uhu: “Ko e ha ne go ai e tau motu kehe, mo e manamanatu ai e tau tagata ke he tau mena nakai aoga? Kua tutu mai e tau patuiki he lalolagi, kua pulega fakalataha foki e tau iki, ke totoko atu kia Iehova mo ia ne fakauku e ia.”​—Salamo 2:1, 2. *

5, 6. Ko e heigoa e “tau mena nakai aoga” ne “manamanatu” ki ai e tau motu?

⁵ Ko e heigoa e “tau mena nakai aoga” ne “manamanatu” e tau motu he vaha nei ki ai? He nakai talia a Ia ne Fakauku he Atua​—ko e Mesia, po ke Keriso—​ne “manamanatu,” po ke onoono fakahokulo ni, e tau motu ke fakatumau e pule ha lautolu. Ko e tau kupu nei he salamo ke uaaki kua ha ha ai foki e fakamoliaga he senetenari fakamua V.N. he magaaho ne pulega auloa e tau pule faka-Iutaia mo e faka-Roma ke tamate e Patuiki-Fifili he Atua, ko Iesu Keriso. Ka e, kua kamata e fakamoliaga lahi he 1914 he magaaho ne fakanofo a Iesu ko e Patuiki he lagi. Tali mai he magaaho ia, ne nakai  taha e motu fakapolitika he lalolagi ne talia e Patuiki ne fakafoufou he Atua.

⁶ Ko e heigoa e kakano he magaaho ne huhu e salamo ‘ko e ha e tau motu kehe ne manamanatu ai ke he tau mena nakai aoga’? Ha ko e finagalo ha lautolu ne nakai aoga; kua teao mo e malaia ke kaumahala. Kua nakai maeke ia lautolu ke tamai e mafola mo e milino ke he lalolagi katoa nei. Ka e, kua fakaholo matua atu e tau gahua ha lautolu ke totoko ke he pule faka-Atua. Ko e moli, kua uta e lautolu e tuaga taufetoko mo e kauauloa a lautolu ke totoko ke he Mua Ue Atu fakalataha mo Ia ne Fakauku e ia. Ko e goagoa ha ia!

Patuiki ne Kautu ha Iehova

7. He liogi, ne fakagahuahua fefe he tau tutaki fakamua atu ha Iesu e Salamo 2:1, 2?

⁷ Ne fakahagaao atu he tau tutaki ha Iesu e tau kupu he Salamo 2:1, 2 ki a ia. Kua moua e favale ha ko e ha lautolu a tua, ne liogi a lautolu: “Ko e Iki [Iehova] na e, ko e Atua a koe ne eke e lagi, mo e lalolagi, mo e tahi, mo e tau mena oti kana ne toka ai ia lautolu; ne talahau mai e koe ke he fofoga he hau a fekafekau ko Tavita, Ko e ha ne vale ai e tau motu kehe, mo e manamanatu ai e tau tagata ke he tau mena nakai aoga? Kua tutu mai e tau patuiki he lalolagi, kua fakapotopoto foki e tau iki, ke totoko atu ke he Iki mo e hana Keriso. Ha kua moli ni, ne fakapotopoto ai a Herota [Anetipa], mo Ponotio Pilato, katoa oti mo e tau tagata he motu kehe, mo e tau tagata a Isaraela, ke totoko atu ke he hau a Fekafekau tapu ko Iesu, kua fakauku e koe.” (Gahua 4:24-27; Luka 23:1-12) * E, kua ha ha ai e fakafualoto ke he Atua mo e fekafekau fakauku hana ko Iesu he senetenari fakamua. Ka e, ko e salamo nei to fai fakamoliaga foki he tau senetenari fakamui.

8. Hagaao fefe e Salamo 2:3 ke he tau motu he vaha fou nei?

⁸ He magaaho ne fai patuiki tagata a Isaraela, ke tuga a Tavita, ne fakapotopoto auloa e tau motu mo e tau pule pouliuli ke totoko atu ke he Atua mo ia ne fakauku e ia mo Patuiki. Ka e kua e magaaho ha tautolu? Ko e tau motu he vaha fou nei kua nakai manako ke fakatatai atu ke he tau manako ha Iehova mo e he Mesia. Ko e mena ia, kua fakatino a lautolu ke talahau: “Kia momotu e tautolu ha laua a tau liliaga, mo e tiaki ha laua a tau toua mai ia tautolu.” (Salamo 2:3) Ko e ha fakakaupaaga ne tuku mai he Atua mo Ia ne Fakauku e ia to totoko ni he tau pule mo e tau motu. Ka e moli, ko e ha laliaga ke mumutu kehe e tau liliaga ia mo e tiaki e tau toua pihia to kaumahala ni.

Va e Iehova a Lautolu

9, 10. Ko e ha ne va e Iehova e tau motu?

⁹ Kua nakai tupetupe a Iehova hagaao ke he ha laliaga he tau pule he tau motu ke fakatu ni  ha lautolu a tau pule. I loto he tau kupu he salamo, ne talahau e Atua: “To kata a ia kua haele ke he lagi; to va e Iki [Iehova] kia lautolu.” (Salamo 2:4) Ne fakaholo atu e Atua ke taute e finagalo hana ke tuga kua nakai ha ha ai e tau tagata pule nei. Ne kata a ia ke he fialahi ha lautolu mo e va atu ki a lautolu. Toka ai a lautolu ke fakahakehake hagaao ke he tau mena ne manako a lautolu ke taute. Ki a Iehova, ko e tau tagata fakafiakata a lautolu. Ne kata a ia ke he totokoaga teao ha lautolu.

¹⁰ He taha he tau salamo hana, ne hagaaki a Tavita ke he tau tagata mo e tau motu fakafi mai mo e lologo: “Ko koe Iehova na e, ko e Atua Sapaota, ko e Atua a Isaraela, kia tu mai a koe, mo e ahiahi e tau motu kehe oti kana; aua neke fakaalofa a koe ke he taha ia lautolu kua mahani kelea mo e pikopiko. To liliu mai a lautolu ke he magaaho afiafi, ti tagi ni a lautolu tuga ne kuli, mo e takai e lautolu e maga. Kitiala, kua fakalua mai he tau gutu ha lautolu e tau kupu kelea; ha ha he tau laugutu ha lautolu e tau pelu; ha ko hai kia ne fanogonogo atu. Ka ko koe Iehova na e, to kata a koe kia lautolu; to va a koe ke he tau motu kehe oti kana.” (Salamo 59:5-8) Ne kata a Iehova ke he fakahakehake mo e fakagogoa he tau motu ke he puhala goagoa ha lautolu he totoko ki a ia.

11. Ko e heigoa ka tupu he magaaho ka lali e tau motu ke tanumia e finagalo he Atua?

¹¹ Ko e tau kupu he Salamo 2 kua fakamalolo e tua ha tautolu na maeke he Atua ke fakafehagai ke he ha paleko ni. Maeke ia tautolu ke talitonu moli kua fakakatoatoa tumau e ia e finagalo hana mo e nakai tiaki e tau fekafekau loto fakamoli hana. (Salamo 94:14) Ti, ko e heigoa mogoia ka tupu he magaaho ka taute he tau motu e tau laliaga ke tanumia e finagalo a Iehova? Hagaao ke he salamo nei, ko e Atua to “vagahau atu . . . kia lautolu ke he hana ita,” ke tuga mo e leo tomumu he pakulagi. Taha mena foki, “ke he hana ita lahi,” ke tuga mo e lupa hila, to “fakamatakutaku foki e ia a lautolu.”​—Salamo 2:5.

Ne Fakauku e Patuiki he Atua

12. Ne hagaao e Salamo 2:6 ke he fakafoufouaga fe?

¹² Ko e mena ka talahau foki e Iehova he puhala he salamo to fakaita moli aki e tau motu. Ne fakapuloa he Atua: “Ka ko au, kua fakauku tuai e au haku a Patuiki ki luga a Siona, ko e haku a mouga tapu.” (Salamo 2:6) Ko e Mouga ko Siona ko e matiketike i Ierusalema ne fakauku ai a Tavita mo patuiki. Ka e ko e Patuiki faka-Mesia to nakai nofo he nofoa patuiki he maga ia po ke ha mena he lalolagi. Ko e moli, kua fita he fakauku e Iehova a Iesu Keriso ko e Patuiki faka-Mesia fifili hana i luga he Mouga ko Siona he lagi.​—Fakakiteaga 14:1.

13. Ko e heigoa e maveheaga ne taute e Iehova mo e Tama hana?

¹³ Kua vagahau e Patuiki faka-Mesia mogonei. Ne talahau e ia: ‘To tokutoku atu e au e poakiaga a Iehova [ne kua fita he taute e maveheaga mo e Tama hana ma e Kautu]; na pehe mai a Iehova ko e Atua kia au, Ko e haku a Tama a koe, ko e aho nai kua fanau ai e au a koe.’ (Salamo 2:7) Ne hagaao e Keriso ke he maveheaga he Kautu he magaaho ne tala age a ia ke he tau aposetolo hana: “Ko mutolu nā, ne tumau a mutolu kia au ke he tau mena ne kamatamata ai au. Tuga ne kotofa mai he haku a Matua e kautu kia au, ke pihia foki he kotofa e au kia mutolu.”​—Luka 22:28, 29.

14. Ko e ha kua lata ke talahau kua tonuhia a Iesu ke he tuaga fakapatuiki?

¹⁴ Tuga ne talahau tuai ia Salamo 2:7, ne fakailoa e Iehova a Iesu ko e Tama Hana he hana papatisoaga mo e he fakaliu tu mai a ia ke he moui fakaagaga. (Mareko 1:9-11; Roma 1:4; Heperu 1:5; 5:5) E, ko e Patuiki he Kautu he lagi ko e Tama fuataha he Atua. (Ioane 3:16) Ha ko e hakega fakapatuiki he Patuiki ko Tavita, nukua moua e Iesu e tonuhia ke he tuaga fakapatuiki. (2 Samuela 7:4-17; Mataio 1:6, 16) Hagaao ke he salamo nei, ne tala age e Atua ke he Tama hana: ‘Kia ole mai a koe kia au, ti ta atu ai e au e tau motu kehe mo tufaaga hāu; mo e tau kala he lalolagi ke eke māu.’​—Salamo 2:8.

15. Ko e ha ne ole a Iesu ke eke e tau motu mo tufaaga hana?

¹⁵ Ko e Patuiki​—ko e Tama ni he Atua—​kua ha ha he tuaga tata lahi ki a Iehova. Ko Iesu ko ia ne kamatamata, loto fakamoli, mo e tututonu, ha Iehova. Mua atu foki, kua tuku age ki a Iesu e tufaaga ha ko e Uluaki he Atua. Moli lahi,  ko Iesu Keriso “ko e fakatai he Atua nakai kitia, ko e uluaki he tau mena oti kana kua eke.” (Kolose 1:15) Ko e hana ni ke ole ti foaki he Atua e ‘tau motu kehe mo tufaaga hana mo e tau kala he lalolagi ke eke māna.’ Ne taute e Iesu e ole nei ha kua ‘fiafia a ia ke he tau mena he fanau he tau tagata’ mo e ha ko e fakamakai lahi hana ke fakamoli e finagalo he hana Matua he lagi ke he lalolagi mo e tau tagata.​—Tau Fakatai 8:30, 31.

Ko e Poakiaga ha Iehova ke he Tau Motu

16, 17. Hagaao ke he Salamo 2:9, ko e heigoa hane tatali ma e tau motu?

¹⁶ Ha kua fakamoli mogonei e salamo ke uaaki, he magahala he ha ha hinei ne nakai kitia ha Iesu Keriso, ko e heigoa hane tatali ma e tau motu? Nakai leva to taute he Patuiki e fakapuloaaga he Atua: “To pakipaki e koe a lautolu [ko e tau motu] ke he tokotoko lapatoa; to lipilipi e koe a lautolu tuga ne kapiniu he tagata eke kapiniu kelekele.”​—Salamo 2:9.

¹⁷ Ko e tau tokotoko he tau patuiki he vaha i tuai ko e tau fakamailoga he pule fakapatuiki. Ko e falu tokotoko kua taute mai he lapatoa, tuga e tokotoko ne totoku he salamo nei. Ko e vagahau fakatai ne fakaaoga ke he mena nei kua fakakite e mukamuka pauaki he magaaho ka fakaotioti he Keriso ko e Patuiki e tau motu. Ko e haha fakalahi he tokotoko lapatoa ka fakamalipilipi aki e tau kapiniu kelekele he tagata taute kapiniu, ati malona tiaki ai.

18, 19. Ke moua e taliaaga he Atua ko e heigoa kua lata he tau patuiki he lalolagi ke taute?

¹⁸ Kua lata pauaki kia e tau pule he tau motu ke kitia mata e fakamahaikava malipilipi pihia? Nakai, ha kua ole e salamo ki a lautolu mo e tau kupu nei: “Ko mutolu ko e tau patuiki na e, kia lotomatala a mutolu; kia ako a mutolu ko e tau fakafili he lalolagi.” (Salamo 2:10) Kua ole ke he tau patuiki ke omaoma, ke fakagahuahua e lotomatala. Kua lata ia lautolu ke manamanatu ke he gati he tau fakatokatokaaga ha lautolu, ne kehe mai he mena ka taute he Kautu he Atua ma e aoga he tau tagata.

¹⁹ Ke moua e talia he Atua, kua lata he tau patuiki he lalolagi ke hiki e puhala ha lautolu. Kua tomatoma ki a lautolu ke “fekafekau kia Iehova mo e matakutaku, kia fiafia foki mo e vivivivi.” (Salamo 2:11) Ko e heigoa la ka tupu ane mai ke taute pihia e lautolu? He nakai go, po ke fakaatukehe e tau manamanatuaga, kua maeke ia lautolu ke olioli ke he amaamanakiaga ka fakatoka he Patuiki faka-Mesia i mua ha lautolu. Kua kakano lahi ai ma e tau pule he lalolagi ke tiaki e fakaikaluga mo e loto fakatokoluga ne fakatata e lautolu ke he tau puhala pule ha lautolu. Mua atu foki, kua lata ia lautolu ke hiki fakamafiti mo e fakagahuahua e lotomatala hagaao ke he tokoluganea he pule katoatoa a Iehova mo e malolo ne mua he Atua mo e he Patuiki faka-Mesia hana.

“Kia Figita Ā e Tama”

20, 21. Ko e heigoa e kakano ke “figita ā e Tama”?

²⁰ Kua fakahoko atu mogonei he Salamo 2 e uiina fakaalofa noa ke he tau pule he tau motu. He nakai fakapotopoto auloa ke totoko, kua fakatonutonu age ki a lautolu: “Kia figita ā e Tama neke ita mai a ia [Iehova ko e Atua], mo e mahaikava ai a mutolu ke he puhala; ha ko e mena tupu vave hana ita.” (Salamo 2:12a) Kua  lata ke omaoma ke he Iki Pule Katoatoa ko Iehova he magaaho ka foaki e ia e poakiaga hana. He magaaho ka fakanofo he Atua e Tama hana he nofoaiki, ko e tau pule he lalolagi kua lata ke tiaki e ‘manamanatu ke he tau mena nakai aoga.’ Kua lata ia lautolu ke fakailoa fakamafiti e Patuiki mo e foaki ki a ia e omaoma katoa.

²¹ Ko e ha ke “figita ā e Tama”? He magaaho ne fati e salamo nei, ko e figita ko e fakakiteaga he fakakapitiga mo e kua fakaaoga ke fakafeleveia fiafia aki e tau tagata uiina ke he fale he tagata, ka olioli ai e lautolu e mahani fakamokoi. Ko e figita ko e mahani fakamoli foki, po ke tua fakamoli. (1 Samuela 10:1) I loto he kupu nei he salamo ke uaaki, ne poaki he Atua e tau motu ke figita, po ke fakafeleveia fiafia, e Tama hana ko e Patuiki fakauku.

22. Ko e heigoa e hatakiaga ne kua lata he tau pule he lalolagi ke omaoma?

²² Ko lautolu ne nakai mahalo ke mailoga e pule he Patuiki ne fifili he Atua kua fakaita ki a Iehova. Kua fakatikai e lautolu e pule katoatoa a Iehova ko e Atua he lalolagi mo e lagi katoatoa mo e hana pule malolo mo e lotomatala ke fifili e Patuiki ne kua mitaki lahi mahaki ma e tau tagata. Ko e tau pule he tau motu to mailoga ko e ita he Atua to hokotia fakalutukia ki a lautolu, he magaaho ka lali a lautolu ke fakagahuahua e tau pulega ni ha lautolu. “Ko e mena tupu vave hana ita,” po ke puho mafiti mo e nakai liutua. Ko e tau pule he tau motu kua lata ke talia mo e loto fakaaue e hataki nei mo e fakalautatai ki ai. He taute pihia ka moui ai.

23. Kua fai magaaho agaia ma e tau tagata takitokotaha ke taute e heigoa?

²³ Ne fakahiku e salamo ofogia nei: ‘Kua fiafia a lautolu oti kana kua tua kia ia [Iehova].’ (Salamo 2:12e) Kua fai magaaho agaia ma e tau tagata, pihia foki ma e tau pule takitokotaha, ne kua lalago e tau pulega he tau motu ke moua e haohao mitaki. Maeke ia lautolu ke fehola ki a Iehova, ne foaki e huaga i lalo he pule Kautu. Ka kua latatonu ia lautolu ke taute fakamua taha mena to fakamalipilipi he Kautu faka-Mesia e tau motu totoko.

24. Maeke fefe ia tautolu ke nonofo ke he moui makona lahi pihia foki he lalolagi muhu lekua nei?

²⁴ Kaeke fakaako fakamakutu a tautolu ke he tau Tohiaga Tapu mo e fakagahuahua e tau fakatonuaga ia ke he tau momoui, maeke ia tautolu ke moua e moui makona he mogonei pihia foki he lalolagi muhu lekua nei. He fakagahuahua e tau fakatonuaga faka-Tohiaga Tapu ka fua mai e fakafetuiaga fiafia lahi he magafaoa mo e tokanoa mai he tau kapaletu loga mo e tau matakutaku ne malaia ai e lalolagi nei. He muitua ke he tau takitakiaga he Tohi Tapu ka tamai e mauokafua kua fakafiafia e tautolu e Tufuga. Kua nakai fai tagata foki ka e ko e Pule Katoatoa he Lalolagi mo e Lagi Katoatoa ne kua maeke ke foaki e fakamoliaga ma e ‘mouiaga nai ne kua tatali’ he mole e fakamea e ia e lalolagi ia lautolu ne totoko e tau mena hako he fakaheu e pule he Kautu.​—1 Timoteo 4:8.

25. Ha ko e ‘poakiaga a Iehova’ kua nakai maeke ke kaumahala, ko e heigoa kua lata ke amanaki ki ai a tautolu ke tupu he vaha ha tautolu?

²⁵ ‘Ko e poakiaga a Iehova’ kua nakai maeke ke kaumahala. Ha ko e Tufuga ha tautolu, kua iloa he Atua e tau mena mitaki lahi ma e tau tagata mo e to fakakatoatoa e finagalo hana ke fakamonuina e tau tagata omaoma aki e mafola, makona, mo e haohao mitaki tukulagi i lalo he Kautu he Tama fakahele hana. Hagaao ke he vaha ha tautolu, ne tohia e perofeta ko Tanielu: “Ko e vaha he tau patuiki ia to fakatu ai he Atua he lagi e kautu nakai fakaoti tukulagi; . . . to tuki malipilipi mo e fakaotioti e tau kautu oti ia, ka ko ia to tumau tukulagi a ia.” (Tanielu 2:44) Ati, moli lahi ai, ko e magaaho hanei ke “figita ā e Tama” mo e fekafekau ke he Iki Pule Katoatoa ko Iehova!

[Tau Matahui Tala]

To Tali Fefe e Koe?

• Ko e heigoa e “tau mena nakai aoga” ne “manamanatu ai” e tau motu ki ai?

• Ko e ha ne va e Iehova e tau motu?

• Ko e heigoa e poakiaga he Atua ke he tau motu?

• Ko e heigoa e kakano ke “figita ā e Tama”?

[Tau Huhu he Fakaakoaga]

[Fakatino he lau 14]

Ne lologo a Tavita hagaao ke he Patuiki faka-Mesia ne kautu

[Fakatino he lau 16]

Ne fakanofo e Keriso mo Patuiki he Mouga ko Siona he lagi