‘Taelo Ya Jehofa’ E Ka Se Palelwe

“Ke tlo bola taêlô; Morêna ó itše: O Morwa wa-ka . . . Nkxopêlê, ke Xo fê dithšaba, e be lefa l’axo.”—PSALME 2:7, 8.

1. Go na le phapano efe magareng ga morero wa Modimo le wa ditšhaba?

JEHOFA MODIMO o na le morero ka batho le ka lefase. Ditšhaba le tšona di na le morero. Eupša merero ye e fapana kudu gakaakang! Re swanetše go letela se, ka gobane Modimo o re: “Bo-ka maxodimo à le kwa xodimo kxolê le lefase, le ditsela tša-ka di xodimo kxolê le ditsela tša lena; le kêlêlô tša-ka di xodimo kxolê le tša lena.” Morero wa Modimo o kgonthišeditšwe gore o tla phethagatšwa, ka gobane o tšwela pele ka gore: “Bo-ka pula le leswêla dì e-tšwa lexodimong, ’me di se hlwê di boêla xôna, ya ba tša xo nošetša lefase xore le hloxišê dibyalo, di melê, di fê mobyadi peu, le moji boxôbê,—le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phetha se ke le rometšexo sôna.”—Jesaya 55:9-11.

2, 3. Ke’ng seo se bontšhitšwego gabotse go psalme ya bobedi, eupša ke dipotšišo dife tšeo di rotošwago?

 ² Taba ya gore morero wa Modimo mabapi le Kgoši ya gagwe yeo e lego Mesia o tla phethagatšwa e bonagala gabotse psalmeng ya bobedi. Mohlami wa yona, e lego Kgoši Dafida wa Isiraele ya bogologolo, o ile a budulelwa ke Modimo go bolela e sa le pele gore go be go tla ba le nako ya bohlokwa ya ge ditšhaba di tla ba khuduegong. Babuši ba tšona ba tla gata mogato wa go ganetša Jehofa Modimo le Motlotšwa wa gagwe. Lega go le bjalo, le gona mopsalme o opetše ka gore: “Ke tlo bola taêlô, Morêna ó itše: O Morwa wa-ka; . . . Nkxopêlê, ke Xo fê dithšaba, e be lefa l’axo, le maxomô a lefase e bê a xaxo.”—Psalme 2:7, 8.

³ ‘Taelo ya Jehofa’ e bolela’ng go ditšhaba? E kgoma bjang batho ka kakaretšo? Ge e le gabotse, ditiragalo tše di bolela’ng go babadi ka moka bao ba boifago Modimo ba psalme ya bobedi?

Ditšhaba di Khuduegong

4. O ka akaretša bjang dintlha tše dikgolo tša Psalme 2:1, 2?

⁴ Ge a šupa ditirong tša ditšhaba le tša babuši ba tšona, mopsalme o thoma kopelo ya gagwe ka go opela ka gore: “Ba re’ng ba dithšaba bà tsoša marole? Dilete di re’ng di rêra tša lefêla? Maxoši a lefase a a tsoxa, le babuši ba lakana xo lwa le Morêna le Motlotšwa w’axwe.”—Psalme 2:1, 2. *

5, 6. Dihlopha tša ditšhaba di ile tša ‘dula di rera selo sefe sa lefela’?

⁵ Ke ‘selo sefe sa lefela’ seo dihlopha tša ditšhaba tša mehleng yeno di ilego tša ‘dula di se rera’? Go e na le gore di amogele Motlotšwa wa Modimo—Mesia, goba Kriste—ditšhaba di ile tša ‘dula di rera,’ goba di naganišiša ka go tšwela pele ga bolaodi bja tšona. Le gona mantšu a a psalme ya bobedi a bile le phethagalo lekgolong la pele la nywaga C.E. ge balaodi ba ba-Juda le ba ba-Roma ba be ba dirišana bakeng sa go bolaya Kgoši e Kgethilwego ke Modimo, e lego Jesu Kriste. Lega go le bjalo, phethagalo e kgolo e thomile ka 1914 ge Jesu a be a bewa e le Kgoši ya legodimong. Ga e sa le go tloga ka nako yeo, ga go na mokgatlo le o tee wa dipolitiki mo lefaseng wo o ilego wa amogela Kgoši ya Modimo e beilwego sedulong sa bogoši.

⁶ Ke’ng seo se bego se bolelwa ke ge mopsalme a be a botšiša gore ‘ba re’ng ba ditšhaba ba rera tša lefela’? Morero wa tšona ke wa lefela; ke wa lefela e bile o tla palelwa. Di ka se kgone go tliša khutšo le kwano lefaseng le. Lega go le bjalo, di phethagatša merero ya tšona go fihla bokgoleng bja go ganetša bogoši bja Modimo. Ge e le gabotse, di kopane ka botee go gata mogato o šoro le go hlasela di le gotee yo a Phagamego Kudu le Motlotšwa wa gagwe. A bošilo bjo bokaakang!

 Kgoši ya Jehofa e Fenyago

7. Ke bjang balatedi ba Jesu ba pele ba ilego ba diriša Psalme 2:1, 2 thapelong?

⁷ Balatedi ba Jesu ba ile ba diriša mantšu a Psalme 2:1, 2 go yena. Ge ba be ba tlaišetšwa tumelo ya bona, ba ile ba rapela ka gore: “Morêna [Jehofa], Wene O hlodilexo lexodimo le lefase le lewatlê, le tšohle [tše] di lexo mo xo ôna, O boletše ka molomo wa Dafida mohlanka wa xaxo wa re: Ba re’ng ba dithšaba bà tsoša marole? Dilete di re’ng dì rêra tša lefêla? Maxoši a lefase a a tsoxa, le babuši ba lakana xo lwa le Morêna Motlotšwa wa xaxo. Ka kxonthe ba bokane motseng wó, ba tsoxêla Jesu Mohlanka w’axo e mokxêthwa, e O mmeilexo; ké bô-Herode [Antipase], le Pontio Pilato, le ba-ntlê bà na le dilete tša Isiraele.” (Ditiro 4:24-27; Luka 23:1-12) * Ee, lekgolong la pele la nywaga go ile gwa logwa maano-mabe malebana le Jesu yo e lego mohlanka yo a tloditšwego wa Modimo. Lega go le bjalo, psalme ye e be e tla ba le phethagalo e nngwe nywaga-kgolo ka morago.

8. Psalme 2:3 e šoma bjang go ditšhaba tša mehleng yeno?

⁸ Ge Isiraele ya bogologolo e be e e-na le kgoši yeo e lego motho, bjalo ka Dafida, ditšhaba tša baheitene le babuši ba tšona ba ile ba bokana gotee bakeng sa gore ba lwe le Modimo le motlotšwa wa gagwe yo a beilwego sedulong sa bogoši. Eupša go thwe’ng ka mehla ya rena? Ditšhaba tša mehleng yeno ga di nyake go dira ka go dumelelana le dinyakwa tša Jehofa le Mesia. Ka go rialo, di hlaloswa di bolela gore: “A re kxaoleng ditlêmô tšé tša bôná, re lahlê dinti tšé tša bôná!” (Psalme 2:3) Dithibelo le ge e le dife tšeo di beilwego ke Modimo le Motlotšwa wa gagwe di tla ganetšwa ke babuši le ditšhaba. Ke therešo gore maiteko le ge e le afe a go kgaola ditlemo tše bjalo le go lahla manti a bjalo e tla ba a lefela.

Jehofa o a di Nyatša

9, 10. Ke ka baka la’ng Jehofa a nyatša ditšhaba?

⁹ Jehofa ga a tshwenyege ka maiteko le ge e le afe a babuši ba ditšhaba a go hloma bogoši bja bona ka noši. Psalme ya bobedi e tšwela pele ka gore: “Mo-dula-maxodimo ó a ba thsêxa, Yêna Mong ’a bohle ó a ba nyatša.” (Psalme 2:4) Modimo o tšwela pele ka morero wa gagwe bjalo ka ge eka babuši ba ga se selo. O sega mereba ya bona e bile o a ba nyatša. Anke ba ikgantšhe ka seo ba nyakago go se dira. Go Jehofa ke sekwero. O sega kganetšo ya bona ya lefela.

¹⁰ Lefelong le lengwe dipsalmeng tša gagwe, Dafida o bolela ka banna le ditšhaba tše tša manaba gomme o opela ka gore: “Wêna Morêna Modimo wa mašaba, Wene Modimo wa Isiraele, tsoxa O bônê se bohle ba-ntlê ba se diraxo; se lesê xo ôtla bahlanoxi bao. Ba boa bošexo, ba boxola byalo ka dimpya; ba dikoloxa motse. Še-bao, ba fufula marê xe ba bola-bola, melomo ya bôná e tšwa marumô, ka xe ba re: Xa xo e a re  kwaxo! Fela, Wêna Morêna O a ba thsêxa; ba-ntlê bohle O a ba nyatša.” (Psalme 59:5-8) Jehofa o sega go ikgantšha le kgakanego ya ditšhaba tseleng ya tšona ya bošilo malebana le yena.

11. Go direga’ng ge ditšhaba di leka go ganetšana le morero wa Modimo?

¹¹ Mantšu a Psalme 2 a matlafatša tumelo ya rena ya go dumela gore Modimo a ka rarolla bothata le ge e le bofe. Re ka ba le kgodišego ya gore ka mehla o phethagatša thato ya gagwe le gona le ka mohla a ka se lahle bahlanka ba gagwe bao ba botegago ka go se kwanantšhe. (Psalme 94:14) Ka gona, go direga’ng ge ditšhaba di dira maiteko a go ganetšana le morero wa Jehofa? Go ya ka psalme ye, Modimo ‘o tla bolela le tšona a befetšwe,’ bjalo ka ge eka ke ka modumo o mogolo. Go feta moo, “a xalefile” bjalo ka ge eka ke ka go thala ga legadima le legolo, ‘o tlo di tšhoša.’—Psalme 2:5.

Kgoši ya Modimo e Beilwe

12. Ke go bewa sedulong sa bogoši gofe moo go bolelwago ke Psalme 2:6?

¹² Selo se se latelago seo Jehofa a se bolelago ka mopsalme ka ntle le pelaelo se galefiša ditšhaba. Modimo o re: “Nna ya-ka Kxoši ke e beile fá Tsione, fa thabeng e kxêthwa ya-ka.” (Psalme 2:6) Thaba ya Tsione e be e le thaba ya kua Jerusalema moo Dafida a ilego a bewa e le kgoši ya go buša Isiraele ka moka. Eupša Kgoši yeo e lego Mesia e ka se dule sedulong sa bogoši motseng woo goba lefelong le lengwe mo lefaseng. Ge e le gabotse, Jehofa o šetše a beile Jesu Kriste go ba Kgoši ya gagwe e kgethilwego yeo e lego Mesia Thabeng ya Tsione ya legodimong.—Kutollo 14:1.

13. Ke kgwerano efe yeo Jehofa a ilego a e dira le Morwa wa gagwe?

¹³ Bjale Kgoši yeo e lego Mesia e a bolela. E re: “Ke tlo bola taêlô [ya Jehofa Modimo], Morêna [yo a dirilego kgwerano ya Mmušo le Morwa wa gagwe] ó itše: O Morwa wa-ka; lehono ke Xo tswetše.” (Psalme 2:7) Kriste o ile a bolela ka kgwerano ya Mmušo ge a be a botša baapostola ba gagwe gore: “Ba ba kxotleletšexo le Nna melekong ya-ka ké bô-lena. Xomme ke Le bea mmušô, byalo ka xe Tate a mpeile mmušô.”—Luka 22:28, 29.

14. Ke ka baka la’ng go ka bolelwa gore Jesu o na le leina leo le sa ganetšegego la bogoši?

¹⁴ Bjalo ka ge go boletšwe e sa le pele go Psalme 2:7, Jehofa o ile a hlaola Jesu e le Morwa wa Gagwe nakong ya ge a kolobetšwa le ka go mo tsošetša bophelong bja moya. (Mareka 1:9-11; Ba-Roma 1:4; Ba-Hebere 1:5; 5:5) Ee, Kgoši ya Mmušo wa legodimong ke Morwa a nnoši wa Modimo. (Johane 3:16) Ka ge e le setlogolwana sa leloko la ka bogošing sa Kgoši Dafida, Jesu o na le leina leo le sa ganetšegego la bogoši. (2 Samuele 7:4-17; Mateo 1:6, 16) Go ya ka psalme ye, Modimo o botša Morwa wa gagwe gore: “Nkxopêlê, ke Xo fê dithšaba, e be lefa l’axo, le maxomô a lefase e bê a xaxo.”—Psalme 2:8.

15. Ke ka baka la’ng Jesu a kgopela ditšhaba go ba lefa la gagwe?

¹⁵ Kgoši—Morwa wa Modimo ka boyena—e maemong a kgaufsi-ufsi le Jehofa. Jesu ke motho yo Jehofa a mo lekilego a hwetša a botega ka go se kwanantšhe e bile e le yo a ka botwago. Go feta moo, Jesu o na le bohwa bjalo ka Leitšibulo  la Modimo. Ka kgonthe, Jesu Kriste ke “seswanthšô sa Modimo e a sa bonwexo, tháka-letswalô yá dibopya tšohle.” (Ba-Kolose 1:15) Sohle seo a swanetšego go se dira ke go kgopela gomme Modimo ‘a mo fe ditšhaba e le lefa la gagwe le magomo a lefase e be a gagwe.’ Jesu o dira kgopelo ye e le yo a ‘kgahlwago ke bana ba batho’ le ka baka la kganyogo ya gagwe e matla ya go phethagatša thato ya Tatagwe wa legodimong ka lefase le ka batho.—Diema 8:30, 31.

Taelo ya Jehofa Malebana le Ditšhaba

16, 17. Go ya ka Psalme 2:9, ke’ng seo se boloketšwego ditšhaba?

¹⁶ Ka ge psalme ya bobedi e phethagala gona bjale, nakong ya go ba gona ga Jesu Kriste mo go sa bonagalego, ke’ng seo se boloketšwego ditšhaba? Kgaufsinyana Kgoši ye e tla phethagatša polelo ya Modimo e rego: “O tlo ba [ditšhaba] rôba ka molamó wa thsipi; O tlo ba phšatla wa pitša tša letsopa.”—Psalme 2:9.

¹⁷ Melamo ya dikgoši tša mehleng ya bogologolo e be e le maswao a go ba le tshwanelo ya go buša. Melamo e mengwe e be e dirilwe ka tšhipi, go swana le wo go bolelwago ka wona mo psalmeng ye. Polelo ya seswantšhetšo ye e dirišitšwego mo e bontšha tsela e bonolo yeo ka yona Kriste e lego Kgoši a tlago go fediša ditšhaba ka yona. Go bethwa ka matla ga pitša ya letsopa ka molamo wa tšhipi go be go tla e pšhatlaganya, gwa e pšhatla gore e se sa bonagala.

18, 19. Dikgoši tša lefase di tla swanelwa ke go dira’ng e le gore di amogelwe ke Modimo?

¹⁸ Na babuši ba ditšhaba ba gapeletšega gore ba lebeletšane le phedišo yeo e boifišago? Aowa, ka gobane mopsalme o ipiletša go bona ka mantšu a: “Byalo-xê, lena Maxoši, hlalefang! Ba-buša-mafase, êlêtšang.” (Psalme 2:10) Dikgoši di kgothaletšwa gore di ele hloko, di be le temogo. Di swanetše go ela hloko go ba ga lefela ga maano a tšona, ka go fapana le seo Mmušo wa Modimo o tlago go se dira bakeng sa go hola batho.

¹⁹ E le gore di amogelwe ke Modimo, dikgoši tša lefase di tla swanelwa ke go fetoša tsela ya tšona. Di kgothaletšwa gore di ‘hlankele Jehofa ka poifo e bile di roromela.’ (Psalme 2:11) Go thwe’ng ge e ba di be di ka gata mogato o bjalo? Go e na le gore di be khuduegong, goba di ferekane monaganong, di be di ka thabela ditebelelo tšeo Kgoši yeo e lego Mesia e tla di beago ka pele ga tšona. E tla ba mo go swanetšego gore babuši ba lefase ba tlogele boikgantšho le boikgogomošo bjo ba bo bontšhago bogošing bja bona. Go feta moo, ba tla swanelwa ke go fetoga ntle le go dika-dika, gomme ba bontšhe temogo mabapi le bophagamo bjo bo sa lekanywego le selo bja bogoši bja Jehofa le matla a sa ganetšegego a Modimo le Kgoši ya gagwe yeo e lego Mesia.

“Atlang Morwa”

20, 21. Go “atla morwa” go bolela’ng?

²⁰ Gabjale Psalme 2 e fetišetša taelo e nago le kgaugelo go babuši ba ditšhaba. Go e na le gore ba bokane gotee ka bontši bakeng sa ntwa, ba eletšwa gore: “Atlang Morwa, [Jehofa Modimo] a se tlo xalefa, la lôba tseleng. Xobane boxale bya xaxwe bo tloxa bò tuka.” (Psalme 2:12a) Morena yo a Phagamego e lego Jehofa o swanetše go theetšwa ge a nea taelo. Ge Modimo a be a bea Morwa wa gagwe sedulong sa bogoši, babuši ba lefase ba be ba swanetše go ba ba ile ba tlogela go ‘rera tša lefela.’ Ba swanetše go ba ba ile ba amogela Kgoši kapejana gomme ba e-kwa ka mo go feletšego.

²¹ Ke ka baka la’ng ba swanetše go “atla morwa”? Ge psalme ye e be e hlangwa, go atla e be e le pontšho ya bogwera gomme go be go dirišwa go amogela baeng ka legaeng la motho, moo ba bego ba ka amogelwa gabotse. Le gona go atla e ka ba tiro ya go bontšha gore motho o a botega. (1 Samuele 10:1) Temaneng ye ya psalme ya bobedi, Modimo o laela ditšhaba gore di atle goba di amogele Morwa wa gagwe e le Kgoši e tloditšwego.

22. Babuši ba ditšhaba ba swanetše go ela hloko temošo efe?

²² Bao ba ganago go amogela matla a bolaodi a Kgoši e kgethilwego ya Modimo ba roga Jehofa. Ba gana bogoši bja Jehofa Modimo bja legohleng le matla a gagwe a bolaodi gotee le  bokgoni bja gagwe bja go kgetha Kgoši yeo e lego mmuši yo kaone wa batho. Babuši ba ditšhaba ba tla lemoga gore ka go panya ga leihlo ba tla welwa ke bogale bja Modimo, ge ba leka go phethagatša maano a bona. ‘Bogale bja gagwe bo tuka gabonolo,’ goba bo tuka kapejana le ka mo go sa ganetšegego. Babuši ba ditšhaba ba swanetše go amogela temošo ye ka tebogo gomme ba gate mogato ka go dumelelana le yona. Go dira bjalo go bolela bophelo.

23. Go sa dutše go e na le nako ya gore batho ba dire’ng?

²³ Psalme ye yeo e kgahlišago e phetha ka gore: ‘Ba lehlogonolo ke ba ba botilego Jehofa.’ (Psalme 2:12b) Go sa dutše go e na le nako ya gore batho ba hwetše tšhireletšego. Seo ke sa therešo gaešita le ka babuši bao ba bego ba dutše ba thekga maano a ditšhaba. Ba ka tšhabela go Jehofa, yoo a neago tšhireletšego ka tlase ga pušo ya Mmušo. Eupša ba swanetše go gata mogato pele ga ge Mmušo wa Mesia o šilakanya ditšhaba tšeo di o lwantšhago.

24. Re ka phela bjang bophelo bjo bo kgotsofatšago kudu gaešita le lefaseng le la mathata?

²⁴ Ge e ba re ithuta Mangwalo ka mafolofolo gomme re diriša keletšo ya wona bophelong, re ka phela bophelo bjo bo kgotsofatšago kudu gaešita le gona bjale lefaseng le la mathata. Go diriša keletšo ya Mangwalo go feleletša ka ditswalano tše di thabišago tša lapa le go lokologa dipelaelong tše dintši le dipoifong tšeo di welago lefase le. Go latela ditaelo tša Beibele go nea kgodišego ya gore re thabiša Mmopi. Ga go na yo mongwe ka ntle le Mmuši wa Legohle yoo a ka neago kgonthišetšo ya “bophelô byono le ya byo bo tl’o xo tla” ka morago ga go tloša mo lefaseng batho bao ba ganetšago seo se nepagetšego ka go gana pušo ya Mmušo.—1 Timotheo 4:8.

25. Ka ge ‘taelo ya Jehofa’ e ka se palelwe, re ka letela gore go direge’ng mehleng ya rena?

²⁵ ‘Taelo ya Jehofa’ e ka se palelwe. Ka ge e le Mmopi wa rena, Modimo o tseba seo e lego se sekaone bakeng sa batho gomme o tla phethagatša morero wa gagwe wa gore batho bao ba kwago a ba šegofatše ka khutšo, kgotsofalo le tšhireletšego ya ka mo go sa felego ka tlase ga Mmušo wa Morwa wa gagwe yo a rategago. Moporofeta Daniele o ngwadile mabapi le mehla ya rena gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, . . . O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.” (Daniele 2:44) Ka gona, ka ntle le pelaelo, ke nako e akgofilego ya go ‘atla morwa’ le go hlankela Morena yo a Phagamego e lego Jehofa!

[Mengwalo ya ka tlase]

[Dipotšišo tša Thuto]

[Caption on page 16]

Dafida o opetše ka Kgoši yeo e fentšego yeo e lego Mesia

[Caption on page 17]

Babuši le batho ba Isiraele ba ile ba loga maano-mabe malebana le Jesu Kriste

[Caption on page 18]

Kriste o beilwe e le Kgoši Thabeng ya Tsione ya legodimong

O tla Araba Bjang?

• Ke ‘selo sefe sa lefela’ seo dihlopha tša ditšhaba di ilego tša ‘dula di se rera’?

• Ke ka baka la’ng Jehofa a nyatša ditšhaba?

• Taelo ya Modimo ke efe malebana le ditšhaba?

• Go “atla morwa” go bolela’ng?