Ag-onsaew so ‘Ganggan nen Jehova’

“Ibalikas ko naani ganggan; si Jehova inkuan to ed siak, Sika so Ana’ko . . . Kerew ka ed siak, et iter ko ed sika so saray nasyon ya onkana a tawir mo.”​—SALMO 2:7, 8.

1. Anto so pandumaan na gagala na Dios tan say gagala na saray nasyon?

 SI JEHOVA a Dios so walaan na gagala ed katooan tan ed dalin. Saray nasyon so walaan met na gagala. Balet agaylan mandumaan irayan gagala! Nepeg tayon ilaloan itan, lapud oniay inkuan na Dios: “Unong ya atagtagey so saray tawen nen say dalin, ontan ira so saray dalan ko atagtagey ira nen saray dalan yo, tan saray kanonotan ko nen saray kanonotan yo.” Seguradon nasumpal so gagala na Dios, lapud oniay intuloy ton inkuan: “Unong a say uran tan say musiak a lurem onlasor ira a manlapu ed tawen, et ag-ira ompawil diman noag ingen salogen da so dalin, tan pambungaen da tan pambukelen da, tan pangitdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”​—Isaias 55:9-11.

2, 3. Anto so nipabitar ed komaduan salmo, balet antoran tepet so onlesa?

 ² Nipabitar ed komaduan salmo so pakasumpal na gagalay Dios nipaakar ed Mesianikon Ari to. Say anibukel ed satan, si Arin David na kadaanan ya Israel, so pinuyanan na Dios a mangipasakbay nipaakar ed makatantandan panaon a manggugulo iray nasyon. Saray manuley da so ontalindeg sumpad si Jehova a Dios tan ed Nilanaan to. Balet, oniay inkanta met na salmista: “Ibalikas ko naani ganggan; si Jehova inkuan to ed siak, Sika so Ana’ko . . . Kerew ka ed siak, et iter ko ed sika so saray nasyon ya onkana a tawir mo, tan say kasampotan a kabiangan na dalin ya onkana a kayarian mo.”​—Salmo 2:7, 8.

³ Anto so kabaliksan na ‘ganggan nen Jehova’ a nipaakseb ed saray nasyon? Panon itan a mangapekta ed katooan diad inkalapagan? On, anto so kabaliksan na sarayan nagawa ed amin a matakot ed Dios a manbabasa ed komaduan salmo?

Manggugulo Iray Nasyon

4. Panon yon segeken iray manunan punto ed Salmo 2:1, 2?

⁴ Diad impanukoy to ed saray inkiwas na nasyones tan saray mananguley na saratan, ginapoan to so komposisyon to diad impanganta to na: “Akin et manggugulo so saray nasyon, tan saray totoo et manuumameng ira na sakey a maapa a pamaakaran? Saray arari dalin impasen da so inkasikara, tan saray manuley mandaragup ira a mansisingbat, na sumpa ed Jehova, tan sumpa ed pinuyokan to.”​—Salmo 2:1, 2. *

5, 6. Saray totoo na nasyon so ‘nannguro-nguro’ ed anton “maapa a bengatla”?

⁵ Anton “maapa a pamaakaran” so ‘inumameng’ odino nginuro-nguro na saray nasyon natan? Imbes ya awaten da so Nilanaan na Dios​—say Mesias, odino Kristo​—saray nasyon so nannguro-nguro odino ‘manuumameng,’ nipaakar ed mismon autoridad da. Sarayan salita na komaduan salmo so walaan met na kasumpalan nen inmunan siglo K.P. sanen nanmuyong so Judio tan Romanon pakauley a mamatey ed Tinuro na Dios ya Ari, si Jesu-Kristo. Balet, ginmapo so baleg a kasumpalan nen 1914 sanen nitrono si Jesus bilang mangatatawen ya Ari. Manlapu la’d saman, anggapo so mapolitikan organisasyon ya amidbir ed introno na Dios ya Ari.

⁶ Anto so labay ya ibaga na salmista sanen intepet to no ‘akin a saray totoo et nanumameng ira na sakey a maapa a pamaakaran’? Say gagala ra et maapa; anggapoy kakanaan na satan tan nigeter lan onsaew. Agda nitarok so kareenan tan pantutunosan ed sayan mundo. Ingen, gagawaen da iray bengatla sumpad pananguley na Dios. Diad tua, sikara so nankakasakey ed masumpan talindeg da tan nanmumuyong ira  sumpad Sankatageyan tan say Alanaan to. Agaylan inkamakulangkulang!

Say Mananalon Ari nen Jehova

7. Diad pikakasi, panon ya inyaplika na saray inmunan patumbok nen Jesus so Salmo 2:1, 2?

⁷ Inyaplika na saray patumbok nen Jesus iray salita na Salmo 2:1, 2 ed sikaton mismo. Sanen apasegsegang ira lapud pananisia ra, oniay impikasi ra: “Katawan [Jehova], sika ya amalsa na tawen tan dalin, tan say dayat, tan saray amin a wala ed sikara: A lapud espiritu santo, dia ed sangi nen ama min David ya aripen mo, inkuan mo: Akin ya inmalsa so saray Gentiles tan saray ombaley mannonot ira na bengabengatla ya andi-kana? Akitulong iray arari ed dalin, et saray pangulo nantitipon ira a nankakasakey, sumpa ed Katawan tan sumpa ed Pinuyokan to: Ta tua nantitipon ira ed sayan syudad di Herodes [Antipas] tan Poncio Pilato, pati saray Gentiles tan ombaley ed Israel, a sinmumpa ed masanto ya Aripen mo a Jesus, sikato a pinuyokan mo.” (Gawa 4:24-27; Lucas 23:1-12) * On, wala so impannononong nen inmunan siglo sumpad nilanaan na Dios a lingkor ton si Jesus. Balet, sayan salmo so walaan na sananey nin kasumpalan kayari na pigaran siglo.

8. Panon ya onaplika so Salmo 2:3 ed saray nasyon natan?

⁸ Sanen walaan ni na toon ari so kadaanan ya Israel, a singa si David, saray paganon nasyon tan manuley so nanmumuyong sumpad Dios tan ed introno ton alanaan. Balet komusta ed panaon tayo? Saray nasyon natan so agmalabay ya ontulok ed saray kakaukolanen nen Jehova tan say Mesias. Kanian, sikara so nilitrato a mangibabagan: “Pultoten tayo so impanaker da, tan ipulisay tayo so saray lubilubir da ed sikatayo.” (Salmo 2:3) Antokaman a pananebel ya impaakseb na Dios tan say Nilanaan to so sumpaen na saray manuley tan nasyon. Siempre, maapa so antokaman iran sagpot a mamultot ed satan a taker tan mangukbar ed saratan a lubir.

Sikara so Balawen nen Jehova

9, 10. Akin a balawen nen Jehova iray nasyon?

⁹ Agnaapektoan si Jehova ed antokaman iran sagpot na saray manuley na nasyon a mangiletneg ed inkasoberano ra. Oniay impangituloy na komaduan salmo: “Saman so manyurong ed katawenan onelek naani: say Katawan balawen to ra naani.” (Salmo 2:4) Itultuloy na Dios so gagala to a singano anggapo iratan a manuley. Elekan to so inkatangsit da tan balawen to ira. Paulyanan to ira ed pangilalastog da ed getma ran gawaen. Panelekan labat iratan nen Jehova. Elekan to so maapan isusumpa ra.

¹⁰ Diad amin a salmo to, tinukoy nen David so kakabusol a totoo tan nasyones, ya oniay inkanta to: “Sika sirin, O Jehova a Dios na saray ehersito, a Dios na Israel, liing ka ya ondalaw na amin a nasyon: Agka mapangasi ed siopaman ed saray bagel a managsumpa. Sikara onsempet ira no labi, managogol ira a singa sake’ya aso,  tan onla ra ed liberliber na asingger ed syudad. Nengneng mo, sikara mansalita ra ed sangi ra; saray barabarang so wala ed saray bibil da: ta kuan da, siopa ta kasi makadngel? Bangbalet sika, O Jehova, elekan mo ra; balbalawen mo so saray amin a nasyon.” (Salmo 59:5-8) Elekan nen Jehova so panaglastog tan kawewetwet na saray nasyon lapud makulangkulang a kurang da sumpad sikato.

11. Anto so nagawa sano sumpaen na saray nasyon so gagala na Dios?

¹¹ Saray salita na Salmo 2 so mamabiskeg ed pananisia tayo a naresolbi na Dios so antokaman a problema. Nawalaan itayo na mabiskeg a kompiyansa a sikato so lawas manusumpal ed linawa to tan agton balot ikaindan iray matoor a lingkor to. (Salmo 94:14) Kanian, anto sirin so nagawa sano sumpaen na saray nasyon so gagala nen Jehova? Unong ed sayan salmo, say Dios et “pisalitaan to ra naani ed kaplesan na sanok to,” a singano tanol na mabalagubog a karol. Niarum ni, “punawen to ra ed masakit ya ingongot to,” a singano maksil a kirmat.​—Salmo 2:5.

Introno la na Dios so Ari To

12. Say Salmo 2:6 so onaplika ed anton inkitrono?

¹² Anto so ontumbok ya imbaga nen Jehova panamegley na salmista a seguradon mangonigon ed saray nasyon. Oniay inyabawag na Dios: “Impasen ko la so arik ed tapew na masantos a palodpor ko a Sion.” (Salmo 2:6) Say Palandey Sion et sakey a pukdol ed Jerusalem a ditan introno si David bilang ari ed interon Israel. Balet say Mesianikon Ari so agnitrono ed satan a syudad odino inerman a pasen na dalin. Diad tua, introno la nen Jehova si Jesu-Kristo bilang say pinili ton Mesianikon Ari to diad mangatatawen a Palandey Sion.​—Apocalipsis 14:1.

13. Anto so impisipanan nen Jehova ed Anak to?

¹³ Say Mesianikon Ari so sinmublay a nansalita. Inkuan to: “Ibalikas ko naani ganggan [nen Jehova ya akisipanan la ed Anak to parad Panarian]; si Jehova inkuan to ed siak, Sika so Ana’ko; inilalak taka ed saya ya agew.” (Salmo 2:7) Tinukoy nen Kristo so sipanan ed Panarian sanen oniay inkuan to ed saray apostol to: “Sikayo so nansiansia ed siak ed saray inkatuktukso. Et manuro ak ed sikayo na sakey a panarian, a singa say Amak anuro ed siak.”​—Lucas 22:28, 29.

14. Akin a nibaga a si Jesus so talagan makanepegan a magmaliw ya Ari?

¹⁴ Unong ed impasakbay na Salmo 2:7, si Jesus so binidbir nen Jehova bilang say Anak to sanen abautismoan tan sanen apaoli bilang espiritu. (Marcos 1:9-11; Roma 1:4; Hebreos 1:5; 5:5) On, say Ari na mangatatawen a Panarian et say bogbogtong ya Anak na Dios. (Juan 3:16) Lapud sikato so maarin poli nen Arin David, si Jesus so talagan makanepegan a magmaliw ya Ari. (2 Samuel 7:4-17; Mateo 1:6, 16) Unong ed sayan salmo, oniay imbaga na Dios ed Anak to: “Kerew ka ed siak, et iter ko ed sika so saray nasyon ya onkana a tawir mo, tan say kasampotan a kabiangan na dalin ya onkana a kayarian mo.”​—Salmo 2:8.

15. Akin a kekerewen nen Jesus iray nasyon bilang tawir to?

¹⁵ Say Ari​—say mismon Anak na Dios​—so walaan na posisyon ya onkokomadua ed si Jehova. Si Jesus so asali la, matoor, tan napanmatalkan nen Jehova. Niarum ni, si Jesus so walaan na tawir  bilang say Panguloan ya Anak na Dios. On, si Jesu-Kristo so “talintaoy Dios ya agnanengneng, say panguloan ed amin a pinalsa.” (Colosas 1:15) Kinerew to so amin a nakaukolan ton gawaen kanian ‘inter na Dios ed sikato iray nasyon ya onkana a tawir to, tan say kasampotan a kabiangan na dalin ya onkana a kayarian to.’ Inkerew itan nen Jesus bilang samay ‘manggagayaga nensaman ed saray anak na totoo’ tan lapud pirmin pilalek ton sumpalen ed dalin tan katooan so linawa na mangatatawen ya Ama.​—Uliran 8:30, 31.

Say Ganggan nen Jehova Sumpad Saray Nasyon

16, 17. Unong ed Salmo 2:9, anto so nagawa ed saray nasyon?

¹⁶ Lapud nasusumpal la natan so komaduan salmo, kaleganan na agnanengneng a kiwawala nen Kristo, anto so nagawa ed saray nasyon? Magano lan sumpalen na Ari so inyabawag na Dios: “Sika buyaken mo ra ed lewet a balatyang; sika ibalsak mo ra a mekmeken a singa pomapalba.”​—Salmo 2:9.

¹⁷ Saray setro na arari nensaman et simbolo na maarin pakauley. Walaray setro a gawa ed balatyang, a singa samay asaglawi ed sayan salmo. Say piguratibon lenguahe ya inusar dia so mangipapabitar ed mainomay a paneral nen Kristo ya Ari ed saray nasyon. Say mabiskeg a pangibasig ed balatyang a setro so manemek ed banga na domadamili, a misimisien to itan.

18, 19. Pian nagamoran da so panangabobon na Dios, anto so nakaukolan a gawaen na saray arari na dalin?

¹⁸ Kasin kapilitan a naeksperiensya na saray manuley na bansa iyan makaderal a pakamekmek? Andi, lapud inmapelo ni ed sikara so salmista panamegley na sarayan salita: “Mankalakal kayo natan sirin, O sikayo arari: nabilin kayo komon, sikayo uko-ukom ed dalin.” (Salmo 2:10) Akerew ed saray arari ya ontalineng ira, ya agamilen da so aralem a pakatalos. Nepeg dan nodnonoten so kaapaan na saray plano ra, a midumaan ed gawaen na Panarian na Dios a pakagunggonaan na katooan.

¹⁹ Pian nagamoran da so panangabobon na Dios, nakaukolan ya umanen na saray arari ed dalin so kurang da. Sikara so asimbawa a ‘manlingkor ed Jehova a tekepan na takot, tan manggayaga a tekepan na panggiwgiw.’ (Salmo 2:11) Anto so nagawa sano tuloken da itan? Imbes a manggugulo ira, odino nawetwet so kanonotan da, makapanliket ira ed saray ilalon intarya na Mesianikon Ari parad sikara. Nakaukolan ya italirak na saray manuley na dalin so kinon tan inkamapaatagey da diad panuuley da. Niarum ni, nakaukolan a tampol dan umanen tan agamilen so aralem a pakatalos nipaakar ed agnaparaan ya inkatalonggaring na inkasoberano nen Jehova tan say agnapugeran a pakayari na Dios tan say Mesianikon Ari to.

“Angoban Yo so Anak”

20, 21. Anto so kabaliksan na “angoban so anak”?

²⁰ Inanatnat na Salmo 2 so mapangasin imbitasyon ed saray manuley na nasyones. Imbes a manmumuyong ira ya onsumpa, sikara so abilin ya: “Angoban yo so Anak, ompan Sikato [si Jehova a Dios] et nasanokan, et nabalang kayo ed dalan naani, ta nadangatan la a magano so sanok to.” (Salmo 2:12a) Nepeg ya unoren so Soberanon Katawan a Jehova sano ipaakseb to so ganggan. Sanen introno na Dios so Anak to, saray manuley na dalin so agnepeg a mannguro-nguro odino ‘manumameng na saray maapa a pamaakaran.’ Nepeg dan bidbiren a tampol so Ari tan sigpot dan tuloken.

²¹ Akin a nepeg dan “angoban so anak”? Sanen tinibukel iyan salmo, say iyangob so panangipatnag na pikakaaro tan gagawaen itan pian abrasaen iray bisita ed abung na sakey, a pamparawesan ed sikara. Say iyangob so sakey met a gawa na katooran. (1 Samuel 10:1) Diad sayan bersikulo na komaduan salmo, igaganggan na Dios iray nasyon ya angoban, odino abrasaen da, so Anak to bilang alanaan ya Ari.

22. Saray manuley na nasyon so nepeg ya ontalineng ed anton pasakbay?

²² Saramay agmangawat ed autoridad na Ari a pinili na Dios so mangiinsulto ed si Jehova. Agda bibidbiren so sankatalbaan ya inkasoberano nen Jehova a Dios tan say autoridad to tan say pakayari ton mamili na Ari a  sankaabigan a manuley ed katooan. Namoria na saray manuley na nasyones a biglan onsabi ed sikara so sanok na Dios, sano sasalien dan gawaen iray plano ra. “Nadangatan la a magano so sanok to,” odino maples tan agnapokpokan so idalang na satan. Nepeg a maliket ya awaten na saray manuley na nasyones iyan pasakbay tan onkiwas ira unong ed satan. Say panggawa ed satan so mankabaliksan na bilay.

23. Wala ni so panaon parad saray indibidual a manggawa na anto?

²³ Oniay impanampot na sayan makapasagyat a salmo: “Mapalar ya amin so saray onapireng ed Sikato [Jehova].” (Salmo 2:12b) Wala ni so panaon parad saray indibidual a mananap ed kaligenan. Tua met itan anggan ed saray indibidual a manuley, a manusuporta ed saray plano na nasyon. Nayarian day ondapag ed si Jehova, a mangitatarya na salimbeng diad silong na uley na Panarian. Balet nepeg ya onkiwas la ran tampol sakbay a deralen na Mesianikon Panarian iray onsusumpan nasyon.

24. Panon itayon makapambilay a mas maliket natan anggaman ed sayan magulon mundo?

²⁴ No maseet itayon manaral na Kasulatan tan iyaplika tayo ed bilay tayo so simbawa na satan, makapambilay itayo ed mas maliket a paraan anggan ed sayan magulon mundo. Say pangiyaplika ed Makasulatan a simbawa so manresulta ed mas maliket a relasyon ed loob na pamilya tan kawayangan manlapud dakel a pakakaaburidoan tan takot a manasalot ed sayan mundo. Say panumbok ed panangigiya na Biblia so mamawala na kompiyansa ed sikatayo a napapaliket tayo so Manamalsa. Anggapo la nilikud ed Sankatalbaan a Soberano so makapangiter na garantiya ed “sayan bilay a peles, tan say onsabi” kayari ton ekalen ed dalin iramay onsusumpa ed kaptekan diad pangipupulisay da ed uley na Panarian.​—1 Timoteo 4:8.

25. Lapud ag-onsaew so ‘ganggan nen Jehova,’ anto so iilaloan tayon nagawa ed panaon tayo?

²⁵ Agbalot onsaew so ‘ganggan nen Jehova.’ Bilang Manamalsa tayo, amta na Dios no anto so sankaabigan parad katooan tan sumpalen to so gagala to ya ipagamor ed saray matulok a totoo so kareenan, inkapnek, tan magnayon a kaligenan ed silong na Panarian na pinabli ton Anak. Nipaakar ed panaon tayo, oniay insulat nen propeta Daniel: “Dia ed saray agew naani na saratan ya arari, say Dios na tawen mamaalagey naani na sakey a panarian ya anggan kapigan agnaani naderal. . . . Buybuyaken to naani tan upoten to naani so saraya ya amin a panarian, et sikato so mansiansia lawas.” (Daniel 2:44) On, inkaganatan la sirin natan ya “angoban so Anak” tan panlingkoran so Soberanon Katawan a Jehova!

[Saray paimano ed leksab]

Panon Yon Ebatan?

• Anton “maapa a pamaakaran” so ‘panuumamengan’ odino panngunguro-nguroan na saray nasyon?

• Akin a balawen nen Jehova iray nasyon?

• Anto so ganggan na Dios sumpad saray nasyon?

• Anto so kabaliksan na “angoban so anak”?

[Tepetepet Parad Panagaral]

[Litrato ed pahina 16]

Inkanta nen David so nipaakar ed mananalon Mesianikon Ari

[Litrato ed pahina 17]

Saray manuley tan totoo ed Israel so nannononong sumpad si Jesu-Kristo

[Litrato ed pahina 18]

Nitrono si Kristo bilang Ari ed mangatatawen a Palandey Sion