‘E Decreto di Yehova’ No Por Faya

“Lo mi proclama e decreto: SEÑOR a bisa mi: ‘Bo ta mi yiu . . . Pidi mi, y siguramente lo mi duna bo e nacionnan como bo herencia.’”—SALMO 2:7, 8.

1. Ki contraste tin entre e proposito di Dios y esun di e nacionnan?

YEHOVA DIOS tin un proposito pa humanidad y pa nos planeta. E nacionnan tambe tin un proposito. Pero tin un contraste grandi entre e propositonan aki! Y esei ta algo cu nos por spera pasobra Dios ta bisa: “Mescos cu e shelonan ta mas halto cu tera, asina mi camindanan ta mas halto cu boso camindanan, y mi pensamentonan mas halto cu boso pensamentonan.” E proposito di Dios lo cumpli sigur, pasobra e ta sigui bisa: “Manera awasero y sneu ta cai for di shelo, y no ta bolbe ayanan sin muha tera, y ta haci tera produci y spruit, y ta duna simiña na e sembrado y pan na esun cu ta come, asina  mi palabra cu ta sali for di mi boca lo ta; e lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:9-11.

2, 3. Kico e di dos salmo ta splica bon cla, pero ki pregunta ta lanta?

² E di dos salmo ta mustra bon cla cu e proposito di Dios relaciona cu su Rei Mesianico lo cumpli. E compositor di e salmo aki, Rei David di antiguo Israel, a profetisa bou di inspiracion di Dios cu lo tin un tempo notabel durante cua e nacionnan lo reboltia. Nan gobernantenan lo tuma un posicion contra Yehova Dios y su Ungi. Sinembargo, e salmista a canta tambe: “Siguramente lo mi proclama e decreto: SEÑOR a bisa mi: ‘Bo ta mi yiu . . . Pidi mi, y siguramente lo mi duna bo e nacionnan como bo herencia, y e finnan di tera como bo pocesion.’”—Salmo 2:7, 8.

³ Kico e “decreto” di Yehova ta nifica pa e nacionnan? Ki efecto lo e tin riba humanidad en general? En berdad, kico e desaroyonan aki ta nifica pa tur hende temeroso di Dios cu ta lesa e di dos salmo?

Nacionnan Ta Reboltia

4. Con lo bo resumi e puntonan principal di Salmo 2:1 y 2?

⁴ Referiendo na e accionnan di e nacionnan y nan gobernantenan, e salmista ta cuminsa su composicion cantando: “Pakico e nacionnan ta reboltia asina, y e pueblonan ta plania un cos vano? E reinan di mundo ta tuma nan posicion, y e gobernantenan ta consulta hunto contra SEÑOR y contra su ungi.”—Salmo 2:1, 2. *

5, 6. Ki “cos vano” e nacionnan ta “plania”?

⁵ Ki “cos vano” e nacionnan djawe “ta plania”? En bes di acepta Dios su Ungi—e Mesias, of Cristo—e nacionnan “ta plania”, of busca moda di sigui cu nan mes autoridad. E palabranan aki di e di dos salmo a cumpli tambe den e prome siglo di nos era ora cu autoridadnan Hudiu y Romano a coopera cu otro pa mata Dios su Rei designa, Hesucristo. Sinembargo, e mayor cumplimento a cuminsa na 1914 ora Hesus a ser entronisa como Rei celestial. Djei padilanti, ni un entidad politico riba tera no a acepta Dios su Rei entronisa.

⁶ Kico e salmista tawata kiermen ora el a puntra ‘pakico e pueblonan ta plania un cos vano’? Nan proposito ta vano; e ta inutil y destina pa fracasa. Nan no por trece pas y harmonia riba e planeta aki. Pero nan accionnan ta bai asina leu cu nan ta opone e gobernacion di Dios. De echo, hunto nan a asumi un  posicion di confrontacion y a uni pa bai contra e Haltisimo y su Ungi. Esta un bobedad!

Yehova Su Rei Victorioso

7. Den oracion, con Hesus su prome siguidonan a aplica Salmo 2:1 y 2?

⁷ Hesus su siguidonan a aplica e palabranan di Salmo 1 y 2 na dje. Persigui pa motibo di nan fe, nan a pidi Dios den oracion: “O Señor [Yehova], ta Abo a traha shelo y tera y lama y tur loke tin den nan, kende, pa medio di spirito santo, pa medio di boca di nos tata David, bo sirbido, a bisa: ‘Pakico e nacionnan ta furioso asina, y e pueblonan ta plania cosnan vano? E reinan di tera a tuma nan posicion, y e gobernantenan a bin hunto contra SEÑOR y contra su Cristo [of, “ungi”, NW].’ Pasobra di berdad den e stad aki a bin hunto contra bo Yiu santo Hesus, kende bo a ungi, tanto Herodes [Antipas] como Poncio Pilato, hunto cu e paganonan y e pueblonan di Israel.” (Echonan 4:24-27; Lucas 23:1-12) * Si, den prome siglo tawatin un complot contra Dios su Yiu ungi, Hesus. Sinembargo, e salmo aki lo tawatin un otro cumplimento siglonan despues.

8. Con Salmo 2:3 ta aplica na e nacionnan djawe?

⁸ Tempo cu antiguo Israel tawatin un rei humano, manera David, nacionnan y gobernantenan pagano a uni contra Dios y su ungi entronisa. Pero kico di nos tempo? E nacionnan djawe no kier cumpli cu e rekisitonan di Yehova y di e Mesias. Pesei, ta como si fuera nan ta bisa: “Laga nos kibra nan cadenanan y tira nan cabuyanan for di nos!” (Salmo 2:3) E gobernantenan y e nacionnan lo bai contra cualkier restriccion imponi door di Dios y su Ungi. Claro cu cualkier esfuerso pa kibra e cadenanan ei y tira nan afo lo ta en vano.

Yehova Ta Haci Bofon di Nan

9, 10. Pakico Yehova ta haci bofon di e nacionnan?

⁹ Cualkier esfuerso di gobernantenan nacional pa establece nan mes soberania no ta precupa Yehova cu nada. E di dos salmo ta continua: “Esun cu ta sinta den e shelonan ta hari; Señor ta haci bofon di nan.” (Salmo 2:4) Dios ta dal bai cu su proposito como si fuera e gobernantenan aki no ta nada. E ta hari nan tribilidad y ta haci bofon di nan. Laga nan broma cu loke nan tin intencion di haci. Pa Yehova, nan ta cos di haci cherche di dje. E ta hari nan oposicion vano.

¹⁰ Otro caminda den su salmonan, David ta menciona hende y nacionnan enemigo y ta canta: “Abo, o SEÑOR Dios di ehersitonan, e Dios di Israel, lanta pa castiga tur e nacionnan; no tene misericordia di ningun traido malbado. Nan ta bolbe atardi, nan ta yora  manera cacho, y ta bai rond den stad. Mira, nan ta respo cu nan boca; tin spada riba nan lipnan, pasobra nan ta puntra: ‘Ken ta tende?’ Ma abo, o SEÑOR, ta hari nan; bo ta haci bofon di tur e nacionnan.” (Salmo 59:5-8) Yehova ta hari e bromamento y confusion di e nacionnan cu ta asina bobo pa opon’e.

11. Kico lo sosode ora e nacionnan ta purba traha contra e proposito di Dios?

¹¹ E palabranan di Salmo 2 ta fortalece nos fe cu Dios por elimina cualkier obstaculo. Nos por tin e confiansa cu semper e ta cumpli cu su boluntad y nunca e ta bandona su sirbidonan leal. (Salmo 94:14) Pues anto, kico ta sosode ora e nacionnan ta purba traha contra e proposito di Yehova? Segun e salmo aki, Dios “lo papia cu nan den su rabia”, como si fuera cu e zonido resonante di strena. Ademas, “den su furia”, manera lamper cu ta corta pisa, lo e “terorisa nan.”—Salmo 2:5.

Dios Ta Establece Su Rei

12. Na instalacion di cua rei Salmo 2:6 ta señala?

¹² Loke Yehova ta bisa siguientemente pa medio di e salmista sigur lo pone e nacionnan aribabou. Dios ta declara: “Pa loke ta ami, mi a establece mi rei riba Sion, mi sero santo.” (Salmo 2:6) Sero Sion tawata un serito den Herusalem caminda David a keda instala como rei riba henter Israel. Pero e Rei Mesianico lo no sinta riba un trono den e stad ei of otro caminda riba tera. De echo, ya caba Yehova a instala Hesucristo como su Rei Mesianico scohi riba Sero Sion celestial.—Revelacion 14:1.

13. Ki pacto Yehova a sera cu su Yiu?

¹³ Awor ta e Rei Mesianico ta papia. E ta bisa: “Lo mi proclama e decreto: SEÑOR [kende a sera un pacto cu su Yiu pa e Reino] a bisa mi: ‘Bo ta mi yiu, awe mi a engendra bo.’” (Salmo 2:7) Cristo a referi na e pacto di Reino ora el a bisa su apostelnan: “Boso ta esnan cu a permanece cu mi henter ora durante mi pruebanan; y mi ta sera un pacto cu boso, mescos cu mi Tata a sera un pacto cu mi, pa un reino.”—Lucas 22:28, 29, NW.

14. Pakico nos por bisa cu Hesus tin e derecho indiscutibel di ta Rei?

¹⁴ Manera Salmo 2:7 a profetisa, Yehova a identifica Hesus como Su Yiu ora esaki a batisa y tambe door di resusit’e na un bida spiritual. (Marco 1:9-11; Romanonan 1:4; Hebreonan 1:5; 5:5) Si, e Rei di e Reino celestial ta Dios su Yiu unigenito. (Huan 3:16) Como e desendiente real di Rei David, Hesus tin e derecho indiscutibel di ta Rei. (2 Samuel 7:4-17; Mateo 1:6, 16) Segun e salmo aki, Dios ta bisa su Yiu: “Pidi mi, y siguramente lo mi duna bo e nacionnan como bo herencia, y e finnan di tera como bo pocesion.”—Salmo 2:8.

15. Pakico Hesus ta pidi e nacionnan como su herencia?

¹⁵ E Rei—Dios su propio Yiu—ta cai direct bou di Yehova. Hesus ta un Yiu leal y confiabel  cu a keda fiel apesar di prueba. Ademas, Hesus, como e Primogenito di Dios, ta haya e herencia. Si, Hesucristo “ta e imagen di e Dios invisibel, e primogenito di henter creacion.” (Colosensenan 1:15) Tur loke e tin cu haci ta pidi y Dios ta ‘dun’e e nacionnan como su herencia, y e finnan di tera como su pocesion.’ Hesus ta haci e peticion aki como un persona cu tin ‘delicia den e yiunan di hende’ y pa motibo di su deseo fuerte pa cumpli cu e boluntad di su Tata celestial relaciona cu nos planeta y humanidad.—Proverbionan 8:30, 31.

Yehova Su Decreto Contra e Nacionnan

16, 17. Segun Salmo 2:9, kico ta warda e nacionnan?

¹⁶ Ya cu e di dos salmo ta cumpliendo awor, durante Hesucristo su presencia invisibel, kico ta spera e nacionnan? Pronto e Rei lo cumpli cu e declaracion di Dios: “Lo bo kibra nan [e nacionnan] cu bara di hero, lo bo kibra nan na pida-pida manera cos traha di klei.”—Salmo 2:9.

¹⁷ E scepter of bara di reinan di pasado tawata un simbolo di nan autoridad como rei. Algun di nan tawata traha di hero, manera esun menciona den e salmo aki. E descripcion aki ta duna nos un idea cu ki facilidad Cristo e Rei lo destrui e nacionnan. Un golpi fuerte cu un bara di hero lo kibra un obheto di klei na werki, y destru’e completamente.

18, 19. Pa e reinan di tera haya e aprobacion di Dios, kico nan mester haci?

¹⁸ Gobernantenan nacional ta obliga pa ricibi un golpi destructivo asina? No, pasobra e salmista ta haci un apelacion na nan cu e palabranan aki: “Pesei anto, o reinan, uza sabiduria; acepta spiertamento, o huesnan di tera.” (Salmo 2:10) E salmo ta pidi reinan pa tuma e asunto aki hopi na serio y uza sabiduria. Nan tin cu realisa nan mes con inutil nan plannan ta, na contraste cu loke e Reino di Dios lo haci pa beneficio di humanidad.

¹⁹ Pa e reinan di tera haya e aprobacion di Dios, nan lo tin cu cambia nan rumbo. Nan a haya e spiertamento pa “sirbi SEÑOR cu temor, y regociha cu temblamento.” (Salmo 2:11) Kico lo pasa si nan dal e paso ei? En bes di reboltia, nan lo por alegra cu e posibilidadnan cu e Rei Mesianico lo pone dilanti nan. E gobernantenan di tera lo tin cu bandona nan orguyo y e arogancia cu nan ta demostra den nan gobernacion. Ademas, sin tarda nan lo tin cu cambia y compronde realmente cu Yehova su soberania ta superior y sin igual y cu ta imposibel pa resisti e poder di Dios y di su Rei Mesianico.

“Sunchi e Yiu”

20, 21. Kico kiermen “sunchi e yiu”?

²⁰ Salmo 2 ta extende awor un invitacion misericordioso na e gobernantenan di e nacionnan. En bes di uni pa bai den oposicion, e ta conseha nan: “Sunchi e yiu, pa E [Yehova Dios] no rabia y boso perece na caminda, pasobra den un rato di ora su furia por sende.” (Salmo 2:12a) Ora Señor Soberano Yehova saca un decreto, mester obedec’e. Ora Dios a instala su Yiu riba trono, e gobernantenan di tera mester a stop di “plania un cos vano.” Nan mester a acepta e Rei mesora y obedec’e completamente.

²¹ Pakico nan tin cu “sunchi e yiu”? Tempo cu a compone e salmo aki, un sunchi tawata un expresion di amistad y un forma pa duna bishitantenan bonbini den bo cas, caminda nan por a disfruta di hospitalidad. Sunchi por tawata un acto tambe di fieldad. (1 Samuel 10:1) Den e versiculo aki di Salmo 2, Dios ta manda e nacionnan pa sunchi, of extende un bonbini na su Yiu como Rei ungi.

22. Gobernantenan di e nacionnan mester haci caso di cua spiertamento?

²² Esnan cu ta nenga di acepta e autoridad di e Rei scohi di Dios ta insulta Yehova. Nan  no ta reconoce Yehova Dios su derecho di goberna henter e universo ni su autoridad y capasidad pa scohe e Rei cu ta e miho gobernante pa humanidad. E gobernantenan di e nacionnan lo realisa cu e rabia di Dios lo bin riba nan di sorpresa, net ora nan ta purba implementa nan mes plannan. “Den un rato di ora su furia por sende”, y caba rapidamente y definitivamente cu nan. E gobernantenan nacional tin cu acepta e spiertamento aki cu gratitud y actua na harmonia cu ne. Esei lo nifica bida.

23. Ainda tin tempo pa hende individual haci kico?

²³ E salmo dramatico aki ta bisa na final: “Bendiciona ta tur esnan cu ta tuma refugio den [Yehova]!” (Salmo 2:12b) Ainda tin tempo pa hende individual scapa. Esei ta conta asta pa gobernantenan individual cu te asina leu a sostene e plannan di e nacionnan. Nan por acudi na Yehova, kende lo duna nan refugio bou di gobernacion di e Reino. Pero nan tin cu actua prome cu e Reino Mesianico destrui e nacionnan opositor.

24. Con nos por hiba un bida mas satisfecho asta den e mundo turbulento aki?

²⁴ Si nos studia e Scritura diligentemente y aplica su conseho den nos bida, for di awor mes nos por hiba un bida mas satisfecho den e mundo turbulento aki. Aplicacion di conseho biblico ta resulta den relacionnan di famia mas felis y libertad for di hopi di e precupacionnan y temornan cu ta tormenta e mundo aki. Door di sigui e guia di Bijbel nos ta haya e confiansa cu nos ta agradando e Creador. Ta e Soberano di Universo so por duna un garantia di “e bida presente y . . . esun cu ta bin” despues cu e elimina for di riba tera tur hende cu ta opone loke ta corecto door di rechasa gobernacion di e Reino.—1 Timoteo 4:8.

25. Ya cu “e decreto” di Yehova no por faya, kico nos por spera cu lo bai pasa den nos tempo?

²⁵ E “decreto” di Yehova no por faya. Como nos Creador, Dios sa kico ta miho pa humanidad y lo cumpli cu su proposito pa bendiciona humanidad obediente cu pas, contentamento y siguridad duradero bou di e Reino di su Yiu stima. Profeta Daniel a skirbi relaciona cu nos tempo: “Den e dianan di e reinan ei e Dios di shelo lo lanta un reino cu nunca lo no wordo destrui; . . . e lo garna y pone un fin na tur e reinonan aki, ma e mes lo dura pa semper.” (Daniel 2:44) Siguramente anto, awor ta ora pa “sunchi e Yiu” y sirbi e Señor Soberano, Yehova!

[Nota]

Con Lo Bo Contesta?

• Ki “cos vano” e nacionnan ta ‘planiando’?

• Pakico Yehova ta haci bofon di e nacionnan?

• Kico ta e decreto di Dios contra e nacionnan?

• Kico kiermen “sunchi e yiu”?

[Preguntanan di Estudio]

[Plachi na pagina 16]

David a canta tocante e Rei Mesianico victorioso

[Plachi na pagina 17]

Gobernantenan y e pueblo di Israel a traha un complot contra Hesucristo

[Plachi na pagina 18]

Cristo a keda instala como Rei riba Sero Sion celestial