E Lē Iʻuvale le ‘Tulafono a Ieova’

“Ou te taʻuina atu le tulafono; ua fetalai mai Ieova iā te aʻu, O loʻu Atalii oe, . . . Ia e fai mai iā te aʻu, ona ou foaʻiina atu ai lea iā te oe o nuu ese e fai mou tofi.”—SALAMO 2:7, 8.

1. O le ā le eseesega o le fuafuaga a le Atua ma fuafuaga a nuu?

E IAI se fuafuaga a Ieova le Atua mo tagata ma le lalolagi. E iai foʻi se fuafuaga a tagata ma nuu. Ae peitaʻi, e matuā eseese lava nei fuafuaga! E ao ona tatou faatalitalia lenei mea, auā na fetalai le Atua: “E pei ona sili ona maualuga o le lagi i le lalolagi, ua faapea ona sili ona maualuga o oʻu ala i o outou ala, ma oʻu manatu e sili i o outou manatu.” E mautinoa e taunuu le fuafuaga a le Atua talu ai na ia toe fetalai: “E pei ona totō ifo o le ua ma le kiona mai le lagi, a e lē toe foʻi atu i ai, a e peitaʻi e faasūsūina ai le laueleele, ma fua mai ai, ma totogo mai ai, e tupu mai ai saito i lē lūlū saito ma mea e ʻai i lē ua ʻai; e faapea foʻi laʻu upu e alu atu ai loʻu gutu, e lē foʻi mai fua iā te aʻu; a e peitaʻi e faia le mea ou te loto i ai, e manuia foʻi i le mea ou te auina atu ai.”—Isaia 55:9-11.

2, 3. O le ā ua faamanino mai e le salamo lona lua, ae o ā fesili ua lāgā ai?

 ² Ua faamatala manino mai i le salamo lona lua le faataunuuina o le fuafuaga a le Atua e tusa ma lona Malo faa-Mesia. Na faaosofia e le agaga o Ieova lē na fatuina le salamo, o le tupu o Isaraelu anamua o Tavita, ina ia valoia se taimi mataʻina o le a faanunununu ai nuu. O le a tetee o latou taʻitaʻi faasaga iā Ieova le Atua ma Lē na ia Faauuina. Ae peitaʻi, na pese foʻi le faisalamo: “Ou te taʻuina atu le tulafono; ua fetalai mai Ieova iā te aʻu, O loʻu Atalii oe . . . Ia e fai mai iā te aʻu, ona ou foaʻiina atu ai lea iā te oe o nuu ese e fai mou tofi, ma tuluʻiga o le lalolagi e fai mou.”—Salamo 2:7, 8.

³ O le ā e uiga i ai le ‘tulafono a Ieova’ po o lana poloaʻiga mo nuu? E faapefea ona aafia ai tagata lautele? O le mea moni, o le ā le uiga o nei taualumaga mo le ʻaufaitau o le salamo lona lua o ē e matataʻu i le Atua?

Ua Vevesi Nuu

4. E faapefea ona e taaofaʻia manatu tāua o le Salamo 2:1, 2?

⁴ I le faasino atu i gaoioiga a atunuu ma o latou taʻitaʻi, na amata le pese a le faisalamo e faapea: “Se ā le mea ua faanunununu ai nuu ese, ma mafaufau ai nuu i le mea e lē aogā? Ua tutū mai tupu o le lalolagi, ua pulega faatasi foʻi alii, e tetee atu iā Ieova ma lē na ia faauuina.”—Salamo 2:1, 2. *

5, 6. O le ā le “mea e lē aogā” lea e “mafaufau” i ai nuu?

⁵ O le ā le “mea e lē aogā” lea e “mafaufau” i ai nuu i aso nei? Na i lo le taliaina o Lē na Faauuina e le Atua, o le Mesia po o Keriso, ua “mafaufau” nuu i le faatumauina o a latou lava pule. Na iai foʻi se faataunuuga o upu nei o le salamo lona lua i le uluaʻi senituri T.A., ina ua pulega faatasi pule a Iutaia ma Roma e fasiotia lē na tofia e le Atua e fai ma tupu i le lumanaʻi, o Iesu Keriso. Peitaʻi, na amata le faataunuuga tele i le 1914 ina ua afio Iesu i le nofoālii o se tupu i le lagi. Talu mai lenā taimi, e augapiu ma se malo faapolotiki i le lalolagi e taliaina le Tupu a le Atua ua afio i lona nofoālii.

⁶ O le ā le uiga o le fesili a le faisalamo e faapea, ‘se ā le mea ua mafaufau ai nuu i le mea e lē aogā’? O lona uiga, ua lē aogā a latou fuafuaga, ua iʻuvale ma o le a lē taulau. E lē mafai ona latou aumaia se filemu i lenei lalolagi. Peitaʻi, ua oo atu a latou gaoioiga e tetee i le pulega a le Atua. O le mea moni, ua latou tutū malolosi e tetee atu faasaga i le Silisili Ese ma Lē na ia Faauuina. Pagā le valea!

 O le Tupu Manumalo a Ieova

7. I le tatalo, na faapefea ona faatatauina e soo o Iesu i le uluaʻi senituri le Salamo 2:1, 2?

⁷ Na faatatau e soo o Iesu upu a le Salamo 2:1, 2 iā te ia. Sa sauāina ona o lo latou faatuatua o lea na latou tatalo ai: “Le Alii silisili e [Ieova], o lē na faia le lagi, ma le lalolagi, ma le sami, ma mea uma lava o i ai; o lē na fetalai mai e le Agaga Paia i le fofoga o lo matou tamā o Tavita, o lau auauna, Se ā le mea ua lilivau ai nuu ese, ma mafaufau ai nuu i mea e lē aogā? Ua tutū mai tupu o le lalolagi, ua faapotopoto faatasi foʻi alii e tetee atu i le Alii ma lona Keriso. Auā e moni lava, na faapotopotoina i lenei aai o Herota, ma Ponotio Pilato, atoa ma nuu ese, ma le nuu o Isaraelu, e tetee atu i lau auauna paia o Iesu, ua e faauuina.” (Galuega 4:24-27; Luka 23:1-12) * I le uluaʻi senituri, na iai se faufauga leaga faasaga i le auauna faauuina a le Atua o Iesu. Ae peitaʻi, e iai foʻi se isi faataunuuga o lenei salamo i le tele o senituri mulimuli ane ai.

8. E faapefea ona faataunuu le Salamo 2:3 i nuu i aso nei?

⁸ Ina ua pule se tupu e pei o Tavita i Isaraelu anamua, na auaufaatasi nuu faapaupau ma taʻitaʻi e faasagatau i le Atua ma le tupu na ia faauuina. Ae, e faapefea o tatou taimi? E lē o mananaʻo nuu i aso nei e lolo atu i tapulaa a Ieova ma le Mesia. O lea la, e pei ua latou fai mai: “Seʻi tatou motusi ese a laʻua noataga, ma lafoaʻieseina a laʻua maea iā te i tatou.” (Salamo 2:3) O so o se faasāsāaga lava e faia e le Atua ma Lē na ia Faauuina e tetee lava i ai taʻitaʻi ma nuu. O le mea moni, e iʻuvale so o se taumafaiga lava e motusi ese na faasāsāaga po o noataga ma lafoaʻieseina na maea.

E Tauemu Ieova iā te i Latou

9, 10. Aiseā ua tauemu ai Ieova i nuu?

⁹ E lē popole le finagalo o Ieova i so o se taumafaiga a taʻitaʻi o malo ina ia faavaeina sa latou lava pule. Ua faaauau le salamo lona lua e faapea: “E soisoi lē o afio i le lagi; e tauemu le Alii iā te i latou.” (Salamo 2:4) Ua faaauau ona faatinoina e le Atua lana fuafuaga e pei lava e lē tāua nei taʻitaʻi. E soisoi o ia i lo latou faasausili ma tauemu iā i latou. Ua latou gugutu i mea o le a latou faia. E soisoi Ieova iā i latou aemaise a latou teteega e lē aogā.

¹⁰ I se tasi o ana salamo, ua faasino atu e Tavita i fili uma o tagata ma nuu i se pese e faapea: “O oe foʻi, Ieova e, le Atua o ʻau, le Atua o Isaraelu, ia e maleifua mai, ma e asiasi ai i nuu ese uma lava; aua neʻi e alofa atu i se tasi o ē amio leaga ma le pepelo. Ua latou foʻi mai i le afiafi, ua latou fetagisi e pei o le ulī, ma latou faataamilo ane i le aai. Faauta, ua  luai mai upu leaga i o latou gutu; ua i ai pelu i o latou laugutu; auā o ai sē faalogo ane? A o oe, Ieova e, e te soisoi iā te i latou; e te tauemu i nuu ese uma lava.” (Salamo 59:5-8) E soisoi Ieova i le gugutu ma le fenuminumiaʻi o nuu i a latou ala valea faasaga iā te ia.

11. O le ā e tupu pe a taumafai nuu e gaoioi faasaga i le fuafuaga a le Atua?

¹¹ Ua faamalosia lo tatou faatuatua i upu o le Salamo lona 2 e faapea, e foʻia e le Atua so o se faafitauli lava. Ua tatou mautinoa e faataunuuina lona finagalo ma na te lē tuulafoaʻiina ana auauna faamaoni. (Salamo 94:14) O lea la, o le ā e tupu pe a faia e nuu taumafaiga e gaoioi faasaga i fuafuaga a Ieova? E tusa ai ma lenei salamo, o le a ‘fetalai le Atua iā te i latou i lona toʻasā’ e pei o le taalili leotele o faititili. E lē gata i lea, “i lona toʻasā tele” e pei o le emo malosi o le uila, o le a ia “faaatuatuvaleina foʻi i latou.”—Salamo 2:5.

Ua Afio le Tupu a le Atua i Lona Nofoālii

12. O le nofoaiga a ai o loo faatatau i ai le Salamo 2:6?

¹² O le isi fetalaiga e sosoo ai a Ieova e ala i le salamo ua faaatuatuvaleina ai atunuu. Ua fetalai mai le Atua: “A o aʻu, ua ou faauuina laʻu Tupu i luga o Siona loʻu mauga paia.” (Salamo 2:6) Na afio Tavita e fai ma tupu o Isaraelu i le mauga o Siona i Ierusalema. Peitaʻi e lē afio le Tupu faa-Mesia i le nofoālii i lenā aai po o so o se vaipanoa i le lalolagi. O le mea moni, ua afio i le nofoālii i le Mauga o Siona faalelagi Iesu Keriso o le Tupu faa-Mesia ua tofia e Ieova.—Faaaliga 14:1.

13. O le ā le feagaiga na osia e Ieova ma lona Alo?

¹³ Ua fetalai le Tupu faa-Mesia e faapea: “Ou te taʻuina atu le tulafono [ua osia e Ieova ma lona Alo se feagaiga mo le Malo]; ua fetalai mai Ieova iā te aʻu, O loʻu Atalii oe, o le aso nei ua oʻu fanauina ai oe.” (Salamo 2:7) Na faasino atu e Iesu i le feagaiga mo le Malo ina ua ia fetalai i ona aposetolo: “Ua outou tumau iā te aʻu i oʻu tofotofoga. E faapei ona tofia mai e loʻu Tamā o le malo iā te aʻu, e faapea foʻi ona ou tofia outou.”—Luka 22:28, 29.

14. Aiseā e lē mafesiligia ai le avea o Iesu ma tupu?

¹⁴ E pei ona valoia i le Salamo 2:7, sa faamaonia e Ieova o Iesu o lona Alo i le taimi o lona papatisoga ma e ala i le toe faatūina o ia i le soifuaga agaga. (Mareko 1:9-11; Roma 1:4; Eperu 1:5; 5:5) Ioe, o le Tupu o le Malo i le lagi, o le Alo e toʻatasi o le Atua. (Ioane 3:16) Talu ai o ia o se suli tautupu o Tavita, e lē mafesiligia la le alagatatau ona avea o Iesu ma tupu. (2 Samuelu 7:4-17; Mataio 1:6, 16) E tusa ai ma lenei salamo, na fetalai le Atua i lona Alo: “Ia e fai mai iā te aʻu, ona ou foaʻiina atu ai lea iā te oe o nuu ese e fai mou tofi, ma tuluʻiga o le lalolagi e fai mou.”—Salamo 2:8.

15. Aiseā na talosaga ai Iesu e fai mona tofi ia nuu?

¹⁵ O le Tupu, le Alo lava o le Atua, ua ia umia le tulaga lona lua atu iā Ieova. Ua matuā faamaonia le faamaoni o Iesu iā Ieova  ma lona maufaatuatuaina i mea uma. E lē gata i lea, e maua foʻi e Iesu le tofi o le Ulumatua a le Atua. O le mea moni, o Iesu Keriso, “o le faatusa o le Atua e lē vaaia, o le ulumatua o mea uma lava ua faia.” (Kolose 1:15) Na pau lava le mea e manaʻomia ona ia faia o le fetalai atu i le Atua e ‘foaʻi atu iā te ia nuu ese e fai mona tofi, ma tuluʻiga o le lalolagi e fai mona.’ Na faia e Iesu lenei talosaga ona na fai ‘mona fiafia le fanau o tagata,’ aemaise lona matuā naunau e faataunuu le finagalo o lona Tamā i le lagi, agaʻi i le lalolagi ma tagata.—Faataoto 8:30, 31.

Tulafono a Ieova Faasaga i Nuu

16, 17. E tusa ai ma le Salamo 2:9, o le ā o le a tupu i nuu?

¹⁶ Talu ai ua faataunuu le salamo lona lua i aso nei, a o faatasi lē vaaia mai Iesu Keriso, o le ā la o le a tupu i nuu? E lē o toe umi ona faataunuu loa lea e le tupu le faalauiloaga a le Atua: “E te fasi gaugauina i latou i le tootoo uʻamea; e pei o le ipu a le fai ipu omea e te nutililii iā te i latou.”—Salamo 2:9.

¹⁷ O le tootoo a le tupu i aso anamua o faailoga ia o le pule tautupu. O nisi tootoo na faia i uʻamea, e pei o lea e faamatalaina i lenei salamo. O le gagana faafaatusa lea e faaaogā i inei, ua faaalia ai le faigofie iā Keriso le Tupu ona faaumatia nuu. E matuā nutililii se ipu omea i se taia malosi i le tootoo uʻamea.

18, 19. Ina ia maua le faamaoniga a le Atua, o le ā e manaʻomia ona faia e tupu o le lalolagi?

¹⁸ Pe e ao ona molimauina e taʻitaʻi o nuu lenā faaumatiaga mataʻutia? E leai, auā ua tuuina e le faisalamo iā i latou upu nei: “O lenei, outou tupu e, ia outou atamamai; ia aʻoaʻoina foʻi outou faamasino o le lalolagi.” (Salamo 2:10) Ua talosagaina tupu ina ia matuā uaʻi atu i nei mataupu. E ao ona latou mafaufau i le lē aogā o a latou fuafuaga, pe a faatusatusa atu i gaoioiga o le a faia e le Malo o le Atua ina ia manuia ai tagata.

¹⁹ Ina ia maua le faamaoniga a le Atua, e manaʻomia e tupu o le lalolagi ona suia o latou ala. Ua lapataʻia i latou ina ia “auauna iā Ieova ma le mataʻu, ia fiafia foʻi ma le gatete.” (Salamo 2:11) O le ā e iʻu i ai pe a latou faia na gaoioiga? Na i lo le ola i se olaga vevesi po o le fenuminumiaʻi, o le a latou olioli i le faamoemoe ua saunia e le Tupu faa-Mesia mo i latou. E ao foʻi i taʻitaʻi o le lalolagi ona lafoaʻia le faamaualuga ma le faasausili i a latou pulega. E lē gata i lea, e ao ona suia i latou e aunoa ma le faatuai ma faaalia le malamalama e uiga i le ofoofogia e lē mafaatusalia o le pulega silisili ese a Ieova, le malosi o le mana o le Atua ma lana Tupu faa-Mesia.

‘Ia Sogi i le Atalii’

20, 21. O le ā lona uiga o le ‘sogi i le atalii’?

²⁰ Ua faasalafa atu nei le valaaulia alofa i taʻitaʻi o nuu. Na i lo le pulega faatasi ina ia tetee atu, ua fautuaina i latou: “Inā sogi ia i le Atalii, neʻi toʻasā mai o ia, ma outou fano ai i le ala; auā e faafuaseʻi ona tupu o lona toʻasā.” (Salamo 2:12a) E ao ona usiusitai i le Alii Silisili Ese o Ieova pe a ia avatu se tulafono. Ina ua afio le Alo o le Atua i le nofoālii, sa tatau i taʻitaʻi o nuu ona aua neʻi ‘mafaufau i mea e lē aogā.’ Sa tatau ona faanatinati ona latou talia le Tupu ma usiusitai atoatoa iā te ia.

²¹ Aiseā e ao ai ona ‘sogi i le atalii’? Ina ua fatuina lenei salamo, o le sogi o se faailoaga o se faigāuō ma e faaaogā e faafeiloaʻia ai mālō i le fale o se aiga, o i inā latou te olioli ai i le talimālō. O le sogi o se gaoioiga foʻi o le faamaoni. (1 Samuelu 10:1) I le fuaiupu lenei o le salamo lona lua, o loo faatonuina e le Atua ia nuu ina ia sogi pe faafeiloaʻia lona Alo o se Tupu ua faauuina.

22. O le ā le lapataʻiga e ao ona utagia e taʻitaʻi o malo?

²² O i latou o ē mumusu e talia le pule a le Tupu filifilia a le Atua, e taufaifai iā Ieova. Ua  latou teena le pule silisili ese a Ieova le Atua i le aoao o mea ma lana pule e filifilia ai le Tupu e sili ona lelei mo tagata. O le a iloa e taʻitaʻi o nuu, o le a oo faafuaseʻi iā i latou le toʻasā o le Atua, a o latou taumafai e faataunuu a latou lava fuafuaga. “E faafuaseʻi ona tupu o lona toʻasā” pe e vave ona oo mai ma e lē mafai ona teena e se isi. E tatau i taʻitaʻi o malo ona taliaina lenei lapataʻiga ma le lotofaafetai ma gaoioi e ōgatusa ai. O le faia faapea o lona uiga e faasaoina ai.

23. O loo iai pea le taimi mo tagata taʻitoʻatasi e faia ai le ā?

²³ Ua faaiʻu mai lenei salamo mataʻina e faapea: “Amuia i latou uma o ē faatuatua iā te ia.” (Salamo 2:12e) O loo iai pea le taimi mo tagata taʻitoʻatasi e maua ai le saogalemu, e oo lava i taʻitaʻi taʻitoʻatasi o malo o ē o loo lagolagoina fuafuaga a nuu. E mafai ona latou sulu atu iā Ieova o lē e saunia le lafitaga i lalo o le pulega a lona Malo. Peitaʻi, e ao ona latou gaoioi a o leʻi faaumatia e le Malo faa-Mesia nuu tetee.

24. E mafai faapefea ona tatou ola i se olaga sili ona faamalieina e ui lava o loo tatou iai i lenei lalolagi tumu i faafitauli?

²⁴ Pe afai tatou te filigā e suʻesuʻe le Tusi Paia ma faatatauina ana fautuaga i le olaga, e mafai ona tatou ola i se olaga faamalieina e ui lava o loo tatou iai i lenei lalolagi tumu i faafitauli. O le faatatauina o fautuaga a le Tusi Paia e iʻu ai i se faiā faaleaiga fiafia ma le saʻolotoga mai le tele o popolega ma le mataʻu o loo pagatia ai lenei lalolagi. O le mulimuli i taʻiala o le Tusi Paia ua aumaia ai se faamautinoaga e faapea, o loo tatou faafiafia Lē na Foafoaina i tatou. E leai se tasi seʻi vaganā le Pule Silisili Ese i le Aoao o Mea e na te mafai ona faamautinoa “le olaga nei atoa ma le atalī” pe a aveesea mai le lalolagi i latou e tetee i le mea saʻo e ala i le teena o le pulega o le Malo.—1 Timoteo 4:8.

25. Talu ai e lē iʻuvale le ‘⁠tulafono a Ieova,’ o le ā tatou te faatalitalia e tutupu i o tatou taimi?

²⁵ E lē iʻuvale le ‘tulafono a Ieova.’ I le avea ma Lē na Foafoaina i tatou, ua silafia e le Atua le mea e sili ona lelei mo tagata. O le a ia faataunuuina lana fuafuaga e faamanuia tagata usiusitai i le filemu, lotomalie ma le saogalemu tumau i lalo o le Malo o lona Alo pele. Na tusi le perofeta o Tanielu e tusa ma o tatou taimi: “O ona pō o ia tupu e faatūina ai e le Atua o le lagi o le malo e lē faaumatia e faavavau. . . . Na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) O lea la, e mautinoa ua matuā faanatinati nei ona ‘sogi i le atalii’ ma auauna i le Alii Silisili Ese o Ieova!

[Faamatalaga pito i lalo]

O le a Faapefea Ona E Tali?

• O le ā le “mea e lē aogā” ua “mafaufau” i ai nuu?

• Aiseā ua tauemu ai Ieova i nuu?

• O le ā le tulafono a Ieova faasaga i nuu?

• O le ā le uiga o le ‘sogi i le atalii’?

[Fesili mo le Suʻesuʻega]

[Ata i le itulau 16]

Na pese Tavita e faatatau i le Tupu manumalo faa-Mesia

[Ata i le itulau 17]

Na fai faufauga leaga e pule ma tagata o Isaraelu faasaga iā Iesu Keriso

[Ata i le itulau 18]

Ua afio Keriso i le nofoālii o se Tupu i le Mauga o Siona faalelagi