“Awashima U Ter” Una Bunde Ga

“Me pase awashima u TER: A kaa a Mo er: We, U ngu Wan Wam je, . . . Sônom, yô, Me na U akuraior, a̱ hingir dyako Wou.”—PASALMI 2:7, 8.

1. Ka mkposo u nyi a lu hen atô u awashima u Aôndo man awashima u akuraioro?

 YEHOVA AÔNDO ngu a awashima sha ci u uumace man tar ne cii. Akuraior kpaa nga a awashima. Kpa, mbaawashima mban mba kwagh môm ga! Ka u ma se ver ishima ser kwagh a lu nahan vough, gadia Aôndo kaa wener: “Er Usha ve tav sha ve gbe ica a tar nahan, kape igbenda Yam i tav i hembe igbenda yen la, mbamhen Av kpaa ve hembe mba enev je la.” Ka u awashima u Aôndo una kure kpee, gadia á za hemen nahan ér: “Er ura kua senou ka ve sen shin inya, ve kera hide Sha ga, kpa ve gema ve ndôhôr tar, ve na u, u mende akaa, u hôm, u na orlôôn ivor, shi u na oryankwagh ruam, kape kwaghôron Wam, u a dugh ken  zwa Wam, una lu la, una hide her a Mo gbilin ga, kpa una er kwagh u M we ishima yô, ikôr ia lagh un sha kwagh u M tindi un u eren yô.”—Yesaia 55:9–11.

2, 3. Kanyi kwagh i te iwanger sha mi wang ken pasalmi, kpa ka mbampin mba nyi ve gem ve dugh sha kwagh nee?

² Í pase m-iv u awashima u Aôndo sha kwagh u Tor Mesiya la wang ken pasalmi u sha uhar la. Aôndo yange na Tor Davidi, tor u Iserael u tsuaa la tsengangeren kwagh u shighe u akuraior aa kumbur shin aa gba ahon la. Mbahemenev vev vea mough ahendan a Yehova Aôndo man u TER A ver Un tor la. Nahan orpasalmi wa ican ér: “Me pase awashima u TER: A kaa a Mo er: We, U ngu Wan Wam je, . . . Sônom, yô, Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je.”—Pasalmi 2:7, 8.

³ Inja i “awashima u TER” hen akuraior yô ér nyi? Awashima ne bende a uumace jimin cii nena? Jighilii yô, awashima u Yehova a we sha akuraior ne bende a mbacian Aôndo cica cii mba ve er pasalmi u sha uhar la nena?

Akuraior Nga Kumbur

4. Ú pase atôakaa a vesen a i ter ken Pasalmi 2:1, 2 la nena?

⁴ Orpasalmi ngur ôron kwagh u akuraior man utor vev yô, á wa icam á kaa ér: “Ka nyi man akuraior a kumbur yumu, ior kpaa ve henen ugbilinmbaakaava? Utor mba sha won ve mough ahendan, mbatarev kpaa ve zua sha u henen akaa a num sha TER man Un u TER A ver Un tor la.”—Pasalmi 2:1, 2. *

5, 6. Ior mba zeren ‘henen ugbilinmbaakaav’ mba nyiivi?

⁵ Ka “ugbilinmbaakaav” mba nyi ior ve zer “henen” aingee? U akuraior ma á lumun un u Aôndo A ver Un tor la—ka Mesiya, shin Kristu je la yô—akuraior de nga “henen” a hen u zan hemen a tahav vev. Mkaanem ma pasalmi u sha uhar ne shi ma kure ken derianyom u hiihii S.W. sha shighe u Mbayuda kohol mbahemenev mba Mbaroma ve wua Yesu Kristu, Tor u Aôndo a Ver la. Nahan kpa, mkur u vesen u kwaghôron ne yô hii ken inyom i 1914, shighe u i ver Yesu Tor sha la. Hii shighe la je, ma gomoti sha tar môm tsô kpa ngu a lumun a Tor u Aôndo a ver la ga.

⁶ Orpasalmi lu ôron ér nyi zum u á pine ér ‘ka nyi man ior ve henen ugbilinmbaakaava’ laa? Ka awashima ve la a lu gbilinkwagh ye, ngu a iwasen ga man ka u una saa ishe kpaa. Vea fatyô u van a bem man mzough shin tar u ngun mayange ga. Kpa, shi mba di hendan a hemen u Aôndo her tsô. Sha kpôô yô, ve kohol imôngo cii mba hendan kwagh kpoghuloo  shi ve zua mba henen akaa a num sha Uhembansha man u A ver Un Tor la. Nenge imba kwagh u ibume la sha wono!

Tor u Yehova Hemba

7. Mbadondon mba Yesu yange ve tôô mkaanem ma ken Pasalmi 2:1, 2 la ve kar sha Yesu ken msen ve la nena?

⁷ Mbadondon mba Yesu yange ve tôô mkaanem ma ken Pasalmi 2:1, 2 la ve kar sha a na. Er i tôv ve a ican sha ci u jighjigh u nan ve yô, ve er msen ve kaa er: “Tere, ka We u U er Sha man tar man zegemnger kua akaa a a lu ken ve cii kpaa ye. Man shi U kaa sha Icighan Jijingi sha ikev i ter wase Davidi, wanakiriki Wou Wer: Ka nyi man atôatyev a zough num, man akuraior kpaa a henen ugbilinmbaakaava? Utor mba sha won ve mough ahendan, mbavesen kpaa ve zua imôngo, ve hendan a Ter kua shi a Kristu Na kpaa. Gadia mimi je, ken gar ne Herode [Antipa] man Pontiu Pilatu kohol a atôatyev man nongoior u Iserael cii imôngo sha Wanakiriki Wou, Yesu, u U shighe Un mkurem la.” (Aerenakaa 4:24–27; Luka 23:1–12) * Mimi je yange i nenge Yesu u Aôndo shighe un mkurem la mker ken derianyom u hiihii la. Nahan kpa, lu u shi kwaghôron ne una kure vindi vindi uderimbaanyomov imôngo ken hemen.

8. Pasalmi 2:3 iv sha akuraior a a lu hegen ne nena?

⁸ Shighe u Aôndo veren tor sha Iserael u tsuaa, imba er Davidi nahan la, akuraior a a kase ve la a utor vev cii ve kohol num sha Aôndo man or u á ver nan tor la. Kpa gema hen shighe wase ne di ye? Akuraior a a lu hegen ne kpa soo u eren sha atindi a Yehova man Mesiya na ga. Sha nahan yô, i ôr kwagh ve ér mba kaan nahan ér: “Sé tôndo nen ikangenev Vev kera, sé kende nen ikor Ve her a vese kera!” (Pasalmi 2:3) Hanma tindi u Aôndo man un u A ver Un tor la ve we cii kpa akuraior man mbahemenev vev ka ve venda kera. Nahan cii kpa, ma iniôngon i tôndon ikangenev mbin shi kenden ikor ve kera cii ia saa ishe.

Yehova Naha Ve Tar

9, 10. Er nan ve Yehova a lu nahan akuraior tara?

⁹ Iniôngon i mbahemenev ve lu nôngon ér vea hemen ayol a ve a Yehova shio la tagher Yehova ma kwagh môm ga. Pasalmi u sha uhar la shi za hemen kaa ér: “Wen u A tem Sha, ngu sen, TER ngu nahan ve tar.” (Pasalmi 2:4) Aôndo za hemen u eren sha awashima na vough er mbahemenev mban mba ma kwagh ga nahan. Ngu sen ve sha ci u tswam ve la, shi ngu nahan ve tar kpaa. Vea soo yô ve er kwagh u ve we ishima u eren la. Kpa Yehova yô ngu sen ve a se. Ngu sen ve sha ahendan a ve a gbilinigh la.

¹⁰ Davidi ôr kwagh u mbaihyomov man akuraior ken pasalmi na ugen kaa ér: “We,  TERE, Aôndo u akum a Sha, Aôndo u Iserael, mough sha, ôr atôatyev ijir, de kera zungwen ma or u ken mba ve eren akaabo sha atseregh la mhôônom ga. Ka ve hide aikighe, ve eren imo er iwa yô, ve zenden ve ningir ken gar. Nenge, ve kaan imbwase sha zwa ve, usanker mba ve sha ityumbujôôgh; gadia ka an nana ungwa? Kape ve kaan la. Kpa We, TERE, Ú se ve; atôatyev cii, Ú nahan a tar.” (Pasalmi 59:5–8) Yehova ngu sen akuraior sha ihyagh i ve lu tan la man er ve tsum kpishi sha u hendan a na sha ibume nahan.

11. Kanyi ia er shighe u akuraior aa ker u bunden awashima u Yehova laa?

¹¹ Mkaanem ma ma lu ken Pasalmi 2 la taver jighjigh u nan wase kpishi, gadia Aôndo una fatyô u been a nyityô mzeyol cii. Se fatyô u lun a vangertiôr ser hanma shighe cii kpa una er sha awashima na vough shi mayange una ta ior nav kera ga. (Pasalmi 94:14) Tsô kanyi ia er shighe u akuraior aa ker u bunden awashima u Yehova laa? Sha kwaghôron u pasalmi ne yô, Aôndo una “ôr kwagh a ve sha iyugh Na,” a kume er idyuran nahan. Heela tseegh ga, shi “una ta ve mciem iyol sha ishima Na i vihin tsung” la fese er ka inyiar nahan.—Pasalmi 2:5.

Aôndo Ver Tor Na

12. Ka hanma ikyônough ki torough Pasalmi 2:6 a iv sha mi voughloo?

¹² Kwagh ugen u Yehova shi a er ken pasalmi la na akuraior anzughul je ka u henen a hen ga. Aôndo yôô wener: “Mo M ver Tor Wam sha icighanwo Wam, Shion.” (Pasalmi 2:6) Uwo u Shion yange lu igyungu igen ken Yerusalem, ape i ver Davidi tor sha Iserael cii la. Kpa Tor Mesiya yô una tema tor ken gar la shin ma ijiir igen shin tar kpaa je ga. Yehova ver Yesu Kristu ér a̱ lu Tor Mesiya sha Uwo u Shion sha kera kpaa.—Mpase 14:1.

13. Ka ikyuryan i nyi Yehova a ye a Wan naa?

¹³ Tsô Tor Mesiya maa ôr kwagh. Á kaa ér: “Me pase awashima u TER [Yehova Aôndo, u a ye ikyur vea Wan na la]: A kaa a Mo er: We, U ngu Wan Wam je, Mo M mar U nyian.” (Pasalmi 2:7) Kristu lu ôr kwagh ter ikyuryan i Tartor zum u á kaa a mbaapostoli ér: “Kpa ka ne je ne taver ishima ne lu a Mo ken ameen a i lu meen Mo la cii ye. Nahan M ver ne tartor er Terem kpaa A verem nahan.”—Luka 22:28, 29.

14. Hii nan ve a fatyô u kaan ér Yesu ngu a ian i lun tor i ma or nana hendan a na ga?

¹⁴ Yehova tese ér Yesu ka Wan Na shighe u i lu eren un batisema la shi tese kwagh ne sha u nderen un shin ku, nan un uma ken jijingi di er i tsengaôron ken Pasalmi 2:7 nahan. (Pasalmi 2:7; Marku 1:9–11; Mbaromanu 1:4; Mbaheberu 1:5; 5:5) Mimi je, ka Yesu u a lu Wan u Aôndo u môm môm la a lu Tor u Tartor u sha ye. (Yohane 3:16) Er Yesu a dugh ken tsombor u Tor Davidi yô, ngu a ian i lun tor i ma or nana hendan a na ga yô. (2 Samuel 7:4–17; Mateu 1:6, 16) Sha kwagh u pasalmi ne a er yô, Aôndo kaa a Wan na ér: “Sônom, yô, Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je.”—Pasalmi 2:8.

15. Er nan ve Yesu a sen ér i na un akighir a tar a̱ hingir kwagh naa?

 ¹⁵ Ka Tor—u a lu Wan u Aôndo la—á lu sha ian i dondon ken Yehova ye. Yesu ka u i kar un kpa á til sha mimi shi á kom u haren sha a na kpaa yô. U seer yô, ka Yesu a ye dyako i Waniunda u Aôndo ye. Sha kpôô yô, Yesu Kristu ngu “ibeen i Aôndo u i nengen a Na ga la, ka Waniunda ken akaa a i gbe a cii.” (Mbakolose 1:15) Ka u un sônon tseegh, Aôndo una ‘na un akuraior aa hingir dyako na, akighir a tar kpaa aa hingir kwagh na je.’ Yesu sôn kwagh ne sha ci u ka or u ‘akaa a ônov mba iorov doo un’ yô, shi sar un tsung u kuren kwagh u Ter na u sha a we ishima sha ci u tar ne kua orumace la.—Anzaakaa 8:30, 31.

Kwagh u Yehova A We Ishima u Eren a Akuraior La

16, 17. Pasalmi 2:9 tese ér kanyi i lu keghen akuraioro?

¹⁶ Er ityough ki sha uhar ki pasalmi ne a lu kuren hegen hen shighe u m-ande u Yesu Kristu u i nengen a na ga ne nahan, kanyi kwagh i lu keghen akuraioro? Ica a kera gba ga tsô Tor una kure kwagh u Aôndo yôô la, ér: “Ú her ve [akuraior] sha tôgh ku iyôgh; Ú hembe ve avur avur er gbande u ormaantyegh nahan.”—Pasalmi 2:9.

¹⁷ Tôgh ku torough ku sha ayange la lu ikyav i utaha. Yange i er tôgh ku genegh sha iyô, er ku i er kwagh u ku ken pasalmi ne nahan. Kwagh u i er heen ne tese ér Kristu u a lu Tor la una tim akuraior je a taver un ga. Aluer i hembe gbande sha tôgh ku iyôgh yô, gbande la una hembe avur avur je a gande u kohol á kpaa.

18, 19. Aluer ka u Aôndo una lumun mbahemenev mba tarev yô, kanyi i gbe u vea eree?

¹⁸ Mba kighir a kighir mbahemenev mba akuraior ér a tim vee? Ei, sha ci u orngeren pasalmi zamber a ve ken mkaanem man ér: “Nahan yô, ne utor, lu nen a mfe, ungwa nen ityesen, ne mbaajiriv mba tarev.” (Pasalmi 2:10) I yila utor ér ve ver ato, ve ungwa kwagh u i lu ôron ne doo doo. Gba u ma ve hidi ma ve hen sha mbamhen vev mba gbilinigh la ma ve nenge kwagh u Tartor u Aôndo ua er sha ci u uumace jimin cii la.

¹⁹ Aluer utor mba tarev soo ér Aôndo a lumun a ve yô, nahan a gba u vea undu gbenda ve la. Í wa ve kwagh ér “civir nen TER a mciem, ember nen a akarkase iyol.” (Pasalmi 2:11) Aluer ve dondo kwaghwan ne yô, kanyi ia ere? U akuraior gban ahon shin moughon num la yô, aa ember a ember sha kwagh u Tor Mesiya una ver sha ci ve la. Saa mbahemenev mba tarev vea de ihyagh i kaan man iyolmoron i ve tesen ken tarsôron ve la keng. U seer yô, a gba u vea gema aeren a ve la a atimbir shio, vea ungwa kwagh u i lu ôron ve ér Yehova ka tor uhemban sha won jimin cii, u tor môm nan kom a na ga la, man tahav mbu Aôndo man Tor Mesiya mbù mbú gande u hendan a mi la.

“Suse Nen Wan Zwa”

20, 21. Inja i u susen wan zwa la er nyi?

²⁰ Hegen ne Pasalmi 2 lôhô mbahemenev mba akuraior teghelee ér a̱ er kwagh ne. U ma ve zough imôngo sha u hendan a hendan kwagh la yô, í wa ve kwagh ér: “Suse nen Wan zwa, sha er [Yehova Aôndo] A̱ de yugh man né saa ishe sha gbenda ga yô; gadia ka Un ican u yuwen ga.” (Pasalmi 2:12a) Shighe u Yehova, Ter Uhembanagee á we tindi yô ve ungwa. Shighe u Aôndo ver Wan na tor la, mbahemenev mban ma ve de u “henen ugbilinmbaakaav.” Yange ma ve kav er á lu tor nahan fese je shi ma ve hii u ungwan un kpaa.

²¹ Hii nan ve i gbe u vea ‘suse wan zwa’? Sha shighe u i lu ngeren pasalmi la yô, zwa susen yange lu ikyav i tesen ér or nan ngu ijende you, shi lu ikyav i tesen ér ú ngohol orvannya ken ya wou kpaa. Shi zwa susen ka ikyav i tesen mtil sha mimi shin u lun jighjigh. (1 Samuel 10:1) Aôndo ngu kaan a akuraior ér a̱ suse Wan na zwa shi a̱ ngohol un ér ngu Tor.

22. Ka hanma icintan i doo u mbahemenev mba akuraior vea ungwaa?

²² Mba ve vende u lumun hemen u un u Aôndo a ver un Tor la yô mba lahan Yehova. Ve venda hemen u Yehova Aôndo man tahav nav  kua ian i á lu a mi i tsuan Tor u nana hemba hemen u uumace sha inja la. Mbahemenev mba tarev vea va mase fan er iyugh i Aôndo ia va sha a ve fese er ka i pelegh ashe nahan zum u vea lu nôngon u kuren mbamhen vev la. “Ka Un ican u yuwen ga,” shi ngu a yuwe fefa man or yevese í nan waren ga. Doo u mbahemenev mba tarev vea ungwa icintan ne saan saan shi vea er sha icintan shon kpaa. U eren nahan la una va a uma.

23. Kanyi shighe a shi sha u ior asange asange vea eree?

²³ Pasalmi ne mase kuren nahan ér: “Mba ve suur sha a Na [Yehova] cii saan ve iyol!” (Pasalmi 2:12b) Shighe shi her u ior asange asange vea ker myom. Mbahemenev mba tarev asange asange mba ve lu suen mbamhen mba akuraior la je kpa vea fatyô u va zuan a myom. Vea fatyô u yevese za tan ken Yehova, un u á ne mkor sha hemen u Tartor na la. Kpa, saa vea er kwagh ne cii man Tartor u Mesiya ua tim akuraior a a lu hendan la ye.

24. Se er nan ve ken tar u ú iv a mbamzeyol ne je kpa se lu a mkomo?

²⁴ Aluer se mba henen Ruamabera sha gbashima a uwer gban shio, shi se mba eren sha kwagh u se hen la yô, hegen je kpa se fatyô u zuan a mkom ken tar u mbamzeyol ve ye tor ker ne. U eren sha kwaghwan u Ruamabera la ngu a va a mlu u kangenaa, u saan saan hen tsombor shi ngu a na se mpase tuhwa sha ikyev i ishimanyian man mciem ma ma dumbur ken tar ungun ne. U eren sha gbendatesen u Bibilo la ngu a na se vangertiôr ser se mba eren sha ishima i Orgban wase. Dugh Tor Uhembansha la kera yô, ma orgen ngu u nana na se ibumun i “uma u hegen ne kua uma u a lu van la,” shighe u una kar a mba ve hendan a kwagh u a lu u vough, ve vende hemen u Tartor na kera la ga.—1 Timoteu 4:8.

25. “Er awashima u TER” a bundu ga yô, se ver ishima ser kanyi ia er hen shighe wase nee?

²⁵ “Awashima u TER” ka u bunden ga. Er Aôndo a lu Orgban wase yô, á fa kwagh u a hembe doon sha ci u uumace yô, man una kure awashima na u á we ér una ver uumace mba ungwan tindi doo doo shi una na ve bem man mkom man mkor u tsôron ken Tartor u Wan na u doonshima la. Daniel yange ôr kwagh sha kwagh u shighe wase kaa ér: “Sha ayange a utor mbara, Aôndo u Sha Una ver tartor ugen u ua gba mayange ga yô, . . . ua hembe ityartor igen ne cii avur avur, ua tim i, kpa u yô, ua lu gbem sha won.” (Daniel 2:44) Sha nahan yô, hemba kan torough torough hegen u se ‘suse Wan zwa’ shi se civir Yehova, Ter Uhembanagee la kpaa!

[Footnotes]

Ú Na Mlumun Wer Nyi?

• Ior mba “henen ugbilinmbaakaav” mba nyiivi?

• Hii nan ve Yehova a lu nahan akuraior tara?

• Kanyi i lu awashima u Aôndo sha akuraioro?

• Inja i kwagh u i kaa ér “suse nen Wan zwa” la ér nyi?

[Study Questions]

[Picture on page 12]

Davidi wa icam sha kwagh u mhembe u Tor Mesiya

[Picture on page 13]

Mbahemenev man ior i Iserael cii yange ve zua zwa sha Yesu Kristu

[Picture on page 14]

Í ver Kristu Tor sha Uwo u Shion sha