‘An Sugo ni Jehova’ Diri Mapapakyas
‘An Sugo ni Jehova’ Diri Mapapakyas
“Pagsusumatan ko ikaw han sugo; hi Jehova nagsiring ha akon: Anak ko ikaw . . . Pangaro ha akon, ngan ihahatag ko ha imo an mga nasud nga imo panurundon.”—SALMO 2:7, 8.
1. Ano an kaibahan han katuyoan han Dios ngan han katuyoan han mga nasud?
HI Jehova nga Dios may-ada katuyoan para ha katawohan ngan ha tuna. An mga nasud liwat may-ada katuyoan. Kondi magkaiba gud ini nga mga katuyoan! Angay laoman naton ini, kay an Dios nasiring: “Sugad nga an mga langit hiruhitaas kay han tuna, amo man an akon mga paagi hiruhitaas kay han iyo mga paagi, ngan an akon mga hunahuna kay han iyo mga hunahuna.” An katuyoan han Dios sigurado nga matutuman, kay nagpadayon hiya ha pagsiring: “Sugad nga an uran ngan an niebe nahuhulog tikang ha langit, ngan diri nabalik ngadto, kondi nahatag hin tubig ha tuna, ngan nakakapanurok ngan nakakapamiyoos hini, ngan nahatag hin liso ha magsarabwag ngan tinapay ha kumaraon; maaamo man an akon pulong nga magawas ha akon baba: diri ini mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.”—Isaias 55:9-11.
2, 3. Ano an iginpatin-aw ha ikaduha nga salmo, kondi ano nga mga pakiana an iginbabangon?
2 Ha ikaduha nga salmo, iginpatin-aw nga matutuman an katuyoan han Dios mahitungod han iya Mesianiko nga Hadi. An nagsurat hito, hi Hadi David han kadaan nga Israel, giniyahan han Dios ha pagtagna nga maabot an makatirigamnan nga panahon nga magsasaramok an mga nasud. An ira mga magmarando magkakatukdaw kontra kan Jehova nga Dios ngan ha iya Dinihogan. Kondi, an salmista nagkanta liwat: “Pagsusumatan ko ikaw han sugo; hi Jehova nagsiring ha akon: Anak ko ikaw . . . Pangaro ha akon, ngan ihahatag ko ha imo an mga nasud nga imo panurundon. Ngan magigin imo kalugaringon [an] mga tubtoban han mga sidsid han tuna.”—Salmo 2:7, 8.
3 Ano an kahulogan han ‘sugo ni Jehova’ para ha mga nasud? Paonan-o ito nakakaapekto ha katawohan ha kabug-osan? Oo, ano an kahulogan hini para ha ngatanan nga mahadlukon-ha-Dios nga mga magbarasa han ikaduha nga salmo?
Nagsasaramok an mga Nasud
4. Paonan-o mo isusumaryo an nangunguna nga mga punto han Salmo 2:1, 2?
4 Ha pag-unabi han mga buhat han mga nasud ngan han mga magmarando hito, an salmista nagtikang han iya sinurat pinaagi han pagkanta: “Kay ano nga nagsasamok an mga nasud, ngan an mga katawohan namamalandong hin mga bagay nga kawang? An mga hadi ha tuna magkakatukdaw, ngan an mga punoan naggigisarosagdon, pagtigi kan Jehova, ngan patok ha iya hinirogan.”—Salmo 2:1, 2. *
5, 6. An mga nasud “namamalandong” hin ano nga “mga bagay nga kawang”?
5 Ano nga “mga bagay nga kawang” an ‘pinamamalandong’ han mga nasud yana? Imbes nga karawaton an Dinihogan han Dios—an Mesias, o Kristo—an mga nasud “namamalandong,” ha pagpadayon han ira awtoridad. Ini nga mga pulong han ikaduha nga salmo natuman liwat ha siyahan nga siglo K.P. han an Judio ngan Romano nga mga awtoridad nagbinuligay ha pagpatay ha Pinili han Dios nga Hadi, hi Jesu-Kristo. Kondi an daku nga katumanan nagtikang han 1914 han ginpalingkod hi Jesus sugad nga langitnon nga Hadi. Tikang hadto, waray politikal nga organisasyon ha tuna nga nagkarawat han nahitrono nga Hadi han Dios.
6 Ano an karuyag ipasabot han an salmista nagpakiana ‘kay ano nga an mga katawohan namamalandong hin mga bagay nga kawang’? An ira katuyoan amo an kawang; waray pulos ito ngan sigurado nga mapapakyas. Diri hira makakagdara hin kamurayawan ngan pagkaurosa ngada hini nga tuna. Kondi, nagpapadayon hira han ira mga buhat tubtob nga ira na ginkukontra an pagmando han Dios. Ha pagkamatuod, nagkakaurosa hira ha pakig-away ngan naggigisarosagdon hira kontra ha Gihitaasi ngan ha iya Dinihogan. Kalurongan gud ito!
An Madaugon nga Hadi ni Jehova
7. Ha pag-ampo, paonan-o igin-aplikar han siyahan nga mga sumurunod ni Jesus an Salmo 2:1, 2?
7 Igin-aplikar han mga sumurunod ni Jesus an mga pulong han Salmo 2:1, 2 ha iya. Han gintimaraot tungod han ira pagtoo, hira nag-ampo: “O, Ginoo [Jehova], ikaw an nagbuhat han langit ngan han tuna, ngan han dagat ngan han ngatanan nga mga butang nga aada ha ira; nga tungod han espiritu santo ha baba han imo surugoon nga hi David, nga amon amay, siniring ka: Kay ano nga an mga Hentil naninggit ha pangisog, ngan an mga katawohan naghuhunahuna han waray kapulsanan nga mga bagay? An kahadian ha tuna nanindog, ngan nagtiripon an mga magburuot kontra ha Ginoo, ngan kontra ha iya Gindihogan: kay, ha pagkamatuod, hi Herodes, [Antipas], ngan hi Ponsio Pilato, upod an mga Hentil, ngan an katawohan ha Israel, nagtitirok hira dinhi hini nga bungto kontra ha imo baraan nga uripon nga amo hi Jesus, nga imo gindihogan.” (Buhat 4:24-27; Lukas 23:1-12) * Oo, ha siyahan nga siglo may-ada pagsarabot kontra ha dinihogan nga surugoon han Dios nga hi Jesus. Kondi, ini nga salmo magkakaada usa pa nga katumanan paglabay hin mga siglo.
8. Paonan-o natutuman an Salmo 2:3 ha mga nasud yana?
8 Han an kadaan nga Israel nagkaada tawhanon nga hadi, sugad kan David, an pagano nga mga nasud ngan mga magmarando nagkaurosa pagkontra ha Dios ngan ha iya nahitrono nga dinihogan. Kondi kumusta man ha aton panahon? Diri karuyag han mga nasud yana nga sumunod ha mga sugo ni Jehova ngan han Mesias. Salit, iginlaladawan hira nga sugad hin nasiring: “Pagraptusa ta an ira mga higot, ngan ilabog ta an ira mga pisi tikang ha aton.” (Salmo 2:3) Anoman nga mga pagdiri han Dios ngan han iya Dinihogan kukontrahon han mga magmarando ngan han mga nasud. Syempre, mawawaray kapulsanan an bisan ano nga mga pangalimbasog ha pag-utod ngan paglabog hito nga mga pisi.
Hi Jehova Magyuyubit ha Ira
9, 10. Kay ano nga hi Jehova nagyuyubit ha mga nasud?
9 Hi Jehova diri nababaraka han bisan ano nga mga pangalimbasog han mga magmarando han mga nasud ha pag-organisa han ira kalugaringon nga pagmando nga bulag ha Dios. An ikaduha nga salmo nagpapadayon: “Hiya nga naglilingkod ha kalangitan magtatawa; an Ginoo magyuyubit ha ira.” (Salmo 2:4) An Dios nagpapadayon ha iya katuyoan nga sugad hin waray gud pulos ini nga mga magmarando. Nagtatawa hiya ha ira kaalohan ngan iya hira pagyuyubiton. Iya pasasagdan hira nga maghambog han ira ginpaplano nga buhaton. Para kan Jehova, mga pataraw-an hira. Nagtatawa hiya ha ira waray pulos nga pagkontra.
10 Ha iba nga bahin han iya mga salmo, gin-unabi ni David an kaaway nga mga tawo ngan mga nasud ngan hiya nagkanta: “Ikaw, O Jehova, Dios han mga kasundalohan, an Dios ni Israel. Buhat gud pagduaw duawa an ngatanan nga mga nasud: Diri ka malooy ha maraot nga masinupakon. Nabalik hira kon gab-i, nag-uusig sugad hin ayam, ngan naglilinakat palibot han sawang. Kitaa, nagbubuga han ira mga baba; an mga espada aada ha ira mga im-im: kay nasiring hira, Hin-o an nadungog? Kondi ikaw, O Jehova, magtatawa ka ha ira: Magpapakaalo ka han ngatanan nga mga nasud.” (Salmo 59:5-8) Hi Jehova nagtatawa ha paghambog ngan kalisang han mga nasud ha ira lurong nga mga buhat kontra ha iya.
11. Ano an nahitatabo kon an mga nasud nangangalimbasog pagkontra ha katuyoan han Dios?
11 An mga pulong han Salmo 2 nagpaparig-on han aton pagtoo nga masusulbad han Dios an anoman nga problema. Makakasarig gud kita nga pirme niya gintutuman an iya kaburut-on ngan diri gud isasalikway an iya maunungon nga mga surugoon. (Salmo 94:14) Salit, ano an mahitatabo kon an mga nasud nangangalimbasog ha pagkontra han katuyoan ni Jehova? Sumala hini nga salmo, an Dios ‘magyayakan ha ira ha iya kasina,’ nga baga in sugad han makalilisang nga tunog han dalugdog. Dugang pa, “ha iya gidadakui nga kasina,” nga baga in sugad han makusog nga kidlat, ‘iya paglilisangon hira.’—Salmo 2:5.
Ginpalingkod ha Trono an Hadi han Dios
12. An Salmo 2:6 naaplikar ha ano nga paglingkod ha trono?
12 An sunod nga ginsiring ni Jehova pinaagi han salmista nakapasina gud ha mga nasud. An Dios nagpahayag: “Ibinutang ko an akon hadi ha bawbaw han akon baraan nga bukid nga Sion.” (Salmo 2:6) An Bukid Sion usa nga bukid ha Jerusalem, diin hi David an ginpalingkod nga hadi ha bug-os nga Israel. Kondi an Mesianiko nga Hadi diri malingkod ha trono dida hito nga siyudad o ha iba nga lugar ha tuna. Ha pagkamatuod, ginpalingkod na ni Jehova ha trono hi Jesu-Kristo sugad nga iya pinili nga Mesianiko nga Hadi ha langitnon nga Bukid Sion.—Pahayag 14:1.
13. Ano nga kauyonan an ginhimo ni Jehova ha iya Anak?
13 An Mesianiko nga Hadi nagyayakan yana. Hiya nasiring: “Pagsusumatan ko ikaw han sugo: Hi Jehova [nga naghimo hin kauyonan ha iya Anak para ha Ginhadian] nagsiring ha akon: Anak ko ikaw; igin-anak ko ikaw hini nga adlaw.” (Salmo 2:7) Gin-unabi ni Kristo an kauyonan ha Ginhadian han nagsiring hiya ha iya mga apostol: “Kamo amo an mga iginkakaupod nakon han ako ginpipinanulay; ngan ako nahatag ha iyo hin ginhadian, sugad han akon Amay nga naghatag hin ginhadian ha akon.”—Lukas 22:28, 29.
14. Kay ano nga masisiring nga hi Jesus an diri-manigaran nga may katungod nga magin Hadi?
14 Sugad han igintagna ha Salmo 2:7, ipinakilala ni Jehova hi Jesus sugad nga Iya Anak han bawtismohan hiya ngan pinaagi han pagbanhawa ha iya ngadto ha espiritu nga kinabuhi. (Markos 1:9-11; Roma 1:4; Hebreo 1:5; 5:5) Oo, an Hadi han langitnon nga Ginhadian amo an bugtong nga Anak han Dios. (Juan 3:16) Tungod kay hiya an hadianon nga tulin ni Hadi David, hi Jesus an diri-manigaran nga may katungod nga magin Hadi. (2 Samuel 7:4-17; Mateo 1:6, 16) Sumala hini nga salmo, an Dios nasiring ha iya Anak: “Pangaro ha akon, ngan ihahatag ko ha imo an mga nasud nga imo panurundon, ngan magigin imo kalugaringon an mga tubtoban ha mga sidsid han tuna.”—Salmo 2:8.
15. Kay ano nga ginhangyo ni Jesus nga magin panurundon niya an mga nasud?
15 An Hadi—an Anak mismo han Dios—an may katungod ha awtoridad nga ikaduha kan Jehova. Hi Jesus an nasarihan, maunungon, ngan masasarigan ni Jehova. Dugang pa, may-ada panurundon hi Jesus sugad nga Suhag han Dios. Oo, hi Jesu-Kristo “an dagway han Dios nga diri sadang makita, an siyahan nga natawo han ngatanan nga mga binuhat.” (Kolosas 1:15) An bubuhaton la niya amo an pangaro ha Dios ngan ‘ihahatag ha iya an mga nasud nga iya panurundon, ngan magigin iya kalugaringon an mga tubtoban ha mga sidsid han tuna.’ Ginhangyo ini ni Jesus kay ‘an iya kalipay aada ha mga anak han mga tawo’ ngan tungod han iya daku nga hingyap nga buhaton an kaburut-on han iya langitnon nga Amay ngada ha tuna ngan ha katawohan.—Proberbios 8:30, 31.
An Sugo ni Jehova Kontra ha mga Nasud
16, 17. Sumala ha Salmo 2:9, ano an mahitatabo ha mga nasud?
16 Tungod kay an ikaduha nga salmo natutuman na yana, durante han diri-nakikita nga presensya ni Jesu-Kristo, ano an mahitatabo ha mga nasud? Hirani na buhaton han Hadi an iginpahayag han Dios: “Pan-gugub-on mo hira [an mga nasud] hin puthaw nga sungkod; pagtitipiktipikon mo hira sugad hin daba.”—Salmo 2:9.
17 An mga sungkod o mga setro han kahadian ha kadaan nga mga panahon mga simbolo han hadianon nga awtoridad. An iba nga mga setro hinimo ha puthaw, pariho han usa nga gin-unabi dinhi hini nga salmo. An simboliko nga pulong nga ginamit dinhi nagpapasabot nga masayon la bungkagon ni Kristo nga Hadi an mga nasud. An makusog nga paghampak pinaagi han setro nga puthaw makakabuong han daba han parahimo hito, bug-os nga marurumok ito.
18, 19. Basi makarawat an pag-uyon han Dios, ano an kinahanglan buhaton han kahadian ha tuna?
18 Kinahanglan ba maeksperyensyahan han mga magmarando han mga nasud an sugad nga kabungkagan? Diri, kay an salmista nanginyupo ha ira hini nga mga pulong: “Busa yana, O! mga hadi: magmakinaadmananon kamo papagtutdo kamo, mga hukom ha tuna.” (Salmo 2:10) An kahadian ginhangyo nga mamati, nga magmakinaadmananon. Sadang tagdon nira an kawaray pulos han ira mga plano, kabaliktaran han bubuhaton han Ginhadian han Dios para ha kaopayan han katawohan.
19 Basi makarawat an pag-uyon han Dios, an kahadian ha tuna kinahanglan magbag-o han ira buhat. Ginsasagdonan hira nga ‘mag-alagad kan Jehova ha kahadlok, ngan magkalipay ha pangurog.’ (Salmo 2:11) Ano an magigin resulta kon magbag-o hira? Imbes nga magin masamok, o malisang an hunahuna, magmamalipayon hira ha mga paglaom nga igin-aandam ha ira han Mesianiko nga Hadi. Kinahanglan isalikway han mga magmarando han tuna an pagpahitaas ngan paghambog nga ira ginbubuhat ha ira pagmando. Dugang pa, kinahanglan magbag-o dayon hira ngan magmakinaadmananon mahitungod ha diri-matupngan nga pagkahitaas han pagkasoberano ni Jehova ngan ha diri-mapugngan nga gahum han Dios ngan han iya Mesianiko nga Hadi.
“Hadki Niyo an Anak”
20, 21. Ano an karuyag sidngon han ‘pagharok ha anak’?
20 An Salmo 2 maloloy-on nga nag-iimbitar yana ha mga magmarando han mga nasud. Imbes nga magkaurosa ha pagkontra, ginsasagdonan hira: “Hadki niyo an anak nga lalaki, bangin masina [hi Jehova nga Dios], ngan magkamatay kamo ha dalan, kay an iya kasina madali maglaga.” (Salmo 2:12a) An Soberano Ginoo nga hi Jehova sadang sundon kon naghahatag hiya hin sugo. Han ginpalingkod han Dios ha trono an iya Anak, inundang na unta an mga magmarando ha tuna ha ‘pamalandong hin mga bagay nga kawang.’ Ira unta ginkilala dayon an Hadi ngan bug-os nga ginsunod hiya.
21 Kay ano nga sadang nira ‘hadkan an anak’? Han iginsurat ini nga salmo, an pagharok usa nga kapahayagan han pakigsangkay ngan pag-abiabi ha mga bisita ngada ha balay han usa, diin magpapahimulos hira han pagkamaabiabihon. An pagharok mahimo liwat magin usa ka buhat han pagkamaunungon, o pagkamatinumanon. (1 Samuel 10:1) Hini nga bersikulo han ikaduha nga salmo, ginsusugo han Dios an mga nasud nga humarok, o karawaton, an iya Anak sugad nga dinihogan nga Hadi.
22. Kinahanglan sundon han mga magmarando han mga nasud an ano nga pahamangno?
22 Iniinsulto hi Jehova hadton nadiri kumilala ha awtoridad han pinili nga Hadi han Dios. Diri nira kinikilala an pagkasoberano ha uniberso ni Jehova nga Dios ngan an iya awtoridad ngan abilidad ha pagpili hin Hadi nga amo an gimaopayi nga magmarando para ha katawohan. An mga magmarando ha mga nasud makakasabot nga an kasina han Dios tigda nga maabot ha ira, samtang nangangalimbasog hira ha pagbuhat han ira mga plano. “An iya kasina madali maglaga,” o tigda nga magkakalayo ngan diri-mapupugngan. Kinahanglan mapasalamaton nga karawaton han mga magmarando han mga nasud ini nga pahamangno ngan magbuhat uyon hito. An pagbuhat hito nangangahulogan hin kinabuhi.
23. May-ada pa panahon para ha mga tawo nga buhaton an ano?
23 Inin makatirigamnan nga salmo natatapos: “Mga maghimayaon an ngatanan nga naayop ha iya [kan Jehova].” (Salmo 2:12b) May-ada pa panahon para ha mga tawo ha pamiling han katalwasan. Totoo ito bisan ha mga magmarando nga nasuporta ha mga plano han mga nasud. Makakapalagiw hira ngadto kan Jehova, nga nagtatagana hin arayopan ilarom han pagmando han Ginhadian. Kondi kinahanglan gumios na hira antes bungkagon han Mesianiko nga Ginhadian an nakontra nga mga nasud.
24. Paonan-o kita magpapahimulos hin mas tagbaw nga kinabuhi bisan dinhi hinin masamok nga kalibotan?
24 Kon maduruto kita nga mag-aram ha Kasuratan ngan iaplikar an sagdon hito ha kinabuhi, mahimo kita magpahimulos hin mas tagbaw nga kinabuhi bisan yana dinhi hinin masamok nga kalibotan. An pag-aplikar han sagdon han Kasuratan nagriresulta hin mas malipayon nga mga relasyon ha pamilya ngan kagawasan ha damu nga mga kabaraka ngan mga kahadlok nga nagpapakuri hini nga kalibotan. An pagsunod ha mga giya han Biblia naghahatag hin pasarig nga aton ginlilipay an Maglalarang. Waray na iba gawas han Soberano ha Uniberso nga makakahatag hin garantiya han ‘kinabuhi yana ngan hadton tiarabot’ katapos niya kuhaon ha tuna adton nakontra ha matadong pinaagi han pagsalikway ha pagmando han Ginhadian.—1 Timoteo 4:8.
25. Tungod kay ‘an sugo ni Jehova’ diri mapapakyas, ano an malalaoman naton nga mahitatabo ha aton panahon?
25 ‘An sugo ni Jehova’ diri mapapakyas. Sugad nga aton Maglalarang, maaram an Dios kon ano an gimaopayi para ha katawohan ngan tutumanon niya an iya katuyoan nga bendisyonan an masinugtanon nga katawohan hin kamurayawan, kakontento, ngan nagpapadayon nga seguridad ilarom han Ginhadian han iya hinigugma nga Anak. Mahitungod han aton panahon, hi propeta Daniel nagsurat: “Ha mga adlaw hito nga kahadian an Dios ha langit magpapabangon hin usa nga ginhadian, nga diri gud magugunaw, . . . ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” (Daniel 2:44) Sigurado, kon sugad, nga panahon na gud yana nga ‘humarok ha Anak’ ngan mag-alagad ha Soberano nga Ginoo, hi Jehova!
[Mga footnote]
^ par. 4 Ha tinikangan, hi Hadi David an “hinirogan,” ngan an “mga hadi ha tuna” amo an Pilisteohanon nga mga magmarando nga nagtarampo han ira mga kasundalohan kontra ha iya.
^ par. 7 Ipinapakita liwat han iba nga mga teksto han Kristiano Griego nga Kasuratan nga hi Jesus an Dinihogan han Dios nga gin-unabi ha ikaduha nga salmo. Makikita ini kon itanding an Salmo 2:7 ha Buhat 13:32, 33 ngan Hebreo 1:5; 5:5. Kitaa liwat an Salmo 2:9 ngan Pahayag 2:27.
Paonan-o Mo Babatunon?
• Ano nga “mga bagay nga kawang” an ‘pinamamalandong’ han mga nasud?
• Kay ano nga hi Jehova nagyuyubit ha mga nasud?
• Ano an sugo han Dios kontra han mga nasud?
• Ano an iginpapasabot han ‘pagharok ha anak’?
[Mga Pakiana]
[Retrato ha pahina 16]
Hi David nagkanta mahitungod ha madaugon nga Mesianiko nga Hadi
[Retrato ha pahina 17]
An mga magmarando ngan an katawohan ha Israel nagsarabot kontra kan Jesu-Kristo
[Retrato ha pahina 18]
Ginpalingkod ha trono hi Kristo sugad nga Hadi ha langitnon nga Bukid Sion