Bed ku lembakeca mi tipo pi niyungo Jacwic peri

“TEKENE ng’atini ung’eyo ngo dhu wat m’ebecinyiko i iye, eng’eyo ngo nia yamu ma kani tap ma bitere kaka m’atira.” Wec maeno ma Jararieko moko mi Roma re m’uyero, ubenyutho kamaleng’ nia kara ng’atini ung’ey ka ma kwo pare ubecidho i iye, ukwayu ebed ku lembakeca moko kokoro.

Biblia umiyo lapor mi dhanu dupa ma gibedo ku lembakeca. Noa “giero avur pi nibodho juruot pare.” Jabila Musa “ketho wang’e tel i bang’ sukulia.” (Juebrania 11:7, 26) Yehova umiyo ni Yocuwa, m’utelo wi nyithindho mir Israel i ng’ei Musa, lembakeca mi maku ng’om mi Kanan ku lwiny.​—Poi mi Cik 3:21, 22, 28; Yocuwa 12:7-24.

I rundi dakne ma kwong’a mi rundi mwa, cicopere nia wec pa Yesu ma nia “lembanyong’a maeni mi Ker jubirweyo i ng’om zoo” ubedo ku matoke ma lee dit iwi lembakeca mi tipo ma Paulo ubino ko. (Matayo 24:14) Rwoth Yesu en gire uweco i bang’ Paulo man enyutho ire lembe nikadhu kud i ginmawokiwang’ man eng’olo nia Paulo “uyey nying’ [Yesu] uter ni thek.” E Paulo udoko ni ng’atu m’utimo tic ma lee dit pi nicaku the cokiri mi Jukristu i Azia ma nok man bende i Europe de.​—Tic mi Jukwenda 9:15; Jukolosai 1:23.

Niai con, jurutic pa Yehova giketho lembakeca dupa ma beco mi tipo man gitundo i kumgi. Tin ke wacopo ketho lembakeca mi tipo nenedi? Wacopo nyego pi lembakeca ma kani man wacopo timo ang’o pi nitundo i kum lembakecanegi?

Pire tek nia thelembe mandha re m’ucwalwa

Jucopo ketho lembakeca pi lembe ceke ma jutimo i kwo. Dhanu mi ng’om maeni bende gitie ku lembakeca ma tung’ tung’. Ento, lembakeca mi tipo gikoc ku lembe m’i ng’om maeni. Dhanu m’i ng’om maeni gisayu lonyo, dito man tego aketha cwinyjo. Eno tie lembe ma kwong’a i kwo migi man lembe maeno zoo romo de ngo wang’gi nyanok de. Niketho lembakeca mi sayu tego man dito eno utie lembe ma rac mi tuko ngo! Lembakeca ma miyo yung’ ni Yehova Mungu utie lembakeca m’ugwaku kum thier ma watimo ire man ma tie pi bero mi ker pare. (Matayo 6:33) Ng’atu m’umaru Mungu man m’umoko kikiki i kume re ma ketho lembakeca ma kumeno.​—Matayo 22:37-39; 1 Timoteo 4:7.

Ukwayu thelembe ma cuu re m’ucwalwa niketho lembakeca mwa mi thenge mi tipo; ecopo bedo pi nitimo ni Yehova i tic moko ma segi kunoke nitimo mediri i thenge mi tipo. Kadok kumeno de, saa moko wacopo ngo nitundo i kum lembakeca mwane. Wacopo timo ang’o kara waketh lembakeca ma cuu man watund i kumgi?

Ukwayu wabed kud ava ma lee mi tundo i kumgi

Wakewec iwi kite ma Yehova ucwiyo ko polo ku ng’om ku piny mange ceke. Wec ma nia “man uthieno nuti kugweno de nuti” ubenyutho nia Yehova upangu nicwiyo giracwiya pare ceke i nindo ma tung’ tung’. (Thangambere 1:5, 8, 13, 19, 23, 31) I acaki mi nindoman, eng’eyo cuu nia ekeco nitimo ang’o cing’ nica. Kumeno re ma Mungu upong’o lembakeca pare pi cwic. (Lembanyutha 4:11) Yob ugam uwacu kumae: “Man gin ma [ng’eyong’ec pa Yehova] uyenyo, etimo maeno.” (Yob 23:13) Yehova bedo kud anyong’a ma lee dit kinde m’eneno “gin ceke m’etimo” man kinde m’eyero nia “e ber dit”!​—Thangambere 1:31.

Kara lembakeca mwa upong’, wan de wacikara nibedo kud ava mi pong’ogi lee mandha. Dong’, ang’o ma bikonyowa kara wamed ava maeno? Kinde ma fodi ‘ng’om ubino mbe kud ayi man mananu de’ nwang’u dong’ Yehova utuc nineno kite m’ebidoko ko i ng’eye, niwacu ve tigo moko m’umil amila i kor polo man ma bimiyo ire yung’ ku dwong’. Kumeno bende, kara wamed ava mi pong’o lembakeca mwa i kumwa, ukwayu wabewapar pir adwogi ma ber man pi bero ma wabinwang’u kinde ma wabitundo i kum lembakecane. Tony, ma oro pare 19, ugam unyang’ i lembe maeno. Ecopo wil de ngo nyanok de pi liew ma kwong’a m’eliewo ko Bethel moko mi Jumulembe pa Yehova i Europe ma yo reto. Niai cing’ nica, Tony ubed upenjere zoo kumae: ‘Eni re ka nwang’u abetimo tic ka ma kumeni, kwo para copo bedo nenedi?’ Tony uwil ngo nyanok de i kum kare mi timotic ka ma kumeno man emedere nitimo ceke m’ecopo pi nitundo i kum lembakeca maeno. I ng’ey oro ma dupa, ebedo kud anyong’a ma yawe mbe kinde ma julwong’e nicitimo tic i Bethel.

Ava mi tundo i kum lembakeca mwa copo bende nimedere ka wacikubedo i ng’et ju m’udaru tundo i kum lembakeca ma tung’ tung’. Jayson, ma oro pare 30, ubed umaru ngo nirweyo lembanyong’a kinde ma nwang’u fodi oro pare nyanok. Ento i ng’ey m’edaru somo pare, ecaku tic pa jayab yo kud amora. Eno uketho edoko jaratic mi saa ceke. Ang’o dhe m’ukonyo Jayson nibedo kud ava mi maku tic pa jayab yo? Edwoko kumae: “Niweco ku ju m’utimo tic pa jayab yo man nirweyo lembanyong’a karacelo kugi ubedo ku matoke ma lee dit i wiya.”

Ukwayu wakiew lembakeca mwa akiewa

Paru moko ci copo doko ni lemandha ka jukiewe akiewa. Suleman uyero nia lembe mi jurieko copo bedo ve dindo ma copo telo wi dhanu. (Eklizia 12:11) Ka wakiewo lembe moko akiewa, edong’ i wiwa man i adundewa pi nindo ma dupa. Pi thelembe maeno re m’uketho Yehova de ukwayu nia ubimoman mir Israel ukiew ire gire wadi Cik Pare i kitabu. (Poi mi Cik 17:18) Dong’ wan de ukwayu wakiew lembakeca mwa man kite ma wabipong’o ko gi iwi karatasi. Wabikiewo bende lembe ma tung’tung’ ma waparu nia copo cerowa ku nitundo i kumgi man kite ma wacopo voyo ko pekonegi ceke. Pire copo bedo tek nisayu lembe matung’ tung’ m’ukwayu wang’ei, bodho m’umito waponji man dhanu ma copo konyowa man ma copo tielowa i kite zoo pi nitundo i kum lembakeca mwane.

Niketho lembakeca mi tipo uketho wi Geoffrey, m’utimo tic pa jayabyo ma segi pi nindo ma dupa i theng’ng’om moko mir Asie, ucungo. Peko ma lith uwok i wiye kinde ma min ot pare utho ku tho ma rek. I ng’ey ma tego moko dwogo i kume, ekeco niroyere zoo i tic pare mi saa ceke man eketho lembakeca dupa. Ekiewo lembakeca parene zoo akiewa man erwo aketha cainye pi nicaku ponjo Biblia ku dhanu adek iwang’ thum pa dwi maeca. Kubang’ ceng’ eneno i tic m’etimo man tek nidno apar uthum tap ci eng’io i mediri m’etimo. Nyo etundo i kum lembakeca parene? Pi nidoko nia eyo, emio adwogi mi ponji ang’wen mi Biblia m’etolo wiye i dwi maeca.

Keth lembakeca moko pi nindo ma ceng’ni

Wacopo neno ve nia etek iwa nitundo i kum lembakeca mwa moko. Nitimo tic i Bethel udok ubedo ve lek ni Tony ma wadaru weco pire malu no, pilembe nwang’u fodi etie nyathin ma wiye tek man kwo pare de nwang’u fodi ethiero ngo ni Yehova. Ento i ng’eye, ecaku nikwo nimakere ku cik pa Yehova man ekeco nilimo batizo. Kinde m’elimo batizone andha tap ci ekeco nidoko jayab yo ma jakony man i ng’eye jayab yo ma nja. Ekiewo nindo mi caku tic maeno zoo akiewa. Saa m’etimo tic pa jayab yo pi nindo moko ci nitimo tic i Bethel udoko ire ni lek ungo.

Ecibedo ber iwa de ka wapoko i lembakeca mwa ma dongo thindho thindho. Ebedo iwa yot nitundo i kum lembakeca ma thindho thindho; eno ke nwang’u wanyiko bende pi nitundo i kum ma dit ma waketho. Ka wacikuneno thirithiri mediri ma wadaru timo, eno biketho wabiketho i wiwa zoo i kum lembakeca mwa. Bende, ukwayu wabed warwo i bang’ Yehova pi lembe ma wakeco nitimo. Jakwenda Paulo ukwayu Jukristu nia ‘girwo areri.’​—1 Juthesaloniki 5:17.

Mediri niketho wii zoo i kum lembakecane man icir

Kadok nwang’u waketho lembakeca mwa ku mukuni man watie kud ava mi tundo i kumgi de, ebicopere ngo iwa nitundo i kum lembakecane moko. Kepar pi kite ma cwiny jalub ma Yohana ma julwong’o Marko utur ko kinde ma Paulo umito ngo gicidh karacelo kugi i woth pare mir ario mi misioner! (Tic mi Jukwenda 15:37-40) Ugam ukwayere nia Marko unwang’ ponji i kum lembe maeno man edog eyiki i lembakeca pare pi nimedo tic pare. Etimo de kumeno. I ng’eye, Paulo uweco ma ber mandha pi Marko man Marko ubedo ma ber mandha ku jakwenda Pethro i Babeli. (2 Timoteo 4:11; 1 Pethro 5:13) Cicopere nia rwom m’usagu zoo ma Marko ubedo ko ubino nikiewo pi kwo man tic pa Yesu ku kony mi tipo ma leng’.

Wan bende wacopo nwang’ara ku macero moko kinde ma wabeii pi nitundo i kum lembakeca mwa mi tipo. Re kakare nivoc, ukwayu wakenen nia nitundo i kakeno wadaru timo ang’o, nyo asu fodi wacopo tundo i kum lembakecane man niloke kan ukwayere. Kinde ma ka macero moko wok, ukwayu wamedara ninyego aketha cwinywa pi nicidho i wang’wa. Ubimo ma riek Suleman uketho cwinywa nia: ‘Wawek tic mwa i bang’ Yehova, e lembakeca mwa bicungo’.​—Lembrieko 16:3.

Re, saa moko lembe ma tung’ tung’ ma wok rek copo ketho lembakeca mwa cungo ngo. Ku lapor, yotkum ma cuu ngo man yeny mi juruot mwa copo cerowa ku nilubo lembakeca mwa. Ukwayu wiwa kud uwil i kum lembe ma e ‘nia piny m’usagu zoo ma wacopo nwang’u tie kwo ma rondo ku rondo’, i polo kunoke iwi ng’om m’udoko ni Paradiso. (Luka 23:43; Jufilipi 3:13, 14) Wacopo nwang’u kwo maeno nenedi? Jakwenda Yohana ukiewo kumae: “Ng’atu m’ubetimo yeny pa Mungu bikwo rondo ku rondo”. (1 Yohana 2:17) Kadok nwang’u ecopere ngo iwa nitundo i kum lembakeca mwa moko ma segi de, ecopere iwa ‘nilworo Mungu, man nilworo lembang’ola pare.’ (Eklizia 12:13) Lembakeca mi tipo konyowa niketho wiwa zoo i kum timo yeny pa Mungu. Dong’ waketh lembakeca ma yungo Jacwic mwa.

[Sanduku]

Lembakeca mi tipo m’icopo ketho

○ Nisomo Biblia kubang’ ceng’

○ Nisomo gazethi Ot Kur ma Wiw man i Cew! ceke m’uwok

○ Niyiko ayi ma wabed warwo ko

○ Nicego nying tipo man ninyuthe i kwo mwa

○ Nisayu kite mi medo tic peri i dilo pa Yehova

○ Nidoko jarwey lembanyong’a man japonji mi Biblia ma tek

○ Niponjo bodho ma tung’ tung’ mi rweyo lembanyong’a: nirweyo ku telefon, i saa ma jupangu ngo man i kaka mi tic