Pakke ma Cita-citamuna Lao Pasangappon Debata

“MOLO dang diboto hamu tu pelabuhan na dia hamu lao marlayar, unang ma alogo na disalahon hamu.” On ma na didok sahalak filsuf Romawi di abad na parjolo. Lapatanna, asa terarah ngolutta ikkon adong do tujuanta.

Godang do sitiruon na disurat di Bibel taringot akka halak na mambahen tujuan. Saleleng 50 taon, kerja keras do si Noak ‘mambahen parau asa malua keluargana’. Dipaima-ima si Musa do “upa na lao dijalo ibana di ari na naeng ro”. (Heber 11:7, 26) Jala adong do tujuan na dibahen si Josua, panggatti ni si Musa lao mangulahon tugas na sian Debata, i ma manaluhon akka luat di Kanaan.—5 Musa 3:21, 22, 28; Josua 12:7-24.

Di abad na parjolo, balga do pengaruh ni hata ni Jesus tu tujuan na dibahen Apostel Paulus. I ma hata ni Jesus na mandok asa “dibaritahon ma barita na uli taringot tu Harajaon i di liat portibi on”. (Mateus 24:14) Ala sai diingot si Paulus hata ni Jesus, parnidaan na dilehon Jesus tu ibana, dohot tugasna lao marbarita na uli taringot tu [Jesus] tu akka bangso, gabe dohot ma si Paulus pajongjokkon godang huria di Asia Kecil sahat tu Eropa.—Ulaon ni Apostel 9:15; Kolosse 1:23.

Sian najolo sahat tu saonari, godang do naposo ni Jahowa na mambahen tujuan na parohon sangap tu Jahowa, jala boi do dapot ni nasida cita-citana i. Attong boha do carana asa boi hita mambahen cita-cita songon nasida? Akka cita-cita aha do na boi tabahen, jala boha do carana asa boi dapotta cita-citatta i?

Ikkon Denggan do Tujuanta Mambahen Cita-Cita

Tikki mangulahon manang aha pe hita, boi do tabahen cita-cita. Di portibi on pe, godang do halak na mambahen cita-cita. Alai dang sarupa i tu cita-cita na mambahen lam jonok hita tu Jahowa. Godang do halak di portibi on mambahen cita-cita tujuanna asa mandapot hamoraon, jabatan, dohot hasangapon. Jadi unang ma tabahen cita-cita na tujuanna asa mandapot hasangapon dohot jabatan. Cita-cita na boi parohon sangap tu Jahowa, i ma cita-cita na adong hubunganna tu Jahowa dohot tu ulaon Harajaon. (Mateus 6:33) Alani holongta tu Debata dohot tu dongan jolma do makana olo hita mambahen cita-cita na songon i. Jala tujuanna lao mamakke ngolutta lao manomba Ibana.—Mateus 22:37-39; 1 Timoteus 4:7.

Tikki mambahen cita-cita hita, ikkon denggan ma nian tujuanta. Dang soal cita-citatta i lao mandapot tanggung jawab tambahan di huria manang lao padenggatton diritta. Alai olo do sipata, dang dapotta cita-citatta i, hape denggan do tujuanta. Attong aha do na boi taulahon asa dapotta cita-citatta i?

Ikkon Balga do Tekadta

Parrohahon ma songon dia Jahowa pasautton tujuanna tikki manoppa tano on. Dipakke Jahowa do hata “salpu ma borngin jala torang ma ari muse” lao manandai akka aha naung diulahon Ibana. (1 Musa 1:5, 8, 13, 19, 23, 31) Tikki naeng dimulai Jahowa manoppa manang aha pe, diboto Ibana do aha tujuanna na lao diulahon Ibana di ari i. Dukkon i, diulahon Ibana ma i. (Pangungkapon 4:11) Didok si Job, ‘Molo nungnga adong sakkap ni roha ni Jahowa, pasautonna do i.’ (Job 23:13) Pasti puas do dihilala Jahowa, tikki diida Ibana “sude akka na binahenna i”. Jala didok Ibana do, “massai denggan do i sude”!—1 Musa 1:31.

Asa boi dapotta cita-citatta i, ikkon bertekad do hita lao mandapot i. Boha ma carana asa boi balga tekadta? Taparrohahon ma sitiruon na dibahen Jahowa. Tikki dang berbentuk dope tano on jala kosong dope i, nungnga boi dibayakkon Ibana pasti gabe planet na bagak do annon tano on di ruang angkasa, na boi parohon hamuliaon dohot hasangapon tu Ibana. Dos songon i ma, boi do tabahen asa lam balga tekadta. Carana, tabayakkon ma aha hasilna dohot manfaatna molo dapotta cita-citatta i. Songon i ma na dihilala si Tony na marumur 19 taon. Sai diingot ibana do tikki parjolo sahali ibana ro tu kantor cabang ni Saksi Jahowa di Eropa Barat. Mulai sian i sai didok ibana do di rohana, “Tabo do ra karejo disi ate.” Sai dipikkiri si Tony do boha carana asa boi karejo disi, jala torus ma ibana berusaha lao mandapot i. Piga-piga taon dukkon i, las hian ma rohana ala dijalo lamaranna lao karejo di kantor cabang i.

Molo mardongan hita dohot akka halak naung mandapot cita-citana, boi do gabe lam balga tekadta lao mandapot cita-citatta. Songon i ma na dihilala si Jayson na marumur 30 taon. Tikki remaja ibana, dang lomo rohana marbarita na uli. Alai dung tamat SMA ibana, semangat do ibana naeng gabe perintis. Jala boi do dapotna cita-citana i. Aha do na mambahen balga tekad ni si Jayson lao gabe perintis? Didok ibana, “Ala sering au makkata-hatai jala marbarita rap dohot akka perintis, gabe balga ma tekadhu lao dohot gabe perintis.”

Suratton ma Cita-citamuna i

Gabe takkas do aha na lao taulahon molo tasuratton i. Didok Raja Salomo, dos songon tukkot ni parmahan do hata ni halak na marbisuk na boi mambahen ngolutta terarah. (Parjamita 12:11) Jala molo disuratton hata i, boi ma i bagas tarsippan di roha dohot pikkiranta. Alani i ma makana disuru Jahowa akka raja ni Israel manuratton Patik ni si Musa. (5 Musa 17:18) Jadi tasuratton ma cita-citatta, aha na boi taulahon asa dapotta cita-citatta i, jala akka aha tantanganna. Asing ni i, porlu do taboto keterampilan aha na ikkon taparsiajari jala ise na boi mangurupi hita lao mandapot cita-citatta i.

Adong sahalak perintis istimewa na margoar si Geoffrey. Nungnga leleng ibana gabe perintis di sada daerah na terpencil di Asia. Gabe lam tenang ma dihilala ibana dung dibahen ibana cita-cita. Lungun hian do rohana ala mate istrina. Jadi dibahen ibana ma piga-piga tujuan asa tetap sibuk di ulaon merintis. Dung disuratton ibana rencanana, martangiang ma ibana jala dibahen ibana ma tujuan. Ikkon dapotna do tolu parsiajaran Bibel na baru di akhir bulan. Dipareso ibana ma tiap ari aha naung diulahon ibana. Jala dipareso ibana do kemajuanna ganup sappulu ari. Marhasil do ibana? Ido. Las do rohana ala boi dibahen ibana di laporan dinasna opat parsiajaran Bibel na baru.

Bahen ma Cita-Cita na Sederhana

Olo do ra maol tahilala mandapot cita-citatta. Songon i ma na dihilala si Tony, na dipaboa nakkin. Hira na so mungkin do dihilala ibana boi karejo di kantor cabang ni Saksi Jahowa. Alana sursar do ngoluna tikki i, jala dang tardidi dope ibana. Alai diputusson si Tony ma mangihutton aturan ni Jahowa di ngoluna. Jala dibahen ibana ma cita-cita lao tardidi. Dung tardidi, berusaha ma ibana lao merintis ekstra jala merintis biasa. Jala ditandai ibana do di kalenderna andigan ibana mulai merintis. Dung merintis ibana piga-piga leleng, hira na boi ma dapotna cita-cita lao karejo di kantor cabang.

Denggan do molo tabahen cita-citatta gabe piga-piga cita-cita na sederhana. Cita-cita na sederhana boi do dipatudos songon akka batu na tadege lao mangakkat tu tujuanta. Jala molo taratur hita mangida kemajuanta lao mencapai cita-citatta na sederhana i, boi ma pikkiranta tetap fokus tu cita-citatta i. Jala molo sering tatangiakkon cita-citatta i tu Jahowa, gabe boi ma ngolutta lebih terarah. Didok Apostel Paulus, “Torus ma hamu martangiang.”—1 Tessalonik 5:17.

Porlu Bertekad Jala Dang Menyerah

Nang pe nga denggan tabahen rencana, jala balga tekadta lao mangulahon i, adong cita-cita na tetap dang boi tadapot. Songon i ma na dihilala si Johannes Markus. Kecewa do ibana ala dang diajak si Paulus tu pardalanan na paduahalihon lao marbarita tu luat na asing! (Ulaon ni Apostel 15:37-40) Ikkon marsiajar do si Markus sian kegagalanna i. Jala ikkon olo do ibana mambahen penyesuaian tu tujuanna di ulaon marbarita. Songon i do na diulahon ibana. Alana di pudian ni ari, dipuji si Paulus do ibana di suratna. Kompak do ibana tu Apostel Petrus tikki di Babel. (2 Timoteus 4:11; 1 Petrus 5:13) Jala hak istimewana na umbalga, diurupi tondi parbadia do ibana lao manuratton taringot parngoluon ni Jesus.

Jadi hita pe olo do gagal mandapot cita-citatta. Alai unang ma hita menyerah. Tapareso ma muse cita-citatta i, jala tabahen ma penyesuaian molo porlu. Molo adong tantangan, ikkon bertekad do hita lao mandapot cita-citatta i. Songon on ma na didok Raja Salomo lao paposson rohatta, “Marhaposan tu Jahowa ma ho manang aha pe na niulam, asa marhasil bahenonna sakkapmu.“—Poda 16:3.

Alai adong do situasi na mambahen dang boi hita mandapot cita-citatta. Misalna ala marsahit manang ikkon mangurupi keluarga. Nang pe songon i, torus ma taingot tujuanta na umbalga, i ma mandapot hangoluan na saleleng ni lelengna, di surgo manang di Paradeiso di tano on. I do hadiah na umbalga sian Jahowa. (Lukas 23:43; Pilippi 3:13, 14) Boha ma carana asa boi dapotta i? Didok Apostel Johannes, “Mangolu saleleng ni lelengna do halak na mangulahon lomo ni roha ni Debata.” (1 Johannes 2:17) Nang pe dang boi dapotta sada cita-cita alani situasi, alai boi dope hita “makkabiari Debata na sittong jala mangoloi parettana”. (Parjamita 12:13) Molo adong cita-citatta, boi ma hita tetap berfokus lao mangulahon lomo ni roha ni Debata. Jadi tapakke ma cita-citatta i lao pasangappon Debata.

[Kotak]

Cita-cita na Boi Dipertimbangkon

○ Manjaha Bibel ganup ari

○ Manjaha terbitan Joujou Paboahon dohot Dungo ma!

○ Mambahen asa lam denggan tangiangta

○ Patuduhon parbue ni tondi parbadia

○ Mangalehon unggodang tu Jahowa

○ Asa lam malo marbarita dohot mangajari

○ Asa lam malo marbarita lewat telepon, mangalehon kesaksian tidak resmi, dohot marbarita di daerah bisnis