Gamiton an Espirituwal na mga Pasohan Tanganing Pamurawayon an Saindong Kaglalang

“KUN dai aram nin sarong tawo kun anong duongan an padudumanan nia, daing serbi dawa magsaen an doros.” An mga tataramon na ini, na iinaatribwir sa sarong pilosopong Romano kan enot na siglo, nagpapaheling kan katotoohan na tanganing magkaigwa nin direksion an buhay, kaipuhan an mga pasohan.

An Biblia nagtatao nin mga halimbawa nin mga indibiduwal na may mga pasohan na pinag-aaabot. Mga 50 taon na nagtrabaho, si Noe “nagtogdok nin dahong para sa pagligtas kan saiyang kasararo sa harong.” Si propeta Moises ‘nagturuhok na gayo sa pagtao kan balos.’ (Hebreo 11:​7, 26) An kasalihid ni Moises, si Josue, nag-ako kan itinao nin Dios na obheto na sakopon an daga nin Canaan.​—Deuteronomio 3:​21, 22, 28; Josue 12:7-24.

Kan enot na siglo C.E., an espirituwal na mga pasohan ni apostol Pablo daing duda na naimpluwensiahan na marhay kan mga tataramon ni Jesus na “an maogmang baretang ini kan kahadean ihuhulit sa bilog na ineerokan na daga.” (Mateo 24:14) Napahiro kan personal na mga mensahe asin bisyon hale sa Kagurangnan na si Jesus, kabale an asignasyon na ‘magdara kan ngaran ni Jesus sa mga nasyon,’ si Pablo nagin instrumento sa pag-establisar nin dakol na Kristianong kongregasyon sa Asia Minor asin sagkod sa Europa.​—Gibo 9:15; Colosas 1:23.

Iyo, an mga lingkod ni Jehova sa bilog na nag-aging mga panahon naggibo nin halangkawon na mga pasohan asin inotob ninda iyan, sa ikakamuraway nin Dios. Paano daw kita ngonyan makakagibo nin espirituwal na mga pasohan? Anong mga pasohan an puede niatong hingoahon na aboton, asin anong praktikal na mga lakdang an puede niatong gibohon tanganing maabot an mga iyan?

Kaipuhan an Tamang mga Motibo

An mga pasohan puedeng gibohon sa haros ano man na kabtang nin buhay, asin an kinaban na ini igwa man nin mga tawong may mga pasohan na pinag-aaabot. Minsan siring, an teokratikong mga pasohan bakong kapareho nin kinabanon na mga ambisyon. An pangenot na mga motibo sa likod nin dakol na pasohan sa kinaban iyo an bangkag na pagmawot nin kayamanan asin dai naiingustohan na pagkagutom sa posisyon asin kapangyarihan. Sala nanggad na pag-aaboton an sarong pasohan tanganing magkamit nin kapangyarihan asin magin prominente! An mga pasohan na nagtatao nin kamurawayan ki Jehova Dios direktang konektado sa satong pagsamba sa saiya asin sa intereses kan Kahadean. (Mateo 6:33) An siring na mga pasohan naggigikan sa pagkamoot sa Dios asin sa kapwa saka diosnon na debosyon an saindang intension.​—Mateo 22:37-39; 1 Timoteo 4:7.

Logod na magin dalisay an satong mga motibo mantang kita naggigibo asin pinag-aaabot niato an espirituwal na mga pasohan, baga man iyan para sa dugang na mga pribilehio nin paglilingkod o para sa personal na pag-oswag sa espirituwal. Pero, maski an tama an motibasyon na mga pasohan kun minsan dai naootob. Paano kita makakagibo nin mga pasohan asin madugangan an posibilidad na maabot an mga iyan?

Dapat na Igwa nin Makosog na Kamawotan

Isipon nindo kun paano hinaman ni Jehova an paglalang kan uniberso. Paagi sa mga tataramon na “nagkaigwa nin banggi asin nagkaigwa nin aga,” binugtakan ni Jehova nin tanda an sunod-sunod na peryodo nin paglalang. (Genesis 1:​5, 8, 13, 19, 23, 31) Sa kapinonan kan kada peryodo nin paglalang, aram nia nin malinaw an saiyang pasohan, o obheto, para sa aldaw na iyan. Asin isinagibo nin Dios an saiyang katuyohan na maglalang nin mga bagay. (Kapahayagan 4:11) ‘An kalag mismo ni Jehova igwa nin pinagmamawot, asin gigibohon nia iyan,’ an sabi kan patriarkang si Job. (Job 23:13) Sierto nanggad na nakakakontento para ki Jehova na maheling “an gabos niang ginibo” asin sabihon nia na iyan “marahayon”!​—Genesis 1:31.

Tanganing magkatotoo an satong mga pasohan,  kita dapat man na magkaigwa nin makosog na kamawotan na aboton iyan. Ano an makakatabang sa sato na magkaigwa kan siring na makosog na kamawotan? Dawa kan panahon na an daga mayo nin kahusayan asin daing laog, nahehelingheling na ni Jehova an magigin resulta​—sarong magayonon na mutya sa espasyo, na nagtatao sa saiya nin kamurawayan asin onra. Kaagid kaiyan, puedeng pataluboon an satong kamawotan na hamanon an pinonan niatong gibohon paagi sa paghorophorop sa magigin mga resulta asin mga pakinabang kun maabot an pasohan. Iyan an naeksperyensiahan kan 19 anyos na si Tony. Dai nia noarin man nalingawan an saiyang enot na impresyon sa pagpasyar sa sarong sangang opisina kan Mga Saksi ni Jehova sa Solnopan na Europa. Poon kaidto, an hapot na pirmeng nasa isip ni Tony iyo an, ‘Paano daw an kamugtakan nin buhay asin paglilingkod sa arog kaiyan na lugar?’ Nungkang nagpondo si Tony sa kakaisip manongod sa posibilidad na iyan, asin padagos siang nagmaigot na aboton iyan. Kanigoan an kaogmahan nia kan pakalihis nin nagkapirang taon naaprobaran an saiyang aplikasyon na maglingkod sa sangang opisina!

An pakikiasosyar niato sa iba na may naabot nang sarong pasohan puede man na magin dahelan na makamate kita nin kamawotan na aboton iyan. Si Jayson, 30 anyos, dai nagugustong makikabtang sa ministeryo sa langtad kan sia nagpopoon pa sanang magtinedyer. Alagad pakatapos nia nin edukasyon sa haiskul, entusiastiko siang naglaog sa paglilingkod bilang payunir, sa siring nagin bilog na panahon na parabalangibog kan Kahadean. Ano an nakatabang ki Jayson na mapatalubo an kamawotan na magpayunir? Nagsimbag sia: “Nakaimpluwensiang marhay sa sako an pakikipag-olay sa mga nagpapayunir asin pag-iba sa sainda sa ministeryo.”

Makakatabang an Pagsurat kan Satong mga Pasohan

An malibog na ideya nagigin klaro asin depinido kun nagpipili kita nin mga tataramon tanganing ipahayag iyan. Sinabi ni Salomon na an tamang mga tataramon puedeng magin mapuersa siring sa mga sogkod na panudok sa baka sa pagtao nin direksion sa buhay. (Eclesiastes 12:11) Kun isusurat an mga tataramon na iyan, hararom an nagigin epekto kaiyan sa isip asin puso. Tadaw ta pagbobotan pa ni Jehova an mga hade sa Israel na gumibo nin personal na nasusurat na kopya kan Ley? (Deuteronomio 17:18) Kun siring tibaad gusto niato na isurat an satong mga pasohan asin an estratehiya niato sa pag-abot kaiyan, na ilinilista an mga kaolangan na inaasahan niato pati na kun anong mga paagi an gigibohon tanganing mapangganahan iyan. Makakatabang man na sabihon kun ano an mga tema na dapat aram niato, an mga abilidad na dapat na igwa kita, asin an mga indibiduwal na makakatabang asin makakasuportar sa sato.

An paggibo nin sadiring espirituwal na mga pasohan nakatabang na magin marigon si Geoffrey, sarong haloy nang espesyal payunir sa sarong napapasuway na teritoryo sa sarong nasyon sa Asia. Nangyari an trahedya kan biglang magadan an saiyang agom. Pakatapos na makabalik sa dating kamugtakan, nagdesisyon si Geoffrey na biyong magkonsentrar sa saiyang ministeryo bilang payunir paagi sa paggibo nin mga pasohan. Pakatapos na isurat sa papel an saiyang mga plano, may pagngayongayo na pinonan nia an tolong bagong pag-adal sa Biblia sa katapusan kan bulan. Sa kada aldaw, rinerepaso nia an saiyang aktibidad, asin sa kada sampulong aldaw, hineheling nia an saiyang pag-oswag. Naabot daw nia an saiyang pasohan? Pakapagreport nin apat na bagong inaadalan sa Biblia, sia magayagayang nagsimbag nin iyo!

Gumibo nin Halipot na Terminong mga Pasohan Bilang mga Senyal

May mga pasohan na sa primero tibaad garo baga masakit aboton. Para ki Tony, na nasambitan sa enotan, garo pangatorogan sana an paglilingkod sa sangang opisina kan Mga Saksi ni Jehova.  Iyan huli ta masumbikal an saiyang estilo nin pamumuhay kaidto, asin dai pa ngani sia nagdusay sa Dios. Alagad nagdesisyon si Tony na ioyon an saiyang buhay sa mga dalan ni Jehova asin ginibo niang pasohan na makualipikar sa bautismo. Pakatapos niang maabot an pasohan na iyan, naghingoa siang magin auxiliary payunir asin regular payunir, na isinurat nia sa saiyang kalendaryo kun noarin sia nagpoon. Pakatapos niang makapagpayunir nin harohalawig na panahon, an paglilingkod sa sangang opisina garo bako nang pasohan na bakong realistiko.

Marahay man na an satong halawig na terminong mga pasohan barangabangaon niato sa nagkapirang halipot na terminong mga pasohan. An mga pasohan sa pag-oltanan kaiyan puedeng magserbing mga pasohan na kayang aboton na nagigin mga senyal pasiring sa pag-abot sa panhaloyan na pasohan. An regular na pagrepaso kan satong pag-oswag may koneksion sa siring na mga sokolan na senyal makakatabang sato na papagdanayon na nakakonsentrar an satong isip. An paorootrong pamimibi ki Jehova manongod sa satong mga plano makakatabang man sa sato na magdanay sa satong gibohon. “Mamibi nin daing ontok,” an sadol ni apostol Pablo.​—1 Tesalonica 5:17.

Kaipuhan an Determinasyon Asin Pagkadesidido

Sa ibong kan satong pinag-isipan na marhay na mga plano asin makosog na kamawotan na gibohon iyan, may mga pasohan na dai pa man giraray naaabot. Siertong nadesganar nanggad an disipulong si Juan Marcos kan habo siang iiba kaidto ni apostol Pablo sa ikaduwang pagbiahe ni Pablo sa pagmimisyonero! (Gibo 15:37-40) Kinaipuhan ni Marcos na makanood sa pagkadesganar na ini asin gumibo nin pagliliwat sa saiyang pasohan para sa dagdag pang paglilingkod. Minalataw na ginibo nia iyan. Kan huri, si Marcos paborableng nasambitan ni Pablo asin dayupot na nakaibaiba si apostol Pedro sa Babilonya. (2 Timoteo 4:11; 1 Pedro 5:13) An pinakadakulang pribilehio nia gayod iyo an pagsurat nin ipinasabong na pagkasaysay kan buhay asin ministeryo ni Jesus.

Sa satong pag-aabot sa espirituwal na mga pasohan, tibaad makaeksperyensia man kita nin mga pagkasudya. Imbes na sumuko, dapat kitang gumibo nin pagrepaso, pag-adalan giraray iyan, asin gumibo giraray nin pagliliwat. Kun may lumataw na mga olang, kaipuhan kitang maghingoa na umabante na may determinasyon asin pagkadesidido. “Ipamahala mo ki Jehova an saimong mga gibo asin an saimong mga plano mapaparigon,” an pag-asegurar sato kan madonong na si Hadeng Salomon.​—Talinhaga 16:3.

Pero, kun minsan may mga kamugtakan na nagpapangyaring magin bakong realistiko an pag-aabot nin nagkapirang pasohan. Halimbawa, an maluyang salud o pampamilyang mga obligasyon tibaad magin olang tanganing dai niato maabot an nagkapirang pasohan. Dai man logod niato noarin man paglingawan na an pinakapremyo iyo an buhay na daing katapusan​—sa langit o sa Paraiso sa daga. (Lucas 23:43; Filipos 3:​13, 14) Paano ini makakamtan? “An naggigibo kan kabotan nin Dios magdadanay sagkod lamang,” an isinurat ni apostol Juan. (1 Juan 2:17) Minsan ngani tibaad dai itogot kan satong kamugtakan na maabot niato an sarong partikular na pasohan, puede pa man giraray kitang ‘matakot sa tunay na Dios asin otobon an saiyang mga togon.’ (Eclesiastes 12:13) Tinatabangan kita kan espirituwal na mga pasohan na magdanay na nakakonsentrar sa paggibo kan kabotan nin Dios. Kun siring gamiton ta iyan tanganing pamurawayon an satong Kaglalang.

[Kahon sa pahina 22]

Espirituwal na mga Pasohan na Puedeng Pag-isipan

○ Pagbasa kan Biblia sa aroaldaw

○ Pagbasa kan kada isyu kan An Torrengbantayan asin Awake!

○ Pagpaoswag kan kualidad kan satong mga pamibi

○ Pagpaheling kan bunga kan espiritu

○ Paghingoang dugangan an satong paglilingkod

○ Pagigin mas epektibo sa paghuhulit asin pagtotokdo

○ Pagkaigwa nin mga abilidad na arog baga kan paghuhulit paagi sa telepono, sa impormal na paagi, asin sa lugar nin negosyo