Wap Ḇepon Roi Imbe Wafrur ro Fararur Ḇesren

Dun Sanandik faro Manḇedaw Bedi

”FYOR wafawi ḇa pelabuhan sai na wayun ro ya ido, buk sasar ya ḇe wam ḇeso awer.” Wos annane ḇekofen ya iso manfawawi oso ḇeraker Romawi. Roi ikofen na nkaku beri isoine, insama kenem koḇena nambran pyum fandun fa kofawi roi imbe kofrur kaku ro kenem koḇena.

Refo fyas fawar ro snonggaku ḇeyap ḇepon roi imbe sifrur kaku ro kenem sena. Ro swaf taun ri 50 Nuh fyararur marḇak fa ’ifrur wai ḇeba fa ḇyuki faspar kina ḇyesi’. Nabi Moses ’myam mura ḇe sasuref ro ras ḇarpur ya’. (Ibrani 11:7, 26) Ḇefadwer Moses, Yosua i, ismai fararur ro Allah, isoine fa ifrur kafyo sup Kanaan.​—Ulangan 3:​21, 22, 28; Yosua 12:​7-​24.

Ro abad ḇeoser Masehi, roi manwawan Paulus imbe ifrur ro kenem ḇyena nya fasfes kuker roi Yesus ikofen ḇekur ”Ankankinem Ḇeḇye ro Ḇaḇesasoser ine nari ḇye ḇeḇaryas ro supswan ḇesiper”. (Matius 24:14) Anun ma fasasna ismai ro Yesus manggundi, ma fararur duf na fa ’ḇyaryas snonsnon Yesus faro er ḇeso’, nadif Paulus i fa ifrur fararur ḇefandun fa ḇyawes sidang jemaat ḇebor ro Asia Kasun isof ro Eropa.​—Farfyar ro Manwawansya (Kisah) 9:​15; Kolose 1:​23.

Imbo, ro abad ḇe abad Yahwe manfamyan ḇyesya sap ḇepon roi ḇepyum imbe sifrur ro kenem sena ma sismai na, ma sun sanandik faro Yahwe I. Ko ro baboine moḇsa kap ḇepon roi imbe kofrur ro fararur ḇesren ya? Rosai monda bisa kosewar fa kofrur ya, ma rosai nyan ḇepyandam kun fa kaksmai na?

Roi Ḇekaku Iso Ḇedif Ko Nama Nefandun Kaku

Kap ḇepon roi risai monda imbe kofrur ro kenem koḇena, ma snonggaku ḇebor ḇero dunya ine sakfrur rarirya kako. Imbape, aw koḇena ro fararur ḇesren naḇese ro roi sisewar marmar na. Roi ḇedif kaku snonggaku ḇero dunya ine ro sasewar sena iso marisen ḇesambraḇ faro nana arasai na, nasan, ma papoik. Kofrur aw koḇena fa kosewar nasan ḇekaki ma papoik ido nama nasrow ḇa kaku! Aw ḇeyun sanandik faro Yahwe iso nya fasfes kuker samsyom koḇena ḇe I ma fandun ro Karajan Ḇyedi. (Matius 6:​33) Nane ndramuma ro saswar koḇena faro Allah ma min koḇesya ma faro fararmyan koḇena faro I.​—Matius 22:37-​39; 1 Timotius 4:7.

Ibye kada roi ḇedif ko fa kap ḇepon roi imbe kofrur ro fararur ḇesren ya, fa kaksmai fakamaman ro fararmyan ke ḇaido kona wis ḇepyum syadi kuker Yahwe I ke, nama roi ḇesren nairi. Ḇape, roi ḇedif ko roi ḇekaku ya no fyorno ido roi kokara imbe kofrur ya kosmai na ḇa. Inja rosai kofrur kaku insama kosmai rosai kap ḇepon kwar na?

Nwa Marasrisen Ḇesambraḇ

Mam pan kada nyan Yahwe ifrur marisen Ḇyena fa namnis kam fyor ifrur supswan ine. Ro wos ḇekofen ”roḇ ya ryama ma arwo ya ryama kako”, kofawi Yahwe fyasos mnis swaf ya fa ifrur nayafa kam. (Kejadian 1:​5, 8, 13, 19, 23, 31) Ro randak swaf oser-oser fyor ifrur roi ḇebor kam anya, Allah ifawi kaku roi nari ifrur ro ras ani. Ramnai mura, Allah ifrur kaku marisen Ḇyena kuker ifrur roi nayafa kam. (Fasasna faro Yohanes (Wahyu) 4:​11) Ayub ikofen, ”[Yahwe] imbe ifrur roi oso ido, na Ifrur na beri”. (Ayub 23:13) Yahwe iryaḇ kaku fyor myam ”roi ḇebor ifrur kwar na” mura ikofen roi anna ”napyum kaku”!​—Kejadian 1:​31.

Komarisen roi kokara imbe kofrur na fa namnis ido, fandun fa kona marisen ḇesambraḇ fa kosmai na. Rosai na ḇefnoḇek ko fa kona marisen ḇeradinenya? Ro fafisu supswan ine isnai pyum ḇaim ma ḇyebei kaker, Yahwe myam kwar ḇe ḇarpon ya​—inkin mor ḇepduk kaku ḇero farsyos ḇeba ya, ḇeyun sanandik ma syowi faro I. Rarirya kako, na kona marisen ḇesambraḇ fa kosmai roi kap ḇepon kwar fa kofrur ya. Nyan ya isoine kokarauser bon ma fainda nari kosmai ya. Naiso Tony ḇeumur taun ri 19 roi ifrur na. Iswarepen ker roi myam randak ya fafisu ryakaki ḇe kantor cabang Saksi-Saksi Yahwe ro Eropa Barat. Tony ifakfuken, ’Yaḇarek ma yafarmyan ro dine ido na moḇsa yaḇaḇir rai?’ Tony kyara ker na, ma syewar fa daksmai na. Imarisen fafaya ḇa fyor taun riḇeso mura kantor cabang kyarem lamaran ḇyedi ma simarisen dakfarmyan ro diwa!

Koḇebati kuker snonggaku ḇesmai kwar roi sap ḇepon kwar na ido na nafnoḇek ko fa kona marisen ḇesambraḇ. Jayson ḇeumur taun ri 30, imewer iso ro fararur ḇaḇebaryas ya fyor ḇye roma babo kaker. Imbape, imnai ro SMA mura, iryaḇ fa daksun ro fararur perintis, rawo dakkufarmyan ro oras nakam. Rosai ḇefnoḇek Jayson i fa nya marasrisen ḇesambraḇ fa dakḇe perintis anya? Doḇe, ”Yawos kuker ḇeḇe perintis kwar sya ma yafararur kayam kuker si ro fararmyan ya nafnoḇek kaku aya.”

Fasepen Aw Bena Ido Nari Nafnoḇek Au

Roi kokara na nari nasnai kaku fyor kofasepen na. Salomo ikofen wos ḇesrow nya papoik fa nfara kenem koḇena imnis ra kusa (anggyon) ḇefara sapi sya. (Pengkhotbah 12:11) Kofasepen na ido wos anna na nsun kaku ro swaruser ma sne koḇena. Iso ḇefnai fa Yahwe iwan raja ḇero Israel sya fa sfas kaḇer Sasoser Moses ya. (Ulangan 17:18) Inja na kofasepen roi imbe kofrur ma moḇsa kosmai na rai, kofas kako roi saiso na ḇedwarek ko ma moḇsa kofrur na fa namnis. Irya monda ḇa, ipyum kaku fa kona fawawi, ḇaḇekir kofandun na, ma komamḇir snonggaku na ḇefnoḇek ma ḇesaramper ko.

Geoffrey, perintis istimewa oso ḇefarmyan fyoro kwar ro moḇ ḇeḇinggwan ro sup Asia, ḇyaḇir iknon syadi fyor dap ḇepon fararur ḇesren imbe ismai ya. Faḇye kaku swari imar kanandor bur i nafnai ra ḇyesneso kaku. Fafisu nenande mura, iprei kaḇer ma syewar fa fyararur syadi wer ro fararmyan perintis ḇyeja kuker dap ḇepon roi ḇese imbe ifrur na wer. Fyasepen na ro syapram oso, ḇyenadi warek na ma dap ḇepon roi imbe ifrur ya isoine ifrur farkarkor Refo ri kyor ro pupes paik ani. Ras ḇe ras, myam kaḇer fararur ḇyena, ma ro ras ḇesamfur ya, myam ifrur nabor kwar ke roḇa. Ismai bon ḇepyum ke? Fafisu byuk laporan ḇyedi bo fyas farkarkor Refo ri fyak ḇebabo ya, iryaḇ fa ikofen imbo!

Wap Ḇepon Roi Imbe Wafrur ro Swaf Ḇekwan Ḇa

Fararur ḇesren ono imbude rya samswen fa wasmai na. Tony, ḇeyap insanja, randak ya kyara na jadi fa dakfarmyan ro kantor cabang Saksi-Saksi Yahwe ḇa. Ine snar ikenem mnis ḇa ma byuk kenem ḇyedi fa ifarmyan ḇe Yahwe I ḇaim. Imbape, Tony dun snemuk fa ikenem imnis Yahwe nyan Ḇyena ma kyara fa ḇyebaptis. Ifrur roi suru suine raposa, syewar wer fa ḇye perintis ekstra ma perintis biasa, kuker byuk kakop ro kalender tanggal irandak na. Ḇye perintis ro swaf ono kwar mura, myam ifarmyan ro kantor cabang ḇe roi ḇesamswen wer ḇa fa ismai na.

Ipyum wer fa korwas roi imbe kofrur ro swaf ḇekwan na ḇe roi kofrur ro swaf ḇekwan ḇa. Kofrur na ido nane nari napyan fa kofrur roi ḇefandun swaf ḇekwan syadi na. Rarirya na komam ker roi ḇepyum kofrur kwar na ma kakara koḇena ndro ro moḇ ḇese ḇa. Koḇenadi ker ḇe Yahwe fa kokofen aw koḇena ido, nari komamuser faro na. Manwawan Paulus danun kaku ḇe ko, ”Mkoḇenadi faswef.”​—1 Tesalonika 5:​17.

Wun Snemuk Kaku ma Wamyaren

Imbude kap ḇepon roi imbe kofrur kwar ro fararur ḇesren ya ma kona marasrisen ḇesambraḇ kaku fa kosmai na, fama roi ono na jadi fa kaksmai na ḇa. Yohanes Markus fyafko kaku rofyor Manwawan Paulus dor i fa iso ro marandan misionaris ḇesuru ḇyeja ḇa! (Farfyar 15:37-​40) Markus dun farkarkor ro fafafko ḇyenane ma fyadwer aw ḇyena fa ifrur nabor syadi ro fararmyan ya. Barpur ya, ro Paulus fasfas ḇyena byuk wos sandik faro Markus i ma ḇyebati fanam kuker Petrus ro Babilon. (2 Timotius 4:​11; 1 Petrus 5:​13) Rya syowi ḇeba ismai na iso fyas fasfas ḇekur Yesus kankenem ma fararmyan ḇyeja.

Kap ḇepon roi imbe kofrur ro fararur ḇesren na mboi nono ido kosmai bon oḇa. Komewer kosusu fama komam kaḇer na ma kofadwer aw koḇena. Roi ḇedwarek na naisya ido, kosewar kaku fa kombran ḇe barpon kuker kun snemuk kaku ma komyaren. Raja Salomo ḇefawinanem ani byuk kakakyar ḇe ko, ikofen, ”Wakyar roi wafrur nakam faro Yahwe I, ma aw bena nari nbuk bon.”​—Amsal 16:3.

Imbape fafisu ono roi imbe kofrur na ndarirya imnis roi kokara na ḇa. Imnis raris rofyor koduf ḇaido snar fandun ro kina ya dori, aw koḇena rya samswen syadi fa kofrur na. Iḇye kada kofnder awer roi ḇepon kaku na kosmai ya iso kankenem fyoro​—ro nanggi ḇaido ro Firdaus ro supswan. (Lukas 23:43; Filipi 3:​13, 14) Moḇsa kosmai na rai? Manwawan Yohanes fyas, ”Snonkaku ḇefrur Allah marisen ḇyena, ikenem faswef isof fyoro- fyoro.” (1 Yohanes 2:​17) Roi ḇekur kenem koḇena nafrur fa kosmai roi imbe kofrur ro fararur ḇesren na ḇa yo, na bisa kofasnai pdef ’komgak faro Allah ḇenapes ma kofrur parenta Ḇyena’. (Pengkhotbah 12:13) Kap ḇepon roi imbe kofrur ro fararur ḇesren nafnoḇek ko fa kofrur Allah marisen Ḇyena. Inja, rwama kobuk na fa kun sanandik faro Manḇedaw koḇedi.

[Kotak]

Fararur Ḇesren bisa Wap Ḇepon na

○ Wawasya Refo ras ḇe ras

○ Wawasya syap Baryas ma Sadarlah! ḇesae babo na

○ Ḇenadi kuker kakaku syadi wer

○ Fasnai rari ḇepyum ro rur ḇesren Allah bon ḇyena

○ Wafrur nabor syadi ro fararmyan ya

○ Ḇekir syadi ro ḇaḇebaryas ma buk farkarkor

○ Swewar fa ḇekir syadi imnis raris ḇebaryas roro telfon, ḇebaryas ro fafisu sairirya kam, ma ro moḇ sfarḇaḇyan ro na