Kasem Ol Mak Long Saed Blong Spirit Blong Presem God

“TAEM wan man i no save se bambae hem i go angka long wanem haba, win i save blu long evri saed, be i no save givhan long hem.” Sam man oli talem se ol tok ya oli blong wan man Rom blong faswan handred yia we i gat bigfala waes blong wol. Tok ya blong hem i soemaot wan trutok se: Sipos yumi no wantem we laef blong yumi i olbaot, i impoten blong putum ol mak we yumi save wok from.

Baebol i givim eksampol blong sam man we oli gat mak we oli traehad blong kasem long laef blong olgeta. Noa i wok samwe long 50 yia blong “wokem wan bigfala sip blong sevem olgeta famle blong hem.” Profet Moses “i stap luk long pei we God bambae i givim long hem.” (Hibrus 11:​7, 26) Taem Josua i tekem ples blong Moses, God i givim wan mak we hem i mas wok from, mak ya se hem i mas winim kantri blong Kenan.​—Dutronome 3:​21, 22, 28; Josua 12:​7-24.

Long faswan handred yia K.T., ol mak we aposol Pol i traehad blong kasem oli laenap wetem ol tok blong Jisas se, “gud nius ya blong Kingdom, bambae ol man oli talemaot long olgeta ples long wol.” (Matiu 24:​14, NW ) Masta Jisas i sanem sam toktok mo i soem sam vison long Pol blong leftemap tingting blong hem. Wan long ol mesej ya i talem se Pol i mas “talemaot nem blong [Jisas] long ol man we oli no laen blong Isrel.” Taswe, Pol i mekem wan bigfala wok blong stanemap ol Kristin kongregesen long Esia Maena mo long Yurop.​—Ol Wok 9:15; Kolosi 1:23.

Yes, oltaem ol man blong wok blong Jeova oli bin traehad blong kasem sam gudfala mak long laef blong olgeta, mo samting ya i presem God. ?Olsem wanem yumi tede yumi save putum sam mak long saed blong spirit? ?Wanem ol mak we yumi save wok from, mo olsem wanem yumi save kasem ol mak ya?

Wan Gudfala Tingting i Mas Pulum Yumi

Yumi save traehad blong kasem sam mak long klosap eni samting long laef blong yumi. Plante man long wol tu oli traehad blong kasem sam mak, be ol mak long saed blong spirit oli defren olgeta long ol mak blong wol. Long wol ya, ol man oli wantem tumas blong kam rij, gat wan haefala posisen mo kasem paoa. Hemia nao ol mak we oli stap traehad blong kasem. !Bambae yumi mestem bigwan sipos yumi traehad blong kasem paoa mo wan haefala posisen! Yumi presem Jeova God taem yumi traehad blong kasem ol mak long wosip we yumi givim long Hem mo long ol wok we yumi mekem blong sapotem Kingdom blong hem. (Matiu 6:33) Lav we yumi gat long God mo long ol man i pusum yumi blong putum ol mak ya, mo yumi traehad blong kasem ol mak ya from we yumi wantem ona gud long God.​—Matiu 22:​37-39; 1 Timoti 4:7.

Nating se yumi traehad blong mekem moa long wok blong God, no blong gohedgud long saed blong spirit, be oltaem tingting we i pulum yumi blong kasem ol mak ya i mas stret. Be samtaem yumi no naf blong kasem ol gudfala mak ya. ?Olsem wanem yumi save putum sam mak mo mekem bes blong yumi blong kasem ol mak ya?

Yumi Mas Gat Strong Tingting Blong Kasem Ol Mak

Tingbaot olsem wanem Jeova i wokem yunivas. * Evri taem we Jeova i finisim wan haf blong wok ya, Hem i makem taem ya i se, “nao dei ya i finis.” (Jenesis 1:​5, 8, 13, 19, 23; 2:1) Long stat blong evriwan long ol dei ya, Jeova i save finis wanem mak we hem i wantem kasem bifo we dei ya i finis. Mo God i kasem mak blong hem blong wokem olgeta samting olsem we hem i wantem. (Revelesen 4:11) Olfala Job i talem se “i no gat man i save blokem samting we [Jeova] i wantem mekem.” (Job 23:13) !Ating Jeova i haremgud tumas taem hem i luk “olgeta wok ya we hem i mekem” mo i talem se “oli gud we i gud tumas”!​—Jenesis 2:1.

Sipos yumi wantem kasem ol mak we yumi putum, yumi tu yumi mas gat strong tingting blong kasem ol mak ya. ?Wanem samting i save halpem yumi blong gat strong tingting olsemia? Taem wol i  stap nating nomo, we i no gat wan samting long hem, Jeova i luk finis se wol ya bambae i olsem wanem​—Hem i luk se bambae wol i olsem wan sas ston we i flasem yunivas, i presem Hem mo i givim ona long Hem. Long sem fasin, sipos yumi luk i go long fiuja mo yumi tingbaot wanem gudfala frut i save kamaot sipos yumi kasem ol mak ya we yumi putum, ale bambae yumi save gat strong tingting mo traehad blong wok from ol mak ya. Hemia nao samting we i hapen long Tony, wan yangfala we i gat 19 yia blong hem. Hem i neva fogetem filing blong hem taem hem i visitim wan branj ofis blong ol Witnes blong Jeova long Yurop. Stat long taem ya, Tony i stap askem kwestin ya long hem wan se, ‘?Bambae i olsem wanem sipos mi laef mo mi wok long wan ples olsem?’ Tony i stap tingbaot samting ya oltaem nomo, mo hem i traehad blong kasem mak ya. !Plante yia biaen, hem i glad tumas taem oli singaot hem blong wok long wan branj ofis!

Sipos yumi joen wetem sam man we oli kasem finis sam mak long saed blong spirit, eksampol blong olgeta i save pulum yumi blong wantem kasem semfala mak. Jayson i gat 30 yia blong hem. Taem hem i yangfala yet, hem i no laekem wok blong prij. Be taem hem i finis long hae skul, hem i stat paenia, mekem se hem i stap talemaot gud nius blong Kingdom fultaem. ?Wanem samting i halpem Jayson blong wantem kam wan paenia? Hem i talem se: “Mi storian wetem ol narafala paenia mo mi prij wetem olgeta, mo eksampol blong olgeta i gat bigfala paoa long mi.”

Raetemdaon Ol Mak We Yumi Wantem Kasem

Wan tingting i kam klia moa taem yumi faenem ol stret tok blong eksplenem tingting ya. Solomon i talem se ol waes tok oli olsem sap stik blong stikim ol sipsip, oli save lidim man i go long laef. (Prija 12:11) Taem yumi raetemdaon ol waes tok ya, oli gat bigfala paoa long tingting mo long hat blong yumi. Hemia nao from wanem Jeova i givim oda long ol King blong Isrel se oli mas raetemdaon wan kopi blong Loa blong Hae God. (Dutronome 17:18) Long sem fasin, maet yumi tu yumi save raetemdaon ol mak we yumi wantem kasem, olsem wanem yumi wantem kasem ol mak ya, mo raetem wan lis blong ol samting we i save blokem yumi, wetem wan lis blong ol rod blong winim ol traem ya. Maet i gud tu blong luksave wanem samting we yumi mas save gud long hem, wanem fasin we yumi mas wokem gud, mo hu ol man we oli save halpem mo sapotem yumi long rod ya.

Geoffrey i wan brata we i wok longtaem finis olsem spesel paenia long wan teritori we i stap farawe long bigfala taon, long wan kantri blong Esia. Hem i putum sam mak long saed blong spirit mo i traehad blong kasem ol mak ya, mo samting ya i halpem hem bigwan. Hem i harem nogud tumas taem waef blong hem i ded. Afta sam taem, Geoffrey i tekem disisen blong stap bisi fulwan long wok blong prij, nao hem i putum sam mak blong kasem. Hem i raetemdaon ol mak blong hem long wan pepa, mo i prea long God se hem i wantem statem tri niufala Baebol stadi bifo long en blong manis. Evri dei, hem i luklukbak long wok blong hem, mo evri ten dei, hem i jekem sipos i gat sam samting we hem i bin kam gud moa long hem. ?Olsem wanem? ?Hem i kasem mak blong hem? !Yes, hem i statem fo niufala Baebol stadi!

Putum Ol Mak We i Isi Blong Kasem

I gat sam mak we, fastaem, i luk olsem se oli had tumas blong kasem. Tingbaot eksampol blong Tony, we yumi tokbaot hem finis. Hem i wantem wok long wan branj ofis blong ol Witnes blong Jeova, be long lukluk blong hem, samting ya i olsem wan drim nomo. Fasin blong laef blong hem i no laenap nating wetem fasin blong laef long Betel, mo hem i no givim laef blong hem i go long Jeova yet. Nating se i olsem, Tony i tekem disisen blong mekem laef blong hem i laenap wetem ol  loa blong Jeova, mo hem i putum wan mak blong kasem, hem i wantem tekem baptaes. Tony i kasem faswan mak blong hem, i tekem baptaes. Nao hem i putum wan narafala mak long laef blong hem. Hem i wantem mekem wok blong haftaem paenia fastaem, mo biaen hem i wantem kam wan fultaem paenia. Tony i makem ol dei long kalenda blong hem, we hem i plan blong statem wok ya. Afta we Tony i bin paenia blong sam taem, wok long branj ofis i no jes wan drim long lukluk blong hem, be i wan mak we hem i naf blong kasem.

Long sem fasin, i gud yumi putum ol mak we i isi blong kasem fastaem, nao biaen yumi save kasem sam mak we i had moa. Olsemia, ol smosmol mak we i isi blong kasem, oli stap olsem ol defdefren step we oli save halpem yumi blong kasem ol mak we oli bigwan moa. Sipos oltaem yumi jekem ol traehad blong yumi, bambae fasin ya i givhan blong holem tingting blong yumi i stap long mak ya. Mo sipos yumi prea oltaem long Jeova long saed blong ol plan blong yumi, fasin ya tu i save halpem yumi blong wok from mak we yumi putum. Aposol Pol i talem se: “Oltaem yufala i mas prea.”​—1 Tesalonaeka 5:17.

Yumi Mas Gat Strong Tingting Mo Gohed Oltaem

Samtaem, i gat sam mak we bambae yumi no save kasem, nating se yumi bin tingting gud long ol plan blong yumi fastaem, mo yumi gat strong tingting blong wok folem ol plan ya. !Ating disaepol Jon Mak i harem nogud tumas taem aposol Pol i no wantem tekem hem long namba tu misinari trip blong hem! (Ol Wok 15:​37-40) Mak i lanem wan lesen from samting ya, mo hem i jenisim ol plan blong hem mo putum sam narafala mak we hem i save kasem blong mekem moa long wok blong prij. Sam taem biaen, Pol i talem sam gudfala tok long saed blong Mak, mo Mak i kam gud fren wetem aposol Pita long Babilon. (2 Timoti 4:11; 1 Pita 5:13) Ating beswan blesing we Mak i kasem, hemia taem tabu spirit i pulum hem blong raetemdaon wan leta we i tokbaot laef mo ol wok blong Jisas.

Taem yumi traehad blong kasem sam mak long saed blong spirit, yumi save fesem sam hadtaem olsem Jon Mak. Be yumi no mas kam slak. Yumi mas tingting bakegen, jekem ol mak ya, mo jenisim sam samting sipos ol mak ya oli had tumas blong kasem. Taem wan traem i kamaot, yumi mas traehad moa, gat strong tingting mo gohed oltaem. Waes King Solomon i givim advaes ya long yumi se, “Sipos yu askem long Hae God blong i lukluk gud long ol plan blong yu, wok blong yu bambae i save gohed gud.”​—Ol Proveb 16:3.

Be samtaem laef i mekem se i gat sam mak we bambae yumi no save kasem nating. Eksampol, wan nogud helt no wan wok long saed blong famle i save blokem yumi, mekem se i gat sam mak we bambae yumi no naf blong kasem. Nating se i olsem, yumi neva mas fogetem presen we God bambae i givim long yumi​—hemia laef we i no save finis, long heven no long Paradaes long wol. (Luk 23:​43, NW ; Filipae 3:​13, 14) ?Olsem wanem yumi save kasem presen ya? Aposol Jon i raetem se, “Man we i stap mekem ol samting we God i wantem, hem bambae i no save lus samtaem.” (1 Jon 2:17) Maet laef blong yumi i mekem se yumi no save kasem wan spesel mak, be nating se i olsem, yumi save gohed yet blong ‘ona long God mo obei long ol tok blong hem.’ (Prija 12:13) Ol mak long saed blong spirit oli halpem yumi blong tingting oltaem long ol samting we God i wantem. Taswe, i gud yumi kasem sam mak long saed blong spirit blong presem God blong yumi.

[Futnot]

[Bokis blong pija long pej 22]

Sam Mak Long Saed Blong Spirit

○ Ridim Baebol evri dei

○ Ridim evri Wajtaoa mo Wekap!

○ Kam gud moa long fasin blong prea

○ Wokem ol frut blong tabu spirit

○ Mekem moa long wok blong prij

○ Kam gud moa long fasin blong prij mo long fasin blong tijim man

○ Gat gudhan long wok blong prij long telefon, long rod, mo long ol ofis