Da Mme Utịtmbuba eke Spirit Nọ Andibot Fi Ubọn̄

“KE INI owo mîfiọkke itie mbehe ubom oro enye akade, ofụm ndomokiet idịghe eti ofụm.” Ikọ emi ẹdọhọde ke owo akwaifiọk Rome eke akpa isua ikie eketịn̄ mi, anam ẹfiọk ikọ akpanikọ oro owụtde ke mbemiso uwem enyenede se ọwọrọde, ana owo enyene utịtmbuba.

Bible ọnọ mme uwụtn̄kpọ mbon oro ẹkenịmde utịtmbuba ẹnọ idemmọ. Noah ama ada n̄kpọ nte isua 50 “ọkọn̄ ubom ndida nnyan̄a ufọk esie.” Prọfet Moses ama “[owụk] enyịn ese utịp eke ẹdinọde enye.” (Mme Hebrew 11:7, 26) Abasi ama enịm utịtmbuba edikan isọn̄ Canaan ọnọ Joshua oro akadade itie Moses.—Deuteronomy 3:21, 22, 28; Joshua 12:7-24.

Ke akpa isua ikie E.N., eyịghe idụhe nte ke se ikenen̄erede itụk utịtmbuba apostle Paul ekedi ikọ Jesus nte ke ẹyekwọrọ “gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.” (Matthew 24:14) Ke ọbọde nsịnudọn̄ oto etop ye n̄kukụt oro Ọbọn̄ Jesus ke idemesie ọkọnọde enye, esịnede utom ‘editan̄a enyịn̄ Jesus ke iso mme Gentile,’ ẹma ẹda Paul ẹsiak ediwak esop Christian ke ofụri Asia Minor tutu esịm Europe.—Utom 9:15; Colossae 1:23.

Ih, mme asan̄autom Jehovah ke ofụri emana ẹmenịm nti utịtmbuba ẹnọ idemmọ ẹnyụn̄ ẹsịm mmọ, man ẹnọ Abasi ubọn̄. Didie ke nnyịn ikpenịm utịtmbuba eke spirit inọ idem nnyịn mfịn? Mme utịtmbuba ewe ke nnyịn ikpodomo ndisịm, ndien nso akpan usio-ukot ke ikeme ndinam man isịm mmọ?

Ọfọn Ndinyene Nti Uduak

Iwakke n̄kpọ oro owo mîkemeke ndinịm utịtmbuba ndinam ke uwem, ndien ererimbot emi n̄ko enyene mbon oro ẹbịnede akpan utịtmbuba. Nte ededi, mme utịtmbuba ukara Abasi idịghe ukem ye eke ererimbot. Akpan ntak utịtmbuba ererimbot edi ọkpọsọn̄ udọn̄ ndinyene inyene ye ọkpọsọn̄ ediyom odudu. Nso ndudue ke ekpedi ntem ndibịne utịtmbuba man inyene odudu inyụn̄ iwọrọ etop! Mme utịtmbuba oro ẹdade ubọn̄ ẹsọk Jehovah Abasi ẹnyene ebuana nnennen nnennen ye utuakibuot oro inọde enye ẹnyụn̄ ẹnyene n̄kpọ ndinam ye udọn̄ n̄kpọ Obio Ubọn̄. (Matthew 6:33) Ima oro imade Abasi ye ekemmọ owo anam inịm mme utọ utịtmbuba oro, ndien emi an̄wam nnyịn ndinyene uten̄e Abasi.—Matthew 22:37-39; 1 Timothy 4:7.

Nnyịn ikpakam inyene eti uduak nte nnyịn inịmde inyụn̄ ibịnede mme utịtmbuba eke spirit, edide edinyanade mbịne mme ifetutom efen efen m̀mê ndinam n̄kọri eke spirit. Edi, ndusụk ini, owo isikemeke ndisịm idem nti utịtmbuba oro ẹkenịmde. Didie ke nnyịn ikeme ndinịm mme utịtmbuba nnyụn̄ nnam n̄kpọ man ikeme ndisịm mmọ?

Ana Inyene Ọkpọsọn̄ Udọn̄

Kere ban̄a nte Jehovah okobotde ekondo. Jehovah akada mme ikọ emi, “mbubịteyo ye usenubọk,” abahade usen edibotn̄kpọ kiet kiet. (Genesis 1:5, 8, 13, 19, 23, 31) Ke ntọn̄ọ ntọn̄ọ usen edibotn̄kpọ kiet kiet, enye ama etịm ọfiọk utịtmbuba, m̀mê uduak esie eke usen oro. Ndien Abasi ama anam uduak esie ke ndibot mme n̄kpọ. (Ediyarade 4:10b) Job, ete-ekpụk, ọkọdọhọ ete: “Se ukpọn̄ [Jehovah] oyomde, enye onyụn̄ anam.” (Job 23:13) Jehovah okokop inemesịt didie ntem ndikụt “kpukpru se enye akanamde” nnyụn̄ ndọhọ ke mmọ “ẹfọn eti eti”!—Genesis 1:31.

Man isịm mme utịtmbuba nnyịn, ana nnyịn n̄ko inyene ọkpọsọn̄ udọn̄ ndisịm mmọ. Nso idin̄wam nnyịn ndinyene utọ ọkpọsọn̄ udọn̄ oro? Idem ke ini isọn̄ ekedide ikpîkpu ye ukpọk,  Jehovah ama ekeme ndikụt nte n̄kpọ oro imọ idibotde editiede—ata ediye edibotn̄kpọ emi odude ke ufụm enyọn̄, adade ubọn̄ ye ukpono ọsọk enye. Kpasụk ntre, edieke nnyịn itiede ikere mme utịp ye mme ufọn utịtmbuba nnyịn, emi eyedemede nnyịn udọn̄ ndisịm utịtmbuba nnyịn. Se iketịbede inọ Tony, eyen isua 19, edi oro. Enye ikefreke nte eketiede enye ke idem ke akpa ini oro enye akakade ekese ọfis n̄kọk itieutom Mme Ntiense Jehovah ke N̄kan̄ Edem Usoputịn Europe. Tọn̄ọ ke ini oro, se Tony ekesikerede kpukpru ini ekedi, ‘Nso ikpenem nte ndidụn̄ nnyụn̄ nnam utom ke utọ itie oro?’ Tony iketreke ndikere mban̄a ifet edinam utom do, ndien enye ama aka iso ndinam n̄kpọ mbịne emi. Esịt ekenem enye didie ntem ke ini ẹkenyịmede eben̄e esie ndidi ndinam utom ke n̄kọk itieutom emi ke ediwak isua ke ukperedem!

Nnyịn ndidụk nsan̄a ye mbon oro ẹma ẹkesesịm akpan utịtmbuba ekeme ndidemede nnyịn udọn̄ ndisịm ukem utịtmbuba oro n̄ko. Jayson, emi edide isua 30, ikesimaha ndibuana ke utom ukwọrọikọ ke ini enye ekedide uyen. Edi ke enye ama okokụre ufọkn̄wed sekọndri, ọkpọsọn̄ udọn̄ ama anam enye odụk utom usiakusụn̄, ke ntem akabarede edi anditan̄a Obio Ubọn̄ uyọhọ ini. Nso ikan̄wam Jayson ndinyene udọn̄ usiak usụn̄? Enye ọbọrọ ete: “Se ikenen̄erede inụk mi ndisiak usụn̄ ekedi ndisineme nneme ye mme asiakusụn̄ eken nnyụn̄ nsan̄a ye mmọ ke an̄wautom.”

Ndiwet Mme Utịtmbuba Nnyịn Nsịn ke N̄wed Ekeme Ndin̄wam

Se inyenede ke ekikere esinen̄ede ana in̄wan̄-in̄wan̄ ke ini itịn̄de-tịn̄ mmọ. Solomon ama ọfiọk ke nnennen ikọ ekeme ndinen̄ede nnọ ndausụn̄ nte ukịm-enan̄. (Ecclesiastes 12:11) Ke ini iwetde-wet mme ikọ emi isịn ke n̄wed, mmọ ẹsinen̄erede ẹdụk owo ke esịt ye ekikere. Ndi idịghe oro akanam Jehovah owụk ndidem Israel ete ẹwet Ibet Esie ẹnyene ke idemmọ? (Deuteronomy 17:18) Ntre nnyịn imekeme ndiwewet mme utịtmbuba nnyịn ye usụn̄ oro iyomde ndida nsịm mmọ nsịn ke n̄wed, iwetde mme ubiọn̄ọ oro idoride enyịn ndisobo ye mme usụn̄ oro ididade ikan mmọ. Ekeme n̄ko ndin̄wam edieke iwetde n̄kpọ oro anade itịm ifiọk, usọ oro iyomde ndinyene, ye mme owo oro ẹkemede ndin̄wam nnyụn̄ nnọ nnyịn ibetedem.

Ndinịm mme utịtmbuba eke spirit ama an̄wam Geoffrey ndinyene iwụk, kpa akpan asiakusụn̄ oro anamde utom ebịghi, emi odude ke nsannsan efakutom ke idụt kiet ke Asia. Ekedi ata n̄kpọ mmọn̄eyet ke ini n̄wan esie akakpade ke unana idotenyịn. Ke enye ama okokpụhọde mme idaha esie, Geoffrey ama ebiere ndisịn idem ofụri ofụri ke utom usiakusụn̄ ebe ke ndinịm mme utịtmbuba. Ke ama ekewet se enye oyomde ndinam esịn ke n̄wed, enye ama esịn emi ke akam onyụn̄ ebiere nditọn̄ọ ye edinịm ukpepn̄kpọ Bible ita etisịm utịt ọfiọn̄. Enye ama esidụn̄ọde se enye anamde ke usen ke usen, onyụn̄ odụn̄ọde n̄kọri oro enye anamde kpukpru usen duop. Ndi enye ama esịm utịtmbuba esie? Sia enye ọkọtọn̄ọde mbufa ukpepn̄kpọ inan̄, enye adat esịt ndibọrọ ih!

Tọn̄ọ ye Mme Utịtmbuba Ibio Ini

Ke akpa, ndusụk utịtmbuba ẹkeme nditie nte se owo mîdikemeke ndisịm. Akpa ini oro Tony emi iketịn̄de iban̄a ke mbemiso akakade ekese kiet ke otu mme ọfis n̄kọk itieutom Mme Ntiense Jehovah, eketie enye nte ke ndinam utom ke utọ itie oro edi utịtmbuba oro enye mîdikemeke ndisịm tutu amama. Koro enye  ekedi otụtutọn̄ eyen emi mîkakam iyakke idem inọ Abasi. Edi Tony ama ebiere ndidu uwem ekekem ye mme usụn̄ Jehovah onyụn̄ enịm edina baptism nte utịtmbuba esie. Ke enye ama ekesịm utịtmbuba enye emi, enye ama enịm utịtmbuba efen, oro edi, ndidụk usiakusụn̄ unọ un̄wam ekem ebe odụk usiakusụn̄ ofụri ini, ewetde ke n̄wed usenọfiọn̄ esie usen oro enye oyomde nditọn̄ọ. Ke enye ama akasiak usụn̄ ke ediwak isua, ndinam utom ke ọfis n̄kọk itieutom iketiehe enye aba nte utịtmbuba oro enye mîdikemeke ndisịm.

Ekeme n̄ko ndifọn edieke nnyịn ibaharede nnyan utịtmbuba nnyịn mbio mbio. Mbio mbio utịtmbuba emi ẹkeme nditie nte utọ-ukot oro an̄wamde nnyịn ndisịm utịtmbuba anyan ini. Ndida mme utọ-ukot ntre ndomo n̄kọri nnyịn ke ini ke ini ayanam nnyịn inyene iwụk. Ndimen utịtmbuba nnyịn nnịm Jehovah ke iso ndien ndien ke akam idiyakke nnyịn iseherede ikpọn̄ utịtmbuba nnyịn. Apostle Paul eketeme ete: “Ẹkûdop akam.”—1 Thessalonica 5:17.

Oyom Ubiere ye Ifịk

Kpa ye oro itịn̄de enyịn itịm mme utịtmbuba nnyịn inyụn̄ inyenede ọkpọsọn̄ udọn̄ ndisịm mmọ, oyosụk odu ndusụk utịtmbuba oro nnyịn mîdikemeke ndisịm. Nso edikpu ke mbet oro ekerede John Mark okokụt ntem ke ini apostle Paul mîkayakke enye asan̄a ye imọ ke ọyọhọ isan̄ isụn̄utom esie iba! (Utom 15:37-40) Mark ama ekpep n̄kpọ oto edikpu emi onyụn̄ anam ukpụhọde ke utịtmbuba oro enye ekenịmde man ada atat utom esie. Ana in̄wan̄-in̄wan̄ nte ke enye ama anam oro. Nte ini akakade, Paul ama etịn̄ eti ikọ aban̄a Mark, enye n̄ko ama enyene n̄kpet n̄kpet itie ebuana ye apostle Peter ke Babylon. (2 Timothy 4:11; 1 Peter 5:13) Etie nte n̄kponn̄kan ifetutom oro enye ekenyenede ekedi ndiwet mbụk eke odudu spirit emi aban̄ade uwem ye utom Jesus.

Nnyịn n̄ko imekeme ndikụt edikpu nte ibịnede mme utịtmbuba eke spirit nnyịn. Utu ke ndikpa mba, nnyịn ikpenyene ndidụn̄ọde n̄kọri oro inamde, inyụn̄ ise m̀mê iyekeme ndisụk nsịm utịtmbuba oro, ndien ekem inam mme ukpụhọde edieke oyomde. Ke ini isobode mme ubiọn̄ọ, nnyịn inyene ndidomo ndisịn ifịk nnam n̄kọri. Enyene-ọniọn̄ Edidem Solomon ọsọn̄ọ ọnọ nnyịn ete: “Kan̄a utom fo nọ Jehovah, ndien uduak fo ọyọsọn̄ọ ada.”—Mme N̄ke 16:3.

Edi ke ndusụk ini, mme idaha owo ẹsinam edi ọkpọsọn̄ n̄kpọ ndisịm ndusụk utịtmbuba. Ke uwụtn̄kpọ, unana nsọn̄idem m̀mê mbiomo ubon ekeme ndibiọn̄ọ nnyịn ndibịne ndusụk utịtmbuba. Nnyịn ikpedehede ifre ke ata ata se nnyịn ibịnede edi nsinsi uwem—ke heaven m̀mê ke Paradise isọn̄. (Luke 23:43; Philippi 3:13, 14) Didie ke ẹkeme ndisịm emi? Apostle John ekewet ete: “Owo eke anamde se Abasi amade ododu ke nsinsi.” (1 John 2:17) Okposụkedi idaha nnyịn ekemede ndibiọn̄ọ nnyịn ndisịm akpan utịtmbuba, nnyịn imekeme ndika iso ‘mbak Abasi, nnyụn̄ nnịm mbet esie.’ (Ecclesiastes 12:13) Mme utịtmbuba eke spirit ẹn̄wam nnyịn ndiwụk ntịn̄enyịn ke ndinam uduak Abasi. Ke ntre, ẹyak nnyịn ida mme utịtmbuba nnyịn inọ Andibot nnyịn ubọn̄.

[Ekebe ke page 22]

Mme Utịtmbuba eke Spirit Oro Ikpekerede Iban̄a

○ Ndikot Bible ke usen ke usen

○ Ndikot kpukpru nsiondi Enyọn̄-Ukpeme ye Awake!

○ Ndifori uduot akam nnyịn

○ Ndision̄o mbun̄wụm spirit

○ Ndiyanade mbịne mme utom efen efen

○ Nditịm nnyene uforo ke utom ukwọrọikọ ye edikpep mme owo n̄kpọ

○ Ndifori orụk usọ nte unọ ikọ ntiense ke urụk ukopikọ, ke ido nneme, ye ke efakutom mbubehe