Yí Yanwle Gbigbọmẹ Tọn lẹ Do Pagigona Mẹdatọ Towe

“WHENUENA mẹde ma yọ́n fie hùn-glintẹn te, awà he ji jẹhọn to yìnyìn hlan masọ nọ yin onú titengbe lọ ba.” Hogbe ehelẹ he yin didọ gbọn tamẹnuplọnmẹtọ Lomu tọn owhe kanweko tintan whenu tọn de dali, dlẹnalọdo nugbo he họnwun lọ dọ eyin gbẹzan mẹde tọn na yin anadena, yanwle lẹ dona tin dandan.

Biblu na apajlẹ mẹdelẹ tọn he yọ́n pinpẹn yanwle zizedai tọn. Noa wazọ́n na nudi owhe dopodopo 50 nado “wleawu ohún aki tọn dai na whlẹngán owhé etọn tọn.” Yẹwhegán Mose “pọ́n hlan ahọsu ale lọ tọn.” (Heblu lẹ 11:7, 26) Jiwheyẹwhe ze yanwle de donukọnna mẹjẹmẹtẹnmẹ Mose tọn, Jọṣua, nado gbawhàn aigba Kenani tọn.—Deutelonomi 3:21, 22, 28; Jọṣua 12:7-24.

E họnwun dọ hogbe Jesu tọn lẹ he dọ dọ “yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ” wẹ yinuwado yanwle gbigbọmẹ tọn apọsteli Paulu tọn lẹ ji to owhe kanweko tintan W.M. mẹ. (Matiu 24:14) Na Paulu yin whinwhàn gbọn wẹndomẹ lẹ po numimọ he e mọ sọn Oklunọ Jesu dè lẹ po, gọna azọ́ndenamẹ lọ nado “hẹn oyín [Jesu tọn] yì Kosi lẹ” dè dali wutu, e lẹzun nuyizan de nado do agun Klistiani tọn susu ai to Asia Pẹvi podọ kakajẹ Europe.—Owalọ lẹ 9:15; Kọlọsinu lẹ 1:23.

Mọwẹ, sọn whenu dindẹn die gbọ́n wẹ devizọnwatọ Jehovah tọn lẹ ko nọ ze yanwle he yiaga lẹ donukọnna yede bosọ nọ jẹ yé kọ̀n, na gigo Jiwheyẹwhe tọn. Nawẹ mí sọgan ze yanwle gbigbọmẹ tọn lẹ donukọnna míde to egbehe gbọn? Yanwle tẹlẹ wẹ mí sọgan zedonukọnna míde, podọ afọdide yọn-na-yizan tẹlẹ wẹ mí sọgan ze nado jẹ yé kọ̀n?

Mẹwhinwhàn He Sọgbe lẹ Yin Dandannu

Mí sọgan ze yanwle lẹ donukọnna míde to adà gbẹzan tọn lẹpo mẹ, podọ aihọn ehe lọsu tindo mẹhe nọ ze yanwle donukọnna yede lẹ. Ṣigba, yanwle yẹwhehọluduta tọn lẹ ma yin nudopolọ po ojlo zogbe aihọn tọn po gba. Mẹwhinwhàn tangan he ji yanwle aihọn tọn susu nọ sinai do lẹ wẹ ojlo ṣejannabi tọn na adọkun podọ nukunkẹn didó na otẹn he yiaga po huhlọn po. Lehe e na yin nuṣiwa nado ze yanwle donukọnna míde nado tindo huhlọn bo diyin do sọ! Yanwle he tindo kanṣiṣa tlọlọ hẹ sinsẹ̀n-bibasi mítọn po nukọnyiyi Ahọluduta lọ tọn po wẹ nọ hẹn gigo wá na Jehovah Jiwheyẹwhe. (Matiu 6:33) Yanwle mọnkọtọn lẹ nọ wá sọn owanyi na Jiwheyẹwhe po gbẹtọ hatọ lẹ po mẹ bosọ nọ sinai do mẹdezejo na Jiwheyẹwhe ji.—Matiu 22:37-39; 1 Timoti 4:7.

Mì gbọ mẹwhinwhàn mítọn lẹ ni yin dehe sọgbe dile mí to yanwle gbigbọmẹ tọn lẹ zedonukọnna míde bo to afọdona yé, vlavo yanwle mítọn lẹ yin nado tindo lẹblanulọkẹyi sinsẹ̀nzọn tọn lẹ dogọ kavi nado yinukọn to gbigbọmẹ. Ṣogan, mí ma nọ jẹ yanwle he tlẹ sinai do mẹwhinwhàn dagbe ji lẹ kọ̀n to whedelẹnu. Nawẹ mí sọgan ze yanwle lẹ donukọnna míde bo hẹn ẹn yọnbasi nado jẹ yé kọ̀n gbọn?

Ojlo Vẹkuvẹku Yin Dandannu

Lẹnnupọndo lehe Jehovah wá azọ́n nudida tọn etọn he bẹ aigba hẹn dotana gbọn ji. Jehovah dohiagona ojlẹ nudida tọn dopodopo po hogbe lọ lẹ po dọ “whèjai wá, afọnnu sọ wá.” (Gẹnẹsisi 1:5, 8, 13, 19, 23, 31) To bẹjẹeji ojlẹ nudida tọn dopodopo, Jehovah nọ yọ́n yanwle etọn na azán enẹ. Podọ Jiwheyẹwhe hẹn lẹndai etọn nado dá onú lẹ di. (Osọhia 4:11) “Nuhe alindọn [Jehovah tọn] jlo, yèdọ enẹ wẹ ewọ nọ wà,” wẹ tọgbo Job dọ. (Job 23:13) Lehe e na ko hẹn pekọwana Jehovah nado mọ “onú he e dá lẹpo” bo dọ dọ “e yọ́n tlala” do sọ!—Gẹnẹsisi 1:31.

Eyin mí na jẹ yanwle mítọn lẹ kọ̀n, mílọsu lẹ dona tindo ojlo vẹkuvẹku nado jẹ yé kọ̀n.  Etẹwẹ na gọalọna mí nado wleawuna ojlo vẹkuvẹku mọnkọtọn? To whenuena aigba tlẹ gbẹ́ tin gbọgbé, bo jẹvọ́, Jehovah sọgan mọhlannukọn lehe e na wá yọnwhanpẹ to nukọn mẹ, bo hẹn gigo po yẹyi po wá na ẹn do. Mọdopolọ, ojlo mítọn nado hẹn nuhe mí ko magbe nado wà lẹ di sọgan yin awuwlena gbọn ayihamẹlinlẹnpọn do kọdetọn po ale he yanwle lọ lẹ kọ̀n jijẹ sọgan hẹnwa lẹ po ji dali. Numimọ Tony owhe 19 mẹvi de tọn niyẹn. E ma wọn nuyiwadomẹji tintan he sadidi yì alahọ Kunnudetọ Jehovah tọn lẹ tọn mẹ to Whèyihọ-waji Europe tọn tindo do e ji gba. Bẹsọn gbènẹgbè, kanbiọ he gbọṣi ayiha Tony tọn mẹ wẹ, ‘Nawẹ e na yọ́n sọ nado nọ nọ̀ ofi mọnkọtọn bo nọ wà sinsẹ̀nzọn to finẹ?’ Tony ma gọ̀n ma lẹnnupọndo yọnbasi ehe ji, podọ e zindonukọn nado to vivẹnudo nado jẹ yanwle ehe kọ̀n. Lehe homẹhun in do sọ to whenuena e yin oylọ-basina to owhe susu lẹ godo nado wá sẹ̀n to alahọ lọ mẹ!

Gbẹdido hẹ mẹdevo lẹ he ko jẹ yanwle tangan de kọ̀n sọgan sọ fọ́n ojlo lọ dote to ohò mítọn mẹ nado jẹ e kọ̀n. Jayson, owhe 30 mẹvi, ma yiwanna lizọnyizọn kunnudegbe tọn to whenuena e pò to aflanmẹ. Ṣigba to whenuena e dotana wehọmẹ daho, e biọ sinsẹ̀nzọn gbehosọnalitọ tọn mẹ po zohunhun po, bo lẹzun lilatọ Ahọluduta tọn whenu-gigọ́ tọn de. Etẹwẹ gọalọna Jayson nado wleawuna ojlo lọ na gbehosọnalitọ bibasi? E na gblọndo dọmọ: “Hodidọ hẹ mẹdevo lẹ he ko basi gbehosọnalitọ podọ tintọ́n hẹ yé to lizọnyizọn lọ mẹ yinuwado ji e taun.”

Yanwle Mítọn lẹ Kinkàndai Sọgan Gọalọ

Linlẹn lẹ nọ yin hinhẹn họnwun hezeheze to whenuena mí yí hogbe he sọgbe lẹ do basi zẹẹmẹ yetọn. Sọlọmọni dohia dọ hogbe he sọgbe lẹ sọgan dohuhlọn di owùn nado deananamẹ to gbẹ̀mẹ. (Yẹwhehodọtọ 12:11) To whenuena hogbe mọnkọtọn lẹ yin kinkàndai, yé nọ yinuwado ayiha po ahun po ji sisosiso. Eyin e ma yinmọ, naegbọn Jehovah na ko degbena ahọlu Islaeli tọn lẹ nado yí alọ yetọn titi do basi vọkan Osẹ́n lọ tọn? (Deutelonomi 17:18) Enẹwutu, mí sọgan jlo nado kàn yanwle mítọn lẹ po lehe mí na wagbọn do jẹ yé kọ̀n po dai do wema de ji, bosọ slẹ aliglọnnamẹnu he mí sọgan pehẹ lẹ po lehe mí sọgan duto yé ji gbọn po. E sọgan sọ yin alọgọnamẹnu nado yọ́n nupinplọn wehọmẹ tọn he mẹ mí dona sewé te lẹ, azọ́n he mí dona yọnẹn lẹ, po mẹhe sọgan gọalọna mí bo nọgodona mí lẹ po.

Yanwle gbigbọmẹ tọn lẹ zizedonukọnna ede miọnhomẹna Geoffrey, gbehosọnalitọ titengbe whenu dindẹn tọn de to aigba-denamẹ he to olá to otò Asia tọn de mẹ ji. Nugbajẹmẹji de wẹ e yin na ẹn to whenuena asi etọn kú to ajijimẹ. Bọdo nujijọ lọ go, Geoffrey basi dide nado hẹn alọnu ede tọn ján mlẹnmlẹn to lizọnyizọn gbehosọnalitọ tọn etọn mẹ gbọn yanwle lẹ zizedonukọnna ede dali. To tito etọn lẹ kinkàndai do wema de ji godo, e biọ alọgọ to odẹ̀ mẹ nado bẹ plọnmẹ Biblu yọyọ atọ̀n jẹeji to osun lọ fifo. To azán dopodopo ji, e nọ gbadopọnna nuwiwa etọn, podọ to azán ao lẹpo godo, e nọ gbadopọnna nukọnyiyi he e ko basi. Be e jẹ yanwle etọn kọ̀n ya? Po linlin plọnmẹ Biblu yọyọ ẹnẹ tọn po, e yí ayajẹ do yigbe dọ mọwẹ!

Ze Yanwle Whenu Gli Tọn lẹ Dai to Bẹjẹeji

Yanwle delẹ sọgan taidi nuhe vẹawu to bẹjẹeji. Na Tony he yin nùdego to bẹjẹeji, sinsẹ̀nzọnwiwa to alahọ Kunnudetọ Jehovah tọn lẹ  tọn mẹ tin taidi odlọ kle-whete tọn de. Ehe yinmọ na ẹn, na gbẹzan tasinyẹntọ tọn de zan wẹ e te, podọ e ma tlẹ ko basi klandowiwe hlan Jiwheyẹwhe. Ṣigba Tony basi nudide nado hẹn gbẹzan etọn sọgbe hẹ aliho Jehovah tọn lẹ bo yí ì do basi yanwle nado pegan na baptẹm. To yanwle enẹ kọ̀n jijẹ pó godo, e ze yanwle gbehosọnalitọ alọgọtọ po whepoponu tọn bibasi po do nukọnna ede, bo dohiagona azán he gbè e jlo nado bẹ yé jẹeji te lẹ do sunzanhiawe etọn ji. To whenuena e ko basi gbehosọnalitọ na ojlẹ de, sinsẹ̀nzọnwiwa to alahọ mẹ masọ yin yanwle he kọ̀n e ma sọgan jẹ ba.

Mílọsu sọgan má yanwle mítọn he yiaga tlala lẹ do adà kleun-kleun debọdo-dego tọn lẹ mẹ. Yanwle pẹvi lẹ sọgan yinuwa taidi afọdotẹn de nado jẹ yanwle whenu dindẹn tọn de kọ̀n. Gbigbeje nukọnyiyi mítọn to yanwle pẹvi lọ lẹ mẹ pọ́n to gbesisọmẹ na gọalọna mí nado ze ayiha mítọn do yanwle mítọn tangan lọ ji. Dẹ̀hiho pludopludo hlan Jehovah dogbọn tito mítọn lẹ dali nasọ gọalọna mí nado ze ayidonugo do yanwle lọ ji. “Mì nọ hodẹ̀ magbọjẹ,” wẹ apọsteli Paulu dotuhomẹnamẹ dọ.—1 Tẹsalonikanu lẹ 5:17.

Gbemima po Akọ́ndonanu po Yin Dandannu

Mahopọnna sọwhiwhe yíyí do basi tito lẹ po ojlo vẹkuvẹku nado hẹn yé di po, mí ma nọ jẹ yanwle delẹ kọ̀n. Lehe devi Johanu Malku na ko jẹflumẹ to whenuena apọsteli Paulu ma jlo nado plan ẹn yì gbejizọnlin mẹdehlan tọn Paulu tọn awetọ do sọ! (Owalọ lẹ 15:37-40) Malku dona plọnnu sọn flumẹjijẹ ehe mẹ bo basi vọjlado na yanwle etọn na sinsẹ̀nzọnwiwa dogọ. E họnwun dọ e wàmọ. To nukọn mẹ, Paulu dọho Malku tọn dagbe podọ e sọ duvivi gbẹdido pẹkipẹki de tọn hẹ apọsteli Pita to Babilọni. (2 Timoti 4:11; 1 Pita 5:13) Vlavo lẹblanulọkẹyi daho hugan he Malku na ko tindo to gbẹzan etọn mẹ wẹ nado basi kandai gbọdo gbẹzan po lizọnyizọn Jesu tọn po tọn.

To afọdidona yanwle gbigbọmẹ tọn lẹ mẹ, mílọsu sọgan pehẹ aliglọnnamẹnu lẹ. Kakati nado hònúpla, mí dona gbadopọnna nukọnyiyi mítọn, bo basi vọjlado to yanwle mítọn mẹ. Eyin aliglọnnamẹnu lẹ fọ́n, mí dona yí gbemima po akọ́ndonanu po do dovivẹnu dogọ. “Yí azọ́n towe jo na [Jehovah], yè nasọ hẹn linlẹn towe lẹpo lodo,” wẹ Ahọlu nuyọnẹntọ Sọlọmọni na jide mí dọ.—Howhinwhẹn lẹ 16:3.

Ṣogan, ninọmẹ lẹ sọgan hẹn afọdidona yanwle delẹ yin nuhe ma sọgbe hẹ lẹnpọn dagbe to whedelẹnu. Di apajlẹ, agbasamalo kavi azọngban whẹndo tọn lẹ sọgan hẹn yanwle delẹ nado hú agbọ́ mí. Enẹ ma dona hẹn mí nado wọn gbede dọ ale daho hugan lọ wẹ ogbẹ̀ madopodo—vlavo to olọn mẹ kavi to Paladisi aigba ji tọn mẹ. (Luku 23:43; Filippinu lẹ 3:13, 14) Nawẹ ehe na yin mimọyi gbọn? “Ewọ he to ojlo Jiwheyẹwhe tọn wà wẹ na nọte kakadoi,” wẹ apọsteli Johanu wlan. (1 Johanu 2:17) Dile ninọmẹ mítọn sọgan glọnalina mí nado jẹ yanwle tangan de kọ̀n, mí gbẹ́ sọgan “dibusi Jiwheyẹwhe bosọ yìn osẹ́n etọn lẹ.” (Yẹwhehodọtọ 12:13) Yanwle gbigbọmẹ tọn lẹ nọ gọalọna mí nado ze ayidonugo do ojlo Jiwheyẹwhe tọn wiwà ji. Enẹwutu mì gbọ mí ni yí yé zan nado pagigona Mẹdatọ mítọn.

[Apotin to weda 22]

Yanwle Gbigbọmẹ Tọn He Sọgan Yin Afọdona Lẹ

○ Biblu hihia egbesọegbesọ

○ Zinjẹgbonu Atọ̀họ̀-Nuhihọ́ Lọ Tọn po Réveillez-vous! po tọn lẹpo hihia

○ Hinhẹn aliho he mẹ mí nọ hodẹ̀ te lẹ pọnte

○ Sinsẹ́n gbigbọ tọn didetọ́n

○ Vivẹnudido nado wà sinsẹ̀nzọn dogọ

○ Lilẹzun kọdetọn dagbenọ dogọ to yẹwhehodidọ po mẹpinplọn po mẹ

○ Awuwiwlena nugopipe kunnudide alokan ji tọn, mayin aṣa tọn, po ajọwatẹn tọn lẹ po