Ma Omaa Eware Nọ Who re Ru Evaọ Egagọ Ọghẹnẹ re Whọ Wha Orro Sei

“OHWO ọ gbẹ riẹ unueri nọ o ti bi okọ riẹ kpahe he, ọ rẹ riẹ hẹ sọ obonọ ofou ọ be wọ okọ riẹ rri na ọ gwọlọ nya.” Ere a ta nọ ọgba-eriariẹ Rom jọ nọ ọ jọ uzuazọ evaọ oke ikọ na ọ ta. Otọ ẹme riẹ na họ, re ohwo ọ sai yeri emamọ uzuazọ, ọ rẹ riẹ oware nọ ọ gwọlọ ru evaọ uzuazọ riẹ.

Ma rẹ jọ Ebaibol na ruẹ iriruo ahwo jọ nọ a tẹrovi oware nọ a gwọlọ ru. Oware wọhọ ikpe udhuvẹ-gbikpe soso Noa o ro “ku okọ re ọ ruẹsi siwi uviuwou riẹ.” Mosis omariẹ nọ ọ jọ ọruẹaro, “ọ tẹrovi osohwa na.” (Ahwo Hibru 11:7, 26) Joshua nọ o je su ahwo Izrẹl nọ Mosis o whu no, ọ tẹrovi epanọ o re ro fi ahwo nọ e rrọ ẹkwotọ Kenan kparobọ re ahwo Izrẹl a rehọ ẹkwotọ na wọhọ epanọ Ọghẹnẹ ọ ta kẹe.​—Iziewariẹ 3:21, 22, 28; Joshua 12:7-24.

Nọ Pọl o zihe ruọ Oleleikristi no, oware nọ o mae jariẹ oja họ, ẹme nọ Jesu ọ ta inọ “a te ta usi uwoma Uvie na evaọ akpọ na soso.” (Matiu 24:14) Eme nọ Jesu Olori na ọ ta kẹ Pọl gbe eruẹaruẹ nọ o dhesẹ kẹe, e lẹliẹ e riẹ se usi uwoma ota gboja gaga. Jesu ọ ta kẹe nọ “o whowho odẹ [riẹ] kẹ erẹwho na,” yọ ere Pọl o gine ru. O tẹ whae ze nọ a rọ rehọ ikoko Ileleikristi buobu mu evaọ Asia Minor rite obọ Europe.​—Iruẹru Ikọ 9:15; Ahwo Kọlọsi 1:23.

U kri gaga no nọ idibo Jihova a be hae rọ ma omaa eware nọ i wuzou gaga nọ a re ru evaọ egagọ Ọghẹnẹ. A bi ru eware nana, yọ e be wha orro se Ọghẹnẹ. Ẹvẹ ma sae rọ ma omaa eware nọ ma re ru nẹnẹ evaọ egagọ Ọghẹnẹ? Eware vẹ ma rẹ sae ma omaa rai, kọ eme o ti fiobọhọ kẹ omai ru ai?

Jọ Ẹjiroro nọ Whọ be rọ Ma Omaa O Jọ Emamọ Ẹjiroro

U wo eware sa-sa nọ ohwo ọ rẹ ma omaa inọ o ti ru evaọ uzuazọ riẹ, yọ who te rri akpọ na, ahwo nọ a ma omaa eware nọ a bi le e da riẹ fia. Rekọ omaa nọ ohwo ọ rẹ ma evaọ egagọ Ọghẹnẹ u wo ohẹriẹ no enọ ahwo buobu a be ma evaọ akpọ na. Ahwo buobu, omaa epanọ a re ro fe, wo okpodẹ, je su amọfa oye a be ma. Rekọ o thọ gaga re ohwo ọ rehọ fiki eware yena ma omaa. Omaa nọ o rẹ wha orro se Ọghẹnẹ họ, omaa epanọ ma rẹ rọ gọ Jihova je ru eware nọ i wobọ kugbe Uvie riẹ. (Matiu 6:33) Ohwo nọ o you Ọghẹnẹ gbe ọrivẹ riẹ, ọ tẹ jẹ gwọlọ rọ oma riẹ kẹ Ọghẹnẹ re o ru iruo riẹ ọye ọ rẹ ma omaa otiọye na.​—Matiu 22:37-39; 1 Timoti 4:7.

Jọ ẹjiroro nọ ma be rọ ma omaa eware nọ ma re ru evaọ egagọ Ọghẹnẹ o jọ emamọ ẹjiroro, te ma be ma omaa iruo jọ nọ ma re ru evaọ ukoko na, hayo eware jọ nọ ma re ru kẹ omobọ mai re ma si kẹle Ọghẹnẹ. Ẹsejọ nọ ohwo ọ tẹ make rọ emamọ eva ma omaa dede, ọ rẹ sai ru oware nọ ọ ma omaa riẹ na ha. Kọ ẹvẹ ma sae rọ ma omaa, ma vẹ jẹ sai ru oware nọ ma ma omaa riẹ na?

Gbaemu inọ Who re Ru Oware nọ Whọ Ma Omaa Riẹ Na

Roro kpahe epanọ Jihova ọ rọ ma odhiwu gbe akpọ na. Ebaibol na ọ ta unuẹse buobu nọ “owọwọ o tẹ ze, kẹsena ohiohiẹ o tẹ ze.” Onana u dhesẹ nọ Jihova ọ ruẹrẹ oke fihọ nọ ọ rọ ma oware ovuovo. (Emuhọ 1:5, 8, 13, 19, 23, 31) Taure oke nọ ọ te rọ ma oware u te ti te, yọ ọ riẹ oware na no gbe oghẹrẹ nọ o te jọ nọ ọ tẹ mae no. Kẹsena o ve mu oware na họ ẹma. (Eviavia 4:11) Odibo Ọghẹnẹ nọ a re se Job ọ ta nọ: “[Jihova] ọ tẹ gwọlọ ru oware, o re ru ei.” (Job 23:13) Nọ Jihova ọ ma eware kpobi re no, ọ tẹ ruẹ nọ “eware kpobi nọ ọ ma i woma gaga.”​—Emuhọ 1:31.

Epọvo na re, re ma sai ru oware nọ ma ma omaa riẹ, o gwọlọ nọ ma rẹ gbaemu inọ ma re ru oware na. Ẹvẹ ma sai ro ru onana? Dede nọ otọakpọ na o jọ ofofe, Jihova ọ riẹ oghẹrẹ nọ ọ te jọ nọ ọ tẹ mae no. Ọ riẹ nọ otọakpọ na o te jọ wowoma, yọ o te wha orro gbe ujiro sei. Epọvo na re, re ma sai ru oware nọ ma ma omaa riẹ, o gwọlọ nọ ma re roro kpahe epanọ oware na u ti woma te gbe irere nọ i ti noi ze. Ere o jọ kẹ Tony nọ ọ jọ ikpe ikpegbizii. Nọ o kpohọ ugheriwo evaọ uwou ogha Isẹri Jihova nọ o rrọ obọ Europe, eware nọ ọ ruẹ e were riẹ gaga. Nọ umuo oke yena vrẹ, oware nọ Tony o je roro kpahe kpobi họ, epanọ ọ sai ro kpohọ Ebẹtẹle nyai ru iruo. O si iroro na no udu vievie he. Ọ tẹ jẹ daoma epanọ o re ro ru oware nọ ọ ma omaa riẹ na. Tony o te fili efọmo rọkẹ iruo Ebẹtẹle. Eva e were riẹ gaga nọ a zizie iei rọkẹ iruo na nọ ikpe jọ e vrẹ no.

Oware ofa nọ u re fiobọhọ kẹ omai ru oware nọ ma ma omaa riẹ họ, ma te bi lele amọfa nọ a ma omaa utioye na nyusu. U wo oniọvo-ọmọzae jọ nọ a re se Jayson nọ ọ rrọ ikpe ọgba. Oke nọ ọ jọ uzoge, usi uwoma o jẹ ruọ ẹe oma ha. Rekọ nọ o nwrotọ no ekọleji no, o te mu ọkobaro oke-kpobi họ. Ọkobaro oke-kpobi yọ Osẹri Jihova nọ ọ rẹ rehọ euwa buobu ta usi uwoma kamara kamara. Eme ọ lẹliẹ ọkobaro oke-kpobi mu ei họ ẹwere? Jayson ọ ta nọ: “Mẹ jẹ hai lele ekobaro oke-kpobi ta ẹme je lele ai kpohọ usi uwoma.”

Kere Eware nọ Whọ Ma Omaa Rai Fihotọ

Nọ ohwo ọ tẹ gwọlọ ru oware jọ, rekọ ọ riẹ epanọ o ti ro ru ei hi, u re fiobọhọ gaga nọ o te kere omaa nọ ọ be ma na fihotọ gbe eware nọ i ti fiobọhọ kẹe ru ei. Nọ who bi roro eme nọ who re ro kere iei na, yọ oware nọ whọ be gwọlọ ru na u bi vẹ ze. Solomọn ọ ta nọ eme areghẹ nọ a nabi kere fihotọ e wọhọ ekpọ esiọsiọle nọ a re ro su iruẹ kpohọ ofẹ nọ whọ gwọlọ nọ a nya rri. (Ọtausiuwoma Na 12:11) Nọ ohwo o te kere oware nọ ọ gwọlọ ru fihotọ u re fiobọhọ kẹe wo ọwhọ nọ o re ro ru ei. Kọ ogbẹrọnọ oye o soriẹ nọ Jihova ọ rọ ta nọ jọ ivie Izrẹl a rọ obọ rai kere izi riẹ fihọ obe kẹ omarai na? (Iziewariẹ 17:18) Fikiere u ti woma re ma kere omaa mai fihotọ gbe oghẹrẹ nọ ma ti ro ru ei. Ma ve je kere ebẹbẹ nọ ma rẹ sai wo oke nọ ma ti ru oware nọ ma ma omaa riẹ na, gbe oware nọ ma ti ru nọ ebẹbẹ itieye na e tẹ ze. Ma sai je kere eware nọ ma ti wuhrẹ nọ i ti fiobọhọ kẹ omai ru oware nọ ma ma omaa riẹ na, gbe edẹ ahwo nọ e sai fiobọhọ kẹ omai jẹ tuduhọ omai awọ.

Omaa nọ ohwo ọ rẹ ma u re ru udu ohwo te otọ nọ o te wo ẹbẹbẹ. Ere o jọ kẹ oniọvo jọ nọ a re se Geoffrey nọ ọ jọ ọkobaro obọdẹ evaọ oria jọ nọ u thabọ gaga evaọ obọ Asia. Idudhe na, aye riẹ o te whu. Nọ omoke jọ o vrẹ no, Geoffrey ọ tẹ ma omaa eware nọ ọ gwọlọ ru re ọ sai fi oma họ iruo usi uwoma na ziezi. Ọ ma omaa inọ ọ te daoma re o wo imasa efa nọ o re wuhrẹ Ebaibol kugbe re amara na o te ti re. O kere onana fihotọ jẹ lẹ kpahe iẹe. Kowọwọ kowọwọ ọ jẹ hae nọ omariẹ epanọ o ru te evaọ ẹdẹ yena. Nọ edẹ ikpe e tẹ vrẹ no, ọ vẹ jẹ nọ omariẹ sọ o wo ahwo jọ nọ o ti wuhrẹ Ebaibol no. Kọ ọ ginẹ sai ru oware nọ ọ ma omaa riẹ na? Ee. O mu imane efa Ebaibol họ ewuhrẹ, yọ onana o wha evawere sei gaga!

Kake Ma Omaa Eware nọ Who re Ru Tao

U wo eware jọ nọ ma gwọlọ ru nọ ma re roro nọ ma te sai ru hu evaọ oke ọsosuọ. Tony nọ ma fodẹ ẹsiẹ na o je roro nọ a te sai zizie iei kpohọ Ebẹtẹle nyai ru iruo ẹdẹvo ho. Oware nọ o jẹ lẹliẹe roro ere họ, evaọ oke yena o je yoẹme he, yọ ọ re tubẹ roma mudhe kẹ Ọghẹnẹ hẹ. Tony ọ tẹ gbaemu nọ ọ rẹ daoma koko izi Jihova jẹ họ-ame. Nọ o ru eware yena no, ọ tẹ ma omaa inọ o re mu ọkobaro obufihọ gbe ọrọ oke-kpobi họ. O tube kpe oka họ ẹdẹ nọ ọ gwọlọ ro muhọ evaọ ekalẹnda riẹ. Nọ o ru ọkobaro te omoke jọ no, ọ tẹ ruẹ nọ ọ sai gine kpohọ Ebẹtẹle nyai ru iruo.

Mai omamai, ma sai ru eware jọ nọ u fo nọ ma rẹ kaki ru tao, nọ i re fiobọhọ kẹ omai ru oware nọ ma ma omaa riẹ na. Nọ ma bi ru eware yena unọjọ utọjọ na, ma te ruẹ nọ ma te sai gine ru oware nọ ma ma omaa riẹ na. U re je ru nọ oware nọ ma ma omaa riẹ na u gbe ro no omai iroro ho. Oware ofa nọ u re fiobọhọ kẹ omai họ, nọ ma tẹ be hae lẹ se Jihova ẹsikpobi re o fiobọhọ kẹ omai. Pọl ukọ na ọ ta nọ: “Wha hae lẹ kẹse kẹse.”​—1 Ahwo Tẹsalonika 5:17.

Jọ Oma O Lọhọ Owhẹ Hẹ

Uzẹme riẹ họ, u wo eware jọ nọ ma rẹ sai ru hu ma tẹ make ma omaa rai ziezi jẹ tubẹ gbaemu nọ ma re ru ai. Wọhọ oriruo, ma riẹ nọ o te kẹ olele nọ a re se Jọn Mak na uye gaga nọ Pọl ukọ na ọ ta nọ ọ rẹ whae lele oma kpohọ erẹ usi uwoma ota avọ ivẹ riẹ hẹ. (Iruẹru Ikọ 15:37-40) Oware nọ o via na u fiobọhọ kẹ Mak kuobọrẹriẹ, kẹsena ọ tẹ ma omaa eware efa nọ ọ rẹ sai ru re ọ nyaharo evaọ egagọ Ọghẹnẹ. Oware nọ o lẹliẹ omai ta ere họ, uwhremu na, Pọl ọ ta ẹme ezi Mak. U te no ere no, Mak ọ jọ kugbe Pita ukọ na evaọ obọ Babilọn je fiobọhọ kẹe. (2 Timoti 4:11; 1 Pita 5:13) Ma sae ta nọ oware nọ o mai wuzou nọ Jihova ọ rehọ Mak ru họ, iku uzuazọ Jesu gbe odibọgba riẹ nọ o kere fihotọ.

Nọ ma be daoma ru oware nọ ma ma omaa riẹ evaọ egagọ Ọghẹnẹ na, oware utioye o sae via kẹ omai re. O tẹ via ere, jọ oma o lọhọ omai hi. Ukpoye, joma dhizu, wariẹ rri oware nọ ma ma omaa riẹ na, je nwene omaa na nọ o tẹ gwọlọ ere. Nọ oware nọ ma ma omaa riẹ na o tẹ be make bẹ omai, joma tilẹmu ei. Solomọn ovie owareghẹ na ọ ta nọ: “Rehọ oware kpobi nọ who bi ru họ obọ Jihova, omaa ra kpobi u ve ti rugba.”​—Itẹ 16:3.

Ẹsejọ, oware jọ o sae whae ze nọ ma gbẹ sai ru oware nọ ma ma omaa riẹ na ha. O sae jọ ẹyao hayo owha uviuwou. Jọ o thọrọ omai ẹro ho inọ oware nọ o mai wuzou nọ ma bi le họ, uzuazọ ebẹdẹ bẹdẹ evaọ obọ odhiwu hayo Aparadase otọakpọ. (Luk 23:43; Ahwo Filipai 3:13, 14) Ẹvẹ ma sai ro wo uzuazọ ebẹdẹ bẹdẹ? Jọn ukọ na o kere nọ: “Ohwo nọ o bi ru oreva Ọghẹnẹ ọ rẹ jọ bẹdẹ bẹdẹ.” (1 Jọn 2:17) O tẹ make rọnọ ma be sai ru oware jọ nọ ma ma omaa riẹ hẹ fiki oghẹrẹ nọ eware e rrọ kẹ omai, ma sae gbẹ “dhozọ Ọghẹnẹ uzẹme na je koko izi riẹ.” (Ọtausiuwoma Na 12:13) Ma tẹ be hae ma omaa eware nọ ma re ru evaọ egagọ Ọghẹnẹ, u re fiobọhọ kẹ omai ru onana. Fikiere joma ma omaa eware nọ e rẹ wha orro se Ọghẹnẹ.

[Ẹkpẹti]

Eware jọ nọ Whọ rẹ Sae Ma Omaa Rai

○ Ebaibol nọ who re se kẹdẹ kẹdẹ

○ Uwou-Eroro Na gbe Awake! nọ who re se

○ Olẹ nọ whọ rẹ lẹ no udu ra kpobi ze

○ Emamọ iruemu nọ whọ rẹ daoma wo

○ Iruo Ọghẹnẹ nọ who re fi oma họ ziezi

○ Usi uwoma nọ whọ rẹ ta ruọ ahwo oma ziezi

○ Usi uwoma nọ whọ rẹ rọ ifonu ta, gbe usi uwoma ota evaọ obọ eki gbe eria efa