Kolesaya Ebilhubirirwa by’Obunyakirimu Eriha Omuhangiki Wethu y’Olhukengerwa

“OMUGHULHU omundu akabya isyasi ng’akaya okwa mwalu wahi, ekitsibu kiwe sikiri busana n’eyo omuyagha akalholha.” Ebinywe ebikasisimulha ebi by’abughawa n’omufilosofa owe Roma omwa kighana ky’erimbere, bikakanganaya ekwenene eyilhangirikire ngoku ebilhubirirwa bikayithaghisibawa nuku engebe yibye n’ekighendererwa.

E Biblia yikaha eby’erileberyako by’abandu ababya bawithe ebilhubirirwa. Omw’ikolha habw’emyaka 50, Noa “mwakokothya obwathu busana n’erilhamya ekithunga kiwe.” Omuminyereri Musa “aby’akayikethera olhuhembo.” (Abaebrania 11:7, 26) Oyuwasuba omwa mwanya wa Musa, ya Yosua, mwahebwa ekilhubirirwa ekikalhua oku Nyamuhanga eky’erikinda ekihugho kye Kanana.—Eryibuka Ebihano 3:21, 22, 28; Yosua 12:7-24.

Omwa kighana ky’erimbere E.K., ahathe erithika-thika ebinywe ebyo Yesu abugha athi “engulhu yuwene y’obwami eyi yasyatsuka erithulhughanibwa omo kihugho kyosi” mubyaleka omukwenda Paulo iniabya n’ebilhubirirwa by’obunyakirimu. (Matayo 24:14) Busana n’ebinywe n’esyonzoli erilhua oku Mukama Yesu, kuthya n’olhukwamirwa “lhw’eriminyisya erina liwe [Yesu] oko bihanda,” Paulo mwakolha omubiiri munene omw’itsukisya ebithunga bingyi by’Ekikristayo erilhua e Asia enyike erihika omwa Yuropu.—Emibiri 9:15; Abanya Kolosai 1:23.

Busana n’ekyo, erihika namunabwire abaghombe ba Yehova babiriyihiriraho ebilhubirirwa binene kandi babiriberereryabyo, habw’eriha Nyamuhanga y’olhukengerwa. Nethu munabwire thwanga yihiriraho thuthi ebilhubirirwa by’obunyakirimu? Ni bilhubirirwa byahi ebyo thwanga lhubirira, kandi ni byahi ebyo thwanga kolha erithoka eribihikako?

Ebilhubirirwa Ebitholere Bikayithaghisibawa

Ebilhubirirwa bikayithaghisibawa hakuhi omwa ngebe yosi, kandi omwa kihugho kino mune abandu abanasi omughaso w’eriyihiriraho ebilhubirirwa. Aliwe, ebilhubirirwa by’Ekiteokrasi sibiri ng’eby’ekihugho. Ekindu kikulhu ekikaleka abandu omwa kihugho ibahiraho ebilhubirirwa w’omururu w’erianza eribana esyosente nyingyi, ekitsumbi n’obuthoki. Kwesi ikikendibya ky’akabi erikwamirira ekilhubirirwa busana n’erianza eribya n’obuthoki n’obukulhu! Ebilhubirirwa ebikaha Yehova Nyamuhanga y’olhukengerwa bihambene ndeke n’erimuramya n’erisonda ly’Obwami. (Matayo 6:33) Ebilhubirirwa ng’ebyo bikasa busana n’erianza Nyamuhanga n’abandu kandi biriho busana n’erikenga Nyamuhanga.—Matayo  22:37-39; 1 Timoteo 4:7.

Kwesi, ka thubye n’ebighendererwa ebitholere thukahiraho n’erikwamirira ebilhubirirwa by’obunyakirimu, nomukyangabya ini kanyirirya omubiiri kutse erikolha esyombinduka sy’obunyakirimu. Nomwabine, okwa bundi buthuku nibya n’ebilhubirirwa ebiwithe ebighendererwa ebitholere sibiriminyikalha. Thwanga hiraho thuthi ebilhubirirwa n’erikanyirirya ehighisa hy’eribihikako?

Eriyisunza Linene Litholere

Thalengekania okwa mibere Yehova aghunziramu erihangika obuhangwa bwosi. Ebinywe “mubwabya igholho-gholho, kandi mubwabya engyakya,” bikakanganaya ngoku Yehova yuwathwamu obuuli bw’emighulhu y’erihangika. (Enzuko 1:5, 8, 13, 19, 23, 31) Okw’itsuka ly’obuli mughulhu w’erihangika, abya inianasi ebilhubirirwa kutse ebighendererwa by’ekiro ekyo. Kandi Nyamuhanga mwaberererya ekighendererwa kiwe eky’erihangika ebindu. (Eribisulirwa 4:11) Omuthaleghulha Yobu mwabugha athi: “Ekyo omuthima wiwe [Yehova] akasonda akakolhakyo.” (Yobu 23:13) Ka kyangabya imukyatsemesya Yehova akalhangira “obuli kindu ahangika” kandi mwabugha athi ‘byuwene kutsibu’!—Enzuko 1:31.

Ebiyithawa byethu erithoka eribererera, nethu thutholere ithwabya n’eriyisunza linene ly’eribihikako. Ni kyahi ekikendi thuwathikya erikulha-kulhania eriyisunza linene eryo? Nibya n’omughulhu ekihugho kyabya mulhalha butsira kindu, Yehova iniakalhangira ebyanga lhwiririremo—ebindu ebyuwene, ebikamulethera olhukengerwa n’ekitsumbi. Kuthya eriyisunza lyethu ly’erianza eriberererya ebyo thwanzire erikolha lyangana kulha-kulhanibwa omw’ighanirya okwa byangalhwiririmo n’emighaso y’erihika okwa bilhubirirwa byethu. Ekyo ky’ekyabya oku Tony ow’emyaka 19. Mwath’ibirirwa ebyo alhangira akabungira ekyaghanda ky’omuthahulha eky’Abema ba Yehova omwa bulengera lyuba bwe Yuropu. Erilhua ekiro ekyo erihika namunabwire, Tony abiribya inianawithe ekibulyo kino omwa muthwe wiwe, ‘Engebe iyikendibya yithi wam’ikalha n’erikolera omwa mwanya ng’oyo?’ Tony mwathaleka erilengekania okw’ibya ikyangana thokekena, kandi mwalholha embere eribya n’ekilhubirirwa ekyo. Ka angabya imwatsema omughulhu enyuma waho efomu yiwe y’erisaba erikolera okwa kyaghanda yasubawamo!

Kandi ithwe erinywana abandi ababirihika okwa kilhubirirwa kirebe kyanga thuhira mw’eriyisunza ly’erikihikako. Jayson, ow’emyaka 30, abya isyali tsemera erisangira omw’ithulira omwa bulengwa bwiwe. Aliwe abere akaghunza e yunivasite, mwathwamu eritsuka obutemburi, ni bugha ambu eribya muthuliri w’Obwami ow’omughulhu wosi. Ni kyahi ekyawathikaya Jayson eribya n’omuhwa w’eribya mutemburi? Akabugha athi: “Erikania n’erikolha n’abandi omw’ithulira ababirikolha obutemburi mukyanyihira mw’omuhwa munene.”

Erihandika Ebilhubirirwa Byethu Kyangana Wathikya

Ekirengekanio ekikabya nga sikihikire kikalhangirika kandi ikyuwana thwamakikaniako omwa binywe ebyuwene. Solomona mwabugha athi ebinywe ebitholere byanganabya n’amaaka ng’omughera owakaha obusondoli omwa ngebe. (Omugambuli 12:11) Ebinywe ebyo byamahandikwa, bikatsemesaya obulengekania n’omuthima. Ni kindi kyahi ekyaleka Yehova inialhaghira abami be Israeli eriyithungira ekopi y’Emighambo? (Eryibuka Ebihano 17:18) Kwesi, thwangananza erihandika ebilhubirirwa byethu, ithwahulha ebyanga thulemesya kuthya n’esyonzira sy’eribisinguriramo. Kandi kyangana wathikya thwamaminyerera emyatsi eya thutholere erigha ndeke, emikolere eyuwene eyo thukayithagha eribya nayu, kuthya n’abandu abanga thuwathikya n’erithusighika.

Eriyihiriraho ebilhubirirwa by’obunyakirimu mubyahamba ndeke oku Geoffrey, oyo wabirikolha obutemburi bw’embaghane habw’omughulhu muuli omwa kihugho kyo Asia. Eky’obulighe mukali wiwe mwaholha kitsumbukirania. Enyuma w’erikolha esyombinduka, Geoffrey mwathwamu eriyihwerya omwa butemburi omw’iyihiraho ebilhubirirwa. Abere abirihandika ebyo akathegheka okwa lhupapura, omw’isaba mwahiraho ekilhubirirwa ky’eritsukisya abigha basathu be Biblia omwa kwezi oko. Obuli kiro, iniakalebaya eby’alyakolha, kandi obuli enyuma w’ebiro ikumi, iniakalebaya nga anemukulha-kulhana. Mbwino mwanahika okwa bilhubirirwa biwe? Ee, kundi mwatsukisya abigha be Biblia bbani, kandi ekyo kyamamulethera etseme!

Hiraho Ebilhubirirwa by’Obuthuku Buke Erikuwathikya Erilebya aho Wamahika

Ebindi bilhubirirwa byanganabya nga bikalire eribihikako. Oku Tony, oyo thulyakanayako, erikolera okwa kyaghanda ky’omuthahulha eky’Abema ba Yehova kyabya nga kilhotho. Ekyo kyabya kithya kundi abya awithe emibere eyithuwene, kandi nibya abya isyali ayihayo oku Nyamuhanga. Aliwe Tony mwathwamu erihambania engebe yiwe n’esyonzira sya Yehova kandi mwabya n’ekilhubirirwa ky’eritholera eribatizibwa. Enyuma w’erihika okwa kilhubirirwa ekyo, mwanza eribya mutemburi omuwathikya kandi ow’omughulhu wosi, omw’ihira okwa kalenda yiwe kw’ekiro ky’eritsukirako. Abere abirikolha obutemburi habw’omughulhu mulebe, erikolera okwa kyaghanda mukyathabya kilhotho buyira.

Kuthya nethu thwangana kolha ekyo omw’itsuka erikolha ebilhubirirwa eby’obuthuku buke imuthwakolha eby’omughulhu muuli. Ebilhubirirwa ebyangana hikwako lhuba byangana kuwathikya eriminya aho wamathahika erithoka erihika okwa bilhubirirwa by’obuthuku buuli. Eribya ithune mulebya erikulha-kulhana lyethu mughulhu wosi omw’ikolesya ebikathuwathikaya eriminya aho thwamahika kikaleka ithwahira ameso w’embere. Erisaba Yehova mughulhu wosi omw’imubwira endegheka yethu kikendi leka ithwabya ithunemulholha embere. Omukwenda Paulo mwahabulha athi, “Musabe butsira eryumbya.”—1 Abanya Tesalonika 5:17.

Erithwamu n’Erilholha Embere Bikayithaghisibawa

Ithwangana ghana erihika okwa bilhubirirwa birebe nibya ithunawithe endegheka n’eriyisunza linene ly’eribihikako. Thalengekania omwigha Yoane Mariko ng’atholere eribya imwayowa athi omukwenda Paulo akaghana erighenda nayu okwa lhughendo lhwiwe lhwakabiri olhw’obumisyonare! (Emibiri 15:37-40) Mariko abya w’erighira okw’iponesibwa eri n’erihindulha ebilhubirirwa biwe nuku alhole embere n’omubiiri. Kilhangirikire ngoku mwakolha ekyo. Enyuma waho, Paulo mwakania oku Mariko kwa ndeke kandi mubabya banywani haghuma n’omukwenda Petero ibane e Babeli. (2 Timoteo 4:11; 1 Petero 5:13) Obundi olhusunzo lhwiwe lhunene lyabya iry’erihandika omwatsi owasondolibawa owahambire okwa ngebe ya Yesu n’omubiiri w’erithulira.

Nethu ithwangana bana ebikathulemesaya thunemukwamirira ebilhubirirwa by’obunyakirimu. Omwakanya k’eribikyako, thutholere ithwathasyalhaba omwa bilhubirirwa byethu, eribilebya ndeke, kuthya n’erithasyabyuwania. Omughulhu hakabuthuka ebikalemesaya, thutholere ithwathwamu erilholha embere. Omwami w’amenge Solomona akathukakasaya athi: “Wuhire emibiiri yawu oko Mwami Mukulhu, neryo eriyisunza lyawu lyasyahanganibwa.”—Emisyo 16:3.

Aliwe, okwa bundi buthuku emibere eyo thulimu yikaleka ikyabya nga sikyanga thokekana erikwamirira ebilhubirirwa birebe. Ng’eky’erileberyako, amaghalha awathuwene kutse ebiyithawa by’eka byangana leka ithwabya nga sithwanga hika okwa bindi bilhubirirwa. Ambi isithwibirirawa ekwenene eyikakanganaya ngoku ekihembo kyethu y’engebe y’erikotha—omo lhubulha kutse omwa Paradiso okwa kihugho. (Luka 23:43; Abanya Filipi 3:13, 14) Ekyo thwanga kikabana thuthi? Omukwenda Yoane mwahandika athi: “Oyukakolha erisonda lya Nyamuhanga asyakotha kera na kera.” (1 Yoane 2:17) Nomwakine indi emibere eyo thulimu yangana leka ithuthahika okwa kilhubirirwa kirebe, thwangan’ubaha “Nyamuhanga, n’eritheya ebihano biwe.” (Omugambuli 12:13) Ebilhubirirwa by’obunyakirimu bikathuwathikaya erihira ameso w’embere okw’ikolha erisonda lya Nyamuhanga. Busana n’ekyo thubikolesaye eriha Omuhangiki wethu y’olhukengerwa.

[Akasanduko]

Ebilhubirirwa by’Obunyakirimu eby’Erilengekaniako

○ Erisoma e Biblia buli kiro

○ Erisoma obuli Kaleberyo ne Awake! ebikahulhuka

○ Eryuwania emisabe yethu

○ Erikangania emikolere y’omulimu

○ Erianza erikolha bingyi omwa mubiiri wa Yehova

○ Eryongera eryuwania erithulira n’erikangirirya

○ Erikulha-kulhania eyindi mibere y’erithulira ng’erikolesya esimu, erithulira kitsumbukirania, n’omwa myanya y’esuburu