Difundila bipatshila bia mu nyuma bua kutumbisha Mufuki webe

“PADI muntu kayi mumanye ku tshitudilu tshia mazuwa tshimpe tshidiye mua kuya, lupepele luonso ludi anu lubi.” Badi bamba ne: mêyi aa ng’a muena nkidi wa mu Lomo wa mu bidimu lukama bia kumpala. Adi aleja mudi bipatshila bikale ne mushinga mu nsombelu wetu.

Bible udi utupesha bilejilu bia bantu bavua bamanye mushinga wa kudifundila bipatshila. Noa wakenza mudimu mukole munkantshi mua bidimu bitue ku 50, ‘ulongolola buatu bua kusungila nabu ba mu nzubu muende.’ Muprofete Mose ‘wakatangila too ne ku dipingajila dia difutu.’ (Ebelu 11:7, 26) Nzambi wakapesha Yoshua (eu wakapingana Mose) tshipatshila tshia kuangata buloba bua Kanâna.​—Dutelonome 3:21, 22, 28; Yoshua 12:7-24.

Kakuyi mpata, mu bidimu lukama bia kumpala, bipatshila bia mu nyuma bivua nabi mupostolo Paulo bivua bilonda nangananga mêyi a Yezu a se: ‘Nebambile bantu bonso ba pa buloba lumu luimpe elu lua bukalenge buanyi.’ (Matayo 24:14) Paulo wakenza mudimu wa mushinga mukole bua kuenza bisumbu bivule bia bena Kristo mu Asia Mukese ne ku Mputu bua muvuabu bamukankamije kudi malu a buludiludi ne bikena-kumona bia kudi Mukalenge Yezu nkayende, pamue ne mudimu wa ‘kutuala dîna dia [Yezu] ku mêsu kua bisamba bia bende.’​—Bienzedi 9:15; Kolosai 1:23.

Bulelela, basadidi ba Yehowa batu anu badifundila bipatshila bilenga ne babikumbaja bua butumbi buende. Mmunyi mutudi mua kudifundila bipatshila bia mu nyuma lelu? Mbipatshila kayi bitudi mua kudifundila, ne mmalu kayi atudi mua kuenza bua kubikumbaja?

Bidi bikengela kuikala ne meji mimpe

Muntu udi mua kudifundila bipatshila mu bualu pa kuamba buonso bua mu nsombelu, ne kutu bantu pa buloba ebu badi bamanye mushinga wa kudifundila bipatshila. Kadi bipatshila bia mu nyuma mbishilangane ne bipatshila bia bantu ba pa buloba. Meji atu atamba kusaka bantu bua kudifundila bipatshila bia bungi pa buloba lelu adi aleja dijinga diabu dikole dia kupeta bubanji ne kupeta muanzu anyi bukokeshi. Kuikala ne tshipatshila tshia kupeta bukokeshi ne butumbi ki nkuimpe nansha kakese to! Bipatshila bidi bitumbishisha Yehowa Nzambi mbipatshila bidi bitangila ntendelelu wetu ne Bukalenge bua Nzambi. (Matayo 6:33) Bipatshila ebi bidi bifumina ku dinanga dia Nzambi ne dia muntu netu ne mbienzeja kudi dilamata dia Nzambi.​—Matayo 22:37-39; 1 Timote 4:7.

Tuikale ne meji mimpe patudi tudifundila ne tukumbaja bipatshila bia mu nyuma, nansha biobi bikale bua majitu makuabu a mudimu anyi bua didiunda dietu nkayetu dia mu nyuma. Kadi, nansha bipatshila bilenga bitu imue misangu bipanga kukumbana. Mmunyi mutudi mua kudifundila bipatshila ne kubikumbaja?

Tuikalayi ne dijinga dikole dia kubikumbaja

Tangila mushindu uvua Yehowa mujikije difuka dia diulu ne buloba. Yehowa wakaleja muvua bikondo bia difuka bintu bilondangane mu mêyi aa: ‘dilolo ne dinda [biakadiku].’ (Genese 1:5, 8, 13, 19, 23, 31) Ku ntuadijilu kua tshikondo tshionso tshia difuka bintu, uvua mumanye bimpe tshipatshila tshia tshikondo anyi dituku adi. Ke mushindu wakakumbaja Nzambi tshipatshila tshiende tshia kufuka bintu. (Buakabuluibua 4:11) Yobo wakamba ne: ‘Bualu budi mutshima [wa Yehowa] usungula mbudiye wenza.’ (Yobo 23:13) Yehowa uvua ne bua kuikala ne disanka dia bungi bua kumona ‘bintu bionso biakenzaye’ ne bua kuambaye ne: “biakadi bimpe be!”​—Genese 1:31.

Bua tuetu petu kukumbaja bipatshila bietu, tudi ne bua kuikala ne dijinga dikole dia kubikumbaja. Kadi ntshinyi tshiatuambuluisha? Nansha pavua buloba kabuyi busunguluke ne buikale butupu, Yehowa uvua yeye umona muvuabu ne bua kuikala ku ndekelu, mbuena kuamba ne: tshintu tshilengele, tshimupesha butumbi ne lumu. Bia  muomumue, tudi mua kupeta dijinga dia kukumbaja malu atudi badifundile bua kuenza tuetu belangane meji bua bipeta ne masanka atuapeta. Atshi ke tshiakafikila Tony, nsongalume wa bidimu 19. Katu muanji kupua muoyo tshiakumvuaye bua musangu wa kumpala pakayaye ku biro bia Bantemu ba Yehowa bia mu dimue dia ku matunga a ku Mputu wa ku Ouest. Katshia anu pinapu, Tony uvua anu udiebeja ne: ‘Kusomba ne kuenza mudimu muaba wa mushindu’eu kudi mua kuikala munyi?’ Tony kavuaku muanji kulekela kuela meji a mushindu wa kufikaku to, ne wakatungunuka ne kudienzeja bua kukumbaja tshipatshila etshi. Ndisankapu kayi divuaye nadi pakitababu dilomba diende dia kuenza mudimu ku biro bidimu bia bungi panyima!

Disomba ne bantu bakadi bakumbaje tshipatshila kampanda didi kabidi mua kutupesha dijinga dia kutshikumbaja. Jayson (udi ne bidimu 30) kavua musue kuya mu mudimu wa buambi pavuaye ne bidimu dikumi ne bia mu njila to. Kadi pakajikijaye tulasa tua bikadilu, wakatuadija kuenza mudimu wa bumpanda-njila, mbuena kuamba ne: wakalua muambi wa lumu luimpe wa ku dîba ne ku dîba. Kadi ntshinyi tshivua tshiambuluishe Jayson bua kupeta dijinga dia kulua mpanda-njila? Udi wandamuna ne: “Kuyukila ne bakuabu bakadi benze bumpanda-njila ne kuya nabu mu buambi ke bidi bingambuluishe bikole.”

Kufunda bipatshila bietu pa dibeji kudi mua kutuambuluisha

Lungenyi lubuitshidile ludi lulua lutoke patudi tusungula miaku ya kulumvuija nayi. Solomo wakaleja ne: miaku mimpe idi mua kuikala ne bukole bu bua misongolo bua kuludika nsombelu wa muntu. (Muambi 12:11) Patudi bafunde mêyi au pa dibeji, adi ashala mu lungenyi ne mu mutshima wetu. Mbua bualu kayi bukuabu buvua Yehowa muambidile bakalenge ba mu Isalele bua kudifundila wabu mukanda wa Mikenji nkayabu? (Dutelonome 17:18) Ke bualu kayi tudi mua kufunda bipatshila bietu ne mushindu wa kubikumbaja. Tudi mua kufunda malu adi mua kututatshisha ne mushindu utudi mua kupita nawu. Tudi kabidi mua kukeba bua kujingulula malu atudi ne bua kumanya, midimu itudi ne bua kulonga ne bantu badi mua kutuambuluisha.

Bua Geoffrey mpanda-njila wa pa buende wa matuku a bungi mu teritware muditole wa mu dimue ditunga dia ku Asia, didifundila bipatshila bia mu nyuma diakamuambuluisha bua kushindama. Wakapeta lutatu pakafua mukajende lufu lua tshikoso. Panyima pa tshikondo tshia dibidilangana ne nsombelu eu, Geoffrey wakadifundila bua kudina ne kasuki mu mudimu wende wa bumpanda-njila. Kunyima kua mumane kufunda bipatshila biende ebi pa dibeji, wakasambila ulomba diambuluisha bua kutuadija kulonga Bible ne bantu basatu bapiabapia ku ndekelu kua ngondo. Dituku dionso uvua ukonkonona mudimu wende, ne panyima pa matuku dikumi uvua utangila muvua malu ende. Wakakumbaja tshipatshila tshiende atshi anyi? Eyowa, wakatuadija kulonga Bible ne bantu banayi ne bualu ebu buakamusankisha bikole!

Difundila bipatshila bia kukumbaja mu matuku makese bu bimanyinu

Bimue bipatshila bidi mua kumueneka bikole bua kukumbaja. Bua Tony utukadi batele, kuenza mudimu ku biro bia Bantemu kuvua anu bu tshilota. Bivua bu tshilota bualu uvua ne nsombelu mubi ne kavua nansha muanji kutambula to. Kadi Tony wakapangadika bua kuenza disua dia Yehowa mu nsombelu wende ne yeye kudifundila tshipatshila tshia kukumbaja malu malomba bua kutambula. Panyima pa  yeye mumane kutambula, wakadifundila tshipatshila tshia kulua mpanda-njila muambuluishi ne pashishe mpanda-njila wa pa tshibidilu, bua kuenza bionso ebi, uvua ufunda dituku divuaye ne bua kutuadija mu kalandriye kende. Yeye mumane kuenza bumpanda-njila munkatshi mua bidimu bungi kampanda, mudimu wa ku biro bia Bantemu kauvua umueneka kabidi bu tshipatshila tshivua katshiyi kukumbaja to.

Tuetu petu tudi mua kukosolola bipatshila bietu bia kukumbaja mu matuku a bungi mu bipatshila bikese bikese bia kukumbaja mu matuku makese. Bipatshila bia munkatshi-nkatshi bidi mua kuambuluisha bu bimanyinu bia tuetu kuipatshila mu njila batangile ku dikumbaja tshipatshila kampanda tshia matuku a bungi. Kukonkonona misangu yonso muaba utukadi ne bimanyinu bia njila ebi kudi mua kutuambuluisha bua kushala batuishile lungenyi ku tshipatshila tshietu. Kusambila Yehowa misangu ne misangu bua bipatshila bietu nekutuambuluishe kabidi bua kushala mu njila eu. Paulo udi utuambila ne: “Nusambile diba dionso.”​—1 Tesalonike 5:17, MMM.

Tshisumi ne dinanukila bidi ne mushinga

Nansha tuetu baditekele bipatshila kampanda ne meji onso ne bikale ne dijinga dikole dia kubikumbaja, bimue bipatshila kabitu bikumbana to. Tshilejilu, Yone Mâko uvua ne bua kuikala mubungame bikole pakabenga mupostolo Paulo bua kuya nende mu luendu luende luibidi lua bu-misionere. (Bienzedi 15:37-40) Mâko wakapetela dilongesha ku dibungama edi ne kulongolola amue malu mu tshipatshila tshiende tshia kuvudija mudimu. Bidi bimueneka ne: ke tshiakenzaye. Panyima pa matuku, Paulo wakakula bua Mâko umuanyisha, ne Mâko uvua ne malanda mashême ne mupostolo Petelo mu Babulona. (2 Timote 4:11; 1 Petelo 5:13) Pamu’apa diakalenga dipite bunene divuaye nadi divua dia kufunda ku diambuluisha dia nyuma wa Nzambi muyuki wa nsombelu ne mudimu wa Yezu.

Patudi tujinga kukumbaja bipatshila bietu bia mu nyuma, tudi petu mua kuanji kupangila bualu. Pamutu pa kulekela tshipatshila, tudi ne bua kukonkonona malu, kutangilula tshipatshila tshietu ne kutshishintulula padiku mushindu. Patudi tupeta ntatu, tudi ne bua kuya kumpala ne tshisumi ne dinanukila. Solomo Mukalenge wa meji udi utushindikila ne: ‘Teka mudimu webe mu bianza bia Yehowa, ne malu awapangidija nealubuluke.’​—Nsumuinu 16:3.

Kadi, imue misangu kutu nsombelu idi mua kupangisha bimue bipatshila bua kukumbanabi. Tshilejilu, masama anyi majitu a mu dîku adi mua kutupangisha bua kukumbaja bimue bipatshila. Kadi katupu muoyo nansha kakese bua se: tshipatshila tshitambe bunene mmuoyo wa tshiendelele mu diulu anyi mu Mparadizu pa buloba. (Luka 23:43; Filipoi 3:13, 14) Mmunyi mutudi mua kuupeta? Mupostolo Yone wakafunda ne: “Yeye udi wenza mudi disua dia Nzambi udi ushalaku tshiendelele.” (1 Yone 2:17) Bikala nsombelu wetu kayi utupesha mushindu wa kukumbaja tshipatshila kampanda, tudi anu ne mushindu wa kutungunuka ne ‘kutshina Nzambi ne kutumikila mikenji yende.’ (Muambi 12:13) Bipatshila bia mu nyuma bidi bituambuluisha bua kushala bateke meji ku dienza dia disua dia Nzambi. Nunku, tubikumbajayi bua kutumbisha Mufuki wetu.

[Kazubu mu dibeji 22]

Bipatshila bia mu nyuma bitudi mua kudifundila

○ Kubala Bible dituku dionso

○ Kubala nimero yonso wa Tshibumba tshia Nsentedi ne Réveillez–vous!

○ Kulengeja masambila etu

○ Kuleja mamuma a nyuma

○ Kuvudija mudimu wetu

○ Kulengeja mushindu utudi tuyisha ne tulongesha

○ Kumanya mua kuyisha ku telefone, padi mpunga umueneka ne miaba ya disumbishila bintu