Thlarau Lam Thiltumte Chu Nangmah Siamtu Chawimawi Nân Hmang Rawh

“MIIN a pan tum lam a hriat loh chuan, khawi lam mah kawng dik a awm lo.” He thu, kum zabi khatna hun laia Rom mi fing pakhatin a sawi hi nunin pan tum lam nei tur chuan thiltumte insiam a ngai tih sawi nâna hman a ni ṭhîn.

Bible chuan mi mal, thiltum neite entawn tur siam a târ lang a. Nova chuan kum 50 vêl chhûng chu “a chhûngte chhandam nân lawng a tu a.” Zâwlnei Mosia chuan “lâwmman pêk tûr chu a thlîr ṭhin.” (Hebrai 11:7, 26) Pathian thil tum, Kanaan ram lâk chu Mosia aiawhtu, Josua kutah dah a ni.—Deuteronomy 3:21, 22, 28; Josua 12:7-24.

C.E. kum zabi khatnaah khân, tirhkoh Paula chu Isua thusawi “he ram chanchin ṭha hi hnam zawng zawng hriattîrna tûin khawvêl zawng zawngah hrilin a awm ang” tih thu hian thlarau lam thiltum nei tûrin a fuih nasa hle ngei ang. (Matthaia 24:14) Ani chu ‘Jentailte hnêna [Isua] hming pu’ tûra tirh a nih bâkah Lalpa Isua hnên aṭanga thuchah leh inlârna a hmuhna chuan a tichak hle a, Asia Minor tluan chhuakah leh Europe khawmuala hmun hrang hranga Kristian kohhran dinaa hmanraw pawimawh takah a ṭang ta a ni.—Tirhkohte 9:15; Kolossa 1:23.

Ni e, hmân lai aṭang tawhin Jehova chhiahhlawhte chuan thiltum ropui tak an nei ṭhîn a, chu chu Pathian chawimawi nân an tipuitling bawk ṭhîn. Tûn laiah hian engtin nge thlarau lam thiltumte kan neih theih ang? Eng thiltumte nge kan neih ang a, chûng chu tipuitling tûrin eng hmalâkna ṭhate nge kan neih theih ang?

Chêttîrtu Dik A Pawimawh

Nuna thiltih hrang hrangah hian tiltum kan insiam thei a, he khawvel pawh hian thiltum nei tûrin mite a fuih bawk. Amaherawhchu, Theocratic thiltumte chu khawvêl tumsânnate nên a inang lo. He khawvêla thiltum tam takte mite neihtîrtu ber chu hausakna leh thiltihtheihna neih duhna nasa tak hi a ni. Hausakna leh thiltihtheihna nei tûra thiltum tihpuitlin tûmna chu a va pawi dâwn êm! Pathian Jehova chawimawitu thiltumte chu amah kan biakna leh a Lalram kan thlâwpna nên a inkungkaih tlat a. (Matthaia 6:33) Chutiang thiltumte chu Pathian hmangaihna, mihring puite hmangaihna leh Pathian hnêna inpêkna neih tum tlatna aṭanga lo awm a ni.—Matthaia 22:37-39; 1 Timothea 4:7.

Thlarau lam thiltum kan insiam a, tih puitlin kan tum hian chutiang ti tûra min chêttîrtu chu thianghlim sela, chanvo hlu dangte tihpun nân, a nih loh leh a mi mal anga thlarau lama hmasâwn nân ni rawh se. Chêttîrtu dik tak nei chunga thiltum neihte pawh tihpuitlin theih loh châng a awm. Engtin nge thiltumte kan insiam a, tipuitling tûra ṭan kan lâk theih ang?

Tih Puitlin Duhna Nasa Tak Neih A Ngai

Jehova’n lei leh vân a siam zawh dân hi han ngaihtuah teh. “Tlai lam a awm a, zîng lam a awm bawk a” tih thu sawiin Jehova chuan thilsiam chhûng chu a hrilhfiah a. (Genesis 1:5, 8, 13, 19, 23, 31) Thilsiam ṭanna, a ni indawt zêl atâna a thiltih tum chu a hrechiang hle a ni. Pathian chuan thilsiam a tumte chu a siam zo ta a. (Thu Puan 4:10, 11) Thlahtu Joba chuan “[Jehova’n] a duhzâwng chu a ti mai a ni” tih a sawi a. (Joba 23:13) Jehova tân chuan ‘a thil siam tinrêng en’ a, a ‘ṭhat êm êm’ thu sawi chu a va lungawithlâk dâwn êm!—Genesis 1:31.

Keini pawhin kan thiltumte chu a taka a lo chan theih nân, tihpuitlin duhna nasa tak kan nei tûr a ni a. Chutiang duhna nasa tak chu nei tûrin engin nge min ṭanpui ang? Lei chu ruak ngawt leh engmah lo mai a nih lai pawh khân Jehova chuan a tâwpa thil thleng tûr—amah tiropui leh chawimawi tûr, lei mawi tak chu a lo hmu lâwk thei a ni. Chutiang chiah chuan, kan tih puitling huna thil thleng tûr leh tihpuitlin a hlâwknate chhût ngunna hmangin kan thil tih tumte chu tih puitlin duh kan nei chho thei a ni. Chutiang chu kum 19-a upa Tony-a’n a tawng a. Ani chuan Europe khaw thlang lama Jehova Thuhretute branch office a tlawh laia a rilru awm dân hmasa ber chu a theihnghilh thei lo. Chuta ṭang chuan zawhna pakhat, ‘Chutiang hmuna chên a, rawngbâwl chu eng nge a an ang le?’ tih chu Tony-a rilruah chuan a châm ta reng mai a. Chumi hmuna awm theih dân chu a ngaihtuah chhunzawm reng a, tichuan chu a thiltum chu tih hlawhtlin ngei a tum tlat a. Kum 7 a han ral leh hnua branch-a rawngbâwl a dîlna pawmsak a han nih chuan a va lâwm tak êm!

An thiltum engemaw chen tipuitling tawhte kan kawmna chuan kan thiltumte tih puitlin châkna min neihtîr thei bawk a. Kum 30 mi Jayson-a chuan a tleirâwl ṭan chhoh lai chuan thu hrilh rawngbâwlnaa tel chu phûr hran lo. Mahse, high school a han zawh hnu chuan, phûr takin pioneer a thawk a; tichuan, hun bikima Lalram thuchhuahtu a ni ta a. Engin nge Jayson a chu pioneer nih châkna neihtîr? Ani chuan heti hian a sawi: “Pioneer thawk tawhte titipuina leh thu hrilhnaa thawhpuina chuan nasa takin min ṭanpui a ni,” tiin.

Kan Thiltum Ziak Chhuaka Dahnain Min Ṭanpui Thei

Kan ngaihtuahnate kan han sawi chhuah hian chiang leh fiah takin a hriat theih ta ṭhîn a. Thu ṭha takte chuan beramputen berâm khalh nâna an hman tiang zum ang maiin nun a kaihruai thei tih Solomona chuan a sawi. (Thuhriltu 12:11) Chûng thu ṭha takte chu ziak chhuah an nih chuan, rilru leh thinlungah a intuh nghet thei hle a ni. Hei vang hi a nih si loh chuan Jehova’n Israel lalte hnêna Dân ziak chhâwng tûra a hrilh chhan dang eng nge awm thei tehlul ang? (Deuteronomy 17:18) Chutiang chuan kan thiltumte leh tihpuitlin kan tum dânte chu kan ziak chhuak thei a, tihpuitlin kan tumna kawnga harsatna tawh kan inbeisei theihte bâkah kan tawrh chhuah theih dân kawngte pawh kan ziak tel thei a ni. Kan hriat tûr te, thiamna kan neih ngai te, leh min ṭanpui leh chhawmdâwl thei mi mal tuemaw hriatte chu a ṭangkai thei bawk a ni.

Geoffrey-a chu Asia rama thu hrilhna bial pilril taka hun rei tak special pioneer thawk tawh a ni a, thlarau lam thiltumte a insiamnain amahah nghawng ṭha tak a nei a ni. Vânduaithlâk takin a nupui a thi thut a. Chumi hnua insiam danglamna a neih chhûng chuan Geoffrey-a chuan thiltumte a insiam a, pioneer rawngbâwlnaa inhman pumhlûm ṭhak a tum ta a. A thiltumte a ziak chhuah hnuah ṭawngṭainaa thlenin a thla tâwpa Bible zirpui pathum neih ṭan a tum ta a. Ni tinin a thiltih dânte chu ennawnin, ni sawm hnu apiangah a hmasâwn dân a inenfiah bawk ṭhîn. A thiltumte chu a tipuitling em? Bible zirpui thar pali a han neih tâkah chuan a thiltumte a tipuitling tih hlim takin a sawi thei ta!

Chhinchiahnate Angin Thiltum Tênaute Insiam Rawh

Thiltum ṭhenkhatte chu a tîrah chuan tih hlawhtlin harsa tak angin a lang thei. Kan sawi tâk Tony atân khân Jehova Thuhretute branch offfice-a hna thawh chu mumang ang mai a ni a. A chhan chu khatih lai khân a nun dân chu a la mumal lovin, Pathian hnêna inpumpêkna pawh a la neih loh vang a ni. Mahse, Jehova duhzâwngte mila nun a tum a, baptisma chan theih chu thiltumah a nei bawk. Baptisma a chan hnu chuan auxiliary pioneer thawh ṭan a tum hun leh a hnua regular pioneer thawh ṭan a tum hun chu calendar-ah a chhinchhiah a. Hun engemaw chen pioneer a thawh hnu chuan branch office-a hna thawh chu atâna thiltum inâwm lo a ni tawh lo.

Keini pawhin kan thiltum hun rei tak chhûnga tihpuitlin ngaite chu hun reilote chhûnga tihpuitlin theih tûra kan ṭhen hran a ṭha zâwk thei a. Thiltum hun rei tak chhûnga tih puitlin ngaite tihpuitlin kan tum rualin, kan tih puitlin nghâl theih thiltumte chu chhinchhiahna ang a ni thei. Chu kan kawng zawha hma kan sâwn dân ngun taka kan ennawnnaah chuan kan rilru pe tûrin chhinchhiahna chuan min ṭanpui thei a ni. Ṭawngṭainaa kan thiltum Jehova hnêna hrilh ziahna pawhin chu kawng zawh tlat tur chuan min ṭanpui thei bawk. Tirhkoh Paula chuan ‘bâng lova ṭawngṭai’ tûrin min fuih a ni.—1 Thessalonika 5:17.

Tumruhna leh Taimakna A Pawimawh

Ruahmanna ṭha tak neiin, tihpuitlin duhna nasa tak nei mah ila, thiltum ṭhenkhat chu tihpuitlin theih loh a awm tho bawk. Tirhkoh Paula’n a missionary zin ṭum hnihnaa a hruai duh loh khân zirtîr Johana marka chu a va lunghnual dâwn êm! (Tirhkohte 15:37-40) Chu a lunghnualna tawn aṭang chuan Marka chu a inzir a ngai a, rawngbâwlna zauh tûrin a thiltum a siam danglam a ngai a ni. Chutiang chuan a tih ngei hmêl a. A hnuah, Paula’n Marka chanchin chu amah ngainat hmêl takin a sawi a, Babulon khuaah tirhkoh Petera nên pawh an inkâwm ngeih hle. (2 Timothea 4:11; 1 Petera 5:13) A chanvo dawn hlu ber chu Bible-a Isua nun leh rawngbâwlna chanchin a ziak hi a ni mai thei a ni.

Thlarau lam thiltumte tihpuitlin kan tumnaah hian harsatnate kan tâwk thei bawk a. Bânsan mai lovin, kan thiltumte chu ennawn a, bûk tawnin, kan siam ṭha zâwk tûr a ni. Kan kawng dâltu a lo awm hunah tumruhna leh taimakna nên hma lam kan pan zêl a ngai. “I hnate chu LALPA kawltîr rawh, tichuan i thil ruahmante chu tihnghehin a awm ang,” tiin Lal fing Solomona chuan min tiam a ni.—Thufingte 16:3.

A châng chuan dinhmunte avângin thiltum ṭhenkhat chu ûm theih a ni lova. Entîr nân, hrisêlna ṭhat loh vâng, a nih loh leh chhûngkaw mawhphurhnate avângin thiltum ṭhenkhat chu kan tâna thil theih loh a ni thei. Kan lâwmman dawn tûr ber chu leiah a ni emaw, vânah a ni emaw, chatuan nunna neih hi a ni tih i theihnghilh ngai lovang u. (Luka 23:43; Philippi 3:13, 14) Chu chu engtianga neih theih nge? “Pathian duhzâwng titu erawh chu kumkhuain a awm reng ang,” tiin tirhkoh Johana chuan a sawi a. (1 Johana 2:17) Thiltum engemaw bîk tak chu kan dinhmun azirin kan tipuitling thei lo pawh a ni thei a, chuti chung pawhin ‘Pathian ṭihin, a thupêkte kan vawng’ thei tho a ni. (Thuhriltu 12:13) Thlarau lam thiltumte chuan Pathian duhzâwng titlat tûrin min ṭanpui a. Chutiang a nih chuan, chûng thiltumte chu min Siamtu chawimawi nan i hmang ang u.

[Bâwm]

Thlarau Lam Thiltum Atâna Neih Theihte

○ Nî tina Bible Chhiar

○ Vênnainsâng leh Awake! chhuak thar apiang chhiar

○ Kan ṭawngṭaina tihhmasâwn

○ Thlarau rahte lantîr

○ Rawngbâwlna zauh

○ Thiam lehzuala thu hrilh leh zirtîr

○ Phone hmang leh tawnchawpa thu hrilhna, leh sumdâwnna hmuna thu hrilhnaa thiamna tihmasâwn