Ná kachíñukayó nu̱ú Ndióxi̱ tasaá ndasakáʼnuyó ta̱ i̱xava̱ʼa miíyó

“TA̱ FILÓSOFO romano ta̱ ni̱xi̱yo siglo nu̱ú káchira: “Nu̱ú iin ta̱ xíka xíʼin iin barco, tá va̱ása xínira ndáa mií xa̱a̱ra kǒo ni iin ña̱ʼa kivi chindeétáʼan xíʼinra”. Ña̱ nda̱a̱ní kúú ña̱yóʼo, tá kúni̱yó vií kooyó xíniñúʼu ndakanixi̱níyó ndáa ki̱ʼva kachíñukayó nu̱ú Ndióxi̱ chí nu̱únínu.

Biblia káʼa̱nña xa̱ʼa̱ na̱ yiví na̱ viíní nda̱kanixi̱ní ndáa ki̱ʼva kachíñuna nu̱ú Ndióxi̱. Ta̱ Noé ka̱chíñura 50 ku̱i̱ya̱ ña̱ va̱ʼa ixava̱ʼara iin arca ña̱ va̱ʼa ka̱kura xíʼin na̱ veʼera. Ta saátu ta̱ Moisés ndiʼi tiempo xi̱ndakanixi̱níra xa̱ʼa̱ ña̱ ndakiʼinra chí nu̱únínu (Hebreos 11:​7, 26). Ndióxi̱ ni̱ka̱ʼa̱nra xíʼin ta̱ Josué ta̱ nda̱kiʼin chiñu nu̱ú ta̱ Moisés ña̱ va̱ʼa xa̱a̱ra ndakiʼinra ñuu Canaán (Deuteronomio 3:​21, 22, 28; Josué 12:​7-​24).

Ña̱ siglo nu̱ú, tu̱ʼun ña̱ ni̱ka̱ʼa̱n ta̱ Jesús ña̱ natúʼunna tu̱ʼun va̱ʼa xa̱ʼa̱ reino Ndióxi̱ iníí saá nu̱ú ñuʼú chi̱ndeétáʼanníña xíʼin ta̱ Pablo ña̱ ndaka̱xin viíra ndáa ki̱ʼva kachíñura nu̱ú Ndióxi̱ (Mateo 24:14). Xa̱ʼa̱ tu̱ʼun ña̱ ni̱ka̱ʼa̱n ta̱ Jesús xíʼin ña̱ ki̱tara nu̱ú ta̱ Pablo saátu ña̱ ku̱ʼu̱nra natúʼunra xíʼin na̱ yiví xa̱ʼa̱ ki̱vi̱ra, ta̱ Pablo va̱ʼaní chiñu ke̱ʼéra, xa̱ʼa̱ ña̱kán ki̱xáʼa íyo ku̱a̱ʼá congregación iníí Asia Menor xíʼin Europa (Hechos 9:​15; Colosenses 1:​23).

Ndiʼi tiempo yóʼo na̱ káchíñu nu̱ú Ndióxi̱ ndákundeéna káchíñukana nu̱úra tasaá xáa̱na ndásakáʼnuna miíra. ¿Ndáa ki̱ʼva chinúuyó meta nu̱úyó ña̱ kachíñukayó nu̱ú Ndióxi̱ tiempo vitin? ¿Ndáa meta va̱ʼa koo ña̱yóʼo ta ndáaña xíniñúʼu keʼéyó ña̱ va̱ʼa sáxi̱nuyóña?

¿Nda̱chun kúni̱yó kuumiíyó meta?

Va̱ʼa kuumiíyó nda̱a̱ ndáaka meta chi ndiʼi na̱ yiví chínúuna meta nu̱úna. Soo ña̱ ndákanixi̱níyó keʼéyó á meta ña̱ kúúmiíyó síínní íyoña nu̱ú ña̱ kúúmií na̱ yiví na̱ va̱ása káchíñu nu̱ú Ndióxi̱. Soo ña̱ kúni̱ ku̱a̱ʼá na̱ yiví keʼéna kúú ña̱ kuumiína ku̱a̱ʼá xu̱ʼún, kuumiína iin chiñu va̱ʼa ta kaʼndana chiñu nu̱ú inkana. Iin ña̱ va̱ása va̱ʼa kúú ña̱ tá ná kuni̱yó keʼéyó iin ña̱ʼa xa̱ʼa̱ ña̱ kúni̱yó ndukáʼnuyó nu̱ú inkana á ña̱ kuta̱ayó nu̱ú inkana. Tá kúúmiíyó meta ña̱ kachíñuyó nu̱ú Jehová, ña̱yóʼo kítáʼanña xíʼin ña̱ ndasakáʼnuyóra (Mateo 6:​33). Ta kúni̱yó keʼéyó ña̱yóʼo saáchi kúʼvi̱-iniyó xíniyó Ndióxi̱ ta saátu na̱ yiví (Mateo 22:​37-​39; 1 Timoteo 4:​7).

Tá kúúmiíyó meta ña̱ kachíñuyó nu̱ú Ndióxi̱ ti̱xin congregación á ña̱ kuaʼnuyó xíʼin tu̱ʼunra xíniñúʼu viíní ndakanixi̱níyó ndáa xa̱ʼa̱ kúú ña̱ kúni̱yó keʼéyóña. Soo sava yichi̱ va̱ása kivi saxínuyó metayó ni ña̱ va̱ʼaní kúúña. ¿Ndáa ki̱ʼva nda̱kaxinyó ña̱ kúni̱yó keʼéyó ta ndáa ki̱ʼva saxínuyóña?.

Ndáyáʼviní ña̱ ku̱niyó keʼéyóña

Ná kotoyó ndáa ki̱ʼva keʼé Jehová ndiví. Ta̱yóʼo nda̱taʼvíra ki̱vi̱: “Ta ni̱xi̱yo xi̱kúaa̱ xíʼin xi̱ta̱a̱n” (Génesis 1:​5, 8, 13, 19, 23, 31). Tá ki̱xáʼara kéʼéra ndiʼi ña̱ʼa, xi̱xinira ndáa ki̱ʼva keʼéra ndiʼi ña̱ʼa. Ta saxínuvara ña̱ xi̱kuni̱ra keʼéra (Apocalipsis 4:​11). Ta̱ Job ni̱ka̱ʼa̱nra: “Tá kúni̱ra [Jehová] keʼéra iin ña̱ʼa kéʼévaraña” (Job 23:13). Jehová ku̱si̱íní-inira tá ki̱ʼinra kuenta xíʼin ndiʼi ña̱ ke̱ʼéra ta ni̱ka̱ʼa̱nra ña̱ va̱ʼaníña (Génesis 1:​31).

Tá kúni̱yó saxínuyó ña̱ ni̱ka̱ʼa̱nyó keʼéyó, xíniñúʼu kuni̱níyó keʼéyóña. ¿Ndáaña chindeétáʼan xíʼinyó ña̱ ku̱ni̱yó saxínuyóña? Tá kúma̱níka ndasavií Jehová nu̱ú ñuʼú yóʼo xa̱a̱ xi̱xinira ndáa ki̱ʼva kooña: tá sa̱ndíʼira nda̱saliviraña, ta xa̱ʼa̱ ña̱ va̱ʼaní ku̱va̱ʼaña ndasakáʼnunara. Ta ki̱ʼva saá keʼé miíyó ña̱ kuni̱yó saxínuyó ña̱ nda̱kaxinyó keʼéyó ta ná ndakanixi̱níyó ndáaña va̱ʼa ndakiʼinyó, ndáaña va̱ʼa saxínuyó ,ndáaña va̱ʼa ndakiʼinyó tá ná saxínuyó metayó. Saá ndo̱ʼo ta̱ Tony ta̱ kúúmií 19 ku̱i̱ya̱. Nda̱a̱ ni iin yichi̱ kǒo ní nandóso-inira ña̱ yichi̱ nu̱ú ña̱ xi̱nira Betel na̱ testigo Jehová ña̱ ndíkaa̱ chí Europa occidental. Ta nani saá xi̱ndakanixi̱níra ndáa ki̱ʼva koora tá ná kachíñura kán. Nda̱a̱ ni iin yichi̱ kǒo ní ndakanixi̱níra xa̱ʼa̱ ña̱yóʼo ta xi̱chikaa̱ra ndee̱ ña̱ saxínuraña. Nda̱kanixi̱ní ña̱ ni̱kusi̱íní-inira ña̱ tá ni̱ya̱ʼa loʼo ku̱i̱ya̱ ka̱nanara ña̱ ku̱ʼu̱nra kachíñura Betel.

Ña̱ kitáʼanyó xíʼin na̱ yiví na̱ xa̱a̱ ke̱ʼé táʼan ña̱ kúni̱yó keʼéyó, va̱ʼaní chindeétáʼanña xíʼinyó. Ta̱ Jayson ta kúúmií 30 ku̱i̱ya̱, kǒo níxi̱kusi̱í-inira ña̱ natúʼunra xíʼin na̱ yiví tá ni̱xi̱yo loʼora, soo tá sa̱ndíʼira ka̱ʼvira bachillerato, saá ki̱xáʼara kúúra precursor ta kixáʼara káchíñura nu̱ú Jehová ku̱a̱ʼá tiempo. ¿Ndáaña chi̱ndeétáʼan xíʼira ña̱ kuni̱ra koora precursor? Ta̱yóʼo káchira: “Ña̱ chi̱ndeétáʼan xíʼi̱n kúú ña̱ ku̱táʼi̱n xíʼin na̱ hermano na̱ kúú precursor ta xi̱kitai̱ xi̱natúʼi̱n xíʼinna xa̱ʼa̱ Ndióxi̱”

Iin ña̱ va̱ʼa kúú ña̱ kaʼyíyó meta ña̱ kúúmiíyó

Tá káxi íyo ña̱ kúni̱yó keʼéyó káxi kúnda̱a̱-inina xíʼinña. Ta Salomón ni̱ka̱ʼa̱nra ña̱ tá káxi íyo ña̱ káʼa̱nna xíʼinyó chindeétáʼanña xíʼinyó keʼéyó ña̱ va̱ʼa xíʼin ña̱ tákuyó (Eclesiastés 12:11). Tá káʼyiyó ña̱ kúni̱yó keʼéyó ña̱yóʼo kíndo̱oña xi̱níyó xíʼin níma̱yó. Xa̱ʼa̱ ña̱kán ni̱ka̱ʼa̱n Jehová xíʼin na̱ reyes ñuu Israel ña̱ ná kaʼyína copia ña̱ Ley (Deuteronomio 17:18). Ña̱ va̱ʼaní kúú ña̱ ná kaʼyíyó ña̱ kúni̱yó keʼéyó ta kotoyó ndáa ki̱ʼva keʼéyóña, ta saátu kaʼyíyó ña̱ kivi ixayo̱ʼvi̱ xíʼinyó ña̱ saxínuyóña. Ta saátu kivi ndakanixi̱níyó ndáaña kivi kaʼviyó xa̱ʼa̱, ndáaña kivi keʼéyó ña̱ saxínuyóña ta ndáana kivi chindeétáʼan xíʼinyó ña̱ saxínuyóña.

Ña̱ xi̱kuumií ta̱ Geoffrey meta ña̱yóʼo kúú ña̱ chi̱ndeétáʼan xíʼinra ña̱ táxi̱n koo inira, ta̱yóʼo xa̱a̱ ku̱a̱ʼání ku̱i̱ya̱ kúúra precursor especial iin país ña̱ íyo chí Asia. Ñá síʼíra inkama ni̱xi̱ʼi̱ñá. Tá ni̱ya̱ʼa loʼo tiempo ta̱ Geoffrey nda̱kaxinra ña̱ ku̱a̱ʼáka tiempo kachíñura nu̱ú Ndióxi̱. Xa̱ʼa̱ ña̱ ka̱ʼyíra ña̱ kúni̱ra keʼéra ta saátu ndu̱kúra nu̱ú Jehová ña̱ ná chindeétáʼanra xíʼinra, chi̱kaa̱ra ndee̱ ña̱ kaʼvira xíʼin u̱ni̱ na̱ yiví tá kúma̱níka ndiʼi iin yo̱o̱. ndiʼi ki̱vi̱ xi̱xitora ndáaña keʼéra, ta tá ni̱ya̱ʼa u̱xu̱ ki̱vi̱ xi̱xitora ndáaña xi̱keʼéra. ¿Á sa̱xínura ña̱ xi̱kuni̱ra keʼéra? Kúsi̱í-inira káʼa̱nra ña̱ ku̱chiñuvara, chi su̱ví u̱ni̱ na̱ yiví ki̱xáʼara káʼvira xíʼin chi u̱ni̱na ki̱xáʼara káʼvira xíʼin.

Meta ña̱ kúni̱yó keʼéyó ti̱xin loʼo tiempo va̱ʼaní chindeétáʼanña xíʼinyó

Sava meta ña̱ kúúmiíyó kivi ndakanixi̱níyó ña̱ kǒo kuchiñuyó saxínuyóña. Ta̱ Tony ta̱ xa̱a̱ ni̱ka̱ʼa̱nyó xa̱ʼa̱, xi̱ndakanixi̱níra ña̱ kǒo kuchiñura kachíñura Betel na̱ testigo Jehová saáchi va̱ása ní xi̱kachíñura nu̱ú Ndióxi̱ ni ña̱ ndataxira miíra ndaʼa̱ Ndióxi̱. Soo nda̱ka̱xíra keʼéra ña̱ káʼa̱n Jehová ta ki̱xáʼara káchíñura nu̱ú Jehová ña̱ va̱ʼa ndakuchira. Tá xa̱a̱ nda̱kuchira nda̱kanixi̱níra ña̱ koora precursor auxiliar, tándi̱ʼi regular; ta ña̱ va̱ʼa ke̱ʼéra ña̱yóʼo ka̱ʼyíraña nu̱ú calendario ña̱ kúúmiíra. Tá ni̱xa̱a̱ra ndu̱ura precursor loʼo tiempo kǒo níndakanikaxi̱níra ña̱ va̱ása kuchiñura kachíñura Betel.

Sava meta ña̱ kúni̱yó keʼéyó tá ná ya̱ʼa ku̱a̱ʼá ku̱i̱ya̱ kivi ndataʼvíyó ña̱yóʼo ta saá loʼo tá loʼo kixáʼayó saxínuyóña. Tá ná ndakanixi̱níyó xa̱ʼa̱ ña̱ xa̱a̱ sa̱xínuyó ña̱yóʼo, kivi chindeétáʼanña xíʼinyó ña̱ keʼéyó ña̱ kúma̱ní keʼéyó. Ña̱kán tá ndiʼi tiempo ná ndakanixi̱níyó xa̱ʼa̱ ña̱ kúni̱yó keʼéyó va̱ʼaní chindeétáʼanña xíʼinyó. Ndiʼi tiempo ná ka̱ʼa̱nyó xíʼin Jehová xa̱ʼa̱ meta ña̱ kúni̱yó, saátu ña̱yóʼo chindeétáʼanña xíʼinyó ña̱ saxínuyó ña̱ kúni̱yó. Ta̱ apóstol Pablo ni̱ka̱ʼa̱nra: “Ka̱ʼa̱n ni̱ʼindó xíʼin Ndióxi̱” (1 Tesalonicenses 5:​17).

Chikaa̱yó ndee̱ ña̱ saxínuyóña

Ni va̱ʼa ndákanixi̱níyó xa̱ʼa̱ ña̱ kúni̱yó keʼéyó, sava ña̱yóʼo kǒo kivi saxínuyóña. Ndakanixi̱níndó ndáaña ndo̱ʼo ta̱ Juan Marcos tá kǒo níxiin ta̱ apóstol Pablo ña̱ ku̱ʼu̱nra xíʼinra yichi̱ u̱vi̱ ña̱ ni̱xa̱ʼa̱nra xi̱tora na̱ hermano (Hechos 15:​37-​40). Ta̱ Marcos xi̱niñúʼu sakúaʼara iin ña̱ʼa xíʼin ña̱ ku̱u yóʼo ta na̱samara ña̱ xi̱kunira keʼéra ña̱ va̱ʼa kachíñukara nu̱ú Jehová. Ta saá ke̱ʼéra. Tá ni̱ya̱ʼa loʼo ta̱ Pablo va̱ʼaní ni̱ka̱ʼa̱nra xa̱ʼa̱ ta̱ Marcos, ta̱yóʼo va̱ʼaní xi̱kitáʼanra xíʼin ta̱ apóstol Pedro chí Babilonia (2 Timoteo 4:​11; 1 Pedro 5:​13). Ta iin ña̱ va̱ʼa ña̱ nda̱kiʼinra kúú ña̱ ka̱ʼyíra tutu ña̱ nátúʼun xa̱ʼa̱ ta̱ Jesús.

Ki̱ʼva saá kivi kundoʼo miíyó sava yichi̱ ña̱ saxínuyó ña̱ kúni̱yó keʼéyó. Ná kǒo ndakava-iniyó ná ndakaʼányó xa̱ʼa̱ ña̱ xa̱a̱ ke̱ʼéyó, ná ndakanixi̱níyó xa̱ʼa̱ metayó ta ná nasamayó sava ña̱ʼa. Tá ná koo ña̱ kasi nu̱úyó ná chikaa̱yó ndee̱ ña̱ ya̱ʼayó nu̱úña. Ña̱yóʼo kúú ña̱ káʼa̱n ta̱ rey Salomón: “Ka̱ʼa̱n xíʼin Jehová xa̱ʼa̱ ndiʼi ña̱ kúni̱ún keʼún, ta saá va̱ʼa kana ndiʼi ña̱ kúni̱ún keʼún” (Proverbios 16:​3).

Sava yichi̱, xa̱ʼa̱ ndiʼi ña̱ ndóʼoyó kǒo saxínuyó ndiʼi ña̱ kúni̱yó keʼéyó. Tá kúú, xa̱ʼa̱ ña̱ kúúmiíyó iin kue̱ʼe̱ á íyo iin na̱ veʼeyó na̱ xíniñúʼu kundaayó. Soo ná kǒo nandóso-iniyó xa̱ʼa̱ ña̱ ndátuyó ndakiʼinyó ña̱ kooyó ndiʼi tiempo nu̱ú ñuʼú yóʼo á chí ndiví (Lucas 23:43; Filipenses 3:​13, 14). ¿Ndáa ki̱ʼva saxínuyó ña̱ kúni̱yó? Ta̱ apóstol Juan ka̱chira: “Na̱ kéʼé ña̱ kúni̱ Ndióxi̱ kutakuna ndiʼi tiempo” (1 Juan 2:17). Tá kǒo kúchiñuyó saxínuyó ña̱ kúni̱yó keʼéyó, kivikava kandíxayó Ndióxi̱ ta̱ nda̱a̱ ta keʼéyó ña̱ káʼa̱nra (Eclesiastés 12:13). Ña̱ ndakanixi̱níyó ña̱ kachíñuyó nu̱ú Ndióxi̱ ña̱yóʼo chindeétáʼanña xíʼinyó ña̱ keʼéyó ña̱ kúni̱ra. Ña̱kán ná chikaa̱yó ndee̱ ña̱ kachíñukayó nu̱ú Jehová ta ná saxínuyó ña̱ kúni̱yó keʼéyó ña̱ va̱ʼa ndasakáʼnuyó Jehová.

[Recuadro]

Meta ña̱ kivi keʼéyó

○ Kaʼviyó Biblia ndiʼi ki̱vi̱

○ Kaʼviyó ndiʼi ña̱ Tutu Ña̱ Nátúʼun xíʼinyó xíʼin ¡Despertad!

○ Viíka ka̱ʼa̱nyó xíʼin Jehová

○ Kuumiíyó fruto ña̱ espíritu

○ Ku̱a̱ʼáka kitayó natúʼunyó xíʼin na̱ yiví

○ Vií va̱ʼaka natúʼunyó ta saátu ña̱ sanáʼa̱yó

○ Vií natúʼunyó xíʼin na̱ yiví xíʼin teléfono, nda̱a̱ ndáaka nu̱ú xíkayó ta saátu ña̱ negocio