Ipeele Dipakane tša Moya Bakeng sa go Tumiša Mmopi wa Gago

“GE MONNA a sa tsebe boema-kepe bjo a yago go bjona, ga go na taba gore phefo e foka e e-tšwa kae.” Mantšu a, ao go thwego a boletšwe ke radifilosofi wa lekgolong la pele la nywaga wa mo-Roma, a šupa go therešo ya gore e le gore bophelo bo be le moo bo lebilego gona, dipakane ke tša bohlokwa kudu.

Beibele e nea mehlala ya batho bao ba bego ba sekametše go beeng dipakane. Ka go šoma ka thata ka nywaga e ka bago 50, Noage ‘o ile a dira polokelo bakeng sa go phološa ba lapa la gagwe.’ Moporofeta Moše o ile ‘a lebelela moputso wo a tlogo o bona.’ (Ba-Hebere 11:7, 26) Mohlatlami wa Moše e lego Jošua, o ile a amogela pakane yeo a e neilwego ke Modimo ya go fenya naga ya Kanana.—Doiteronomio 3:21, 22, 28; Jošua 12:7-24.

Lekgolong la pele la nywaga C.E., ga go na pelaelo gore dipakane tša moya tša moapostola Paulo di ile tša tutuetšwa kudu ke mantšu a Jesu a gore “ditaba tše tše dibotse tša mmušo di tla bolelwa lefaseng ka moka leo go agilwego go lona.” (Mateo 24:14, NW) A kgothatšwa ke melaetša ya motho ka noši le dipono tše di tšwago go Morena Jesu, go akaretša le kabelo ya go “xo iša ’ina la [Jesu] xo bantlê,” Paulo o ile a kgatha tema e bohlokwa kudu go hlomeng diphuthego tše dintši tša Bokriste go phatša Asia Minor le go tsena Yuropa.—Ditiro 9:15; Ba-Kolose 1:23.

Ee, bahlanka ba Jehofa go theoša le nywaga ba ile ba bea dipakane tše dikgolo gomme ba ile ba di phethagatša bakeng sa go tumiša Modimo. Lehono re ka ipeela bjang dipakane tša moya? Re ka katanela go fihlelela dipakane dife, gomme ke megato efe e šomago yeo re ka e gatago bakeng sa go di fihlelela?

Maikemišetšo a Mabotse a Bohlokwa

Dipakane di ka bewa mo e ka bago karolong le ge e le efe ya bophelo, gomme lefase le le lona le na le batho bao ba sekametšego go beeng dipakane. Lega go le bjalo, dipakane tša pušo ya Modimo ga di swane le dikganyogo tša lefase. Morero o mogolo wa dipakane tše dintši lefaseng ke kganyogo e feteletšego ya go nyaka go huma le go kganyoga ka megabaru maemo le matla a go laola. E tla ba phošo gakaakang go phegelela pakane ya go ba le matla a go laola le botumo! Dipakane tšeo di tumišago Jehofa Modimo di tswalana ka go lebana le borapedi bja rena go yena gotee le dikgahlego tša Mmušo. (Mateo 6:33) Dipakane tše bjalo di tšwa leratong la go rata Modimo le magagabo motho le go ba ga tšona le morero wa boineelo go Modimo.—Mateo 22:37-39; 1 Timotheo 4:7.

Anke maikemišetšo a rena e be ao a nepagetšego ge re bea le go phegelela dipakane tša moya, e ka ba e le tša go ba le ditokelo tše oketšegilego tša tirelo goba tša go dira tšwelopele ya motho ka noši ya moya. Lega go le bjalo, gaešita le dipakane tšeo di dirwago ka maikemišetšo a mabotse, ka dinako tše dingwe ga di fihlelelwe. Re ka bea bjang dipakane gomme ra oketša kgonagalo ya go ka di fihlelela?

Re Swanetše go ba le Kganyogo e Tiilego

Ela hloko kamoo Jehofa a ilego a hlola legohle ka gona. Jehofa o ile a swaya dinako tše di latelanago tša tlholo ka mantšu a rego: “Ya ba mantšibua; ya ba mosô.” (Genesi 1:5, 8, 13, 19, 23, 31) Mathomong a lebaka le lengwe le le lengwe la tlholo, o be a tseba gabotse pakane, goba morero wa gagwe bakeng sa letšatši leo. Le gona Modimo o ile a phethagatša morero wa gagwe wa go bopa dilo. (Kutollo 4:11) Mopatriareka Jobo o itše: “[Jehofa] ó dira se pelo ya xaxwe e se rataxo.” (Jobo 23:13) E swanetše go ba e bile mo go kgotsofatšago gakaakang go Jehofa go bona “tšohle tše a di dirilexo” gomme a bolela gore ke “tše botse kudu”!—Genesi 1:31.

E le gore dipakane tša rena di phethagale, le rena re swanetše go ba le kganyogo e tiilego ya go di  fihlelela. Ke’ng seo se tla re thušago go hlagolela kganyogo e bjalo e tseneletšego? Gaešita le nakong ya ge lefase le be le se na sebopego e bile le se na selo, Jehofa o ile a kgona go bona mafelelo e sa le pele—lebenyabje le lebotse leo le lego sebaka-bakeng, le mo nea letago le kgodišo. Ka mo go swanago, kganyogo ya rena ya go phethagatša seo re ikemišeditšego go se dira e ka hlagolelwa ka go naganišiša ka mafelelo le mehola ya go fihlelela pakane yeo. Yeo e bile phihlelo ya Tony wa nywaga e 19. Le ka mohla ga se a ka a lebala kamoo a ilego a ikwa ka gona ge a be a etela ka lekga la mathomo ofising ya lekala la Dihlatse tša Jehofa kua Yuropa Bodikela. Go tloga ka nako yeo go ya pele, potšišo yeo e ilego ya dula e le ka monaganong wa Tony e be e le ya gore, ‘Go be go tla ba bjang go phela le go hlankela lefelong la go swana le leo?’ Le ka mohla Tony ga se a ka a kgaotša go nagana ka kgonagalo ya go ka ba fao, gomme o ile a tšwela pele a šomela go fihlelela pakane yeo. O be a thabile gakaakang ge nywaga e mmalwa ka morago kgopelo ya gagwe ya go hlankela lekaleng e be e amogelwa!

Go gwerana ga rena le ba bangwe bao ba šetšego ba fihleletše pakane e itšego le gona go ka tšweletša ka go rena kganyogo ya go e fihlelela. Jayson wa nywaga e 30, o be a sa thabele go tšea karolo bodireding bja tšhemo ge a be a le mathomong a nywaga ya gagwe ya mahlalagading. Eupša ka morago ga go fetša thuto ya gagwe ya sekolong se se phagamego, ka phišego o ile a tsenela tirelo ya bobulamadibogo, ka go rialo a ba mogoeledi wa Mmušo wa nako e tletšego. Ke’ng seo se thušitšego Jayson go hlagolela kganyogo ya go bula madibogo? O araba ka gore: “Go boledišana le ba bangwe bao ba ilego ba bula madibogo le go šoma le bona bodireding go ile gwa ntutuetša kudu.”

Go Ngwala Dipakane tša Rena go ka Thuša

Kgopolo e sa kwagalego gabotse e ba molaleng le go ba e kwagalago ge re kgetha mantšu a go e bolela. Salomo o ile a lemoga gore mantšu a nepagetšego e ka ba a matla bjalo ka magapeletši goba ditomo bakeng sa go nea tlhahlo bophelong. (Mmoledi 12:11) Ge mantšu ao a ngwadilwe fase, e ba ao a tutuetšago monagano le pelo ka mo go tseneletšego. Le gona ke ka baka la’ng Jehofa a be a ka laela dikgoši tša Isiraele go itirela kopi ya motho ka noši yeo e ngwadilwego ya Molao? (Doiteronomio 17:18) Ka go rialo re ka kganyoga go ngwala dipakane tša rena letlakaleng gotee le tsela ya go di fihlelela, re lokeletše mapheko ao re letetšego go ka gahlana le ona mo tseleng gotee le mekgwa ya go a phema. Le gona e ka ba mo go thušago go tseba ditaba tšeo re swanetšego go ba le tsebo ka tšona, bokgoni bjoo re swanetšego go ba le bjona le batho bao ba ka re thušago gotee le go re thekga.

Go ipeela dipakane tša moya go ile gwa ba le mafelelo a homotšago go Geoffrey, mmulamadibogo yo a kgethegilego wa nako e telele wa tšhemong yeo e lego lekatana ya kua nageng ya Asia. O ile a welwa ke masetla-pelo ge mosadi wa gagwe a be a hlokofala ka mo go sa letelwago. Ka morago ga nako ya go itlwaelanya le boemo, Geoffrey o ile a dira phetho ya go swarega ka mo go feletšego bodireding bja gagwe bja bobulamadibogo ka go bea dipakane. Ka morago ga go ngwala seo a se rerilego letlakaleng, ka thapelo o ile a ipeela pakane ya go thoma dithuto tša Beibele tše tharo tše difsa mafelelong a kgwedi. Letšatši le lengwe le le lengwe, o be a lebelela modiro wa gagwe, gomme ka morago ga matšatši a mangwe le a mangwe a lesome, o be a hlahloba tšwelopele ya gagwe. Na o ile a fihlelela pakane ya gagwe? Ka go bega dithuto tša Beibele tše difsa tše nne, ka lethabo o araba ka gore ee!

Bea Dipakane tša Nakwana e le Maswao

Dipakane tše dingwe mathomong di ka bonagalago di sa fihlelelege gabonolo. Go Tony yoo go boletšwego ka yena pejana, go hlankela ofising ya  lekala ya Dihlatse tša Jehofa go be go bonagala go le bjalo ka toro. Seo se be se le bjalo ka gobane mokgwa wa gagwe wa bophelo e be e le o sa kgahlišego, le gona o be a se a tšwa a ineela go Modimo. Eupša Tony o ile a dira phetho ya go dumelelanya bophelo bja gagwe le ditsela tša Jehofa gomme a itirela pakane ya gore a swanelegele bakeng sa kolobetšo. Ka morago ga go fihlelela pakane yeo, o ile a ipeela pakane ya go tšea bobulamadibogo bja go thuša le bja ka mehla gomme a swaya almanakeng ya gagwe matšatši ao a thomilego ka ona. Ka morago ga go bula madibogo ka nakwana, go hlankela ofising ya lekala ga se gwa bonagala go le bjalo ka pakane yeo e sego ya kgonthe.

Le rena ka mo go swanago re ka dira gabotse gore re aroganye dipakane tša rena tša nako e telele gore e be dipakane tše sego kae tša nakwana. Dipakane tša magareng di ka šoma e le maswao a fihlelegago tseleng ya go fihlelela pakane e ya nako e letelele. Go ahla-ahla tšwelopele ya rena ka mehla ge e le mabapi le maswao a bjalo a lego tseleng go ka re thuša go dira gore monagano wa rena o dule o tsepame. Go rapela Jehofa leboelela mabapi le dipakane tša rena le gona go tla re thuša go kgomarela tsela yeo. Moapostola Paulo o kgothaleditše gore: “Le se kxaotše xo rapêla.”—1 Ba-Thesalonika 5:17.

Go Nyakega Boikemišetšo le go Phegelela

Go sa šetšwe go ba ga rena le dipakane tšeo di naganišišitšwego gabotse le kganyogo e matla ya go di phethagatša, dipakane tše dingwe di dula di sa fihlelelwa. Morutiwa Johane Mareka o swanetše go ba a ile a nyama gakaakang ge moapostola Paulo a be a sa nyake go sepela le yena leetong la gagwe la bobedi la boromiwa! (Ditiro 15:37-40) Mareka o ile a swanelwa ke go ithuta go tšwa go nyamišweng mo le go fetoša pakane ya gagwe gore e be ya tirelo e oketšegilego. Go molaleng gore o ile a dira bjalo. Ka moragonyana, Paulo o ile a bolela gabotse ka Mareka gomme a thabela bogwera bja kgaufsi kudu le moapostola Petro kua Babele. (2 Timotheo 4:11; 1 Petro 5:13) Mohlomongwe tokelo ya gagwe e kgolo kudu e be e le ya go ngwala pego e buduletšwego ya bophelo le bodiredi bja Jesu.

Le rena re ka lebeletšana le ditšhitišo ge re dutše re phegelela dipakane tša moya. Go e na le go lahlela toulo, re swanetše go seka-seka, re lekodišiše gomme re dire diphetogo. Ge go tšwelela mapheko, re swanetše go gatela pele ka boikemišetšo le ka go phegelela. Kgoši Salomo yo bohlale o re kgonthišetša gore: “Xafêla Morêna medirô ya xaxo ka moka; ké mo merêrô y’axo e tl’o xo phêthêxa.”—Diema 16:3.

Lega go le bjalo, ka dinako tše dingwe maemo a dira gore go phegelela dipakane tše itšego e se be ga kgonthe. Ka mohlala, boemo bja maphelo bjo bo fokolago goba boikarabelo bja lapa bo ka dira gore re se ke ra kgona go fihlelela dipakane tše dingwe. Anke le ka mohla re se ke ra lebala therešo ya gore moputso wo re tlago go o hwetša mafelelong ke bophelo bjo bo sa felego—legodimong goba Paradeiseng mo lefaseng. (Luka 23:43; Ba-Filipi 3:13, 14) Se se fihlelelwa bjang? Moapostola Johane o ngwadile gore: “E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Johane 2:17) Gaešita le ge boemo bja rena bo ka se re dumelele go fihlelela pakane e itšego, re sa dutše re ka ‘boifa Modimo, gomme ra lota ditaelo tša gagwe.’ (Mmoledi 12:13) Dipakane tša moya di re thuša go dula re tsepamišeditše kgopolo go direng thato ya Modimo. Ka go rialo anke re ipeeleng tšona bakeng sa go tumiša Mmopi wa rena.

[Lepokisi go letlakala 22]

Dipakane tša Moya Tšeo o ka Naganago ka Tšona

○ Go bala Beibele letšatši le letšatši

○ Go bala tokollo e nngwe le e nngwe ya Morokami le Phafoga!

○ Go kaonefatša boemo bja dithapelo tša rena

○ Go bontšha dienywa tša moya

○ Go fihlelela tirelo e okeditšwego

○ Go ba yo a atlegago kudu boboleding le go ruteng

○ Go hlagolela bokgoni bjo bjalo ka go nea bohlatse ka mogala, ka mo go sa rulaganyetšwago le mafelong a kgwebo