Usaren Iray Espiritual a Kalat Pian Igloria so Manamalsam

“SANO ag-amta na sakey a too no iner so pandaongan to, aliwan say direksion na dagem so problema.” Saratan a salita, a bibidbiren ya imbaga na sakey a Romanon pilosopo nen inmunan-siglo, so mangipapabitar ed katuaan ya importante iray kalat pian nawalaan na direksion so bilay.

Say Biblia so mangitatarya na saray alimbawa na saray indibidual a sinononot a tuloy ed panangiletneg na saray kalat. Diad impantrabaho to ed manga 50 a taon, si Noe so “angiparaan na sakey a biong a kilabanan na abung to.” Si propetan Moises et “inyan to so mata to ed katumangan.” (Hebreos 11:7, 26) Si Josue, a sinmalat ed si Moises, so akadampot ed inter na Dios a kalat a mangonkesta ed dalin na Canaan.​—Deuteronomio 3:21, 22, 28; Josue 12:7-24.

Nen inmunan siglo K.P., saray espiritual a kalat nen apostol Pablo so andi-duaruwan inimpluensyaan a tuloy na saray salita nen Jesus a “saya ya ebanghelyo na panarian nipulong naani ed sankamundoan.” (Mateo 24:14) Lapud sikatoy apaseseg ed personal iran mensahe tan pasingawey manlapud Katawan a Jesus, laktip lay asainmin a ‘mangawit ed ngaran [nen Jesus] ed arap na saray Gentiles,’ si Pablo so awalaan na importantin betang ed inkiletneg na dakel a Kristianon kongregasyon diad interon Asia Minor tan dia ed Europa.​—Gawa 9:15; Colosas 1:23.

On, saray lingkor nen Jehova so lawas angiletneg na atataragey a kalat tan dinampot da iratan, parad kigloriaan nen Jehova. Panon itayon makapangiletneg natan na espiritual iran kalat? Antoran kalat so nayarin gegemtanen tayo, tan antoray praktikal a kundang a nagawaan tayo pian nadampot iratan?

Importante Iray Dugan Motibo

Nayari so mangiletneg na saray kalat diad antokaman ya aspekto na bilay, tan sayan mundo so walaan met na saray totoon sinononot a tuloy ed panangiletneg na saray kalat. Balet, saray teokratikon kalat so miduma ed saray minumundon ambisyon. Saray manunan motibo ed dakel a kalat diad mundo et say alabas a pampilalek ed kayamanan tan agnapenek a pampirawat ed posisyon tan pakayari. Agaylan lingo so pangegemtan na kalat a nawalaan na pakayari tan inkaprominente! Saray kalat a mangiglogloria ed si Jehova a Dios so direktan misiglaotan ed panagdayew tayo ed sikato tan ed intereses na Panarian to. (Mateo 6:33) Saratan a kalat so makasengeg ed panangaro ed Dios tan ed kaparan too tan say pakawalaan na maridios a debosyon so gagala ra.​—Mateo 22:37-39; 1 Timoteo 4:7.

Komon ta susto iray motibo tayo diad pangiletneg tan pangegemtan tayo ed espiritual iran kalat, balanglan saratan et parad kaaruman iran pribilehyo ed panaglingkor odino parad personal a panamaaligwas ed espiritual. Anggaman ontan, agnadampot no maminsan iray kalat a walaan na dugan motibo. Panon itayon makapangiletneg na saray kalat tan lalon naseguro so pakadampot ed saratan?

Nakaukolan so Pirmin Pampilalek

Imanoen no panon a sinumpal nen Jehova so panamalsa to ed uniberso. Diad panamegley na saray salitan “wala nensaman so ngarem tan wala nensaman so kabuasan,” inggetar nen Jehova so mantutumbokan iran peryodo na panamalsa. (Genesis 1:5, 8, 13, 19, 23, 31) Diad gapo na kada peryodo na panamalsa, amta ton tuloy so kalat to, odino gagala to, ed satan a peryodo. Tan sinumpal na Dios so gagala to a palsaen so bengabengatla. (Apocalipsis 4:11) “No anto so pilalek na kamarerwa [nen Jehova], satan lanlamang so gawaen to,” so inkuan nen patriarkan Job. (Job 23:13) Agaylan malikeliket si Jehova diad impakanengneng to ed “amin a bengatla a ginawa to” tan inyabawag to a “maong iran tuloy”!​—Genesis 1:31.

 Pian nadampot iray kalat tayo, nepeg a walaan itayo met na pirmin pampilalek a dampoten iratan. Anto so ontulong ed sikatayo pian nabayuboan itan ya aralem a pampilalek? Anggan sanen anggapo ni itsura tan kibalatar ni so dalin, sankanengneng la nen Jehova so pansumpalan​—sakey a marakdakep a mablin bato ed liwang, a mangitarok na gloria tan galang ed sikato. Mipadpara, say pampilalek tayon sumpalen so ginetma tayon gawaen so nabayuboan diad pandalepdep ed saray resulta tan gunggona ed pakadampot na kalat. Ontan so naeksperiensya na 19 años a si Tony. Agton balot nalingwanan so maabig ya anengneng to sanen primero toy binmisita diad sangan opisina na saray Tasi nen Jehova diad Sagur a Europa. Manlapu la’d saman, onia so naynay lan panuumamengan nen Tony, ‘Anto kasi kipapasen na manayam tan manlingkor ed onman a lugar?’ Si Tony so agtinmundan nannonot ed posibilidad, tan sineetan to a dampoten itan. Agaylay liket to sanen kalabas na pigaran taon et naaprobaan so aplikasyon ton manlingkor diad sanga!

Say pilimog tayo ed arum ya akadampot la ed sakey a kalat so nayarin mamaseseg met ed sikatayo a dampoten itan. Si Jayson, a mantaon na 30, so agmaliket a mibiang diad lawak na ministeryo sanen kasakbayan na inkatin-edyer to. Balet kapangraduar to ed haiskul, nanggunaetan toy linmoob ed panagpayunir a serbisyo, kanian nagmaliw a sigpot-panaon a manangiyabawag na Panarian. Antoy tinmulong ed si Jayson pian nabayuboan to so pilalek a manpayunir? Oniay inyebat to: “Say pitotongtong ko ed arum a payunir la tan pikikimey ko ed sikara diad ministeryo so angimpluensyan maong ed siak.”

Makatulong so Pangisulat ed Saray Kalat Tayo

Say agmalinew ya ideya so magmaliw a malinew tan mabitar sano ibesngaw tayo itan diad saray salita. Impaimano nen Solomon a saray dugan salita so nayarin mapuersa a singa panikil diad pangiter na direksion ed bilay. (Eclesiastes 12:11) Sano nisulat iratan a salita, nipasepsep iratan a maong ed kanonotan tan puso. Akin ya ingganggan ni nen Jehova iray arari ed Israel a mansulat na personal a kopya ra na Ganggan? (Deuteronomio 17:18) Maabig sirin no isulat iray kalat tayo tan say paraan ed pakadampot ed saratan, ya ilista iray iilaloan tayon babeng pati saray paraan no panon iratan a talonaan. Makatulong met so pamidbir ed saray pamaakaran a nepeg tayon kabaten a maong, saray dunong a kaukolan tayon gamoran, tan saray indibidual a nayarin ontulong tan onsuporta ed sikatayo.

Say panangiletneg na dilin espiritual iran kalat so anambayo ed si Geoffrey, sakey ya abayag lan espisyal payunir diad nisulinek a teritorya ed sakey a bansa ed Asia. Sinmabi so trahedya sanen ag-inilaloan ya inatey so akulaw to. Kayari na impamalabas to ed agawa, denesidi nen Geoffrey ya iteen lan sigpot so nonot to ed pampapayunir to diad impangiletneg to na saray kalat. Kayari ton insulat iray plano to, diad tulong na saray pikakasi et niletneg to so kalat a mangigapo na taloran balon iyaaralan na Biblia diad mantapos na bulan. Kada agew, rerepasoen to so agawaan to, tan kada samploran agew, uusisaen to so iyaaligwas to. Kasin adampot to so kalat to? Diad impangireport to na apatiran balon iyaaralan na Biblia, sikatoy malikeliket ed impakadampot to ed kalat to!

Mangiletneg na Magano Iran Kalat Bilang Panalian

Diad gapo, ompatnag a mairap a nadampot so pigaran kalat. Parad si Tony, ya asalambit ed banda’d gapo, singano kugip labat so pakapanlingkor diad sangan opisina na saray Tasi nen Jehova.  Ontan so inisip to lapud pikewet so estiloy-panagbilay to nensaman, tan agni ingen dedikado ed Dios. Balet denesidi nen Tony ya itunos so bilay to ed saray dalan nen Jehova tan ginawa ton kalat so onkualipika ed bautismo. Sanen abautismoan la, ginawa ton kalat so pagmaliw ya auxiliary payunir tan regular payunir, a minarkaan to ed kalendaryo iray petsa na inggapo to. Kalabas na pigaran taon bilang payunir, ompatnag ya aliwa lan imposible so pakadampot to ed kalat a manlingkor diad sangan opisina.

Maabig no apag-apagen tayo met iray mabayag a kalat tayo diad pigaran magano a kalat. Nayarin panalian met iray nisaletsalet a kalat a sarag a dampoten legan a panggugunaetan a gamoran so manbayag a kalat. Makatulong ed sikatayo so maparanay a panrepaso ed iyaaligwas tayo nipaakar ed saratan a panalian pian mansiansian niyapasakey so kanonotan tayo. Makatulong met no mabetbet tayon ipikasi ed si Jehova iray plano tayo pian agtayo nisuawi ed kalat tayo. “Mikasi kayo ya andi-tunda,” so impaseseg nen apostol Pablo.​—1 Tesalonica 5:17.

Nakaukolan so Determinasyon tan Inkaseet

Anggaman maab-abig lay impanplano tayo tan pirmi la so pampilalek tayo a sumpalen iratan, siansia nin agnagagamoran so pigaran kalat. Ontan lay impakadismaya nen babangatan a Juan Marcos sanen sikatoy ag-impila nen apostol Pablo diad komaduan impanbaroy nen Pablo bilang misionaryo! (Gawa 15:37-40) Akaaral si Marcos na leksion manlapud sayan impakadismaya kanian inuman to so kalat to pian napadaak toy serbisyo to. Mapatnag ya agawaan to itan. Diad saginonor, si Marcos so paborablin sinalambit nen Pablo tan nanggayagaan to so maapit ya impilimog ed si apostol Pedro diad Babilonia. (2 Timoteo 4:11; 1 Pedro 5:13) Nayarin say sankaabigan a pribilehyo to et samay impansulat to na pinuyanan a salaysay nipaakar ed bilay tan ministeryo nen Jesus.

Diad pangegemtan tayo ed saray espiritual a kalat, nayarin wala met iray pakasaewan tayo. Imbes ya onsuko, nepeg tayon repasoen, usisaen lamet, tan umanen iray kalat tayo. Sano onlesa iray babeng, nakaukolan a determinado tan maseet itayon mansagpot pian onaligwas. “Imatalek mo so saray kimey mo ed Jehova, et saray kanonotan mo niletneg ira,” so impaseguro ed sikatayo nen makabat ya Arin Solomon.​—Uliran 16:3.

Ingen, no maminsan et aliwan realistiko so pakadampot ed pigaran kalat lapud saray sirkumstansya. Alimbawa, say maletey a bunigas odino saray obligasyon ed pamilya so nayarin mangamper ed sikatayon nadampot so pigaran kalat. Komon ta agtayon balot lilingwanan so katuaan a say ultimon tumang et andi-anggaan a bilay​—ed tawen odino diad Paraison dalin. (Lucas 23:43; Filipos 3:13, 14) Panon iyan nagamoran? Say “mangunor ed linawa na Dios onsiansia lawas,” so insulat nen apostol Juan. (1 Juan 2:17) Sano ag-iyabuloy na kipapasen tayo a nadampot so sakey a kalat, nayarian tayo nin siansia a ‘takotan so Dios, tan unoren iray ganggan to.’ (Eclesiastes 12:13) Ontulong ed sikatayo iray espiritual a kalat pian mansiansian niyapasakey so nonot tayo ed panggawa na linaway Dios. Usaren tayo sirin iratan pian nigloria so Manamalsa tayo.

[Kahon ed pahina 22]

Saray Espiritual a Kalat ya Ikonsidera

○ Pambasa ed Biblia ya inagew-agew

○ Pambasa ed kada paway na Say Panag-Bantayan tan Awake!

○ Pamaaligwas ed kalidad na saray pikakasi tayo

○ Pangipatnag ed saray bunga na espiritu

○ Pandampot ed apadaak a serbisyo

○ Pagmaliw a lalon epektibo diad panagpulong tan panagbangat

○ Pamayubo ed saray dunong a singa say pantasi panamegley na telepono, diad impormal a paraan, tan diad pasen na negosyo