Jehoväta mas sirwinapaq imakunata ruranapaq kaqman pensashun

MËTA ËWANAPAQ kaqta musyarqa, imëkanöpam tsë sitiuman chëta procurashun y chärirqa kushishqam sientikushun. Peru mëman chänapaq kaqta mana musyarqa, llutam mëpapis ëwakushun y mëman chëta mana musyarmi llakikushun. Tsë cuentallam imata ruranapaq kaqta puntallapitana pensanantsik y imëkanöpam rurëta tïranantsik. Pensanqantsikta rurarirqa kushishqam sientikushun.

Bibliachömi willakun unë witsanchö nunakunapis warë warätin imakunata rurayänampaq kaqman alli pensayanqanta. Por ejemplu, Noëmi 50 watapanö trabajarqan ‘wayinchö kawaqkuna salvakuyänampaq arcata rurarnin’. Diospa willakoqnin Moisesnam “pägutanö chaskinampaq kaq premiuta” imëpis pensarqan (Hebrëus 11:7, 26). Josuëpis Diosnintsik mandaptinmi Canaan markata imanö ushakätsinampaq kaqman pensarqan, pëqa Moisespa rantinmi israelïtakunata dirigirqan (Deuteronomiu 3:21, 22, 28; Josuë 12:7-24).

Jesusmi kënö nirqan: “Llapan nunakuna musyayänampaqmi teyta Diospa Gobiernumpita alli noticiakunata entëru patsachö willakuyanqa”. Tsënö ninqanmi apostol Pabluta animarqan imëkata rurar Jehoväta sirwinampaq (Mateu 24:14). Y yuripur shumaq animanqan y jutinta mëtsëman chätsir yanapakunampaq Jesus akranqampis apostol Pablutaqa animarqanmi Asia Menorchö y Euröpa kinrëkunachö congregacionkunata patsätsinampaq (Hëchus 9:15; Colosensis 1:23).

Unëpitam Jehoväta sirweqkunaqa imëkata rurëta procurayashqa Pëta alabayänanrëkur. Y noqantsikpis Jehoväta maslla sirwinapaq ¿Imakunatataq rurëta procurashwan? Y ¿imatataq ruranantsik rurëta munëkanqantsikta logranapaq?

Imatapis rurëta munarqa ama kikintsikllamanqa pensashuntsu

Kawë vïdantsikchöqa llapantsikmi imëkata rurëta munantsik. Peru Jehoväta sirweqkunaqa manam wakin nunakunanötsu kikintsikllaman yarpëkur imatapis rurëta munantsik, Jehoväta mana sirweqkunaqa kikinkunallaman pensëkurmi imatapis rurayan, rïcu këta munar, puëdeq këta munar y mandakoq këta munarnin. Pëkunanölla këta munar imatapis ruranqantsikqa mana allim kanman. Noqantsikqa imatapis rurantsik Jehoväta alabëta munar y Gobiernunta yanapëta munarmi (Mateu 6:33). Tsëmi Jehoväta sirwir imëkata rurëta munanapaqqa, Pëta y nuna mayintsikta kuyanqantsik yanapamäshun (Mateu 22:37-39; 1 Timoteu 4:7).

Jehoväta sirwinqantsikchö ima privilegiullatapis chaskita munarqa, Pëta alabanapaqmi kanan. Peru tsëkunata logrëta munarpis höraqa manam puëdintsiktsu. Tsëqa, ¿imatataq rurashwan?

Imëkanöpam logrëta procuranantsik

Yachakurishun kë patsata Jehovä imanö kamanqampita, Pëqa musyarqannam puntata imakunata ruranampaq kaqta. Tsëmi kënö nirqan: ‘Paqasyätsun’ y ‘warätsun’ (Genesis 1:5, 8, 13, 19, 23, 31). Imëkata kamar qallanqanllachömi musyarqan tsë kamanqan imanö yarqunampaq kaqta, y rurëkanqantaqa pensanqannöllam usharqan (Apocalipsis 4:11). Y sirweqnin Jobpis Jehoväpaq kënömi nirqan: “Rurëta munanqantaqa pensanqannöllam ruran” (Job 23:13). Jehoväqa llapan ruranqanta rikarqa alläpachi kushikurqan. Tsëmi “llapampis alläpa alli kanqanta” nirqan (Genesis 1:31).

Imatapis rurëta pensëkarqa, tsëta logranapaqmi kallpachakunantsik. Peru, ¿imaraq tsëpaq yanapamäshun? Imatapis lograrirnin imanö sientikunapaq kaqman pensanantsikmi. Kë patsachö manaraq imatapis kamarmi Jehovä Diosnintsikqa pensëkarqanna, llapanta kamar ushariptin imanö rikakunampaq kaqta. Llapampis alläpa shumaq kanampaq kaqta y Pëllata alabayänampaq kaqta. Tsëtam rurarqan 19 watayoq Tony jutiyoq jövinpis, pëqa Euröpa occidentalchö Jehoväpa testïgunkunapa principal oficïnanman visitakoq ëwanqantaqa imëpis yarparaqmi. Tsë junaqpitam pëqa oficïnakunachö kushishqa yanapakuyanqanta yarpaq. Tsëman yarpararmi, ëwëta munar imëpis kallpachakoq. ¡Imanö kushishqaraq sientikurqan watakuna pasariptin yanapakoq ëwanampaq Betelman invitariyaptin!

Jehoväta llapan tiempunkunawan sirwiyänampaq kallpachakoqkunawan juntakuypis pëkunanölla kanapaqmi yanapamantsik. Tsëtam rurarqan Jaysonpis, pëqa 30 watayoqmi, wamra kanqan witsanqa manam yachatsikuyta gustaqtsu. Peru secundarianta usharirqa precursor kanampaqmi decidirqan y llapan tiempunwanmi Diospita yachatsikurqan. Peru, ¿imataq pëtaqa yanaparqan precursor këta munanampaq? Kënömi willakun: “Precursorna wawqi panikunawanmi imëpis parlakoq kä y pëkunawanmi yachatsikoq kä, tsëmi yanapamarqan precursor kanäpaq”.

Imatapis rurëta pensëkanqëkita qellqë

Imatapis yarpanqantsikllawan o pensanqantsikllawanqa manam imapis rurakärintsu, tsëmi imata rurëta munanqantsikta parlakunantsik. Tsënö rurashqaqa vïdantsikchö imata ruranapaq kaqtam cläru musyashun, Salomon ninqannöpis tsëta ruranqantsikqa törukuna yapyanampaq puntayoq garröti yanapanqannömi kanqa (Eclesiastes 12:11). Tsëmi imatapis ruranapaq kaqta qellqanqantsikpis mana qonqanapaq yanapamäshun. Tsëchi Jehoväqa Leyninkunata copiar qellqayänampaq Israelchö reykunata mandarqan (Deuteronomiu 17:18). Allim kanman noqantsikpis imakunata rurëta munanqantsikta qellqashqaqa y qellqashwanmi tsë pensëkanqantsikta imanö cumplinapaq kaqta y imapis michämashqaqa tsë cäsuchö imata ruranapaq kaqtapis. Y ima yanapamänapaq kaqkunatam estudianantsik. Imakunachö mejoranantsik pishinqanta y pikuna yanapamänapaq kaqmampis pensanantsikmi.

Geoffreytaqa mana allikuna pasanqan höram Jehoväta imanö sirwinampaq kaqta cläru musyanqan yanaparqan. Pëqa precursor especialmi y Asiachö këkaq karu markachömi yanapakuykan. Peru llakikuypaqqa tsë wawqipa warminmi illaqpita wanukuykurqan. Tsënö kaptimpis warmin wanunqampita watakuna pasariptinqa yachakärirqanmi y Jehoväta maslla sirwinampaqmi churapakarqan. Tsëmi imata ruranampaq kaqta qellqarqan y Jehovätam yanapëkunampaq mañakurqan. Tsë killa manaraq ushaptinmi, kimsaq nunakunata Bibliapita yachatsinampaq churapakarqan, y cada junaqmi imanö tsëta rurëta puëdinampaq kaqman pensarqan. Y cäsi ishkë semänatanam tsë rurëta munëkanqanta imanö logrëkanqanta cuentata qokurqan y ninqannömi kimsaq nunakunata Bibliapita yachatsir qallëkurqan y juk mastapis taririrqanmi.

Puntataqa puëdinqantsikllataraq rurashun

Capazchi qallananllachöqa imatapis rurëta munanqantsikta mana puëdinapaq kaqta pensashun. Tsëmi pasarqan qallananchö parlanqantsik Tony jutiyoq jövintapis, pëqa Betelmanmi ëwëta munarqan. Peru manam bautizakurqanraqtsu y imëka mana allikunatam rurëkarqan. Peru Jehovä mandakunqannönam kawëta munarqan, tsëmi bautizakunampaq imëkata rurar kallpachakurqan y bautizakurirqanmi. Tsëpitanam precursor auxiliar nïkurna precursor regular këta munarqan y imë junaqpita precursor kanampaqmi juk calendariuman apuntarqan. Unëpana precursor kanqanmi yanaparqan Betelman mas fäcil invitayänampaq.

Rurëta pensëkanqantsikta logranapaqqa këta ruranqantsikpis yanapamäshunmi. Rurëta puëdinqantsikllawanraq qallashun. Tsëkunata cumplirqa mastapis rurëta puëdishunmi. Rurëta puëdinqantsikkunata cumplikanqantsikta rikarqa, kallpachakurmi sïguishun. Y Jehoväta mañakunqantsikpis yanapamäshunmi. Apostol Pablupis “Teyta Diosman imëpis mañakuyë” nirqanmi (1 Tesalonicensis 5:17).

Mana qelanarlla kallpachakur sïguishun

Yarpëkanqantsikta o pensëkanqantsikta logrëta munarpis, capazchi hörataqa logrëta puëdishuntsu. Apostol Pablu viajarnin yanaqänanta mana munaptinmi, Juan Marcuspis alläpa llakikurqan (Hëchus 15:37-40). Peru tsënö llakishqalla kakunampa rantinmi, Marcusqa kallpachakur sïguirqan y juknöpana Jehoväta sirwinampaq decidirqan. Tsënö kallpachakur sïguinqampitam tiempuwanqa apostol Pablupis pëpaq allita parlarqan. Marcusqa apostol Pëdruwampis alli amïgum tikrayarqan Babilonia markachö (2 Timoteu 4:11; 1 Pëdru 5:13). Juan Marcusqa Jehovä yanapaptinmi, Jesuspa vïdampaq y imanö yachatsikunqampaq qellqarqan. Capazchi imëkata ruranqankunapitapis tsëta ruranqanqa mas shumaq qarënö pëpaq karqan.

Jehoväta maslla sirwinapaq pensëkashqapis, capaz illaqpita imapis cambiarinman. Peru qelanänantsikpa rantinqa, logrëkanqantsikkunaman yarpäshun. Imëpis kallpachakur sïguishun Jehoväta juknöpana sirwinapaq. Imëka pasaptimpis kallpachakur sïguishun rurëta munanqantsikta logranqantsikyaq. Rey Salomonmi nirqan: “Imatapis rurëta munanqëkitaqa, Teyta Jehoväpa makinchö dejari y rurëta pensanqëkiqa llapampis allillam yarqunqa” (Proverbius 16:3).

Capaz kawë vïdantsikchö imapis cambiariptinqa rurëta pensanqantsikta rurashunnatsu. Qeshyapäkur, familiantsikta yanapanantsik kaptin. Peru tsënö kaptimpis ama qonqashuntsu, kë patsachö kar o ciëluchö karpis mana wañuypa kawakunapaq kaqta (Lücas 23:43; Filipensis 3:13, 14). Peru ¿imatataq ruranantsik tsënö kawakunapaqqa? Apostol Juanmi kënö nirqan: “Peru Teyta Dios munanqanta ruraqqa, imëyaqpis kawëkanqam” (1 Juan 2:17). Imëkapis cambianqanrëkur Jehoväta maslla sirwita mana puëdishqapis, ‘Teyta Diosta respetanapaq y mandakunqankunata cäsukunapaqmi’ kallpachakur imëkatapis rurëkantsik (Eclesiastes 12:13). Jehoväta sirwinqantsikchö maskunata rurëta munanqantsikmi yanapamäshun, pëta sirwir ocupädu kanapaq. Tsëqa, imëkata rurar Jehoväta sirwirnin kallpachakur sïguishun, tsënömi pëta alabashun.

[Recuadro]

Jehoväta sirwir këkunata ruranapaq kallpachakushun

○ Cada junaq Bibliata leyinapaq

○ Täpakoq y ¡Musyatsikoq! revistakuna yarqamoqllata leyinapaq

○ Jehovä Diosnintsikman mas shumaq mañakunapaq

○ Jehovä munanqannö kawëta procuranapaq

○ Maslla yachatsikoq yarqunapaq

○ Mas alli yachatsikoq kanapaq y nunakunata mas alli entienditsita procuranapaq

○ Mas alli yachatsikunapaq. Telëfunupa kar, negociukunachö o mëchö tsëchö karpis