Dios serviyninchikpi imatapas haypanapaq tantiakusun chaynapi payta kusichinapaq

ROMA nacionmanta yachayniyuq huk runam kaynata nirqa: “Sichu barcota manejaq runa mana yachanchu maymanpas risqanta, hinaspaqa wayrawanmi kaynaman-waknaman apaykachachikunqa”, nispa. Chaywanmi nichkarqa vidanchikpi allin kawsakunapaqqa kallpanchakunamanta.

Bibliapim niwanchik ñawpaq tiempopi Diosta serviqkuna Diosta astawan kusichinankupaq tantiakusqankumanta. Noeymi yaqa 50 wata buqueta ruwarqa, chaynapi ayllun mana wañunanpaq. Diosmanta willakuq Moisespas “premiota chaskiyta tukuy sunqunwan suyasqanraykum” tukuy imata saqirqa (Hebreos 11:7, 26). Josueytañataqmi Jehova Dios akllarqa Israel runakunata Canaan allpaman pusananpaq (Deuteronomio 3:21, 22, 28; Josuey 12:7-24 *).

Jesusmi nirqa: “Diospa munaychakuyninmanta kay sumaq willakuymi willakusqa kanqa enterollan kay pachapi”, nispa (Mateo 24:14). Apostol Pablom Jesuspa chayna nisqanta kasukunanpaq anchata kallpanchakurqa. Jesusmi apostol Pablota willakuykunawan chaynataq sueñoyninpi kallpancharqa. Chaymantapas paymanta willakunanpaqmi akllaykurqa. Chayraykum Pabloqa Asia Menor hinaspa Europa lawpi Diosmanta runakunaman willakurqa iñiqmasikichikkuna kanankupaq (Hechos 9:15; Colosenses 1:23).

Arí, Diosta serviqkunaqa ñawpaq tiempomantaraqmi payta astawan servinankupaq tantiakuspanku chaypaq kallpanchakurqaku. Chaypaqqa, ¿imaynatam ñuqanchikpas kallpanchakuchwan? ¿Imakunapi astawan kallpanchakunapaqmi tantiakuchwan? ¿Imakunatam ruwachwan tantiasqanchikman hina ruwanapaq?

Tantiakunanchikqa Diosta kusichinapaqmi

Yaqa llapallan runakunam riqsisqa hinaspa qullqisapa kayta munanku. Diosta serviqkunam ichaqa mana tukuy chaykunata haypananchikpaqchu tantiakunchik. Tantiakusqanchikqa Jehova Diostam kusichinan, chaymi kallpanchakunchik kamachiwasqanchikta kasukunapaq (Mateo 6:33). Chaynataqa ruwanchik Diosta hinaspa runamasinchikkunata kuyasqanchikraykum (Mateo 22:37-39; 1 Timoteo 4:7).

Diosta serviyninchikpi imapipas yanapakunapaq utaq allin iñiyniyuq kanapaq tantiakusqanchikqa kanan manam riqsisqa kanapaqchu, aswanqa Diosta kusichinapaqmi. Wakinpiqa manam tantiasqanchikman hinachu imapas kanman. Chaynaqa, ¿imakunataraqmi ruwananchik tantiakusqanchikman hina kallpanchakunapaq?

¿Imataq yanapawasun tantiasqanchikta haypanapaq?

Rimarisun kay allpanchikta Jehova Dios imayna ruwasqanmanta. Tukuy imata pisi-pisimanta unanchasqanmantam biblia kaynata nin: “Achkiytamá Dios suticharqa punchawwan, tutayaytañataq tutawan”, nispa (Genesis 1:5, 8, 13, 19, 23, 31). Diosqa sapa punchaw ima ruwanantaqa tantiarqañam, hinaspanmi chayman hina ruwarqa. Arí, tukuy imatamá tantiasqanman hina ruwarqa (Apocalipsis 4:11). Jobmi Jehova Diosmanta kaynata nirqa: “Payqa ruwanpunim imam munasqantaqa”, nispa (Job 23:13). Diosqa mayna kusisqachá tarikurqa tukuy ima ruwasqankuna “sumaqllaña kasqanta” qawaspanqa (Genesis 1:31).

Chaynaqa, ¿imataq yanapawasun imapas tantiasqanchikta haypanapaq? Jehova Diosqa tukuy imata manaraq unanchachkaspanpas ruwananpaq tantiasqankunataqa ruwasqa kasqanta hinañam qawarqa. Arí, tukuy imakuna ruwayta tukuruptin payta alabanankupaq hina kananpim yuyaymanarqa. Chaynam ñuqanchikpas imapas tantiasqanchikkuna cumplikuruptin imayna tarikunanchikpi yuyaymanananchik. Chaynam pasarqa 19 watanpi Tony sutiyuq jovenwan. Europa occidental lawpi betelman chayllaraq chayaruspanmi admirasqa tarikurqa. Chaymantapacham piensarqa betelpi kay mayna kusikunapaq kasqanpi, sapa punchaw chaypi piensaspanmi astawan kallpanchakurqa. Chaymanta qipata betelpi kananpaq invitaruptinkum ancha kusisqa tarikurqa.

Tantiakusqankuta haypaq iñiqmasinchikkunapas yanapawachwanmi tantiakusqanchikta haypanapaq. 30 watanpi kaq Jaysonmi warmallaraq kaspanqa mana kusisqachu Jehova Diosmanta willakuq. Ichaqa colegionta tukuruspanmi precursor regular kayta qallaykurqa. Chaymantapacham tukuy tiemponwanña Diosmanta willakurqa. ¿Imataq yanaparqa precursor kananpaq? Kikinmi nin: “Precursorña kaqkunawan rimasqaymi hinaspa paykunawan Diosmanta willakusqaymi yanapawarqa”, nispa.

Imapaq tantiakusqanchiktam anotachwan

Diosta serviyninchikpi imata haypanapaq piensaylla-piensanamantaqa anotakunanchikmi. Salomonmi nirqa yachayniyuqpa nisqankunaqa kawsakuyninchikpi imatapas allinta akllanapaq yanapawasqanchikta (Eclesiastes 12:11). Imata haypanapaq tantiasqanchikta anotayqa utaq qillqayqa yuyayninchikpiwan sunqunchikpim takyan. Chayraykuchá Jehova Diosqa ñawpaq Israel nacionpi reykunata kamachirqa Leyta copianankupaq (Deuteronomio 17:18). Chaynaqa, allinmi kanman Dios serviyninchikpi imakunata haypanapaq tantiasqanchikta qillqayqa chaynataq chayta haypanapaq imakuna ruwananchikta qillqaypas. Qillqachwantaqmi chay tantiasqanchikta haypanapaq ima sasachakuykuna kanantapas chaynataq chayta atipanapaq imakuna ruwananchikmantapas. Allintaqmi kanman chay tantiasqanchikta haypanapaq ima yachachikuykuna estudianapaq, imakunata ruwanapaq hinaspa pikuna yanapawananchikpi piensaypas.

Geoffrey sutiyuq iñiqmasinchikmanta rimarisun. Payqa Asia lawpim unay wataña precursor especial kachkan. Paytam llaki pasaruptin anchata yanaparqa Dios serviyninpi imata haypananpaq tantiakusqan. Warmichan qunqaymanta wañukuptinmi ancha llakisqa tarikurqa. Chaymanta watakuna pasaytam Geoffreyqa precursor kaspan Diosmanta astawan willakunanpaq tantiakururqa. Imapi kallpanchakuy munasqantam papelpi anotarqa. Chaymantapas, Jehova Diostam mañakurqa, hinaspapas munarqam killa tukuypaq kimsa runakunaman Diosmanta yachachiyta. Payqa sapa punchaw ruwayninta allinta ruwananpaqmi kallpanchakuq. Chaymantapas sapa 10 punchawpim qawarikuq imapiraq astawan kallpanchakunanpaq. ¿Hayparurqachu chay tantiakusqanta? Kikinmi ancha kusisqa nirqa: “Arí, hayparurqanim”, nispa. Payqa chay killa tukuypaqqa manam kimsa runakunallamanchu yachachirqa, aswanqa tawamanmi.

Haykapimanta ruwananchikpaq tantiakuyninchikmi yanapawasun

Wakinpiqa Dios serviyninchikpi imapipas yanapakunapaq munasqanchikqa mana haypay atinam rikchakuwachwan. Kaqmanta rimarisun iñiqmasinchik Tonimanta. Payqa betel wasipim Jehova Diosta serviyta munarqa, ichaqa manaraqmi wanakurqachu mana allin vidanmanta, manataqmi bautizasqaraqchu karqa. Ichaqa Jehova Diospa kamachikuyninkunata kasukuspan bautizakunanpaqmi tantiakururqa. Bautizakuruspanñataqmi tantiakururqa precursor auxiliar kananpaq, chaymantañataq precursor regular kananpaq. Chaykunata haykapi qallarinanpaqmi anotarqa. Precursor kaspanqa betel wasipi serviytaqa manañam mana haypay atina kasqanta hinañachu piensarqa.

Diosta astawan imapi servinapaq tantiakusqanchikta haypanapaq pisi-pisimanta kallpanchakuspaqa atisunmi haypayta. Imata haypanapaq tantiakusqanchikpi yuyaymanaymi yanapawasun chayta haypanapaq. Chaypaqqa yanapawasuntaqmi sapa kutilla Diosta mañakuyninchikpas. Apostol Pablom nirqa: “Diostayá tukuy tiempo mañakuychik”, nispa (1 Tesalonicenses 5:17).

Tantiasqanchikman hina ruwanapaqmi kallpanchakunanchik

Yaqapaschá wakinpiqa tantiakusqanchikman hina kallpanchakuptinchikpas chayta haypanapaqqa imapas sasachawachwan. Piensarisun Juan Marcospi. Payqa mayna hukmanyasqachá qiparurqa llaqtan-llaqtan watukuq rinankupaq apostol Pablo mana pusaptinqa (Hechos 15:37-40). Chayna pasaruptinpas Marcosqa hinallam kallpanchakurqa Jehova Diosta servinanpaq. Marcospa chaynata kallpanchakusqanqa manamá yanqapaqchu karqa. Tiempo pasaytam apostol Pablo paymanta allinta rimarqa. Chaymantapas, Juan Marcosqa Pedrowanmi Babiloniaman rispanku Diosmanta willakurqaku (2 Timoteo 4:11; 1 Pedro 5:13). Marcosqa mayna kusisqataqchá tarikurqa Jesuspa vidanmanta hinaspa Diosmanta willakusqanmanta qillqasqanwanqa.

Yaqapaschá ñuqanchiktapas Marcosta hina pasawachwan. Chaywan hukmanyaruspa imata haypanapaq tantiakusqanchikta saqirunamantaqa hinallayá kallpanchakusun chayta haypanapaq. Hinaspaqa atisunmi tantiakusqanchikta haypaytaqa. Bibliapim nin: ‘Tayta Diospa makinmanyá churay imapas ruway munasqaykikunataqa. Paymi qispichinqa tukuy imapas ruwanaykipaq piensasqaykikunataqa’, nispa (Proverbios 16:3).

Wakinpiqa ichapas unqusqanchikrayku, yuyaqña kasqanchikrayku utaq familianchikta mantienesqanchikrayku imapaq tantiakusqanchikta mana haypayta atichwanchu. Chaywanpas, hinallayá kallpanchakusun wiñay kawsayta haypananchikpaq hanaq pachapaq akllasqa kaspapas utaq allpa pachapaq kaspapas (Lucas 23:43; Filipenses 3:13, 14). ¿Imatataq chaypaq ruwachwan? Apostol Juanmi nirqa: “Diospa munayninta ruwaqmi ichaqa wiñaypaq kawsanqa”, nispa (1 Juan 2:17). Chaynaqa, imapaq tantiakusqanchikta mana haypayta atispapas hinallayá kallpanchakusun Diosta kuyaspa kasukunanchikpaq (Eclesiastes 12:13). Imapi yanapakunapaq tantiakusqanchikmi yanapawasun Diosta tukuy sunqunchikwan servinapaq. Chaynaqa, hinallayá kallpanchakusun imapaq tantiakusqanchikta haypaspa Jehova Diosta hatunchanapaq.

[Recuadro]

Diosta astawan servinapaqmi tantiakuchwan:

○ Bibliata sapa punchaw leenapaq

○ Sapa kuti lluqsimuq revistanchikkunata leenapaq

○ Diosta tukuy sunqunchikwan mañakunapaq

○ Diospa yachachikuyninman hina kawsakunapaq

○ Diosmanta astawan willakunapaq

○ Diosmanta willakuspa runakunapa sunqunman chayanapaq

○ Telefonowan, negociokunapa kasqanpi utaq maypi kaspapas Diosmanta imaynata astawan willakunapaq

[Nota]