Diosta jatunchanapaq jina imatapas ruway

ROMA llaqtamanta juj filósofo runan nirqan: “Mayqen puertomanchus rishasqanta mana yachaqtaqa manan ima wayrapas yanapanmanchu”, nispa. Chay nisqanqa cheqaqmi, kusisqa kausananchispaqqa allintan Diospaq llank’ananchis.

Bibliapin willashan wakin Dios sonqo runakuna Diospaq allinta llank’asqankumanta. Jujninmi karqan Noé, payqa pisqa chunka watakuna jinan “juj arcata ruwaran familianpiwan salvasqa kananpaq”. Moisespas “premiota chaskiypin tukuy yuyayninta churaran” (Hebreos 11:7, 26). Diosmi Moisesman qatiq Josuemanpas juj ruwayta qorqan, Canaán jallp’atan jap’ikapunan karqan (Deuteronomio 3:21, 22, 28; Josué 12:7-24).

Jesuspa nisqanmi apóstol Pablotapas yanaparqan Diospaq allinta llank’ananpaq. Jesusmi nirqan: “Diospa gobiernonmanta allin willakuykunan pachantinpi willasqa kanqa”,nispa (Mateo 24:14). Pablotaqa yanaparqan Jesusmanta chaskisqan willakuykuna, rijuriykuna, Jesusmanta “waj nación runakunaman” willamunanpaq kamachisqa kasqan iman. Pabloqa allintan llank’arqan, chaymi Asia Menor, Europa ladokunapi ima jatarichirqan iñiq t’aqakunata (Hechos 9:15; Colosenses 1:23).

Ñaupa tiempokunapipas kunan tiempokunapipas Jeho­vá Diosta serviqkunaqa Diosta jatunchanankupaqmi ima ruwaytapas junt’arqanku. ¿Imaynatan Diospa munayninman jina ruwaykunata ajllakusunman? ¿Mayqenkunan chaykuna, imaynatan chay ruwaykunata junt’asunman?

Imaraykus imatapas ruwashanchis chayta yachayqa allinpunin

Kausayninchispiqa imaymanatan ruwasunman, kay pacha runakunapas imaymanatan ruwanku. Ichaqa Diospa munayninman jina ruwaykunaqa jujniraymi kay pacha runakunaq piensasqanman jina ruwaykunamantaqa. Askha runakunan imatapas ruwanku qhapaq kayta maskhaspa, allin reqsisqa kayta munaspa otaq atiyniyoq kayta munaspa. Manapunin allinchu kanman atiyniyoq kayta munaspa, allin reqsisqa kayta munaspa imatapas ruwasunman chayqa. Jehová Diosta jatunchananchispaq ruwaykunaqa paypa munayninman jinan kanan, gobiernonta yanapananchispaq jinan kanan (Mateo 6:33). Chaytaqa ruwasun Diostapas runamasinchistapas munakusqanchisraykun, Dios sonqo runa jinataqmi purisunpas (Mateo 22:37-39; 1 Timoteo 4:7).

Diospa llaqtanpi astawan yanapakuyta munashanchis chayqa otaq iñiyninchispi astawan wiñariyta munashanchis chayqa, kallpachakunanchismi Diospa munayninman jinapuni imatapas ruwananchispaq. Chaywanpas, mayninpiqa manan imachus ruway munasqanchista junt’asunchu allinña kashan chaypas. ¿Imaynatan ima ruway munasqanchistapas junt’asunman?

Junt’aytapunin munananchis imachus ruway munasqanchista

T’aqwirisun imaynatachus Jeho­vá Dios imaymanata kamarqan chayta. Kamasqan tiempota t’aqasqanmantan khaynata nirqan: “Hinan ch’isiyaykurqanpas illarimurqanpas”, nispa (Génesis 1:5, 8, 13, 19, 23, 31, Diospa Simin Qelqa). * Sapanka kamasqan tiempopi imachus ruwanantaqa qallariymantapachan allinta qhawarirqan. Junt’arqantaqmi imakunachus ruway munasqanta (Apocalipsis 4:11). Ñaupa tiempomanta Jobmi Diosmanta nirqan: “Payqa munasqantan ruwan”, nispa (Job 23:13). Jeho­vá Diosqa maytachá kusikurqan “llapa ruwasqankunata” rikuspa, chaychá “ancha allinpaq” qhawarirqan (Génesis 1:31).

Sichus ima ruway munasqanchispas junt’akunanta munanchis chayqa, noqanchis kikinchismi kallpachakunanchis. ¿Iman chaypaq yanapawasunman? Kay jallp’anchis qallariypi ch’usaqña, manaña munaychu rikukurqan chaypas, Jehová Diosqa imaynachus tukusqa kaspa rikukunman chaypin yuyaykurqan: may munaymi kamayta tukuqtinqa karqan, chay jawan Diosqa jatunchasqa kanan karqan. Chay jinallataqmi noqanchispas imata ruwananchispaqpas yuyaykunanchis imaynas junt’aqtinchis kanqa, imapis yanapawasun chaypi. 19 watayoq Tonypas chhaynatan ruwarqan. Europa occidental ladopi Jeho­vá Diospa testigonkunaq sucursalnintan visitarqan, chaytan payqa mana qonqarqanchu. Chay p’unchaymantapachan piensaq imaynas kanman chaypi yanapakuy chaypi tiyay chayta. Chaypi yanapakuyta munaspan kallpachakushallarqan jayk’aqllapas chayta junt’ananpaq. Maytachá kusikurqan watakuna pasaqtin chay sucursalpi yanapakunanpaq wajaqtinkuqa.

Imachus ruway munasqankuta junt’aqkunawan juñukuypas yanapawasunmanmi paykuna jina ruwananchispaq. 30 watayoq Jaysonqa manan adolescente kashaspaqa kusikuqchu Diosmanta willaspa, ichaqa colegionta tukuspan precursor kapurqan, chaymantapas tukuy tiemponwan Diosmanta willaqmi kapurqan. ¿Iman yanaparqan precursor kayta munananpaq? Paymi nin: “Precursor hermanokunawanmi rimaq kani, paykunawanmi Diosmanta willaq kani”, nispa.

Allinpunin imachus ruway munasqanchista qelqayqa

Umallanchispi piensasqanchisqa chaymanta rimaqtinchismi aswan sut’i rikukun. Salomonmi nirqan allin rimasqa simikunaqa atiyniyoq t’urpuna jina kasqanta, chaykunan runataqa yanapanman (Eclesiastés 12:11). Ima piensasqanchispas qelqasqa kashan chayqa, yuyayninchista sonqonchista iman yanapanman. Chayraykuchá Jeho­vá Diosqa Israel reykunata kamachirqan kamachikuy simita copianankupaq (Deuteronomio 17:18). Chhaynaqa, allinpaschá kanman imakunatas ruwayta munashanchis, imaynatas junt’asunman chaykunata qelqay, qelqallasunmantaqmi sasachaykuna kaqtin imaynatas atipasunman chayta. Chaymantapas piensananchismi imakunatas estudiananchis, ima ruwaykunatas yachananchis, pikunas yanapawasunman chaypipas.

Diospaq allinta llank’asqanmi Geoffreyta yanaparqan, payqa precursor especial jinan askha watakunaña Asia ladopi juj karu llaqtapi Diosta servishan. Paypa esposanmi qonqaylla wañukapurqan. Tiempowan chayman yachakapuspanmi Geoffreyqa precursor kayninpi imakunatas ruwanman chaypaq kallpachakurqan. Imakunatas ruwayta munasharqan chayta qelqaspa Jeho­vá Diosmanta mañakuspa iman kallpachakurqan manaraq killa tukushaqtin kinsa estudiantekunata tarinanpaq. Sapa p’unchaymi imachus ruwasqanta qhawariq, sapa chunka p’unchaytaq qhawariq maykamas kallpachakurqan chayta. ¿Junt’arqanchu imachus ruway munasqanta? Arí junt’arqanmi, manan kinsa estudiantekunallatachu tarirqan, aswanpas ¡tawa estudiantekunatan tarirqan!

Pisi tiempollapi junt’ananchispaq ruwaykunaqa yanapawanchismi

Wakin ruwaykunaqa mana junt’ay atiy jinapaschá kanman qallariypiqa. Ñaupaqpi rimamusqanchis Tonypaqqa mana junt’ay atiy jinan karqan Jeho­vá Diospa testigonkunaq sucursalninpi yanapakuyqa, chay tiempopaqqa manaraqmi bautizasqachu karqan, mana allintan kausasharqanpas. Ichaqa kallpachakurqanmi Jeho­vá Diospa munayninman jina kausananpaq, chaymantapas bautizakunanpaq imakunachus faltasqantan junt’arqan. Chayta junt’aruspanmi kallpachakurqan precursor auxiliar kananpaq, chay qhepamantaq precursor regular kananpaq; chaypaqmi calendariopi anotarqan jayk’aqchus qallarinanta. Juj tiempo precursor kaspaqa manañan mana atikuqpaq jinañachu qhawarirqan sucursalpi yanapakuytaqa.

Unay tiempopi junt’anapaq ruwayta pisi-pisimanta junt’anapaq t’aqaypas allinmi kanman,chhaynapin wakinta junt’aspa reparasunman chay unay tiempopi junt’ananchis ruwayta jayk’aq junt’ananchista. Maykamas kallpachakurqanchis chayta qhawariymi yanapawasun imachus ruwananchispi yuyayninchis kananpaq. Imachus ruwananchista junt’ananchispaqqa Jeho­vá Diosmanta sapa kuti mañakuymi yanapawasun. Apóstol Pablon nirqan: “Tukuy tiempo Diosmantaqa mañakushallaychispuni”, nispa (1 Tesalonicenses 5:17).

Mana iskayaq mana sayk’uq iman kana

Mayninpiqa, allintaña qhawarirqanchis chaypas maytukuytaña ruway munasqanchista junt’ayta munashanchis chaypas wakinqa manan atikunchu. Maytachá llakikurqan Juan Marcospas apóstol Pablo iskay kaq viajenpi mana apayta munaqtin (Hechos 15:37-40). Marcosqa chaywanmi yacharqan Diosta astawan servinanpaq imachus ruway munasqanta cambianan kasqanta. Chaytan payqa ruwarqan. Tiempowanmi Pabloqa allinta rimarqan Marcosmanta, chaymantapas Marcosqa apóstol Pedrowanmi Babiloniapi sumaqta llank’arqanku (2 Timoteo 4:11; 1 Pedro 5:13). Aswan allin ruwasqanqa yaqapaschá karqan, Diospa yuyaychasqan kaspa Jesuspa vidanmanta imachus ruwasqanmantawan qelqasqan.

Noqanchistapas, yaqapaschá imapas llakichiwasunman Diospaq allinta llank’ananchispaq kallpachakushaqtinchis. Ichaqa chaywan pisipananchismantaqa imakunatachus junt’arqanchisña chaypin piensananchis, yaqapaschá imachus ruway munasqanchista cambiananchis kanqa. Sasachakuykuna kaqtinqa ama iskayaspa ama sayk’uspa kallpachakusun atipananchispaq. Yachayniyoq rey Salomonmi nirqan: “Lliw ruwanaykikunata [Jehová] Diosman hap’iykachiy, hinan yuyaykusqaykikuna hunt’akunqa”, nispa (Proverbios 16:3).

Imaymanataña ruwarqanchis chaypas, mayninpiqa imapas pasasqanwanmi imachus ruway munasqanchis mana junt’akunchu. Wakin ruwaykunaqa yaqapaschá mana junt’akunmanchu onqosqa kasqanchisrayku otaq familianchista cuidananchis kaqtin. Ichaqa, amapuni qonqasunchu tukukuypi wiñay kausay premionchista, janaq pachapiña kay pacha paraisopiña kausananchis kaqtinpas (Lucas 23:43; Filipenses 3:13, 14). “Imaynatan chayta aypasunman? Apóstol Juanmi qelqarqan: “Diospa munayninta ruwaqmi ichaqa wiñaypaq kanqa”, nispa (1 Juan 2:17). Imaynapi tarikusqanchisña jark’awasunman imatapas junt’ananchispaq chaypas, atisunmanmi junt’ayta Bibliapi kay nisqanta: “Diosta manchakuy, kamachikuyninkunatapas hunt’ay”, nispa (Eclesiastés 12:13). Diosta jatunchanapaq jina ruwaykunaqa yanapawanchismi Diosta servishanallanchispaq. Chayrayku ima ruwasqanchispas kamaqninchis Diosta jatunchananchispaq jina kachun.

[Willakuy]

[Recuadro]

Diospa munayninman jina ruwaykuna

○ Bibliata sapa p’unchay leey

○ Llapan Qhawaq, ¡Rijch’ariy! qelqakunata leey

○ Aswan allinta mañakuyta yachay

○ Santo espirituq rurunta wiñachiy

○ Astawan Diosmanta willay

○ Aswan allinta Diosmanta willay yachachiypas

○ Telefonontapas, imataña ruwashaspapas, negocio ruwaykunapipas Diosmanta willay