Poti yeye marki fu man gi glori na yu Mekiman

„EFU wan man no sabi na sortu lanpe a e tyari en boto go, dan a no abi bisi sortu winti e wai.” Na ini a fosi yarihondro, wan filosofiaman fu Rome ben taki den wortu disi. Disi e sori wi wan prenspari tru tori, namku taki efu wi no wani taki wi libi e waka bruyabruya, dan a de tumusi prenspari fu poti marki gi wisrefi.

Bijbel e gi eksempre fu sma di ben e poti marki gi densrefi. Noa ben e wroko sowan 50 yari fu „bow wan ark fu kibri na osofamiri fu en”. A profeiti Moses „ben poti ala en prakseri na a pai di a ben sa kisi” (Hebrewsma 11:7, 26). Yosua, di ben kisi a wroko fu Moses, ben kisi a komando fu Gado fu teki a kondre Kanan abra.—Deuteronomium 3:21, 22, 28; Yosua 12:7-24.

Yesus ben taki dati „a bun nyunsu disi fu a kownukondre o preiki gi ala sma na heri grontapu” (Mateyus 24:14). A no de fu taki dati na ini a fosi yarihondro G.T., den wortu dati ben abi furu krakti tapu den marki di na apostel Paulus ben poti gi ensrefi na yeye fasi. Paulus ben kisi boskopu nanga fisyun fu Masra Yesus srefi èn a ben kisi a wroko tu „fu tyari [Yesus] nen go na den nâsi”. Disi ben gi Paulus so furu deki-ati taki a ben abi wan prenspari prati na a seti fu den Kresten gemeente na ini heri Pikin Asia nanga Europa.—Tori fu den Apostel 9:15; Kolosesma 1:23.

Iya, na ini ala den hondrohondro yari di pasa, den futuboi fu Yehovah poti bun marki gi densrefi, èn fu di den ben doro den marki dati, meki Gado ben kisi glori. Fa wi na ini a ten disi kan poti marki gi wisrefi na yeye fasi? San na den marki di wi kan poti gi wisrefi, èn san wi kan du fu doro den marki disi?

A prenspari trutru fu du sani nanga a yoisti denki

Na ini ala afersi fu a libi wi kan poti marki gi wisrefi, èn a grontapu disi abi sma tu di e poti marki gi densrefi. Ma den marki di wan sma e poti na yeye fasi, no de a srefi leki den sani di sma wani doro na ini grontapu. Te den sma na ini grontapu e poti marki gi densrefi, dan den e du dati moro furu fu di den wani kon gudu nomonomo èn fu di den gridi fu kisi posisi nanga makti. A ben o de wan bigi fowtu trutru efu wi ben o feti fu kisi makti nanga barinen! Den marki di e meki taki Yehovah Gado kisi glori, na marki di abi fu du langalanga nanga na anbegi fu en èn nanga Kownukondre afersi (Mateyus 6:33). Lobi gi Gado èn gi tra sma e meki taki wan sma e suku fu doro den marki disi, èn a sma e du dati fu di a wani dini Gado na wan getrow fasi.—Mateyus 22:37-39; 1 Timoteyus 4:7.

Te wi e meki muiti fu doro marki na yeye fasi, soleki fu kisi moro grani na ini a diniwroko noso fu gro na yeye fasi, dan wi musu du dati nanga wan opregti ati èn nanga a yoisti denki. Ma son leisi wi no man doro den marki di wi poti gi wisrefi, awansi wi de opregti. Fa wi kan poti marki gi wisrefi èn san wi kan du fu meki taki wi man doro den?

Wi musu angri trutru fu doro den marki

Prakseri fa Yehovah meki hemel nanga grontapu. Nanga den wortu, „neti ben kon èn mamanten ben kon”, Yehovah ben sori o ten a ben bigin meki sani èn o ten a ben kaba meki sani (Genesis 1:5, 8, 13, 19, 23, 31). Na a bigin fu ibri pisi ten di Gado ben teki fu meki sani, a ben sabi heri bun san a ben wani du na ini a dei dati. Èn Gado ben meki den sani soleki fa a ben abi na prakseri (Openbaring 4:11). A famiri-edeman Yob ben taki: „[Yehovah] en eigi sili e angri trutru fu du wan sani, èn a sa du dati” (Yob 23:13). A no de fu taki dati a ben gi Yehovah prisiri trutru fu si „ala san a ben meki” èn fu taki dati a ben de „heri bun”!—Genesis 1:31.

Efu wi wani doro den marki fu wi, dan wi sosrefi musu angri trutru fu doro den. San sa yepi wi fu kon kisi a tranga winsi dati? Srefi di grontapu no ben moi ete èn di a no ben abi noti na en tapu, toku Yehovah ben kan si na fesi kaba san ben o de a bakapisi, namku taki a ben o de wan kefalek moi planeiti, di ben o gi en glori nanga grani. Na a srefi fasi, te wi e prakseri dipi fu den bakapisi èn den wini di wi sa kisi te wi doro wan spesrutu marki, dan dati o meki wi angri fu du san wi ben abi na prakseri. Dati ben de na ondrofeni fu Tony di ben abi 19 yari. Noiti a frigiti fa a ben e firi a fosi leisi di a go na wan bijkantoro fu Yehovah Kotoigi na ini West-Europa. Sensi a dei dati, Tony ben e prakseri nomo, ’Fa a ben o de efu mi ben o libi èn wroko na so wan presi?’ Noiti Tony puru a prakseri disi na en ede, ma a ben si en leki wan sani di a ben man du trutru, èn a tan meki muiti fu doro a marki dati. A ben gi en nen fu dini na a bijkantoro, èn wan tu yari baka dati a ben breiti srefisrefi fu yere taki a bijkantoro ben feni dati bun!

Te wi abi demakandra nanga tra sma di doro wan spesrutu marki kaba, dan dati kan gi wi a winsi tu fu doro a srefi marki dati. Jayson di abi 30 yari, no ben lobi fu go na ini a preikiwroko di a ben de wan tini. Ma baka di a kaba en skoro, dan a go na ini a pionierwroko fayafaya èn na so fasi a tron wan furuten preikiman fu a Kownukondre. San ben gi Jayson a winsi fu go pionier? A e piki: „Mi ben e taki nanga trawan di ben e pionier èn mi ben e wroko makandra nanga den na ini a preikiwroko, èn dati ben abi furu krakti na mi tapu.”

A kan de wan yepi te wi e skrifi na tapu papira san na den marki di wi wani doro

Te yu e skrifi na tapu papira san yu abi na prakseri, dan yu o man si moro krin san yu musu du. Salomo ben taki dati neleki fa sma e gebroiki tiki nanga srapu penti fu tiri wan kaw, na so den yoisti wortu kan de wan bigi yepi tu fu tyari wi libi na a yoisti fasi (Preikiman 12:11). Te wi e poti den wortu fu wi na tapu papira, dan dati sa abi furu krakti tapu wi frustan èn tapu wi ati. A no fu soso Yehovah ben gi den kownu fu Israel a komando fu meki wan kopi gi densrefi fu a Wet! (Deuteronomium 17:18) Dati meki a kan de wan yepi te wi e skrifi na tapu papira san na den marki di wi wani doro èn a fasi fa wi wani doro den. Wi kan skrifi sosrefi sortu problema wi ben sa kan kisi èn fa wi kan pasa den problema disi. A ben o bun tu fu luku san na den sani di wi musu kon sabi; wi musu leri sosrefi fa fu du wan wroko bun, èn suma na den sma di kan yepi wi èn di kan horibaka gi wi.

Wan heri pisi ten kaba, Geoffrey e dini leki spesrutu pionier na wan farawe presi na ini wan kondre fu Asia. Den marki di Geoffrey ben poti gi ensrefi na yeye fasi ben gi en wan korostu firi. A ben de wan sari sani trutru di en wefi dede sondro taki a fruwakti dati. A ben hebi gi en wan pisi ten, ma baka dati Geoffrey teki a bosroiti fu wroko fayafaya na ini a pionierwroko; fu man du dati, dan a ben poti marki gi ensrefi. Baka di a poti na tapu papira san a ben wani du, dan a begi Gado taki a ben wani opo dri nyun bijbelstudie fosi a mun tapu. Ibri dei a ben luku baka san a du, èn ibri tin dei a ben luku efu a go na fesi. A ben doro a marki fu en? Nanga prisiri a ben kan taki iya, fu di a opo fo nyun bijbelstudie!

Poti marki gi yusrefi di yu kan doro na ini wan syatu pisi ten

Na ini a bigin, a kan sori leki son marki tranga tumusi fu doro. Tony, di wi kari na a bigin, no ben denki taki oiti a ben o man dini na a bijkantoro fu Yehovah Kotoigi. Dati ben de so fu di a ben e libi leki fa a ben wani, èn a no ben gi ensrefi abra na Gado ete srefi. Ma Tony ben teki a bosroiti fu bigin  libi soleki fa Yehovah wani èn a ben poti en leki marki fu doro den markitiki fu man teki dopu. Baka di a doro a marki dati, dan a poti a marki fu go na ini a yepi-pionierwroko nanga a gewoon pionierwroko, aladi a ben skrifi na tapu en kalender o ten a ben o bigin nanga a wroko dati. Baka di a du a pionierwroko wan pisi ten, dan a diniwroko na a bijkantoro kon tron wan sani di a ben o man du trutru.

Na a srefi fasi, te wi e suku fu doro wan bigi marki, dan a ben o bun tu efu wi e pruberi fu doro pikinpikin marki fosi. Te wi e suku fu doro den pikinpikin marki disi, dan ibriwan fu den kan tyari wi go moro krosibei na a moro bigi marki te fu kaba. Te wi luku doronomo fa wi go na fesi fu di wi doro den pikinpikin marki disi, dan dati kan yepi wi fu tan poti prakseri na a bigi marki di wi wani doro. Te wi e begi Yehovah ibri tron baka fu den sani di wi wani du, dan dati kan yepi wi tu fu tan meki muiti fu doro den. Na apostel Paulus ben gi a frumane: „Begi doronomo.”—1 Tesalonikasma 5:17.

Wi musu abi wan fasti bosroiti èn wi musu horidoro

Son leisi wi no man doro wan tu fu den marki di wi poti, awansi wi sreka sani bun na fesi èn awansi wi abi a tranga winsi fu doro den. A disipel Yohanes Markus ben musu firi brokosaka trutru di na apostel Paulus no ben wani tyari en go na a di fu tu preikiwaka fu en! (Tori fu den Apostel 15:37-40) Fu di Markus no ben man go makandra nanga Paulus, meki a ben musu leri wan sani fu a tori dati èn a ben musu suku wan tra fasi fu doro a marki di a ben abi, namku fu du moro na ini a diniwroko. Soleki fa a sori, dan a ben du dati tu. Bakaten, Paulus ben taki bun fu Markus, èn Markus ben abi krosibei demakandra nanga na apostel Petrus na ini Babilon (2 Timoteyus 4:11; 1 Petrus 5:13). A kan taki a moro bigi grani di a ben kisi, na taki Gado ben meki a skrifi wan buku fu a libi nanga a diniwroko fu Yesus.

Te wi e suku fu doro marki na yeye fasi, dan wi sosrefi kan kisi problema di e gens wi fu doro den marki dati. Na presi fu lasi-ati, wi musu luku fa wi go na fesi, wi musu ondrosuku efu wi man doro a marki fu wi ete, èn wi musu poti tra marki gi wisrefi efu dati de fanowdu. Te problema e miti wi, dan wi musu abi a fasti bosroiti fu doro a marki fu wi èn wi musu tan horidoro aladi wi e du tranga muiti fu go na fesi. A koni Kownu Salomo ben gi wi a dyaranti: „Lolo yu wroko na tapu Yehovah srefi èn den plan fu yu sa poti steifi.”—Odo 16:3.

Ma son leisi, son situwâsi e meki taki wi no man poti spesrutu marki gi wisrefi. Fu eksempre, kande siki, noso frantwortu na ini na osofamiri, kan meki taki wi no man du wan tu fu den sani di wi ben sa wani du. Wi no musu frigiti noiti taki a moro prenspari marki di wi wani doro na fu kisi têgo libi, awansi efu dati de na ini hemel noso na ini Paradijs na grontapu (Lukas 23:43; Filipisma 3:13, 14). Fa wi kan kisi dati? Na apostel Yohanes ben skrifi: „A sma di e du a wani fu Gado, e tan fu têgo” (1 Yohanes 2:17). Aladi a situwâsi fu wi kan meki taki wi no man doro wan spesrutu marki, toku a de so ete taki wi kan „frede a tru Gado èn hori den komando fu en” (Preikiman 12:13). Den marki di wi e poti na yeye fasi e yepi wi fu tan poti ala wi prakseri fu du a wani fu Gado. Fu dati ede, meki wi gebroiki den marki dati fu gi glori na wi Mekiman.

 [Faki na tapu bladzijde 22]

Yeye marki di wi kan suku fu doro

○ Leisi Bijbel ibri dei

○ Leisi ibri Waktitoren nanga Ontwaakt!

○ Meki den begi fu wi kon moro bun

○ Sori a froktu fu a yeye

○ Meki muiti fu du moro na ini a diniwroko

○ Tron wan moro bun preikiman èn wan moro bun leriman

○ Leri fu gi kotoigi nanga yepi fu telefon, fu gi kotoigi na ibri okasi di wi e kisi èn sosrefi na bisnispresi