Manàgna Tanjogne Magnomey Voninahitse i Mpamorogney

“TSY mampagninogne o ndatio ze omba i tiokey, naho fa tsy hai’e ze figaràn-tsambo handena’e.” Nao zao Filozofa romana raike taloha tamy ty taonjato voaloha’e ty nirehake izay. Aseho o rehake rehoe fa tena ilaegne mba hitari-dalagne amy ty fiaignagne o tanjogneo.

Mirehake ndaty tsiampeampe nifantoke tamy ty fagnatratraragne tanjogne ty Baiboly. Niasa mafe tagnate ty 50 taogne ty Noa, mba ‘hagnamboaragne sambofiara hamonjeagne i keleia’ey.’ “Nandigne mafe i valesoa’ey” ty Mosesy mpaminany. (Hebreo 11:7, 26) Ty handrese ty tane Kanana ty tanjogne nimean’Andrianagnahare i Josoa, mpandimbe i Mosesy.​—Deoteronomia 3:21, 22, 28; Josoa 12:7-24.

Tamy ty taonjato voaloha’e, le azo antoke fa nisy heri’e lahibey tamy ty tanjogne ara-pagnahy tea i apostoly Paoly hotratraregne ty reha i Jesosy tihoe: “Hotoriegne magneran-tane ty talily soa i Fanjakagney toy.” (Matio 24:14) Nampahery aze ty hafatse naho ty fahitagne boake amy i Jesosy Tompo, agnisa izay ty fanendreagne aze ‘hinday ty agnara i Jesosy amy ty hafa firenena agne.’ Nandrambe anjara bey tamy ty fiforogna ty fiangonagne kristiana maro nagneragne i Azia Minora hatrake Eropa agne reke.​—Asan’ny Apostoly 9:15; Kolosianina 1:23.

Tena nanagne tanjogne ambone o mpanompo i Jehovah-o hatrake amy izay, sady nagnatratse izay mba hideragne an’Andrianagnahare. Akore ty hanagnantikagne tanjogne mifandrambe amy ty fanompoagne an’Andrianagnahare? Inogne iaby ty tanjogne azontikagne kezahegne tratraregne, naho ty dingagne toko’e hatao amy izay?

Tena Ilaegne ty Fanagnagne Anto’e Manoseke Soa

Azo asiagne tanjogne iaby ze asa atao amy ty fiaignagne. Mifantoke amy ty fagnatratraragne tanjogne ka ty ndaty amy ty tontolo toy eto, faie tsy mitovy amy ty ahy ty Kristiana ty ahy iareo. Mateteke ty hatea vola aman-karena naho ty fipaliavagne fahefagne vaho ty fipaliavagne seza ty anto’e lahibey mandrisike iareo hagnatratse tanjogne. Faie tena hadisoagne lahibey zay, satria ty tanjogne mifandrambe amy ty fanompoagne an’Andrianagnahare naho ty asa i Fanjakagney avao ro minday fideragne hoahy i Jehovah. (Matio 6:33) Tea an’Andrianagnahare naho ty mpiara-belogne ama’e ty ndaty hoe izay, sady mahafoe tegna ho an’Andrianagnahare.​—Matio 22:37-39; 1 Timoty 4:7.

Lonike abey ho anto’e soa ty mandrisike antikagne, ndra ty hampitombo ty fanompoantikagne ty tanjontikagne, ndra ty hagnasoa ty fifandrambesantikagne aman’Andrianagnahare. Faie kindraike le misy tanjogne tsy tratse, ndra tie soa aza ty anto’e manoseke. Akore areke ty hanagnagne tanjogne soa naho ty hatao mba hagnatratraragne aze?

Mila Managne Fagniriagne Hagnatratse i Tanjogney Rehe

Dineho ty fomba namità i Jehovah ty famorognagne ze kila raha. Izao ty nisaontsie’e naho fa isake vita ty fe-potoagne famorognagne tsikiraidraike: “Le nisy hariva, sady nisy maraindraigne.” (Genesisy 1:5, 8, 13, 19, 23, 31) Fanta’e soa ty tanjogne hoahy ty fe-potoagne tsikiraidraike tam-panomboha i raha rey, le nahavita ze nisafirie’e reke, le ty famorognagne. (Apokalypsy 4:11) Hoe ty Joba, loha ty keleiagne raike taloha: “Ze tea’e hatao le atao’e.” (Joba 23:13) Tsy maintsy ho tena niafa-po ty Jehovah naho fa nahavazoho “ze kila raha natao’e”, le nisaontsy tie “fanjaka.”​—Genesisy 1:31.

Tsy maintsy magniry mafe ty hagnatanterake i tanjontikagney ka tika, naho teantikagne ty hagnatratse aze! Ino ty hagnampe antikagne amy izay? Ndra tie mbe tsy nisy endre’e sady foagne aza ty tane toy, le fa nihay i Jehovah fa hanjare vatosoa mahafinaritse amy i lagnitse ey eo, le hagnomey voninahitse aze. Hoe izay ka tikagne. Hitombo ka ty fagniriantikagne hagnatratse i tanjontikagney naho saintsaignentikagne ty soa ho ente ty fagnatratraragne izay. Izay vata’e ty raha niseho tamy i Tony. Tena tsy haligno’e ty raha nitsapa’e tamy ireke nitilike voaloha’e ty birò ty sampa ty Vavolombelo i Jehovah, ta Eropa Ahandrefagne agne. Izao ty fagnonteneagne tsy afake an-tsai’e ao nanomboke teo: ‘Mba hanao akore koahe ze o hitoboke naho hanompo amy ty toeragne manahake io zao?’ Nieretseretse avao reke fa azo tanterahegne i fagniria’ey, le nikezahe’e nitratraregne. Tena fale reke naho fa nekegne ty fangataha’e hanompo tamy i sampagney tao, taogne maromaro tafara tatoy!

Va’e hampitiry fagniriagne amantikagne ao mba hagnatratse tanjogne raike ty fiarahagne amy ty ndaty fa nahatratse i tanjogney. Telopolo taogne ty Jayson tie amy izao. Tsy tea nitory reke tamy tie reke mbe niajalahy. Faie nanao mpisava lalagne reke, le nanjare mpanompo marain-tsy hariva, naho fa nivita ty fianara’e tamy i lisé tey. Ino ty nahavy aze nagniry ty hanao mpisava lalagne? Namale reke tie: “Nirehake tamo o mpisava lalagneo raho sady niarake nanompo tamy iareo. Izay ty tena nagnampe ahy.”

Sorato i Tanjo’o Rey

Mihamazava o hevetseo naho fa sorategne. Nirehake ty Solomona fa va’e hahery manahake ty fagnozagne o agnombeo ty rehake mete soa, le hitari-dalagne amy ty fiaignagne. (Mpitoriteny 12:11) Milenteke agnate fo naho an-tsaigne agne i rehake rey, naho fa voasoratse. Izay ty nahavy i Jehovah handily o mpanjaka o Israelio mba hanoratse hoahy iareo ty boke i Lalànay. (Deoteronomia 17:18) Va’e ho teantikagne ka areke ty hanoratse ty tanjontikagne naho ze raha irientikagne hatao mba hagnatratraragne aze. Le va’e hosoratentikagne ao ka ty raha tsy ampoizegne va’e hikalagne antika tsy hahatratse i tanjogney naho ty fomba handreseagne aze. Soa ka naho mba haintikagne ty fahalalagne naho ty fahaiagne toko’e hanagnantikagne, vaho ty ndaty afake hagnampe naho hanohagne antikagne.

Mpisava lalagne manokagne fa ela tamy ty faritane mitokagne ta Azia agne ty Geoffrey. Nampitony aze ty fanagnagne tanjogne mifandrambe amy ty fanompoagne an’Andrianagnahare. Nimate tampoke ty vali’e. Faie naho fa nihazatse i raha niseho ignehoe reke, le nanapa-kevetse ty hifantoke tamy ty fanompoagne, le nifily tanjogne hotratraregne. Nisorate’e zay, sady nivavake reke mba ho afake hanomboke fampianaragne Baiboly vaovao telo tagnate i volagney. Nihentea’e isan’andro ty asa natao’e sady nihentea’e isake ty folo andro ty fandrosoagne vita’e. Nitratse’e vao i tanjo’ey? Nisomimoke reke namale tihoe ‘ie’, satria fampianaragne Baiboly vaovao efatse ty nanoa’e tatetse!

Zarao ho Tanjogne Maromaro i Tanjogne Ela Vaho Tratse Rey

Amy ty voaloha’e, le va’e ho sarotse tratraregne ty tanjogne ila’e. Hoahy i Tony, le hoe raha nofinofy zay tihoe hanompo amy ty birò i sampagne. Niraty ty fomba fiaigna’e tamy izay sady mbe tsy nanokan-tegna ho an’Andrianagnahare reke. Faie nampifagnarake ty fiaigna’e tamy ty lily i Jehovah reke, sady natao’e tanjogne ty hahafeno fepetse ho amy ty badisa. Naho fa vita’e zay, le nikezake ty ho mpisava lalagne mpagnampe reke, le mpisava lalagne maharetse naho fa avy eo. Nimarehe’e tamy ty kalandrie teo aza ty date tea’e hanombohagne aze. Tsy tihoe tanjogne tsy azo tratraregne sasa i fanompoagne tamy ty birò i sampagne aoy, naho fa nanao ty asa ty mpisava lalagne tagnate ty fotoagne elaela reke.

Va’e ho soa ka naho mba zarazaraentikagne maromaro, i tanjogne ela vaho tratse rey. Amy izay naho fa tratsentikagne ty tsikiraidraike ama’e, le midika zay fa mandeha mbamy i tanjogne lahibeỳ mbeo tikagne. Hifantoke avao amo o tanjogne iohoe tikagne, naho magnente tsy tapake ty fandrosoagne vitantikagne. Ho afake hanohy avao ka tikagne, naho mivavake mateteke amy i Jehovah ty raha safirientikagne. Izao ty fagnanara i apostoly Paoly: “Mivavaha lognandro.”​—1 Tesalonianina 5:17.

Toko’e ho Tapa-kevetse Naho Hanagne Fikirizagne Rehe

Misy tanjogne tsy azo tratraregne, ndra tie fa nisaintsaignegne soa naho niriegne mafe aza. Tsy maintsy ho nidiso tamà ty Jaona Marka, naho fa tsy nimete ninday aze tamy i lia misionera faharoe natao’ey ty apostoly Paoly. (Asan’ny Apostoly 15:37-40) Tsy maintsy nandrambe lesogne tamo o raha nandiso tamà aze iohoe ty Marka, sady nagnitsy i tanjo’e miomba i fagnitaragne ty fanompoa’ey. Mibaribary fa nanao izay reke, satria nirehake raha soa miomba aze ty Paoly naho fa tafara tatoy, sady niarake tamy i apostoly Petera reke ta Babilona agne. (2 Timoty 4:11; 1 Petera 5:13) Nanoratse ty tantaram-piaigna naho ty fanompoa i Jesosy ka reke, noho ty hery ty fagnahy masigne. Va’e izay varagne ty voninahitse lahibey niazo’e.

Va’e hisy raha hikalakalagne antikagne ka amy itika mikezake magnatratse i tanjontikagney. Faie tsy toko’e ho kivy tika fa hagnente avao ty fandrosoagne fa nivitantikagne. Toko’e ho dinehentikagne ka naho mbe azo tratraregne i rahay, sady hiova tanjogne naho ilaegne zay. Toko’e hikezake handroso tikagne, le ho tapa-kevetse sady hanagne fikirizagne naho fa miatreke raha manahiragne. Hoe ty Solomona Mpanjaka hendre: “Ankigno amy i Jehovah ze raha atao’o, le ho tomombagne ze raha safirie’o.”​—Ohabolana 16:3.

Faie kindraike le misy raha tsy azo ialagne. Va’e hikalagne antikagne tsy hagnatratse tanjogne ila’e, ohatse ty aretegne, ndra ty andraikitse amy ty keleiagne eo. Lonike abey tikagne mba tena tsy hagnaligno fa ty fiaignagne nainai’e, ndra an-dagnitse agne ndra amy i Paradisa an-tane etoỳ ty loka fara’e lahibey. (Lioka 23:43; Filipianina 3:13, 14) Akore ty hahazoagne io? Hoe ty apostoly Jaona: “Ze manao ty zoton’arofon’Andrianagnahare ro maharetse nainai’e.” (1 Jaona 2:17) Va’e tsy hagnenga antikagne hagnatratse tanjogne raike ty raha misy amantikagne, faie mbe afake ‘matahotse an’Andrianagnahare naho magnorike ty lili’e’ tikagne. (Mpitoriteny 12:13) Magnampe antikagne hifantoke amy ty fanoagne ty zoton’arofon’Andrianagnahare ty tanjogne mifandrambe amy ty fanompoagne aze. Lonike areke tikagne hampiasa irey mba hideragne i Mpamorogney.

[Efajoro]

Tanjogne Azo Saintsaignegne

○ Mamaky Baiboly isan’andro

○ Mamaky ty nimerò tsikiraidraike amy ty Fitalakesan-davitse naho Mifohaza!

○ Magnasoa ty vavake atao

○ Maneho vokatse ty fagnahy

○ Mikezake hampitombo fanompoagne

○ Mikezake ho mpitory naho ho mpampianatse mahay

○ Magnasoa ty fahaiagne mitory an-telefony naho tsy mifamotoagne vaho amy ty faritane maro fiasagne