«Kalakkaxwiliw tlakg naskujnaniyaw kiMalakatsukinakan xlakata namalankiyaw»

«TIKU ni katsi niku champutun, nila makgtaya un». Uma xtachuwin chatum filósofo romano kxapulana siglo, uma xlikana tuku wan: xlakata nalipaxuwayaw kilatamatkan, xlakaskinka nalakkaxwiliyaw tuku lakgchamputunaw.

Biblia kalichuwinan makgapitsi latamanin tiku lakkaxwilikgolh tuku xlakgchamputunkgo. Max tipuxamakaw kata, Noé liskujli xlakata xtlawalh «akgtum arca xlakata xlakgtaxtukgolh tiku xalak xchik». Palakachuwina Moisés «liwana xʼakxilhlakachanit taskgaw nema xʼamaka maxkikan» (Hebreos 11:7, 26). Dios wanilh Josué, tiku x’ama tawila kxlakgxokgo Moisés pi x’akgchipalh xtiyat Canaán (Deuteronomio 3:21, 22, 28; Josué 12:7-24).

Kxapulana siglo, Jesús lichuwinalh pi uma «xatlan tamakatsinin xla Tamapakgsin natalichuwinan kxlilakgatum katiyatni». Xlikana pi uma tachuwin lu makgtayalh apóstol Pablo xlakata tlakg liwana xmakgantaxtilh la skujnanima Jehová (Mateo 24:14). Lu makgpuwantinilh Pablo tuku makatsinika chu tuku ma’akxilhnilh Jesús chu taskujut nema maxkika xlakata nakalini xtukuwani Jesús kachikinin, Pablo lu makgtayanalh xlakata na’anan lhuwa congregaciones kxlikalanka Asia Menor chu Europa (Hechos 9:15; Colosenses 1:23).

Xlikana pi lata titaxtunit kilhtamaku, kskujnin Jehová lakkaxwilikgonit tuku lakgchamputunkgonit chu makgantaxtikgonit xlakata namalankikgo Dios. ¿La natlawayaw la uku xlakata nalakkaxwiliyaw tuku lakgchamputunaw? ¿Tuku nalakkaxwiliyaw chu la natlawayaw xlakata nalakgchanaw?

Kilikatsitkan tuku xlakata lakgchamputunaw tuku lakkaxwiliyaw

Tlan lakkaxwilikan putum tuku lakgchamputunkan klatamat, kkakilhtamaku lhuwa tiku chuna tlawakgo. Pero, akxni lakkaxwilikan xlakata tlakg naskujnanikan Dios litalakgpali tuku lakkaxwilikgo tiku ni skujnanikgo. Latamanin lakkaxwilikgo tuku lakgchamputunkgo xlakata lhuwa tumin nakgalhikgo chu lu xlakaskinka nakali’akxilhkan. Nitlan nakinkakitaxtuniyan komo na tlakg nakgalhiputunaw tumin o atanu tuku nalitalankiyaw. Akxni makgantaxtiyaw tuku lakkaxwilinitaw limalankiyaw Jehová chu tuku makgtanuma xlakata xTamapakgsin (Mateo 6: 33). Tapaxkit nema kgalhiniyaw Jehová chu latamanin tlawa pi tlakg liwana namakgantaxtiyaw tuku lakkaxwilinitaw (Mateo 22:37-39; 1 Timoteo 4:7).

Akxni nalakkaxwiliyaw tuku lakgchamputunaw xlakata tlakg skujnaniputunaw Jehová o na matliwakglhputunaw kintakanajlakan liwana kilikatsitkan tuku xlakata chuna tlawaputunaw. Min kilhtamaku nila makgantaxtikan tuku lakkaxwilikan, maski tlan tuku lakpuwanitaw. ¿La natlawayaw xlakata wi tuku nalakkaxwiliyaw, chu tuku tlan natlawayaw xlakata tlan nalakgchanaw?

Lu namakgantaxtiputunaw tuku lakkaxwilinitaw

Ka’akxilhwi la malakatsukinalh Jehová. Liwana lakkaxwililh la natlawa xtamalakatsukin, wa xlakata wa: «Ka’analh kakgotanun chu tsisa» (Génesis 1:5, 8, 13, 19, 23, 31). Akxni tsukulh malakatsukinan liwana xkatsi tuku x’ama tlawa. Wa xlakata makgantaxtilh tuku xlakpuwanit (Apocalipsis 4:11). Job wa: «Akxni wi tuku tlawaputun [Jehová] xlikana namakgantaxti» (Job 23:13). Jehová max lu tlan limakgkatsilh akxni akxilhli pi «putum tuku xtlawanit [...] lu tlan xwanit» (Génesis 1:31).

Komo makgantaxtiputunaw tuku lakkaxwilinitaw, lu xlakaskinka naliskujaw xlakata namakgantaxtiputunaw. ¿Tuku nakinkamakgtayayan xlakata namakgantaxtiputunaw? Akxni kKatiyatni nina tu x’anan, Jehová liwana xlilakpuwanita la x’ama tasiya akxni xlakkaxwilikgolh: komo uma Katiyatni kaj x’ama latawaka chu nitu xlichipaxnalh xmalankilh xtukuwani Jehová. Nachuna komo nalilakpuwanaw la nakitaxtu chu la nalitamakgtayayaw tuku lakkaxwilinitaw, uma natlawa pi namakgantaxtiputunaw. Chuna akgspulalh Tony tiku xkgalhi 19 kata. Nikxni patsankgalh tuku makgkatsilh akxni lakgapaxialhnalh sucursal xla xtatayananin Jehová k’Europa occidental. Watiya ama kilhtamaku xlilakpuwan la tamakgkatsi skujkan chu tawilakan anta. Chuntiya lilakpuwa chu liskujli xlakata anta naskuja. Lu paxuwalh akxni makgamakglhtinanka ksolicitud nema xmalakgachanit ksucursal.

Natalan tiku makgantaxtikgonita tuku xlakkaxwilikgonit tlan kinkamakgpuwantinikgoyan. Jayson, tiku xkgalhi 30 kata, ni xlipaxuwa la xlichuwinan Dios akxni kgawasaku xwanit, pero akxni masputulh xtakgalhtawakga k’escuela, lu xatapaxuwan tsukulh skujnani Jehová la precursor. ¿Tuku makgpuwantinilh precursor nalitaxtuputun? Xla wan: «Lu kimakgtayakgolh nakkatachuwinan natalan tiku precursores xwankgonit chu akxtum nakkatalichuwinan Dios».

Xlakaskinka natsokgwilikan tuku lakgchamputunkan

Akxni wanaw tuku lakgchamputunaw tlakg tlan kitaxtu komo natsokgwiliyaw. Salomón wa pi laktlan tachuwin tlan nakinkamakgtayayan xlakata nakinkapulalinan kilatamatkan (Eclesiastés 12:11). Akxni tsokgwiliyaw tuku wanaw, liwana lilakpuwanaw tuku tlawaputunaw. Wa xlakata, Jehová kalimapakgsilh mapakgsinanin xalak Israel pi xtlawakgolh maktum copia xla Limapakgsin (Deuteronomio 17:18). Wa xlakata, tlan natsokgwiliyaw tuku lakgchamputunaw chu tuku natlawayaw xlakata namakgantaxtiyaw, na tlan natlawayaw akgtum lista xlakata tuku natlawa pi nila namakgantaxtiyaw tuku lakkaxwilinitaw. Atanu tuku tlan nakinkamakgtayayan wa nalilakpuwanaw tuku nalikgalhtawakgayaw, tuku tayat maklakaskinaw chu tiku nakinkamakgtayakgoyan.

Geoffrey chatum precursor especial tlan xlimakgkatsi xlakata xlakkaxwili tuku xlakgchamputun chu uma lu makgtayanit naskujnani Jehová niku ni lu xlichuwinankan Dios k’akgtum país xla Asia. Pero lu nitlan pi xpuskat lakapala nilh. Akxni xtitaxtunita kilhtamaku, Geoffrey lakkaxwililh tuku xtlawaputun xlakata tlakg skujnanilh Jehová. Tsokgwililh tuku xtlawaputun chu skinilh xtamakgtay Jehová, chu lakkaxwililh namatsuki akgtutu takgalhtawakga xalak Biblia. Chali chali x’akxilha tuku xtsokgwilinit chu akxni xtitaxtunita akgkaw kilhtamaku xlilakpuwan la xmakgantaxtima. ¿Makgantaxtilh uma? Xatapaxuwan wan pi chuna, xlakata ni kaj akgtutu matsukilh, wata ¡akgtati takgalhtawakga xalak Biblia!

Lakkaxwilikan tuku ni makgas kilhtamaku makgantaxtikan kinkamakgtayayan

Makgapitsi tuku lakgchamputunaw, lakgachunin lu tuwa tamakgkatsi. Tony, tiku xapulana lichuwinaw, ni para tsinu xlilakpuwan naskuja ksucursal xlakata xapulana nitlan xlinit xlatamat chu ni xtamakamastaninit Dios. Pero alistalh lakkaxwililh tuku xtalakaskin xlakata tlan xtamunulh. Akxni chuna tlawalh litaxtulh precursor auxiliar chu alistalh precursor regular, xla tsokgwilih k’akgtum calendario tuku kilhtamaku x’ama matsuki. Akxni xmatsukinita la kskujnanima Jehová, xmakgkatsi pi nialh tuwa kskujli ksucursal.

Max na tlan nakinkamakgtayayan nalakkaxwiliyaw tuku tlan pulana natlawayaw nema ni tlakg tuwa, xlakata akxni namakgantaxtitilhayaw, nakinkamakgtayayan namakgantaxtiyaw tuku tlakg tuwa lakkaxwilinitaw. Komo ankgalhin na’akxilhaw tuku liskujmaw nakinkamakgtayayan xlakata ni katipatsankgaw tuku lakkaxwilinitaw. Komo ankgalhin natlawaniyaw oración Jehová xlakata tuku tlawaputunaw nakinkamakgtayayan xlakata naliskujaw tuku lakkaxwilinitaw. Apóstol Pablo mastalh akgtum tastakyaw: «Ankgalhin katlawatit oración» (1 Tesalonicenses 5:17).

Talakaskin naliskujaw tuku lakgchanputunaw

Maski liwana lakkaxwiliyaw chu lu lakgchamputunaw, min kilhtamaku ni chuna tlawayaw. Juan Marcos max lu nitlan limakgkatsilh akxni apóstol Pablo ni lilh akxni xlimakgtiy kilichuwinantapulilh Dios (Hechos 15:37-40). Marcos wi tuku katsinilh xlakata tuku titaxtulh chu lakgpalilh tuku xlakkaxwilinit xlakata tlakg skujnanilh Jehová. Katsiyaw pi Marcos chuna tlawalh. Xlakata alistalh, Pablo tlan lichuwinalh chu lipaxuwalh pi akxtum taskujli apóstol Pedro k’Babilonia (2 Timoteo 4:11; 1 Pedro 5:13). Tuku max akgtum talakgalhaman liʼakxilhli wa pi tsokgwililh kBiblia xlatamat chu xtaskujut Jesús.

Max akinin lakgachunin nalipatinanaw xlakata tlan nalakgchanaw tuku lakkaxwilinitaw xlakata kintakanajlakan. Pero ni kataxlajwaniw, wata kalilakpuwaw tuku makgantaxtinitawa, ka’akxilhwi tuku lakgchamputunaw chu katlawaw tuku talakaskin xlakata nalakgchanaw tuku lakkaxwilinitaw. Akxni wi tuku nakinkamalakgachokgoputunan lu xlakaskinka naliskujaw xlakata namakgatlajayaw chu nalakgchanaw tuku lakgchamputunaw. Xaskgalala mapakgsina Salomón kinkawaniyan: «Kamakamaxki Jehová putum tuku natlawaya, chu tuku nalakkaxwiliya tlan nakitaxtu» (Proverbios 16:3).

Maski chuna, min kilhtamaku tuku titaxtuyaw tlawa pi nila namakgantaxtiyaw makgapitsi tuku lakkaxwilinitaw. Kalilakpuwaw uma, max makgapitsi tuku lakkaxwilinitaw ni katimakgantaxtiw xlakata tatatlayaw o kakuentajtlawamaw kifamiliajkan. Pero, nikxni kapatsankgaw tatlaja nema namakglhtinanaw kkilhtamaku nema aku mima, wa latamat nema ni kgalhi xlisputni, k’akgapun o kkatiyatni (Lucas 23:43; Filipenses 3:13, 14). ¿La nalakgchanaw? Apóstol Juan tsokgli «tiku tlawa xtalakaskin Dios putum kilhtamaku nalatama» (Juan 2:17). Maski tuku titaxtumaw ni kinkamaxkiyan talakaskin nalakgchanaw tuku lakkaxwilinitaw, chuntiya «kapekuaniw xaxlikana Dios chu kakgalhakgax[matwi] xlimapakgsin» (Eclesiastés 12:13). Tuku lakkaxwiliyaw chu lakgchamputunaw xlakata kintakanajlakan kinkamakgtayakgoyan namakgantaxtiyaw xtalakaskin Dios. Wa xlakata, chuntiya kalakkaxwiliw tuku lakgchamputunaw chu kamakgantaxtiw xlakata namalankiyaw kiMalakatsukinakan.

[Recuadro]

Tuku tlan nalakkaxwiliyaw xlakata kintakanajlakan

○ Nalikgalhtawakgayaw Biblia chali chali

○ Nalikgalhtawakgayaw putum Makatsinina chu ¡Despertad!

○ Tlakg tlan natlawayaw kioracioneskan

○ Kalimasiyaw laktlan tayat

○ Tlakg kalichuwinaw Dios

○ Tlakg tlan nalichuwinanaw Dios chu tlakg tlan namasiyayaw

○ Tlakg tlan nalichuwinanaw Dios kteléfono, lata niku nakatekgsaw latamanin chu niku stanankan